網頁清單

2007年5月24日 星期四

加勒比海盜:魔盜王終極之戰 Pirates of the Caribbean: At World's End


Yo ho, yo ho, a pirate's life for me.... Welcome aboard!.... Captain! Captain Jack Sparrow!


嘻嘻, 我呢個"加勒比海盜"迷今日(2007年5月24日)第一時間去咗睇第三集喇! 3粒鍾話咁快就過咗, 既緊張, 又爆笑!


全片正到不得了, 大家記得去睇呀! 睇之前記得睇番第一集同第二集溫習咗先呀!


尋日同細佬妹msn傾開, 原來佢地都係今日睇呀, 你話幾"橋"呢! 我地幾個好少咁夾o架!


完場時, 記得唔好走住, 因為片尾影住十年後有個小朋友同Elizabeth Swann一齊等Will Turner上岸, 全場只剩下不足十個人(包括我同honey, 原本全院滿座)等睇呢段, 由於真係等咗好耐, 所以等緊嘅時候... 都擔心其實o個段片尾嘅傳聞係假嘅... 好彩係真嘅啫, 總算冇白等!



咳... 做份問卷調查先, 你地最鍾意邊個角色呀? 我呢... 嘻嘻... 咪同女主角Elizabeth Swann一樣, 最鍾意Will Turner, 但又有小小鍾意Captain Jack Sparrow囉!


TO 貓頭夫人: 我終於聽你話, 轉咗鈴聲喇 -- Yo ho, yo ho, a pirate's life for me....

2007年5月17日 星期四

Q Club

早2日(2007年5月15日)又有飯局(慶祝KaKaMa即將重擭新生), 真係有食神!

原本鑽媽揀咗Santa Fe American Brasserie, 不過KaKaMa打電話去book位時, 職員就recommend佢去Q Club, 話多d選擇喎(有美國菜之餘仲有東南亞多國菜, 價錢一樣), 所以KaKaMa就"誤打誤撞"訂左Q Club喇。

嘩! 原來間餐廳好靚o架, 情調一流! 食物真係好多選擇... 情侶們, 萬勿錯過!

我地order咗沙律, 軟殼蟹, 蟹餅, baby rib, lamb rack, chesse cake, tiramisu, 炸香蕉, 4杯special drink... 全部都咁好味, 價錢又唔貴, 等honey生日帶佢o黎呢度食先... (呵呵, 好o野, 唔使唸爆頭)

由7點傾到11點, 都冇比人趕走, good!

尋晚睇"師奶兵團", 葉童個老公請新女食開工飯, 咁啱係呢度取景, 真係"橋"! honey即刻扭計話點解冇佢份, 唉, 前2晚咪話咗帶你去囉, 冇記性嘅!

是次每人消費約$230元
味道: 4; 環境: 5; 服務: 3; 衛生: 3; 抵食: 4



地址: 尖沙咀諾士佛臺金巴利廣場3樓前座
電話: 2312-1168

2007年5月12日 星期六

我的第一副模型

哈哈... APiTA開張時, 最大收穫... 應該係比我同honey發現咗呢兩個模型!

 

唔知點解我地兩個都好鍾意, 仲決定買晒兩隻, 不過我地冇即刻買, 因為要去吉仔同模型鋪格價...

原本以為APiTA會最貴, 點知模型鋪仲貴(Giroro同價, Keroro貴43%), 吉仔得Giroro(同價)...

第二日路過APiTA, 即刻買咗隻Keroro先(最後一隻), 再等多幾日等吉仔感謝日先買Giroro(平5%)! 好o野, 買齊晒囉!

其實我咁大個女係第一次買模型, 都唔明點解會有咁嘅衝動, 呵呵...

honey一返到屋企, 就急不及待砌起佢 (砌完仲有好多配件剩低), 而家有Keroro同Giroro守門口, 出街都放心晒!


2007年5月11日 星期五

East End Brewery


今日(2007年5月11日)d同事唔知點解咁好興致, 話去轉角間酒吧食lunch, 哈... 咪陪佢地去傻下囉!

