網頁清單

2011年8月31日 星期三

師奶胡亂購物篇 の 十勝紅豆月餅

29 August 2011, Monday


早幾日同朋友食飯, 大家提到中秋月餅, 佢就勁推介東海堂十勝紅豆月餅好正... 我聽完即時雙眼發光... 紅豆呀... 十勝呀...


時不宜遲, LUNCH HOUR即買!!!


原先只係一心想買"1"個月餅咁大把... 唔想肥, 又想應節?!!! 只可以得1個月餅擺係屋企搞吓氣氛囉, 唔通玩層層疊咩... (以前細個成日數下有幾多個月餅罐疊起咗)


DEK米唔知價嘅我, 一問之下, 嘩!!!!!! 50蚊1個月餅?!! O咀-ing期間, 職員即力SELL東X咭優惠1盒4個就155蚊... 我同同事都冇喎, 正想轉身走人之際, 職員又力SELL任何CREDIT CARD都只係158蚊... 貴3蚊咋嘛... 早響啦...


腦海不斷催眠自己... "嘩... 即係唔使40蚊1個啦, 抵好多喎"... 最後...


又迷迷糊糊咁拎咗張信用卡出o黎找數啦!!! 我明明只係想要1個月餅啫, 點會攪成咁o架?!!


為咗慳10蚊, 結果使多咗110蚊!!! 呢條數真係用微積分都計唔掂啦!!!


以免自己失控食晒, 結果唔使2日已經送咗3個比人... 我一定要寫低呢篇BLOG, 得閒要拎出o黎警惕吓自己先得啦!!!


好搞笑地, 買完即刻響東海堂隔2個鋪位, 撞到勁推介呢隻十勝紅豆月餅果位朋友... 有冇咁橋呀?!!


是次每人消費約$160元
味道: 2 環境: 2 服務: 3 衛生: 3 抵食: 2
###
地址 : 鰂魚涌糖廠街1號英皇大廈地下G店
電話 : 2805 5296


~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~


- 後記 -


話說... 好多BLOG友同朋友都即時問我好唔好味, 我見大家咁有興趣, 就將呢個本來留待8月15先食嘅珍品, 即刻開咗o黎食吓...


我以為自己味覺出咗問題, 點解紅豆月餅食落口, D味會咁似蓮蓉月餅嘅呢... 百思不得其解... 第2日忍唔住拎個盒o黎睇吓D成份... 哦!!! 原來真係有蓮子... 同埋唔係剩係用十勝紅豆, 仲有普通紅豆!!!



2011年8月28日 星期日

彩晶軒 V Cuisine

21 August 2011, Sunday


今日為家人慶牛一, 因為下午要觀賞芭蕾舞表演嘅關係, 所以選址就近嘅新元朗中心... 呢間「彩晶軒」新開張冇耐o架咋...


餐廳嘅入口極之金碧輝煌, 富麗堂皇...


未齊人, 睇一睇餐牌先... 嘩!!!!!! 「九大簋」?!!! 聽落好豪咁喎!!! 部長, 全部同我拎晒出o黎!!! 嘩咔咔咔...


餐牌話... 九大簋係廣東一帶嘅傳統盛宴, 寓意「長長久久」喎... 至於呢個新界圍村九大簋就有茄汁大明蝦, 農家筍炆肉, 紅蔥頭南薑走地雞, 砂盆陳皮扣大鴨, 盆滿缽滿, 脆皮門鱔球, 圍村燒肉, 鹽燒烏頭魚, 蜆蚧鯪魚球...


後尾部長話, 鹽燒烏頭魚同脆皮門鱔球賣晒啦... 我唔制呀... 自從祖母金盤洗手退出廚房之後, 我都冇食過門鱔啦... 我估呢2樣應該係最抵食同埋最好食, 如果唔係, 點會7點幾就話賣晒吖...


圍村燒肉--嗯... 韌咗D啫... 同埋硬咗少少, 又鹹咗少少...



農家筍炆肉--嘩!!!!!! 好好味呀!!!!!! 好重南乳味呀!!! 同埋D豬肉炆得好淋... 同細個時祖母煮嘅味道一模一樣呀!!!!!! 一D都冇誇張, 唔係剩係我一個咁講o架, 幾個「客家食神」都一致認同o架!!! 仲要用蠟燭台暖住食, 唔怕凍咗D汁痴埋一PAT, GOOD!!!



