網頁清單

2009年9月26日 星期六

銀座藏人 Ginza Kurando

23 September 2009, Wednesday


今晚標咗8B月餅會... 呵呵呵呵... 多謝大家!!!


一坐低見到筷子套係百人一朱的, 即時回憶起N年前好鐘意同Honey去新開嘅Hollywood Plaza間百人一朱撐枱腳, 不過已經係好多年前嘅事...


我到達時, 貓兄同DD已經鑽研緊餐牌(寫Number落單), 由於係放題, 所以我地3個先Order 1 Round...


經典位 #1
我地9個人, 佢竟然比張8人枱, 背住牆嘅一邊放5張椅, 椅貼椅, 完全冇隙縫, 都長過張枱半個身位, 試問叫人點坐???


經典位 #2
我地3個坐係最左手邊, D侍應將所有菜上係最右手邊, 試問叫人點夾o黎食??? 就算, 我比D侍應諗住唔想係貓兄同DD中間上菜, 佢都可以係DD身邊上菜吖!!! DD身邊當時都未有人坐!!!
最後要勞動到貓兄逐次叫D侍應將D菜拎過o黎我地呢邊擺... 我懷疑... 因而種下禍根...


~~~ Round 1 ~~~


刺身沙律唔錯, D沙律菜都幾新鮮... 壽司唔係話特別好食, 所以冇Re-Order, 以免浪費個胃嘅空間...


帶子刺身好新鮮, 其他刺身就一般啦, 海螺出奇地細囉... 炙三文魚沙律味道唔錯... 炸蝦好油好硬, 冇再Re-Order...


燒鰻魚都OK啦, 但唔係好肥美果種, 我食咗一半, 竟然冇人肯食埋剩番果一半, 真奇怪...


魚肉豆腐幾好食... 牛膀沙律都幾正, 比我清晒...


牛油焗元貝冇牛油味, 淋GiGi咁, 嗯, 我身為"帶子怪"都唔想再食多一隻... 串燒牛肉好薄好乾, No Good... 前菜茄子冇咩味咁... 卷物我冇掂, 唔知咩環境...


呢個唔知咩沙律同天婦羅蝦我都冇掂...


~~~ Round 2 ~~~


接近8點開始人齊, 好難再影到相... 因為D侍應繼續將所有菜上係最右手邊(即使最右手邊已經堆滿食物, 冇位再攝), 我坐係最左手邊, 一來坐得太遠, 二來未企起身影相已經比人食咗大半碟, 又唔好意思叫停大家, 唯有放棄...


牛柳粒味道都OK, 硬咗少少... 明太子雞翼勁鹹同埋好細隻...


冇上鏡嘅有: -
日本迷你蕃薯天婦羅--都幾特別, 又唔油, 個脆皮仲好薄...
炸芝士薯波--完全冇芝士味可言...
清酒煮蜆--冇清酒味+冇蜆味, 食1粒就夠...
燒鯖魚--味道都OK...
自家制豆腐--同網民所講一樣, 個底係百福... 姊妹們即刻話佢應該標榜"香港自家制"...


每位顧客包一杯汽水, 冇熱飲選擇... 嘩... 點解D忌廉勁苦藥水味嘅...


網民提及有個waiter差d成碟菜倒落佢個身度... 同埋成間餐廳星期日都唔full, 7-8個waiter行行企企都唔識自己收碟, 又唔識主動睇下有冇人落單, 連vip房入面d客都要自己行出o黎幾轉落單...


估唔到... 我地嘅遭遇會同佢一模一樣...


經典位 #3
貌似(高度都似)小學女生的侍應, 竟然係我地埋單後, 收碟時, 倒瀉貓兄杯茶, 成杯淋落貓兄度, 好彩貓兄閃得快, 冇中招...
正常人發生呢D事之後, 應該會提高警戒, 點知... 事件竟然延續到我身上... 個小學女生竟然將Washabi豉油放係一隻碟上面, 再將隻碟放係我隻有骨嘅碟上面, 果碗豉油傾斜40度向住我, 理論上, 佢一收走就冇事, 但係佢竟然將隻碟Chok起又放低, 重複咗十次八次, 我忍唔住問佢"你想點?", 又同其他人講"佢想倒D豉油落我個身度咁囉", 跟住佢先話"對唔住", 仲9秒9收走隻碟, 究竟發生緊咩事??? 大家自己諗諗...


