鐮倉和茶房夢見屋 與 太空奇兵•威E (WALL•E)

終於有機會試下呢間夢見屋, 吉之島重開至今都係超多人排隊...

 

入面d裝修都幾和風, 大部份都係梳化位, 坐得好舒服...

Set Lunch 蟹肉莧菜長通粉 -- 味道OK, 蟹肉有殼, 要小心d食...

Set Lunch 蕃茄火腿意粉 -- 味道OK, 淡咗小小, 買相就靚...

藍莓芝士餅 -- 味道OK...

食得多pokka, 食下呢間唔使咁悶... 下次o黎要試下佢d和風甜品先...

 

是次每人消費約$77元
味道： 3 環境： 4 服務：3 衛生： 3 抵食： 3

###

地址 : 鰂魚涌康怡廣場南座吉之島2樓L202號舖

電話 : 2560 2483

 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

 

食飽飽去咗睇"免費"WALL•E (6月16日至7月13日，中銀Visa卡簽帳3次，每次簽帳滿HK$300或以上)... 最正係雖然得3間戲院有得換領，但竟然有MCL康怡份, 方便晒我地!!!

散場去toilet個陣見到呢個立體廣告紙板, 好得意, 見冇咩人, 忍唔住要同佢地o黎張合照先...

套戲嘅真正含意都幾深, 小朋友未必會明, 不過當普通卡通片睇, 應該冇問題!!!

 

單反一族 の Canon EOS 1000D

Honey之前睇中"喪你"咬化350... 同d小記朋友去到"喪你"東角Pro Shop門口入貨個陣, "喪你"竟然拉晒閘話要裝修一個月... 更驚聞10數個已pre-order嘅電雜小記都放晒飛機... 熱情一下子冷卻了... 最慘嘅係... 我已經係網上蝕讓咗隻Canon 650 IS... 進退失據...

 

經過咗2個月o黎嘅搜尋+等待... Da Da... 終於今個星期出咗隻新機... Canon EOS 1000D... 今日趕得切去豐X入貨(一早打咗電話去好多間問有冇貨, 得1間有貨, 即刻飛車過去)... 送4GB SD Card+腳架+多送1粒副電+LCD保護貼, 慳番好多o架...

 

渣X咭逢星期六係豐X買o野有10%現金回贈, 每個月最多回贈500蚊, 為咗用盡d現金回贈, 支長鏡就要留番8月先買!!!

 

原價HK$5380, 講價平多100蚊, 計埋現金回贈, 折實$4780, 真係幾抵!!!

 

咁急進身單反一族, 其實都係為咗係奧運年嘅雙澳之旅做好準備... 下個月去澳門玩個陣試下部機d性能, 咁遲d去澳洲玩個陣, 就唔使影埋d鬆郁朦嘅相返o黎啦, Yeah!!!

裝修後的王家沙

裝修咗幾個月嘅王家沙, 今個月終於開番...

 

天花加咗具有中國特色嘅木飾...

碗櫃都係...

查實大枱嘅吊燈先恐怖, 係將好多茶壺貼咗係上面... 如果食食下o野跌咗落o黎... =.=

除此之外...

. 座位 -- 迫咗好多...

. 環境 -- 嘈咗好多...

. 食物 -- 味道Keep得住...

 

話梅骨 -- 酸酸甜甜, 肥肉又小, Yummy!!!

豆板莧菜 -- 豆板味道好奇怪... 早知叫番"至愛"嘅蕃茄莧菜...

回鍋肉炒年糕 -- 新嘗試, 唔太油, 味道唔錯...

價錢的確貴咗好多, 已經唔可以好似以前咁, 當飯堂咁食...

白沙灣 + 蒲台島 + 南灣 一日遊

星期日(2008年7月20日)同honey d friends去遊船河, 一早食定暈浪葯, 冇有怕!!!

 

10:30am -- 由香港仔碼頭出發, 大家一上船二話不說拎晒D零食出o黎"曬冷"先!!!

沿路見到有個島有好多天線... 唔通呢度係秘密基地?!

11:00am -- 去到赤柱監獄泊低隻船先... 泊得咁近... 會唔會有 Prison Break o架?!

係我地隻船側邊, 有漁民係度打魚... 好似打得好狠下(D水花咁勁)!!

趁D人落晒水, 我地2隻無聊怪又出動攪攪震...

扮下揸船...

扮下梳乎... (今次隻船勁大, 我地得8個人, 1人瞓1張梳化都仲有梳化剩... 船倉仲有紅酒櫃, 雪櫃, 微波爐, 熱水煲, 2間房, 2個廁所... 希望8月再o黎都係呢隻船啦)

2:00pm -- 玩到咁上下, 就開船去蒲台島食海鮮... 我咁大個女第一次o黎蒲台島喳... 呢度逢星期二/四每日得一班船o架喳, 星期一/三/五直頭係冇船到添o架...