茄汁大明蝦--嘩... 咁大隻嘅??? 比人夾2夾已經冇晒...



紅蔥頭南薑走地雞--呢味又係一絕!!! 又係好似食翻細個時祖母煮嘅雞咁... 好好味, 好香, 好彈牙... 咁快冇晒嘅??? 我仲想食呀...



蜆蚧鯪魚球--怕怕... 由細到大都唔食...



砂盆陳皮扣大鴨--全餐呢碟最唔掂!!! 好韌, 又冇鴨味... 食剩半隻, 服務員問咗幾次, 都冇人肯打包拎返屋企...



盆滿缽滿--嘩!!! 好足料呀!!! 勁多鴨腳同原條海參, 食極都有!!! 全餐最抵食!!! 清碟之後, 電視咁啱做緊賜哥洗新鮮海參, 見到D綠色內臟咇出o黎, 全枱V嘩鬼叫!!! Honey話如果電視早D播仲好, 益晒佢, 嘿嘿...



你睇... 隻鴨腳幾巨型... 唔講得笑o架...



北京西紅柿豆腐煮蟹--咦咦... 乜... 柿同蟹... 唔係唔可以一齊食嘅咩??? 問清楚部長... 原本... 西紅柿係蕃茄... 冇事... 可以放心食... 嘩!!! 唔好講隻蟹, 剩係D蕃茄炒蛋炒豆腐已經好好送飯, 真係食到唔停得口!!! 隻蟹個夾多肉到呢... D肉都得呀....



蒜子火腩薑蔥煀蠔--嘩!!! 呢味得到呢... 雖然D蠔好細粒, 同埋望落去好似好細份量咁, 但係原來係夾極都仲有o架喎, D蠔收埋晒響D薑蔥下面...



小順子南瓜燜涼瓜--D南瓜好甜呀!!! D涼瓜都好得喎!!! 南瓜同涼瓜配豆豉汁真係一絕!!! 仲要份量都幾足喎...



竹笙銀杏雜箘時蔬--我都未夾已經冇晒, 好難會唔好食囉...



消暑原個冬瓜盅--我地已經食完晒D餸, 見到隔離枱飲緊, 又心郁郁叫一個... D湯好清甜呀!!! D冬瓜肉又多又甜... 同埋呢, 而家外面D特價冬瓜盅好多都係用燒鴨皮煮, 冇配料o架, 更唔好妄想會落夜香花... 呢個冬瓜盅簡直係最傳統嘅冬瓜盅, 我比100分呀!!!



壽桃--話明牛一宴喎, 又點小得拳頭咁大嘅壽包呢... 其實大家都已經飽到不得了, 都仲要以隊剩4個, 利害!!! 阿B食完1個仲唔夠喉(D餡當然係被爸爸食晒), 未識講o野已經手指指話要繼續食多1個... 之後大家仲搶住要打包走, 頭先隻鴨又唔見你地話包走...



生果拼盤(送)--嘩!!! 今時今日仲有得送生果拼盤嘅咩??? 仲要咁大碟咁靚仔??? 而且西瓜係天然微甜冇加糖水, 好得呀!!!



冰鎮龍鬚什果芒果布甸--嘩!!! 已經飽到暈o架啦, 見到隔離枱食, 個個對眼發晒光, 失晒常性, 都唔理自己食唔食得落, 就話要叫5個... 個餐牌呢, 下面個金魚缸係放住金魚, D細路問部長係咪係真係有金魚, 唔知部長講笑定講真, 話之前真係有, 而家因為衛生問題, 冇再拎D生AU AU嘅金魚出o黎... 部長... 你真定假呀??? 唔好呃細路喎... 個賣相吸引到咁, 好唔好食已經唔重要... 不過... 佢係好味道o架!!!



上年牛一宴係響尖東彩晶軒食套餐, 已經抵食到爆... 估唔到今次係元朗食仲平仲正...  讚!!!


之但係阿B得1歲, 都收佢茶錢, 好似有點兒那個喎... 唉... 不過算啦... 最緊要服務好味道好, 大家又食得開心就得啦!!! 除開14個大人小童, 都係$130蚊1個人啫...


拉姑誠意推介!!!


