網頁清單

2012年6月29日 星期五

螳螳強勢回歸

23 June 2012, Saturday
舊年9月尾颱風「納沙」來襲, 螳螳係我地個窗台外面玩咗幾粒鐘都唔肯走...

今晚唔知係咪吽緊雨, 螳螳又o黎喇!!! 仲大隻咗好多呀!!! 伸直手腳有成15cm咁長, 好驚呀!!! 撞到我塊玻璃窗啪啪聲, 搞咗好耐都唔肯走, 仲一度走入我個蚊網度, 搞到我閂唔到窗... 後尾佢一離開咗個蚊網, 我地即刻9秒9閂窗...

佢由1am玩到我2am都唔走, 我頂佢唔順喇, 我要瞓喇!!!

2012年6月28日 星期四

王記糖水 Wong Kei Tong Shui

23 June 2012, Saturday

食完「住家菜」已經飽到上喉嚨掟, Honey竟然仲提議去試吓係北角好出名嘅王記糖水, 唔係呀嘛?!! 不過實在太吸引喇, 我個後備胃開始啟動~


嘩!!! 門口真係好多人排隊呀!!!


不過經我深入調查, 發現呢條龍只係買外賣, 鋪頭入面咁啱有2個面壁位, 唔使排隊, 直入!!!

呢度最出名嘅係陳腎蠔豉豬骨粥, 但係我地今晚嘅目標係糖水...

餐牌好簡單, 得12款糖水+陳腎蠔豉豬骨粥, 阿蟬強烈連環催促下, Order咗(大)蓮子桑寄生蛋茶同埋(大)(走花奶)香芋椰汁喳咋... 落完單先發現牆上面貼咗好多凍嘅甜品名, 激死~


(大)(走花奶)香芋椰汁喳咋變(細)(冇走花奶)香芋椰汁喳咋, 阿蟬, 我以為我聽唔明你講咩啫, 乜原來你都聽唔明我地講咩o架...

(細)香芋椰汁喳咋 -- 好足料, 好出味, 好好味, 但係略嫌稀咗d, 如果杰d會更好~

(大)蓮子桑寄生蛋茶變(細)蓮子桑寄生蛋茶... 阿蟬... 你真係...

(大)蓮子桑寄生蛋茶 -- 味道都唔錯, 但可以更好...
份量好足, 細嘅都咁大碗, 大嘅真係驚食唔晒...

價錢亦好相宜, 以後可以多一個地方食宵夜喇~

不過店內環境極之擠迫, 買外賣返屋企食會舒服d~

王記糖水的確唔錯, 但係我心裡面嘅Number One仍然係天后嘅晶晶糖水!!!

是次每人消費約$17元
味道: 4 環境: 1 服務: 1 衛生: 2 抵食: 5
###
地址 : 北角書局街5號地下
電話 : N/A

2012年6月27日 星期三

住家菜 Home Feel (II)

23 June 2012, Saturday

1月尾o黎「住家菜」食過1次, 覺得好味又抵食, 所以介紹屋企人今晚o黎試吓...

Book位時問職員拎套餐餐單睇定先, 點知... 原來剩係做冬同過年先會供應套餐!!! 平時係得散叫o架咋!!! 最後預訂咗「招牌阿嫲雞」同「南瓜排骨盅」...

Book 7:00pm, 職員話晚餐時段分開做6:30-8:30pm同埋8:30-10:30pm, 好強調8:30pm一定要還枱!!! 唉... 8:30pm又太夜, 6:30pm又太早, 最後迫住揀6:30pm, 好彩全部屋企人都神奇地6:30pm到達...

我6:00pm就到咗, 劃定晒餸, 好等大家一到埗檢視一下就即刻可以落單, 一人齊就有得食...

先o黎2煲住家老火湯, 最嘴刃嘅都讚個湯冇落味精, 好好味...

招牌阿嫲雞(1隻) -- 依然美味, 份量十足, 好快清晒...


南瓜排骨盅 -- 原個南瓜蒸都可以咁腍, 利害!!! 排骨鬆化, 南瓜軟腍, 原個南瓜最後被解體...