我地order咗午餐A(Pork Curry), 午餐B(Grilled Salmon), Turkey Burger w/ Fries, Pizza (BBQ Chicken w/ Mozzarella) !午餐包湯或沙律, 仲有甜品!

餐麭: d牛油好味 (後尾先知原來可以要求"看"熱d麭);
餐沙律: 唔錯, sauce好開胃;
咖哩猪: 少少辣, 好香, 嚟嗰時, 竟然跟白飯? 乜唔係食西餐咩?
三文魚: 唔腥, 幾好味, 薯茸勁滑, 一定唔係開粉;
Turkey Burger: 今次去呢度食嘅目標, 薯條好香軟, 漢堡一般;
Pizza: d味好似义燒酥, 幾好味, 切開一格格, 好得意;
胡蘿蔔蛋糕: 男同事話好好食, 女同事話食唔慣

美國菜--我不嬲嘛嘛地, 不過呢間都ok!

其實呢間酒吧最特色嘅係... 伴酒的花生... 食完後, d殼會被侍應倒落地, 呢個情景要過咗午飯時間先有...

一路食, 一路比出面行過d人喪"目及", 男男女女都係咁, 原因係大家對呢間o野都好好奇! d男同事話, 除咗女朋友之外, 未試過比其他女咁"目及"法, 哈哈...

是次每人消費約$105元
味道: 3; 環境: 3; 服務: 3; 衛生: 3; 抵食: 3

###

地址: 側魚涌糖廠街23-27號地舖
電話: 2811-1907

2007年5月9日 星期三

王家沙 Huang Tsa Sa Shanghai Restaurant

尋晚(2007年5月8日)原本想去游水, 不過因為一早去咗同客開會, 兩點幾先食lunch, 跟住趕埋d手尾... 已經7點幾, 又倦又餓, 所以決定食d好味嘅晚餐... 唸呢唸去, 最後都係去番其中一個飯堂開餐...


我地其實好懶唸食乜o架, 所以都係叫返平時叫開嗰d: -

. 松子桂魚 -- 超好食, 酸酸甜甜--送飯一流, 最正係d松子多到食極都食唔晒呀嘛;
. 蕃茄莧菜 -- 好健康, 又好食, 其他地方又少見;
. 栗子鮮肉粽 -- 時令食品, 咸咗d

食飽飽, 好倦呀...返屋企沖涼瞓教先...

 

拉姑推介: 如果唔係太飽的話, 一定要試下"棗泥糕", 用竹蒸籠上的, 香香軟軟又唔太甜, 正!

是次每人消費約$100元
味道: 4; 環境: 3; 服務: 3; 衛生: 4; 抵食: 4

###

地址: 側魚涌太古城中心1 樓101號舖
電話: 25603668

新羅寶韓國餐廳 Sorabol Korean Restaurant

尋晚(2007年5月7日)要去領取紅色炸彈, 準新娘為我地揀咗新羅寶韓國燒烤, 真係冇得頂!
原因1:之前無X嘅原裝入口介紹過之後, 已經想去試好耐, 不過一直都冇
機會試...
原因2:大家第一次一齊食韓國燒烤, 眨下眼已經係十五年前嘅事lu, 好有
記念價值...
原因3:我地3個都鍾意食韓國燒烤...


我地揀咗二人餐, 再加2份烤肉, 勁飽...
. 前菜:牛乜乜--幾特別;沙律--一般;
. 主菜:烤牛肋骨--好正;烤羊肉--ok;烤鷄肉--ok;烤大蝦--最正, 爽脆彈牙;牛
乜乜湯麵--一般;
. 甜品:乜東東糖水--好正, 好特別, 好清甜, 飲完舒服晒;生菓盤--一般

烤肉--主要都係侍應快手快腳搞掂, 冇得自己慢慢o黎, 冇乜mood!

開開心心又食完一餐, 醉翁之意不在食, 志在與好友歡聚一下, 這一餐真的不錯...

歡樂嘅時光過得特別快, 眨下眼已經10點幾, 好彩6月6號又可以再一齊聚餐, 好o野!!!

TO:準新娘, 恭喜恭喜, 祝你白頭偕老,永結同心!honeymoon記得玩得開心d喇...