呢間明記D海鮮真係Ichiban... 連埋酒水, 飽到嘔, 1人都係200蚊...
. 薑蔥炒肉蟹同膏蟹 : 巨型到呢, 市區好罕見, 就算食到都會好貴, 肉質勁彈牙, 勁多膏(有成個飯碗咁多), 仲勁新鮮...

. 白灼蝦同椒鹽鮮魷 : 勁新鮮勁彈牙...

. 炒聖子: 好惹味...

. 炒飯同炒菜: 超水準, 平時D海鮮酒家呢2樣通常唔多掂...

. 蒸扇貝 : 成餐嘅精髓, 冇落調味, 完全係食扇貝嘅鮮味, 個個都讚不絕口...

所有o野上枱都熱騰騰, 小心辣親嘴!!

 

(上船之後, Captain叔叔問:"有冇食龍蝦呀? 呢度D龍蝦係香港龍蝦, 全香港得呢度有"... 

Captain叔叔, 唔該你下次早響呀!!!)

3:00pm -- 飯後honey同友人行咗去天后古廟散步, 我就返上船嘆下冷氣好過...

3:30pm -- 齊人就開船去南灣繼續嬉水... Yeah!!!

 

5:30pm -- 打道回府

 

好彩今日天公造美, 比番D藍天白雲比我地, 輕輕鬆鬆又一天...

超級吉之島の誕生篇

康怡吉之島終於裝修完畢!!! 而家做緊Pre-opening, 尋晚10點入去行咗一陣超市, 以為自己去錯City Super, 所以今日要去再詳細了解一下...

 

行動前係超市入面嘅麻布茶房入油先!!! (Honey嘅咖哩牛肉蛋包飯好好味, 我嘅蟹肉飯冇咩味)

而家冇咗美食廣場, 取而代之嘅係一大堆新食肆同小食店...

新食肆除咗麻布茶房, 仲有山頭火, 大戶屋, 板長壽司, 夢見屋!!! (地頭蟲Pokka上咗2樓!!! Cafe Gute 位置不變)

新開嘅小食店有Happy Lamon(台灣飲品), Antique(精美蛋糕西餅), Beard Papa (泡芙) + Stick Stick, Mado (土耳其人手拉雪糕), Marion Crepes (可麗餅), 櫻花樓(銅鑼燒), 芭蕉堂(關西舊式甜吃), 杏花樓, 恆香, 超群, ... 仲可以去健康功房飲湯...

Honey第一個Comment就係"你唔使旨意減到肥啦!" (無言以對)

 

Wine Cellar 勁大, 仲有間恆溫房, 好High呀!!! (價錢仲High, 3千幾蚊一支, 放係外面果D, 幾十蚊都有交易)

仲有City Super果種Cheese Bar, Amazing!!!

 

Ready Meal 方面仲勁, 竟然有Fat Angelo's!!!  仲有"即叫即燒日式串燒", 好吸引!!! 中島水產仲整咗個Oyster Bar, 即叫即開, 嘩!!! 仲有好多舊ready meal, 唔係度介紹喇!!!

最得人驚係, 凍肉櫃入面, 竟然有佐賀A5和牛!!!

試業期間, 超群有雞蛋仔試食, 買o野仲送蛋撻!!!

日本吉列專門店餐廳 Tonkichi Japanese Restaurant

 

曾經聽過好多人提過嘅"吉列專門店", 榮獲"最優秀銅鑼灣開飯熱店、最優秀開飯日本料理、十大好評開飯熱店", 想試好耐好耐, 可惜一直未有機會... 近日無意中有張85折Coupon, 令到我更加心急想去食...

 

今日(2008年7月5日)Honey要去銅鑼灣買o野, 我就順勢問佢想唔想跟我去試菜, 估唔到佢答好...

我地去到嘅時候大概係6點半左右, 已經要等20張細枱(仲未計大枱)... 等等等等等... 等到8點終於入得席... 原來入面唔係太多枱, 怪唔得要等咁鬼耐啦... 嗚嗚...

 

我地揀咗"吉列豬扒豬柳定食"(二人餐), 包麵豉湯、白飯(免費添吃)、椰菜(免費添吃)、漬物、生菓!

 

D芝麻係比你自己磨架，一磨D香味就湧出o黎，再加入豬扒醬汁，好好味呀! 仲有海鹽同芥末醬可以用，可以試下一口豬柳3種味道，奇High! 豬柳入口比豬扒鬆化，好味!
椰菜有2隻沙律醬可以配，就係柚子沙律醬(DD至愛)同埋紫菜沙律醬(個味都幾特別)，我地足足Refill咗3次咁多呀... 飽飽!

入面d裝修都好正, 如果可以坐卡位就更正!!!

 

是次每人消費約$128元
味道： 4 環境： 4 服務：4 衛生： 4 抵食： 4

###

地址 : 銅鑼灣告士打道280號世貿中心412室

電話 : 2577 6617