網頁清單

2014年1月3日 星期五

翡翠潮人潮食 Crystal Jade Chao Zhou Kitchen : 秋冬三寶平廿蚊

27 December 2013, Friday

今日返工真係超辛苦, 無論精神上及肉體上均有點超負荷!!! 連續幾晚都磨到夜麻麻先瞓, 對超級熊貓眼今日仲要睇住朋友們係度鬥Upload放假相上Facebook, 置身辦公室內的我好難唔精神崩潰...

放工去到吉豬島搵食, 遇著超級減價日吸引咗勁多人去購物兼食埋飯, 間間餐廳都大排長龍... 噢撈!!! 我好肚餓呀!!! 我要食o野呀!!!



Honey靈機一觸, 提議去康怡廣場3樓搵食(其實係4樓, 係假2樓有條好狹窄的樓梯行上去, 無扶手電梯, 又或是係地下乘電梯直達, 所以人流較少)...

拾級而上康怡廣場3樓,見到翡翠門口有張好大的Poster--秋冬三寶 $296 任選其二... 嘩... 又胡椒粉絲肉蟹煲, 又枝竹冬筍羊腩煲, 好吸引喎!!! 天氣咁鬼凍, Holiday mood又濃厚, 食好少少都唔過份啫...

初時店員帶我地去張好細好細的2人枱, 枱面只夠放2碗湯麵, 勉強可以放多1碟小菜... 我瞄咗一眼, 淡淡然咁同個店員講, 張枱咁細點放得落羊腩煲... 之後店員帶我地來梳化坐, 其實都係2人枱, 只係大張小小... 有梳化位坐, 是但啦...


前菜 & 功夫茶
-- 花生鹹到苦, 鹹菜好多根, 又粗又硬, No Good... 功夫茶夜晚唔好飲咁多, 好易失眠, 我只敢飲一杯...


胡椒粉絲肉蟹煲 (原價 $168)
-- 份量比想像中多, 肉蟹好大隻, 蟹肉都OK新鮮, 粉絲勁多, 勁重胡椒味, 好辣, 但越食越起勁...


蟹黃不多不少, 甘香欠奉, 談不上滋味, 還可以吧...


枝竹冬筍羊腩煲 (原價 $148)
-- 好精緻的煲架...


為了徹底底煮熟D生菜, 前後換了3次酒精Jelly... 難得店員弟弟仍笑容滿面, 欣勤地款待, 難得, 難得...


移開枝竹冬筍羊腩煲的煲蓋, 嘩!!! 份量好多呀!!! 無論羊腩, 馬蹄, 枝竹, 冬筍都勁多, 近年已經好少見咁足料的羊腩煲, 羊腩少少膻, 正合口味!!! 當然唔少得靈魂人物腐乳醬, 無咗佢, 就好似食薯條無茄汁一樣咁無癮...


某某信用卡有9折, 可惜無帶係身, 蝕咗... 回家後先驚覺秋冬三寶的價錢其實只係比原價加起來平20蚊, 早知唔使叫咁多o野啦...

飽到唔郁得, 要慢慢散步回家幫助消化... 走到街上, 外面冷冰冰, 身體暖笠笠, 好舒服呀...

是次每人消費約 $175 元
味道: 3 環境: 3 服務: 4 衛生: 3 抵食: 4
###
地址 : 太古康山道1號康怡廣場3樓T4號舖
電話 : 2554 6338

2 則留言:

  1. •★•───•★•───•★•───•★•───•★•───•★•
     ┏┓┏┓。・゚゚・。。゚♡
     ┃┗┛ appy♡⌒2Ѽ14╮\(⌒▽⌒)/
     ┃┏┓┃ ღ開心的心情延續到每一個明天ღ
     ┗┛┗┛   *゚*°•♩¤。♪.♬。•:。⊹♫*。.•:。
    ılılıll|̲̅̅●̲̅̅|̲̅̅=̲̅̅|̲̅̅●̲̅̅|llılılı
    •★•───•★•───•★•───•★•───•★•───•★•

    回覆刪除