是次每人消費約$130元
味道: 4 環境: 4 服務:4 衛生: 4 抵食: 5
###
地址 : 元朗朗日路西鐵元朗站大堂26號舖
電話 : 2443 2677


2011年8月26日 星期五

龍皇酒家 Dragon King Restaurant

21 August 2011, Sunday


今日要去睇芭蕾舞表演, 一早起身, 太古之友CALL食飯, 好, 食埋先去睇表演... 有得食, 明明唔夠時間食都唔理得咁多啦, 哈哈哈哈...


龍皇之前已經食過一次, 不過果次太多人, 根本冇機會比我影到相, D o野食就已經比人食晒...


全間龍皇都見到維港景o架... 咁好View, 食都食得心曠神怡D啦...


叉燒包--都幾好味吖...


蘿蔔糕--正呀, 好足料, 唔會一口都係粉...


菠蘿叉燒包--好味!!! 哈哈... 又係叉燒包... 我地真係好鍾意食叉燒o架, 之後仲叫埋叉燒腸添呀...


XO醬腸粉--唔夠惹味, 好重辣味...


糯米雞--細細隻好多醬, 不過一來就散晒...


之後我已經夠晒鐘遲晒大到, 唯有閃人... 聽聞話... 佢地仲叫多咗幾個點心同甜品... 咁埋單90蚊1個人又唔貴喎... 因為環境食物服務都好, 仲要D客人講o野蚊滋咁細聲先至係"最讚"!!!


是次每人消費約$90元
味道: 4 環境: 4 服務:4 衛生: 4 抵食: 4
###
地址 : 銅鑼灣告士打道280號世貿中心12樓
電話 : 2895 2288


2011年8月23日 星期二

原粒栗子酥 & XX老婆餅 @ 工聯會

19 August 2011, Friday


今晚係第八堂去工聯會學整蛋糕... 今晚係整「原粒栗子酥 & XX老婆餅」!!!


上星期掛住去食龍蝦, 走咗堂... 今晚D同學你一言我一語, 吹晒水咁話上星期點正點正, 又話終於可以自己搓酥皮, 仲要係一個人搓一份, 一個人仲有6隻葡撻帶走, 仲有鮮果酥盒, 杏仁酥條, 仲話好充實, 成堂都未停過手, 幾驚唔夠時間做咁話喎... 你班o野吖... 使唔使咁齊心響樹四重奏呀?!! 仲要比埋相我睇, 慌死我唔信咁... 哈哈... 查實未睇相真係唔係好信o架... 咁都冇計o架, 食龍蝦緊要D嘛...


下個星期五我又要再走堂去Happy啦啦啦啦啦~


個課程明明話整香芒老婆餅o架嘛, 最後竟然變咗糖冬瓜老婆餅都有嘅?!! 即刻冇晒特別啦!!!!!! 雖然阿Sir有整番小小香芒老婆餅比我地試食, 但係貨不對板嘅感覺依然揮之不去...


我嘅制成品....


右邊係糖冬瓜老婆餅, 左邊係原粒栗子酥...


制作花絮...






今晚係2個人搓1份酥皮, 唉... 蝕底晒... 冇得好似佢地上星期咁自己1個搓1份酥皮...


2011年8月22日 星期一

浦和日本料理 Urawa Japanese Restaurant

18 August 2011, Thursday


今晚係8月之星慶生飯局嘅大日子!!!


真係好好笑, 何超連續問DD同龍媽今晚點, 2個人都答佢唔係今日食飯, 係下星期四... 如果唔係問一問, 呢2位人兄今晚都唔知會去咗邊... 何超, 你係得嘅...


浦和日本料理嘅「刺身和食火鍋放題」唔會限時限刻, 可以由6:30PM坐到10:30PM, 簡直係為我地嘅八卦飯局度身訂造!!! 最怕果D入座起2小時就要埋單嘅放題, 因為次次都會有人大遲到, 攪到好似唔夠時間食咁, 仲要攪到大家驚食唔切唔敢講o野, 趕頭趕命咁食...


沙律/小食Japanese Salad & Snack--蟹籽沙律叫咗幾轉, 每一轉都要催幾次攪好耐先到... 蘆薈野菜沙律都唔錯, 枝豆都OK, 好似話鮮蕃茄沙律都OK...