寫Blog時Research資料時回憶起, 其實我去過呢間餐廳嘅中環萬宜大廈分店食晚餐, 印象中果間食物好味好多, 同埋Service都係唔錯... 點解呢間會咁o架???


是次每人消費約$207元
味道: 3 環境: 4 服務:0 零 Zero 衛生: 3 抵食: 2
###
地址 : 灣仔駱克道57-73號香港華美粵海酒店1樓
電話 : 2862 1030


L'Eclipse

21 September 2009, Monday

較早前收到DD通知, L’Eclipse推出「生日之星」優惠, 顧客於生日月份內與親友到L’Eclipse用膳, 每一天都可享免費大餐!!! 咁抵??? 我地一眾9月之星緊係要拿拿聲Book位啦!!!

誰不知... 先遣部隊DD食完之後, 叫我地都係轉第二間啦... 嘩... 唔係咁大鑊呀嘛??? 係唔想煩(再搵第二間)同埋驚DD嘴刁嘅情況驅使下, 我都係決定要同Honey去了解下...

一坐低諗都唔使諗, 就隊龍蝦先!!! 澳洲龍蝦、龍蝦蚶、迷你龍蝦仔、波士頓龍蝦... 嗯... 最好食都係波士頓龍蝦, 配紅酒汁好夾(全晚最好, 食多幾隻就值回票價)... 再o黎多一Round先!!! 青口肉好細粒, 食之無癮, 棄之有理!!!



每名顧客可從原隻鮑魚、燕窩薑汁蛋白布甸、煎和牛及比目魚四款主菜中選兩款美食... 網民大比數話燕窩薑汁蛋白布甸最好, 但係食落冇咩特別啫, 至於鮑魚, 真係又細又冇味... 和牛就好軟腍, 味道都唔錯, 但係好細舊囉...



刺身得4款, 三文魚好多筋, No Good!!! 壽司賣相麻麻, 唔想浪費個胃嘅空間... 沙律都OK新鮮...



巴拿馬火腿, 切到薄過紙, 擺得又肉酸, 好小家, 唔似酒店作風... 味道仲... (冇再添食)
羊奶芝士先恐怖, 只係影相嘅短短時間, 竟然溶到一灘汁咁, 我唔敢放落口囉...




熱葷嘅即燒蠔有6隻味揀... 我揀咗煙肉同茄汁... 嘩... 好唔得囉, 個樣唔掂之餘仲要完全冇味, D肉又超細粒... 其他熱葷都冇一樣可以令我再食多一Round...
左下角個唔知咩醬蒸豬肉先恐怖, 我只係食咗20分之1...
餐飲熱檸茶又一恐怖傑作... 等咗好好好耐... D水係微溫嘅, 我飲咗半啖已經成杯唔飲, 因為我驚佢D水根本未煮熟, 我唔想博...




食到咁上下, 見有單反攝友出咗去Buffet枱影相, 仲要玩自拍合照, 都冇人理佢, 我地又出去影下相先...



出去拎甜品時, 廚師極力推介我試下部Pancake機(上圖), Click OK之後等50秒就會自己彈塊Pancake出o黎, 仲叫我加個Movenpick雪糕球o黎食, 我揀咗夏威夷果仁味, 呢一味自制甜品我都幾滿意...



但係其他甜品就真係麻麻地啦, 連我呢個甜品怪都可以食一啖就唔食嘅, 唯一食晒係個朱古力Cake, 大家自己諗諗啦... 法式焦糖燉蛋最奇怪, 個面係水汪汪嘅, 乜唔係應該用火槍燒到脆脆地嘅咩???



生果都OK嘅, 除咗奇異果有神功護體刀叉不入之外(好大力咬都只可以留下好淺嘅牙齒印)...



每名顧客都有當晚精選甜品一客, 呢晚係「士多啤梨三重奏」, 有士多啤梨梳乎厘、芝士蛋糕(面頭有16分之1粒士多啤梨), 士多啤梨毛士... 我淨係食咗梳乎厘, 味道都好一般下... 呢個「三重奏」, 就算放係度任拎, 我都唔會食囉, 使唔使一人一客咁矜貴呀...