豉汁蒸西曹 -- 上次食過好好味, 所以推介比屋企人試吓... 初時見到餐牌寫住時價都有d擔心, 一問之下, 咁大條都只係108蚊, 嘩!!! 好抵呀!!! 屋企人聽完仲話條魚108蚊啫, 咁煮都要錢o架, 我話108蚊包埋煮o架啦, 佢都唔係好信抵到咁... 見到大家極速清碟, 放心晒, 即係冇介紹錯啦... 今次豉汁味冇咁濃, 反而剛剛好, 魚肉好新鮮, 蒸嘅火喉啱啱好...


蟹子黃金蝦 -- 蝦肉好爽脆, 鹹蛋黃醬好香口, 好好味呀!!! 雖然又熱氣又高膽固醇, 偶爾放任食一次都無妨吖~


我地張枱係廚房出菜位旁邊, 等待屋企人期間, 一聞到香味就昅吓係d咩咁香, 比我昅到鐵板蒜爆牛柳粒同埋鐵板鳳陽豆腐經常出場...

鐵板蒜爆牛柳粒 -- 好香呀!!! 牛柳粒醬汁甜甜地, 切到細細粒咁, 都幾多粒, 小朋友初時唔肯食牛肉, 迫佢食咗1粒之後, 即刻爭住食... 不過洋蔥可能唔夠熟, 大家都話好辣...


鐵板鳳陽豆腐 -- 我冇機會食就已經冇晒啦...


XO醬花枝片 -- 我覺得好好味, XO醬好香喎, 花枝又夠新鮮, 不過大家話好辣喎...


鮮雜果咕嚕肉 -- 上次食過幾好味, 今次再叫, 小朋友話好好味, 爭住食...


梅菜蒸豬肉 -- 梅菜味偏淡, 豬肉腍身, 清淡之選...


柱貝肉崧蒸水蛋 -- 家常小菜, 清清淡淡, 啱晒一年365日都出街食嘅朋友...


腿茸奶油津白 -- Yummy!!! 奶油同津白永遠都係絕配...
 
之後我地又再Order多一個清炒白菜仔... 都好味... 一d都唔油膩...
 
泰式蝦醬炒飯 -- 好好味呀!!! 蝦醬好香口, 飯粒炒得好乾身, 粒粒味道均勻...

太極鴛鴦飯 -- 中招!!! 見到太極2個字, 就以為係上次食過超美味嘅太極兩儀飯... 好彩味道都唔錯, 只係普通咗一d啫...
 
是日糖水(送) -- 紅豆沙西米露, 都幾稀, 但係因為唔太甜而備受欣賞...

壽包(送) -- Book位時問清楚係咪有人生日就有壽包送, 職員話出示到生日證明就可以送, 屋企人到埗後, Show一Show身分證就OK, 當然遮咗個身分證號碼同埋年份同埋半個名啦... 壽包蒸得好軟熟, 唔太膩, 好好味, 不過屋企人問點鮮冇蛋黃嘅?!!

準時8:30pm交枱, 唔知係咪因為今日係端午節嘅關係, 所以門外有好多人等候...

食咗12個餸, 2個炒飯, 2煲湯, 幾支啤酒汽水... 咁先1300蚊, 仲要又魚又蝦, 實在抵到爛!!! 味道偏清淡得o黎都好好味, 菜單大大隻字強調「屋企Feel無味精, 清淡少油, 住家靚湯」, 如果佢去我屋企附近開分店就好喇, 咁我就可以日日有住家菜食喇~

是次每人消費約$110元
味道: 4 環境: 3 服務: 3 衛生: 3 抵食: 5
###
地址 : 尖沙咀麼地道68號帝國中心UG50-57號舖
電話 : 3105 0515

2012年6月26日 星期二

[拜師學藝] 梘水稯, 桂花紅豆稯 & 紫米甜薯稯 @ 循道衛理教育中心

16 June 2012, Saturday

上星期六係灣仔「循道衛理教育中心」嘅美味廚房跟導師Winnie學咗點包裹蒸稯同鹹肉稯, 今日再接再厲!!!