刺身Sashimi
白玉豚刺身(Mackerel)--口感好奇怪, 淋PAT PAT一團o野咁, 一D都唔似魚, 冇人肯再食第2塊...
北寄貝刺身(Hokigai)--都幾新鮮爽口... 不過D冰好似未溶晒, 食到"索索"聲...
三文魚刺身(Salmon)--都幾新鮮, 而且厚切, 大大舊, 好膩, 食一舊已經唔想再食...
玻璃蝦刺身(Glass Shrimp)--冇味嘅... D肉都好似唔係太新鮮...


唔知點解我地一人齊, 服務員就奉上刺身, 唔係我地自己根據自己嘅喜好而Order, 咁點算放題呀... 我地唔想浪費D白玉豚, 係服務員夾硬放低...


同埋佢話刺身會自動出, 叫我地唔好再Order, 咁係咪只可以食一轉?!!


仲有... 放題餐牌話有吞拿魚刺身(Tuna), 八爪魚刺身(Octopus) , "魚立"魚刺身(Sea Bbream), 希靈魚刺身(Herring Fish)... 但係服務員又叫我地唔好再Order, 咁究竟呢幾種刺身係有定冇???


壽司Sushi--冇幫襯過!!! 話明食放題, 冇理由食舊白飯落肚塞飽自己o架嘛...


手卷Hand Roll/特式卷物Special Roll/爐端燒Grilled Dish/天婦羅Deep-fried Dish
(左上) 海胆手卷, 軟殼蟹手卷, 花之戀--軟殼蟹手卷塊紙菜都幾脆... 花之戀嘅三文魚又係厚身...
(右上) 燒雞翼--幾好味, 熱辣辣, 不過咁細隻, 究竟響邊樹入貨?!!
(左下) 海老天婦羅, 炸餃子, 黃金花枝丸--海老天婦羅好油, 隻蝦又冇味... 餃子同花枝丸都OK,
(右下) 金菇牛肉卷--嘩, 好難食...


南瓜天婦羅, 蕃薯天婦羅--全餐比較好食嘅...


(左上) 蟹籽沙律--因為BB醬嘅原故, 好難會難食...
(右上) 冷豆腐--食1件仔就夠, 冇咩味...
(左下) 鵝肝多士, 鹽燒鯖魚--鵝肝多士係脆, 不過撈埋D唔知咩, "讓"入個包度, 剩係睇個樣已經冇胃口, 食落口真係要好集中精神先食到小小鵝肝味... 鯖魚就好快比貓兄幹掉, 要問番佢好唔好食...
(右下) 芝士焗蠔--未掂到已經冇晒... 不過唔見朋友們再Order, 心照啦...


一品料理A La Carte Dish/日式火鍋Shabu Shabu


(左上) 豬軟骨煮蘿蔔, 清酒煮蜆--冇食到, 又係唔見朋友們再Order...
(右上) 日式火鍋--唔知點解大家咁勇敢Order豬骨湯底... 不過一餐半餐, 應該冇事嘅...
(左下) 牛肉, 豬頸肉, 粟米, 津白--牛肉都OK...
(右下) 鮮冬菇, 唐生菜, 金菇, 豆腐, 花枝丸, 葛絲--葛絲好OK喎...


咖啡巴芙條--全餐最好味... 咖啡味好香好甜, 正呀... 食咗2 Round...
雪糕糯米糍--鑽媽好好彩, 食到綠茶味, 其他都係Vanilla味...
香蕉天婦羅--好油...


我地仲有食其他野, 不過太濕星, 好難影相...


飲品方面都係罐裝百事比較吸引, 因為夠凍... 香芒橙汁又唔好飲又唔凍... 梅酒佢地好甜...


咁嘅價錢, 真係唔多抵!!! 根本就冇咩好味嘅o野食過落肚!!! 仲要我地坐係廚房出口(基本上係廚房嘅一部分), 嘈到不堪... 唔係見佢可以坐足4個鐘, 真係會火起...


是次每人消費約$240元
味道: 3 環境: 2  服務: 2 衛生: 3 抵食: 2
###
地址 : 灣仔蘭杜街4號A舖
電話 : 2866 8876


2011年8月21日 星期日

Al Bistro Mediterranean Restaurant & Bar

13 August 2011, Saturday


今日約咗貓兄再去香港歷史博物館睇展覽, 去之前緊係要醫下個肚先啦~


貓兄搵咗呢間「Al Bistro」, 地中海菜, 唔知係食D咩嘅呢...