雖然話我係免費, 但係呢個價錢, 如果唔係Buffet, 可以有好多好好味嘅選擇囉...

不聽DD言, 吃虧在眼前!!!

是次每人消費約$281元
味道: 2 環境: 4 服務:3 衛生: 4 抵食: 2
###
地址 : 尖沙咀北京道8號香港朗廷酒店高層大堂
電話 : 2375 1133


2009年9月24日 星期四

話咗唔去又去嘅「迪士尼黑色世界 (HK Disneyland Haunted Holloween)」

18 September 2009, Friday


之前一晚仲推咗Miss Chan Chan一家三口加DD一家三口話唔去... 第二日同事話會同家姐去, 我諗諗下又跟埋去... 點解會咁??? 因為跟住是但一邊嘅「一家三口」都好似阻住人地家庭樂咁... 同同事姊妹花去就唔同喇, 大家成年人, 冇咩所謂, 玩玩下又可以Join番Miss Chan Chan同DD一齊玩陣呢...


放咗工買咗個下午茶餐去到門口食, 食完一D都唔飽嘅, 陰公...





入場每人派一把夜光扇, 又可以撥涼, 又可以借面, 一舉兩得!!!




夜光鬼魅巡遊同之前都差不多...





呢D佈置第一次見... (我舊年冇o黎)





同同事姊妹花分開咗, 就去會合Miss Chan Chan同DD, 一齊玩咗小熊維尼就影番張大合照... DD部機影得好靚呀!!!





會合番同事姊妹花, 行咗一陣Shop, 都冇咩收穫, 準備離去之際, 見到Chip & Dale, 有感冇同公仔影相就好似對自己冇咗個交代嘅心情下, 我地都排一排隊先... 影到樂園關門都未到我地, 幾驚呀, 好彩最後都影埋我地先收工, Yeah!!!




呢件衫係幾年前同貓兄去日本玩嘅時候買嘅, 一次都未着過... 加咗入場派嘅貼紙, 效果又幾好喎... KaKaKaKa...






2009年9月22日 星期二

金不換泰國餐廳 Sweet Basil Thai Cuisine

16 September 2009, Wednesday


又到一年一度標月餅會嘅時候... 第一餐... 全新女子組合... 成員主要來至「四塵俠」Mix「台山四寶」... 嗯... 重未命名, 哈哈哈哈!!!


原先係約咗14號食, 果朝1號風球, 鑽媽已經打電話問我"需唔需要"改期... 嗯... 我想講話, 佢搵錯人囉, 我呢D神瘋敢死隊, 八號照出都冇有怕, 哈哈哈哈!!!


返到公司又到龍媽MSN我, 佢就醒得好多啦, 佢斬釘截鐵咁話, 佢想改期!!! 咁咪改囉, 哈哈哈哈!!!


「巨爵」不負佢地嘅厚望, 真係打得成... 香港天文台係2009年09月14日17時55分發出八號東北烈風或暴風信號, 不仼我地改咗期...


當日鑽媽一坐低就不停叫肚餓, 叫個沙律比佢頂住先...


西柚牛油果沙律--西柚肉肥肥短短, 好可愛...  牛油果同燻豬肉(bacon)好似唔多Match...


仲以為佢食完個沙律會叫飽, 估唔到佢一陣又叫餓, 廋人嘅身體儲備果然真係小過人...


炭燒豬頸肉--都幾惹味, 又鬆軟, Good Good!!!
軟殼蟹--好大隻呀, 啖啖肉, Good Good!!!


焗南瓜海鮮咖哩配蒜蓉包--好正呀D咖哩, 加個白飯呀唔該... 海鮮就冇咩味, 食咗D咩落肚都唔知... 南瓜肉好甜好淋, 食極都有, 好抵...


咖哩鱔--呢個咖哩配白飯仲正, 再加多個白飯呀唔該... 鱔肉同咖哩好似唔多Match...


蛋包海鮮金邊粉--買相一流, 味道亦不俗...


邊食邊睇"幻彩FING啷啷", 好遊客Feel, 哈哈...


食得太飽, 食唔落甜品, 我地叫咗椰青同珍多冰同椰奶, 一路飲一路傾, 轉眼就差不多11點, 歡樂原是這麼簡單... 多謝大家!!!


