網頁清單

2007年10月31日 星期三

2007年10月30日 星期二

迪士尼黑色世界 Dark Side of HK Disneyland


11:00am 出發...

12:00nn 青衣城食lunch...

13:30pm 到達迪士尼





 

我鼓起勇氣跟honey入鬼屋, 但全程合埋眼貼住佢個膊頭, 入面黑漆漆連路都睇唔到, 只聽到honey全程笑到"咭咭"聲... 出左鬼屋我全身都出晒汗...





 

排隊同米奇美妮影相時, 有國語小妹妹跪在地上伸高手說"寄錢喎, 超超你"(比錢我, 求求你), 帶住佢嘅老婦即時黑面, 我心諗, 平時果然訓練有素, 呵呵...




 

排隊同阿積影相時, 有國語阿叔叫我幫佢睇住個位, 我冇答應佢, 佢已經閃左去, 我發晒脾氣同honey講"痴線, 佢咪好着數, 唔使排就有得影相, 我時薪幾錢呀, 佢比唔比得起呀, ... 等陣佢番o黎我死都扮未見過佢架,...", 之後... 個國語阿叔真係返轉頭, 仲帶成團人黎, 企番係我前面, 仲鬼咁大聲(大聲過大聲公)講左好耐野, 直迫我同honey嘅忍耐極限, 到阿積出o黎時, 佢地唔理所有排隊嘅人, 走去龍頭睇, 然後又開一輪"大聲公", 發覺冇積蘇, 唔影相就閃左去...

前面位高大弟弟用國語同我講"佢都唔知自己排咩, 見我排佢又排, ...", 我用廣東話答"係啦".

隔一陣, 高大弟弟又用廣東話同朋友講野, 再隔一陣, 高大弟弟又用英文同我搭傘, 我又用番廣東話答"哦", 唔知佢做咩用咁多語言, 可能佢想話比我知, 佢係讀國際學校啩!



 

夜光鬼魅巡遊勁正, 好有氣氛, 全程"伸直隻手, 然後交叉"... (請看下回分解)

20:30pm 打道回府



Mr. Steak -- Buffet a la minute (II)

上星期六(2007年10月27日)同10月之星賀壽, 因為高廋平鐘意食生蠔, 所以揀咗去食"暴肥"...

 

食buffet前約埋貓頭同DD去中央圖書館逛下, 之後高廋平又o黎join埋大隊, 原來DD同高廋平係第一次o黎中央圖書館o架, 簡直匪而所思, 呵呵, 雖然我都係第二次o黎啫!

 

我上次係Mr. Steak度食完就胃炎, 所以今次唔敢亂食野... 由於牛肉加價4次, 所以我今次主力食牛... 三款牛肉都好味, 沙律好新鮮, 芝士都唔錯, 朱古力甜品都唔錯, 個件海鮮沙律(高廋平攞多咗夾硬塞比我)就真係麻麻地喇!


飯後餘興節目係去掃貨(何超有7折coupon), 買小小野就有咁多贈品, 正!


仲要多謝鑽媽的兩份大板手信, 兩樣都好實用, 謝謝!

 

特別新聞: 一日後龍媽通知我, 佢返屋企個胃就唔舒服想作嘔, 而經我明查暗訪之後, 原來貓頭半夜都腸抽筋, 其他姊妹如有不適速速回報!!!

2007年10月27日 星期六

APiTA UNY(HK)20周年大創業祭 送大禮 即抽即獎

尋日(2007年10月26日)放工去APiTA添d秋裝, 付款時收銀姐姐提我記得到地下抽獎(我事前係唔知情嘅) (通常都未必去, 因為實唔中, 唔想浪費時間)...

 

去到地下抽獎台, 照平常(諗住咩都唔會中)咁抽, 抽完見到張獎卷寫住即食麵, 個職員仲話"都唔錯呀"... 我望下個禮品台, 呵, 有5個(1包)即食麵, 心諗"都唔錯吖"...