原本呢堂係10am-12pm, 不過報咗名之後, 職員通知我地要改做12pm-2pm, 上堂前食Lunch又太早, 落堂先食Lunch又驚餓暈, 都係帶定2塊曲奇去Standby先...

12:00pm 準時到達課室, 已經有同學係度抺緊竹葉, 等我地洗乾淨咗對手又o黎幫吓手先...

12:30pm 準備好晒d材料, 可以開工!!!

用咗半個鐘, 包好咗5隻梘水稯... 經過上星期嘅特訓, 我今日突然開竅, 包得好成功呀!!!

1:20pm 好, 第二場戰鬥開始...

今次仲快, 用咗20分鐘就包好咗6隻桂花紅豆稯, 簡直係越戰越勇!!! 包得實在太完美啦, 哦呵呵呵...

1:55pm 剩低5分鐘咋!!! 下一堂嘅同學仔已經陸續殺到!!! 我地要移埋角落頭度繼續包埋紫米甜薯稯...

今次開埋Turbo, 用咗15分鐘就包好5隻紫米甜薯稯!!! 如果唔係中途有2位同學叫我示範點包, 應該會仲快... (都有少少飄飄然o架, 竟然會有人向廚盲請教, 嘩咔咔咔)


上次有成廿幾人學裹蒸稯同鹹肉稯, 勁迫, 仲迫過鑵頭沙甸魚... 今次得幾個人, 舒服得多...

即刻趕返屋企, 烚90分鐘, 今次一隻都冇散開, 勁呀!!! ( 第一轉 : 桂花紅豆稯 + 紫米甜薯稯, 第2轉 : 梘水稯)

桂花紅豆稯食得啦!!! 外型簡直係完美!!! 味道仲好好味添呀!!!

梘水稯一向唔係我杯茶, 不過Honey鐘意食...


好搞笑地, 我分稯比人時撈亂咗d桂花紅豆稯同紫米甜薯稯, 結果自己原來1隻紫米甜薯稯都冇!!! 好彩後尾又被我亂打亂撞咁食番, 味道都OK, 好似食緊冇芒果同冇椰奶嘅芒果黑糯米咁囉~


今堂嘅制成品我好滿意呀!!!

循道衛理中心 延伸教育服務
聯絡電話 :2527 2249
傳真號碼 :2527 3065
地  址 ︰香港灣仔軒尼詩道22號3樓
網  址 :
www.methodist-centre.com/ces
電子郵件 :ces_info@methodist-centre.com

2012年6月25日 星期一

羅勒印度餐廳 Tulsi Indian Restaurant

23 June 2012, Friday

端午節假期前夕, 搵食指數突然標升!!!

路過太古坊, 突然醒起當年港澳一推出米芝蓮指南, 呢度附近就即刻有間印度餐廳拎到「米芝蓮精選食肆」榮銜, 想試好耐, 但一直醒唔起去試... 擇日不如撞日, 就而家去喇...

去到門口, 有d猶疑... 點解... 羅勒呢個名咁陌生嘅呢... 但係位置又一樣, 裝修又一樣, 門口都一樣係放住「米芝蓮精選食肆」嘅牌, 只係由2009年改咗做2012年... 以為自己冇記性, 寫Blog時做資料搜集時發現, 原來之前2009年拎到米芝蓮精選食肆果名叫「皇轎印度餐廳 Palki Indian Cuisine」, 2010年時已經Close咗, 轉咗而家個名!!!

餐廳入面都幾企理, 真係出乎意料之外... 因為... 呢個商場都幾噏耷吓...

我地6點鬆d去到, 未開冷氣, 好焗... 店主隔咗一陣走埋o黎開冷氣, 個天花機係正我地頭頂, 太太太大風, d o野食凍得過快... 我加件外套都凍到滕滕震...

6點半先有客入o黎, 話Book咗位... 到我地食完鬆人, 都再冇人客入過o黎...

初o黎步到, 都唔知食咩好, 網上嘅參考又唔多, 多數都係食Lunch嘅Comment...