今餐飽到我第二日5:30pm先食得落早餐(10點幾已經起咗身)...


是次每人消費約$172元
味道: 4 環境: 4 服務:3 衛生: 4 抵食: 4
###
地址 : 尖沙咀廣東道17號海港城海運大廈 2 樓 OT 260 - 263 舖
電話 : 2730 1963


2009年9月21日 星期一

「第二十一屆澳門國際煙花比賽匯演」

12 September 2009, Saturday


因為Honey要去澳門工作一天, 咁啱佢有朋友原來早一個星期六去咗澳門睇煙花, 同佢講話幾正, 又唔迫人... 咁我地就係毫無Planning嘅情況下, 臨急臨忙決定等Honey工作完, 我地就Join埋一齊去睇煙花, 所以當晚嘅回程船飛已經冇晒, 只係剩得23:59嘅豪華位...


Honey一早9點就出發, 我就2點半先施施然咁係碼頭食埋味千拉麵出發... 去到澳門第一時間去"不勞而獲手信街"狂食試食, 當然都會買D返香港慢慢嘆啦... 跟住就去上次貓兄帶路嘅甜品鋪食糖水, 然後先去瑪嘉烈蛋撻會合Honey(我又再隊多2個葡撻), 最後先去澳門塔...


我地Book咗BBQ Buffet, 因為未夠鐘入場, 所以週圍逛影下相...


我地呢張枱係最近海邊果行, 又係最近評判席嘅, 仲唔使同人搭枱, 真係萬幸...


現場仲有Live Performance...


因為我o黎之前食咗太多o野, 搞到飽到上喉嚨掟, 食唔到Buffet, 咁唯有影下相先啦...


9點正 : 台灣代表 "'Wan Dar"


我地個位可能實在太靚, 搞到之後好多人走咗過o黎我地側邊Set腳架... 同埋身後邊仲好多人擔晒"登"坐係度, 等睇第二場煙花...


10點正 : 法國代表 "Féérie"


我最鐘意佢Ending嘅心形煙花, 好Romantic呀!!! *0*


BBQ Buffet食物一般啦, 冇咩期望... 燒腸仔同燒魷魚幾好味... 估唔到有中式燒味...


「第二十一屆澳門國際煙花比賽匯演」資料可瀏覽:
http://www.macautourism.gov.mo/cn/events/majoreventsdetail.php?rid=63


原本諗住煙花22:30完, 我地船飛23:59實冇死啦, 點知... 竟然完全冇加開巴士(佢D巴士又細過人, 仲要半個鐘都冇一班車去碼頭), 亦無咩的士(1個鐘都唔夠10架的士, 人龍係短咗, 不過係因為D人轉晒用腳離開), 時間一分一秒咁流逝... 終於... 係23:40左右有一班巴士到, 我地都唔理得咁多, 變身難民湧上車...


上次旅程, 我體驗到係澳門搵的士, 冇30-45分鐘, 你都唔使旨意有車...
今次旅程, 我體驗到係澳門問路, 係一件好危險嘅事!!! 我地係澳門塔B1問"食蕉"去碼頭嘅巴士幾多號, 佢答"唔知!!!", 叫我地問客戶服務檯... 我地係澳門塔G/F問客戶服務檯, 佢比咗2個Number我地... 到我見到巴士公司職員, 搵佢求證, 佢竟然話"o黎果程就停碼頭, 去果程唔經喎!!!"... 但係... 到我地依巴士公司職員指示上咗車, 巴士司機又話架車根本去唔到碼頭, 我地即刻係市中心落車, 轉咗一架標明"碼頭"嘅巴士... 好好彩, 我地竟然係最後5分鐘到達, 否則...


我呢個大鄉里, 第一次坐豪華位, 竟然唔知道原來豪華位係有餐食嘅!!! 不過味道就... 我最後只係食咗乳酪同Jelly, 飲埋果汁...


特別天氣報告: -


買咗船飛之後發現「彩虹剛去 彩雲將至」都有D擔心, 驚暈船浪... 點知... 海面比平時更平靜...


估唔到回程之後2日又突然殺出熱帶氣旋「巨爵」,  香港天文台仲係2009年09月14日17時55分發出八號東北烈風或暴風信號, 真係"貴人出門招風雨"囉, 哈哈哈哈...