網頁清單

2010年2月25日 星期四

虎虎生福@廸士尼

22 February 2010, Monday

大年初九約咗奶奶去廸士尼玩... 奶奶係第1次去, 而我... 感覺上好似去過廿幾三十次咁, 返HOME睇相數一數, 原來都只係第14次入去玩啫... 呵呵呵呵...


一入到去, 平時Mickey同Minnie嘅鐵竇, 竟然比跳跳虎霸咗??? 係喎... 今年佢先係主角, 哈哈哈... 條龍已經截咗, 退而求其次, 搵財神Goofy影下合照先... 呢個無敵Pose引起全場大笑囉...




跟住就欣賞下「迎福跳跳鼓」表演...






睇完就去咗「幻想世界」玩「小小世界」、「瘋帽子旋轉杯」、「灰姑娘旋轉木馬」、「米奇幻想曲」... 仲係「睡公主城堡」前面留倩影...
之後又去「探險世界」睇「獅子王慶典」、然後玩「森林河流之旅」、再係「歷奇噴水池」留倩影...
最後去「明日世界」玩埋「太空飛碟」同「巴斯光年星際歷險」...
玩夠就去「大街餐廳」食晚飯, 幫鑽媽買埋個水壺, 就開始欣賞「星夢奇緣」煙花表演...

今日行程比預計中順利, 遊戲都比預計中玩得多, Good Good!!! 做咁多野, 咪又係為博紅顏一笑... 奶奶全日都好開心咁, 總算冇白費我嘅腳力同腦力...


去過咁多次廸士尼, 正常應該冇咩未見過啦... 大家絕對唔好咁諗... 因為有大量同胞湧去, 絕對會令你大開眼界+O咀O到合唔番埋個咀... 當然, 亦唔小得香港嘅代表啦...


O咀1) 小五咁上下嘅小妹妹, 攪住D公仔模型, 影完十幾張相都唔肯走, 有另一個同胞行埋去, 佢竟然LOOK大對眼+惡形惡相咁兇人"喎蟹米酒"... 真係睇到我眼突突... 腦海中聯想到人地搶緊年過40嘅佢嘅鑽石王老五男友...


O咀2) 金毛港男(勁似)幫同胞影相, 因為同胞又影咗好多張都唔肯走, 有小朋友忍唔住越行越埋, 金毛男就開始講D難聽嘅說話, 小朋友媽媽講咗1句"你唔使咁惡吖", 金毛男就好似啪咗葯咁, 發狂鬧人... 勁似去收爛數咁款...


O咀3) 排緊太空飛碟, 職員清理完地上垃圾, 準備離開之際, 有個似中三咁上下嘅男仔, 啪一聲, 大大力掉舊垃圾落職員嘅腳側邊, 我大大聲話"咩人o黎架, 咁離譜都得, 唔係呀嘛", 個男仔&同佢一齊嘅大人都扮聽唔到, 個職員只好搖頭嘆氣咁夾埋呢舊垃圾, 然後離開...


O咀4) 繼續排太空飛碟, 排我前面嘅小三咁上下嘅男仔, 係坐輪椅嘅, 由一個著MING化行妝嘅跳跳CHAK細路--阿媽著MING


以上幾件事嘅主角, 我都想大巴大巴咁星埋去...


2010年2月21日 星期日

季季紅乳豬

18 February 2010, Thursday

大年初五原定去鑽鑽屋企拜年, 可惜鑽鑽同鑽媽都病咗, 唯有臨急轉去龍媽度... 鑽鑽, 鑽媽, 你地要好好休息, 快D好番呀!!!


平時好唔認真咁準備食物嘅我地, 今次竟然出奇地認真, 要出動到2個美少婦+2個美少女去買餸... 何超仲一早Order定滔滔推介嘅季季紅乳豬... 當日5點先開始燒... 打開個袋一聞... 嘩... 真係好香呀!!!


呵呵... 開鏡儀式... 剪落去果一下, 係超脆囉...


可以剪到2大碟o架, 放到11點先食都仲係好脆, 貓兄第2日叮o黎食都仲係脆, 學何超Honey話齋, 真係脆得有古怪...


今晚嘅主角出場... 就係2個邊爐鍋!!!