餐廳唔算好大, 佈置簡約而優雅... 燈光就昏暗咗D, 比較適合D情侶用膳...


Set Lunch有3大類, Salad Lunch, Light Lunch 同埋 Executive Lunch!!!


Salad Lunch就有餐前飲品, 自助沙律吧, 餐湯, 甜品, 餐茶...
Light Lunch就係Salad Lunch再加個輕量嘅主菜, 有得揀奄列呀, 三文治呀, 漢堡包呀, 或者薄餅呀咁...
Executive Lunch就係Salad Lunch再加個有份量嘅主菜, 有得揀天使麵呀, 龍脷呀, 鴨胸呀, 牛扒呀, 大蝦呀咁...


我地最後Order咗2個Light Lunch...

餐包--D包都幾鬆軟, 牛油都幾香... 全部幹掉...


精選餐湯--豆蓉湯... 感覺好特別, 唔係好習慣, 但唔難飲...


自助沙律吧--都有十幾款材料選擇, 唔算多唔算少... 樣樣材料都好新鮮, 如果唔係個Light Lunch Main Course份量太重, 我會食多幾轉Salad囉... 仲有生菜同火箭菜個樣都好新鮮, 不過我冇拎到...


菠蘿海鮮薄餅--個餅底小小脆, 不過可能配料比較濕, 加埋個醬, 淋到好似"起潺"咁, 嗯... 我唔鐘意呢種口感...


特色牛肉漢堡伴薯條--貓兄呢個Main Course我試咗少少, 好好食呀, 個包好鬆軟, 漢堡又有肉味又Juicy, 薯條又熱又脆, 青瓜先至最正, 係小小酸又脆口... 我要強調, 我平時係好憎食漢堡o架, 所以呢個漢堡應該係"真係好好食"先會令到我覺得好食囉, 哈哈...


特色甜品--千層芒果班戟... 都幾好味喎, D芒果仲好甜添呀...


餐飲--食到咁飽, 飲番杯檸檬茶消吓滯就最適合不過...


真係利害, 一個Set Lunch都有2杯飲品, 餐前1杯果汁或汽水, 餐後又1杯咖啡或茶... 仲話Light Lunch?!! 我覺得比Full Lunch更Full!!!


同埋服務都唔錯, 上餐茶前服務員仲會清走枱上嘅食物碎屑...


之但係呢間係地中海菜餐廳, 除咗個餐湯之外, 我Feel唔多到地中海Feel囉... 比較似西餐多D...


是次每人消費約$95元
味道: 3 環境: 3 服務: 3 衛生: 3 抵食: 4
###
地址 : 尖沙咀金馬倫道35號地下A, B, C & D1號舖
電話 : 2369 3189


~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~


食飽飽就行去香港歷史博物館, 今日我地係常設展覽玩咗「早期香港海旁模型制作工作坊」, 冇咩人喎, 完全唔Full, 我同貓兄2個人坐1張枱, 好鬆動...


今次嘅工作坊係o係4號展區...


左邊係貓兄嘅作品, 右邊係我嘅, 中間係Sample...


2011年8月19日 星期五

汽球森林之旅 Balloon Jungle Twist and Fun

12 August 2011, Friday


食完「鼎泰豐」加「The Chocolate Library」加「鐘菜」, 真係飽到暈... 諗住散吓步, 去到康怡廣場見到好多波波呀, 嘩... 好靚好得意呀!!! 簡直神乎其技呀!!!


唔知擺得耐會唔會溜氣嘅呢...


@地下入口~




@2/F東橋~


@3/F南翼~









### 活動詳情 ###


康怡廣場 - 汽球森林之旅


今個夏天,康怡廣場帶你進入室內的森林世界。
場內各處佈滿大大小小的動物汽球,大象、猴子、雀鳥,應有盡有。
在週末,你更可以即場參與扭汽球工作坊,發揮無限創意。
快來加入獨特的森林之旅!


地點 : 康怡廣場‧鰂魚涌
日期 : 8月9日至8月22日
網址 :
http://www.hanglung.com/Libraries/Image_-_Hong_Kong_Properities/Balloon_Poster_540x760_20110728_2.sflb.ashx