「Happy Meal for 2」有2個Starter, 1個Tandoori, 2個Main Course, 1個Bread, 1個Rice, 2杯Drink, 好似好多o野食咁喎... 唔想用腦, 最後決定Order 2人餐!!!

Chang Beer -- 來自泰國嘅啤酒, 味道偏淡, 好似越南啤酒咁...
Mango Lassi  -- 酸酸甜甜嘅芒果乳酪, 如果可以凍d就好喇...

(後) 胡椒薄脆 -- 以前食過嘅印度菜, 都係一坐低未點菜就已經會有胡椒薄脆食, 仲係捲成一個雪糕桶嘅形狀, 仲會配埋香草醬伴食... 呢度... 落埋單上晒前菜先拎胡椒薄脆o黎, 仲要係一片平平咁, 一d誠意都冇, 呢d就係米芝蓮嘅標準?!!
(右) 咖哩角 -- 熱到辣嘴, 咖哩味香濃, 薯仔餡好好味, 仲一d都唔油, 全餐最好味!!!
(左) 薯仔沙律 -- 有1種好特別嘅香味, 味道都幾好~

印度炭燒鐵板香燒雞 -- 嘩!!! 得2件?!! 唔知係咪因為少食多滋味嘅關係, 我覺得佢都幾好味, 起碼想再食多幾件, 味道應該因應香港人口味而調節過... 記得N年前係新加坡小印度食過, 勁誇張嘅香料味, 勁到我食咗一件已經頂唔順...

(前) 咖哩羊 -- 咖哩汁好香, 但好稀, 有點可惜... 羊肉都OK...
(右) 咖哩什菜 -- d什菜... 根本就係我最最最憎嘅雪藏什豆!!! 咖哩汁味道一般... 失望...
(左) 印度炒飯 -- 冇咩味, 冇咩餡, 炒得幾乾身...
(後) 蒜蓉烤餅 -- 鬆鬆軟軟, 不錯, 如果蒜蓉重d會更好...


個冷氣實在太大風, 呢4樣o野未食已經凍晒, 扣分!!!

全程只有店主及店員妹妹為2枱客服務, 妹妹只有上菜同埋單時出現過片刻, 未有開過聲講過任何o野, 而店主就永遠都企係100公尺以外... 感覺有d怪怪地...

是次每人消費約 135元
味道: 3 環境: 3 服務: 2 衛生: 3 抵食: 1
###
地址 : 鰂魚涌海光街13-15號海光苑地下1號舖
電話 : 2561 2968

2012年6月21日 星期四

Yahoo! Blog 人氣精選「味王傳說」

20 June 2012, Wednesday

繼上月第一次投稿到Yahoo Blog主頁嘅「今日人氣話題 : 遊歷遍天下」, 意外地獲得小小小編輯的肯定, 將我的士多啤梨狩獵之旅登出之後, 今個月繼續努力投稿!!!

除咗「遊歷遍天下」, 今個月仲多咗一個我最拿手嘅Topic... 食!!!

日日昅到實, 今晚零晨終於發現小小小編輯刊登咗我嘅食評係「味王傳說」啦!!! 好興奮呀!!!
 
今個月真係雙囍臨門, 繼成為U Food星級食家之後, 又可以係Yahoo Blog 人氣精選露面, 我對我嘅體重總算有個交代!!!


2012年6月20日 星期三

樂農 Happy Veggies (III)

9 June 2012, Saturday

上完「循道衛理教育中心」嘅包稯班, 一個人, 諗o黎諗去都諗唔到去邊度食, 最後決定去附近嘅「樂農」食...

前菜--好好味, 焗芋頭好腍, 焗紫薯同黃薯超甜, 仲有花生同粟米, 超健康!!!

金沙餃--蕃茄薯仔湯餃, 美味依然, 好滿足呀!!!

生磨合桃露--超濃郁呀!!! 好似有好多粒合桃係口入味跑o黎跑去咁!!! 仲有d合桃粒粒咬吓, 又係另一番滋味!!!