 

點知... 個職員放成箱上枱面, 我仲諗"又會咁啱冇晒要拆箱嘅"...

 

跟住... 個職員攞個超級大膠袋出o黎, 笠落個箱度, 我先好驚(差d暈低)咁問"做咩咁多o架?", 個職員答"係呀, 係送成箱o架!" (其他職員都陰陰咀咁笑緊)... 我個時先諗"死啦, 30個(6包)即食麵咁多, 咪食成年都食唔晒", d職員見我唔想拎咁, 係咁隊比我話"真係唔錯o架"...

 

Oh.... No.... 唯有拎到死下死下咁拎番屋企, 一路行一路心諗"使唔使咁重手呀, 好彩冇理d職員話買多小小野可以抽多一次喎, 如果唔係, 一個唔好彩比我抽中2箱, 真係搭的士都唔掂呀"... 各位姊妹們, 想試下味就通知我啦, 2008年1月27日到期!





之後番屋企調查下, 原來呢份都真係算唔錯, 因為有得出鏡架, 未至於輪為"尚有其他豐富獎品", 哈哈...

2007年10月13日 星期六

碌咭奇遇記 @ 阿詩瑪雲南風味軒


星期三(2007年10月10日)個晚, 諗住去阿詩瑪食米線, 點知個餐牌改到冇晒米線, 淨係叫套餐先有米線跟, 咁即係逼人食套餐啫... 最後... 我地決定散叫, 唔食米線...

 

經過一輪商議後, 決定Order D 新o野試下(除咗湯之外): -

. 氣鍋雞 : 一貫水準

. 嘶嘶雞 : 好辣, 但好惹味, 食到嘶嘶聲

. 水晶麥 : 溜單, 仲收晒我地d碗筷, 話比佢聽溜單要取消, 順便埋單, 佢竟然夾硬整出o黎, 仲要咸到嘔, 好難食呀))))))

 

到咗真係埋單嘅時候啦... 如常碌咭, 個侍應之前已經唔係好態度, 都算喇, 費事同佢計, 點知佢見到要碌咭, 就話部機壞咗要我地比現金, 但係honey冇現金係身, 叫佢試下碌咭(因為我地唔信部機壞咗), 點知... 佢竟然當住我地面"藐嘴藐舌", 唔係輕輕個隻, 係好大動作個隻... 諗落都拍得住咪咪姐個"藐嘴藐舌"樣...

我心諗: "啍!!! 有冇攪錯!!! 有問題嘅係你, 唔係我地呀..."

 

佢死死地氣攞張信用咭去收銀度, 唔夠1分鐘又過番o黎, 話"碌唔到呀, 唔信你自己試下喇"... 

嘩!!! 唔係呀o痳!!! 碌咁多年咭, 第一次比人叫我自己行入收銀部碌咭, 呵呵... 好, 咪試比你睇囉! (我估計佢係諗住我地攪唔掂, 要我地死咗條心)

 

行到入收銀部, 一睇... 吓... 唔係呀o痳... 咁都得?!

 

第一, 個收銀(有幾分姿色, 操半咸淡廣東話)竟然將叠Signatory Slip就咁放係個碌咭機嘅出紙位, 不停強調"部機壞咗, 插唔到紙入去, 所以碌唔到咭..."

第二, 叠Signatory Slip係放到"底面" & "前後"都錯, 錯成咁, 都真係幾有難度...

第三, 就算比佢成功插到叠Signatory Slip入去碌咭機嘅入紙位, 都唔係就咁插入去就得o架, 仲要用手卷張紙上o黎先得o架...

 

我一路整緊, 佢一路用半咸淡廣東話係度講"喎能住叻地油綠開咭, 實識整...", 佢老闆吖, 佢冇碌過咭咩, 咪一樣唔識整, 除非佢係火星o黎o架啦!!!

 

攪掂離開時, 個個四萬咁口揮晒手"唔該晒, 拜拜", 但係唔知我地走咗之後, 佢地會唔會即刻搬番o個個"藐嘴藐舌"嘅嘴臉出o黎呢...