是次每人消費約$250元
味道: 3 ;環境: 4; 服務: 3; 衛生: 4; 抵食: 3

###

地址: 尖沙咀金巴利道1-23 號美麗華商場4字樓
電話: 2375-2882

我的下午茶

自從搬咗去新office, d同事唔知乜o野原因, 越來越少叫下午茶外賣, 真係好唔習慣, 以前一星期先碼叫4日下午茶外賣, 但係自己一個order又冇mood, 久而久之, 我都好耐冇食辦公室下午茶喇...

不過... 試問貓又點會忍倒口唔食魚吖... 唉...
 
近排我唯有改變下生活習慣, 食完lunch返公司前--買埋下午茶返公司喇...

12 April 2007 : 鴻星--可愛小白兔棉花糖(太古坊新開)


26 April 2007 : 太子--迷人士多啤梨拿破崙(太古城老店)


8 May 2007 : 中意坊--路邊的野花(綠茶芝士配士多啤梨毛士)(鯉景灣)


嘻嘻... 是不是很吸引呢...

2007年5月2日 星期三

蜘蛛俠3

尋日(2007年5月1日)見放假又冇節目,率先去睇下『豬豬俠III』,輕輕鬆鬆又搞掂一日假期嘅節目,yeah!


上星期六同honey d朋友食飯時,佢d朋友話想一齊睇,呵呵,唔好意思,我上星三已經係網上訂好飛喇,唔可以一齊睇lu... 尋日朝都仲有打電話o黎話要一齊睇,不過今日聽番,好似話尋日買唔倒飛囉喎...


我覺得豬豬俠着黑色戰衣形仔d,今次有3隻怪獸咁多(後尾變2對2),好似精彩咗,不過每隻怪獸嘅心路歷程自然會分薄咗喇... 鍾唔鍾意真係見仁見智。豬豬俠--真係一集肥過一集,豬豬女--就一集瘦肥過一集,搞笑!我覺得最好笑係... 個博士話d黑色物質會令人情緒大變,鏡頭一轉,影住一個黑色細胞推撞其他細胞,如果咁就斷定d黑色物質會令人情緒大變,好似兒戲咗少少喎!


值得一睇,因為一年可以睇嘅電影得好少,下一部要睇嘅係『加勒比海盜』,好期待呀...

 

尋日有香港近年難得一見嘅『全院滿座』情景,Good!

2007年5月1日 星期二

鹿鳴春飯店 Spring Deer


今晚(2007年4月30日)成班姊妹去鹿鳴春幫無敵賀壽,好熱鬧!不過唔知係咪月尾加第二日係假期嘅關係,攪到冇人準時到!最好笑係龍媽... 打電話叫我地食住先,我反問佢:『我地得2個人喳喎,點食住先呀?』... 等咗半個鐘,先得5個人, 我地已經忍唔住落order,部長死都唔肯上菜先,話會涷晒喎,只肯上什錦冷盤同砂煲雞飽翅,不過到上第一道菜時咁啱齊晒人,哈哈,奸計失逞!
 

多得貓頭夫人之前打電話去訂定教化雞、窩燒肘子(三斤重)、酒糟鴨肝,等我地今晚有好嘢食,謝謝!

什錦冷盤:刀功精細;
砂煲雞飽翅:冇得彈,好入味,好足料,一流,抵食;
教化雞:造型獨特,味似糯米鷄;(叫無敵當切生日蛋糕咁,用槌仔打碎舊泥,佢死都唔肯,激死!)
蔥爆羊肉:勁好味,正;
扒四蔬:想食時只剩一舊西蘭花;

松鼠魚:好多肉,酸甜度適中,不過好似冇乜松子;
窩燒肘子:三斤重,好乾身下;
酒糟鴨肝:正到痺,香軟味美,極品;


小籠包、高力豆沙香蕉、拔絲香蕉:一般


環境嘈過乜,個個講幾句嘢都叫喉嚨痛,唔適宜傾謁!九點幾仲好多人等緊位,大部份係遊客,所以唔訂位可能真係會冇得食!


味道:4;環境:3;服務:4;衛生:3;抵食:4


地址: 尖沙咀麼地道42號二樓
電話: 2366-4012