每次o黎都忍唔住狂買有機產品, 原來呢幾個月腰果糖都缺貨, 職員話要6月中之後就會返貨, 仲送咗2張書籤比我, 多謝~


呢度d職員真係好友善親戚, 客人都滿臉笑容, 置身其中, 感覺溫暖閒適~

是次每人消費約$85元
味道: 4 環境: 3 服務:4 衛生: 4 抵食: 4
###
地址 : 灣仔軒尼詩道99號彰顯大廈1樓
電話 : 2529 3338

2012年6月19日 星期二

[拜師學藝] 裹蒸稯 & 鹹肉稯 @ 循道衛理教育中心

9 June 2012, Saturday
由於微型黏土食品嘅新同學極力推介灣仔「循道衛理教育中心」嘅美味廚房, 導師Winnie姐廚藝好了得, 仲話自己會報6月份嘅包稯班, 微型黏土食品嘅老師又話一齊學, 加上識咗1年嘅微型黏土食品嘅舊同學又話想一齊去, 所以我又趁熱鬧, 親身走去灣仔報名...

期待咗2星期, 今日終於來臨啦!!! 但係... 點解... 極力推介果位同學仔... 又話報咗名, 但係又唔見咗人嘅呢...

好彩仲有個舊同學一齊去...

到達課室時, 見到老師同學員好似仲準備緊食材...

我地準時11:00AM去到嘅, 要幫手抺乾淨d荷葉同竹葉...

2012年6月15日 星期五

林邊生物多樣性自然教育中心 (Woodside Biodiversity Education Centre)

3 June 2012, Sunday

講咗十幾年, 話將紅屋開放做博物館, 今日終於有得入去參觀喇!!! 你地話啦, 我地個政府做o野幾咁有效率吖~

好, 而家就帶大家入去睇睇, 搞d咩咁勁, 要搞成十幾年嘅...

2012年6月14日 星期四

西歐「文藝復興」2012の塞納河船河, 巴黎, 法國 (River Seine Cruise, Paris, France)

1 May 2012, Tuesday
 

9oC - 19oC, Cloudy

~ 巴黎小檔案 ~

巴黎位於法國北部巴黎盆地的中央,是法國的首都和最大城市,全市分成20個區,人口超過1200萬。

巴黎三個最有名的地標分別是:巴黎聖母院、凱旋門,和艾菲爾鐵塔。
離開凡爾賽宮, 唔使半個鐘, 已經去到巴黎市心嘅香榭麗舍大街, 當然要同戴高樂廣場中央嘅凱旋門影張合照啦~ 只係短暫停留10分鐘咋, 真係想慢慢影個靚d嘅角度都唔得~ 10年前係呢度比人踩滑板搶DV嘅情景仍然澀澀在目~


* 拿破崙為紀念1805年戰勝俄羅斯及奧地利, 興建凱旋門 (Arc de Triomphe Etoile), 於1836年完成。

2012年6月11日 星期一

U Food 星級食家

8 June 2012, Thursday

經過一年嘅努力, 我終於都成為「U Food 星級食家」啦!!! Yo Ho!!! 好興奮呀!!! 我以後可以攞正牌繼續喪飲喪食啦~~~ 減肥, 遲d先啦!!!

而家嘅最新目標係... 盡快攀升成為二星級食家!!!

2012年6月8日 星期五

百瀧意粉薄餅餐廳 Buono Nuobo

30 May 2012, Wednesday

星期日突然興起, 去試吓開咗張半年嘅「百瀧」~

12點鬆d到, 要等5張枱, 諗住好快, 居然排咗45分鐘, 暈~ 對面餐廳只係半滿, 呢邊已經要排隊, 高下立見~

好彩有卡位坐, 2個人都係比4人卡位, 超寬敞~



排隊其間, 昅到佢個會員招募計劃, 好似幾抵咁, 填完表Submit時先發現自己會錯意, 誤會咗2佰幾蚊嘅會籍送6佰幾蚊Coupon, 原來係冇嘅, 衰咗!!! 都拎晒會員卡係手, 唯有頂硬上喇, 之後食多d幫返條數囉~ 結果短短4日食咗3餐!!!