 

好掛住以前o個個貼住"笑笑口貼紙"嘅經理, 今日唔見咗佢, 唔通轉咗工?

 

是次每人消費約$110元
味道: 3 環境: 3  服務: 1 衛生: 3 抵食: 2
戰鬥指數
 
###



地址 : 側魚涌太古城中心地下005-006舖
電話 : 2560-9666


###


2007年10月9日 星期二

醉瓊樓飯店

星期一(2007年10月8日)晚聯同一衆"嚇雞"人去醉瓊樓試菜...



一坐低唔使睇餐牌就識落order... 緊係o黎個醉瓊樓四寶啦!

 

. 鹽焗雞 : 果然名不虛傳! 好好食!

. 梅菜炆猪肉 : 正到冇影, 食3碗飯都得呀!

. 客家釀豆腐 : 唔錯, 但唔夠我地GrandMa個d咁正!

. 白果豬肚湯 : 落左白果腐竹, 好特別, 正!

. 炒通菜 : 可以

 

女侍應(傳統中式服)見我影相, 好緊張咁話"做乜剩係影一樣, 影晒全部吖o痳", 要我比晒之前晒d相佢睇, 佢先信, 笑死我! 仲不繼同我講佢地有咩特色, 哈哈哈...

 

環境好似去番廿幾年前波地個度間龍華咁, 好懷舊, 哈哈哈...

 

是次每人消費約$86元
味道: 2.5 環境: 1  服務: 3 衛生: 2 抵食: 4
戰鬥指數
 
###



地址 : 佐敦西貢街7號地下

電話 : 2384 2423


###


2007年10月7日 星期日

MOS Burger

星期日(2007年10月7)... 懶洋洋... 邊度都唔想去... 近近地...

 

開咗大半年都未去試, 因為聽到劣評太多...

 

一試之後... 短期內唔會再去, 咁嘅價錢, 去鴻星飲下午茶抵d...

. Seafood Rice Burger -- Oh, 唔係我杯茶... 黑椒味雪藏海鮮, 軟淋淋的飯, ...

. Spicy Chicken Burger -- Honey話都唔錯...


 

是次每人消費約$41元
味道: 2 環境: 2  服務: 2 衛生: 3 抵食: 1
戰鬥指數

###

地址 : 側魚涌康安街224號地下A1-A2舖 (近吉之島)
電話 : 2568-1313


2007年10月3日 星期三

Tiffin Lounge


上星期日(2007年9月29日)去完「葛量洪號」滅火輪展覽館, 夜晚去咗久仰大名嘅Tiffin試佢個甜品buffet! 食物款式真係勁多, 環境絕對一流, 仲有隊live band演奏醉人音樂, 二人世界嘅首選!



↓拉姑推介:豆腐花--好滑! 即制冬甩--好多配料架, 值得一試!

↓拉姑推介:低脂蛋糕--好似燉蛋白咁, 好特別! 咖啡朱古力蛋糕--好香呀, 好味呀!
↓拉姑推介:Tiramisu--好味! 南瓜布甸--好清甜, 值得一試!

↓拉姑推介:朱古力雪糕--香濃軟滑, 雪葩都唔錯! 綠茶紅豆蛋糕--好清香, 值得一試!


埋咗單先知原來中銀商務咭有85折架, 嘻, 又慳倒小小, 抵喎!

是次每人消費約$215元
味道: 4 環境: 5  服務: 4 衛生: 4 抵食: 3
戰鬥指數
 
###

地址 : 灣仔港灣道1號君悅酒店
電話 : 2584 7822
###


2007年10月1日 星期一

A貨蛋

午餐附送的甜品, 白色係雲呢拿, 黃色係芒果, 9成真, 簡直係巧奪天工!!! (註: 個蛋殼係真嘅)


中意仿 
地址 : 西灣河鯉景灣太康街45號 地 下 GB01-02A
電話 : 8100 8446

 
TP