~ Day 1 ~

(左) 低溫鴨胸肉蕃茄汁意大利飯--需時20分鐘, 忌廉飯好好味, 鴨胸都OK~
(右) 傳統蕃茄香草薄餅--需時20分鐘, 用傳統火山岩o黎燒, 薄餅夠晒薄同脆, 但係欠缺柔軟同煙韌感, 蕃茄香草汁唔及我地係米蘭食嘅Pizza, 又係嘅, 米蘭喎, 唔可以咁唔公平嘅... 同香港嘅"Pizza黑"計, 佢當然好d啦, 起碼唔會油淋淋...


Order薄餅可以加$38配沙律, 又或者湯+咖啡茶... 我地揀咗湯+咖啡茶...

(左) Cappuccino湯--用玻璃杯上, 賣相好Kawaii!!! 今日係蕃茄湯, 比軟鹹... 跟湯嘅麵包又香又甜又軟, 好好味~
(右) 咖啡茶--熱檸茶個杯好靚, 但茶好一般~


~ Day 2 ~

今晚試Set Dinner, 包餐湯, 沙律, 餐茶...

(左) Cappuccino湯--今日係蘑菇湯, Honey話似冬菇水...
(右) Mini Salad--有得揀煙三文魚/煙帆立貝/燒牛肉/煙鴨胸, 我地揀咗煙鴨胸, 煙鴨胸都OK香又有咬口, 沙律好清新, 沙律汁酸酸地好開胃~


(左) 上級牛柳鮮蕃茄燴飯--Set Dinner Rice Set, 好強勁嘅蕃茄味, 牛柳軟腍, 好好味!!!
(右) 意大利香草辣肉腸雞肉意粉--好多香草但係冇味, 辣肉腸似加大加鹹臘腸, 2樣一齊放入口食又OK喎~
(後) 芒果苿莉花綠茶--餐飲選擇之一, 唔使加錢, 冇芒果味, 強勁嘅苿莉味+強勁嘅綠茶味=好苦, 唔Match~


~ Day 3 ~

(左) 是日餐湯--飲咗2日Cappuccino湯, 今日轉吓飲餐湯... 甘筍湯, 味道都OK, 不過有蜆肉就奇d~ 燒牛肉Mini Salad都好味~
(右) Cappuccino咖啡--餐飲選擇之一, 唔使加錢, 奶味唔重...
(後) 神秘甜品--咦... 咦... 點解會有甜品嘅? 係咪跟Set Dinner嘅呢? 如果係, 早2晚係咪溜咗冇比我地呢? 黑森林蛋糕都幾好味, 好鬆軟, 以送嘅甜品o黎計, 算好有誠意~


(左) 忌廉汁海鮮意大利飯--Set Dinner Rice Set, 忌廉飯好好味, 海鮮就So So啦~
(右) 意大利水牛芝士雞肉香草蕃茄薯團--薯團好特別, 軟軟地但又有d咬口, 配埋個蕃茄醬, 好開胃~ 雞肉好重雪味, 要落黑椒辟走d味~



~ Day 4 ~

(左) 是日餐湯--甘筍Cappuccino湯~ 煙帆立貝Mini Salad好味~ 繼續芒果苿莉花綠茶~
(右) 是日甜品--布甸, 唔係我杯茶~

(左) 燒牛肉意大利飯--好味, 牛柳軟腍, 蕃茄汁配意大利飯好開胃~
(右) 白汁煙肉北海道溫泉蛋意粉--白汁唔錯, 煙肉香口, 我唔係生蛋, 所以要求熟蛋~


叫1個Set Dinner, 另外係A La Carte Menu揀1個飯/麵/薄餅, 用會員卡, 折實大約150-160蚊, 算幾抵食!!! 環境又舒適!!! 服務都唔錯, 雖然部分服務員都幾生手, 但態度正確搭夠~

呢度將會繼大戶屋之後, 成為我地嘅新飯堂~

是次每人消費約 80元
味道: 4 環境: 4 服務: 4 衛生: 4 抵食: 5
###
地址 : 鰂魚涌康山道1號康怡廣場北座M樓M4號舖
電話 : 2643 6988