2010年2月20日 星期六

情人節第二撃のWii Sports Resort

20 February 2010, Saturday

大年初一細佬帶咗佢部新買嘅Wii Sports Resort同大家一齊玩, Honey玩得好似好開心咁...


大年初三去Honey嘅朋友屋企拜年, 主人家一早問朋友借定部Wii Sports Resort與大家同樂, Honey依然玩得好開心... 拜完年我地已經決定等Jusco感謝日買番1部...


大年初五去龍媽屋企拜年, 龍爸原來送咗Wii Sports Resort比龍媽做情人節禮物, 我先第一次試玩咋... 真係好想快D到20號...


終於等到啦... Yeah!!!


一返到Home... Honey忙於Setup...


你地話Set得似唔似...


好, 開波!!!


Honey知道龍爸買部Wii Sports Resort比龍媽做情人節禮物之後, 話"呢條橋幾Work喎, 一於照炒!!!"... 哈哈哈哈...


2010年2月16日 星期二

被爐

16 February 2010, Tuesday


大年初三, 一早起身去拜年, 拜完年食埋Lunch就可以返屋企休息下... 奔波咗幾日, 終於有得休息下...


今日係入冬以o黎, 最凍嘅1日!!! 之前點都忍住唔拎出o黎嘅羽絨(因為之前焗好咗入埋膠袋), 今日都要出o黎再次見人啦...


睇下, 大嶼山得5度咋...



之前睇交響情人夢果陣, 見過野田妹拎個"被爐"去千秋師兄屋企, 真係覺得呢種發明好正!!!


今日凍到開咗油爐係枱底都覺得凍, 於是就想試下自制"被爐"... 雖然唔係好完美, 但係都可以保持到小小暖氣嘅, 節省唔小能源架...



太古城中心歌舞昇平夜上海

13 February 2010, Saturday


年卅十晚係奶奶屋企食完飯, 返到太古都已經11點3, 我地竟然仲興致勃勃咁走去太古城影相, 之後仲話要去食糖水, 不過實在太飽, 食唔落... 跟住仲要慢慢行番屋企, 我都覺得自己好"冷街FEEL", 哈哈...



太古城中心歌舞昇平夜上海 - 表演節目表 (2月14至28日)
http://www.cityplaza.com/chi/hot_promotions/coming_attraction_items/8.htm

2010年2月13日 星期六

情人節第一撃

13 February 2010, Saturday



聽日就係情人節, 可惜... 今年冇得慶祝... HONEY尋日送咗盒朱古力比我... YEAH!!!


迎春接福


13 February 2010, Saturday



萬事俱備!!! 只欠1天!!!


利苑酒家 Lei Garden Restaurant

9 February 2010, Tuesday


今年第二餐團年飯, 係拉力早叙餐!!! 開餐前去咗花園街買咗隻醒獅, 之後路過見到有馬會, 順便入去發個橫財夢先, 哈哈...

原本我同力仔之前一晚上網做晒Research, 要Order咩餸, 可惜... 去到時個餐牌變晒... 係冇咩選擇嘅情況下, 唯有Order至尊燉品海鮮餐(四位用)...


坐位安排方面極之差!!! 我地3個人, 坐最細嘅圓枱仲要貼實幅牆, 前後被2張大圓枱夾住, 早兄被夾係牆同人地嘅椅背中間, 而我同力仔都同後面枱背貼背, 後面枱初時仲投訴太迫, 我心諗"你夠我地迫?!!", 仲要力仔側邊又有條大石柱頂住, 真係想郁下張櫈都唔得呀...


服務仲更加之差!!! 侍應冇禮貌兼黑面之餘, 人地話要影相但佢當你冇到, 一路分湯, 根本影唔到, 佢走咗之後先有得影... 食完D碟又冇人收, 狂揮手都冇人理... D餸都未上齊就已經冇晒位, 男部長話換隻細碟, 我即寸佢"仲有再細D嘅碟咩?", 佢答"冇", 我心諗"你唔係諗住換隻骨碟比我地呀嘛"... 跟住女部長仲要喝我地"你地唔好飲水啦!!! 飲茶啦!!! 冇位擺水壺呀!!!", 嘩, 呢D係咩服務態度呀試問!!! 點解會拎到米芝蓮一星o架呢間o野??? 同福臨門簡直係差天共地!!!


鹵水滑豆腐--豆腐一般啦, 花生好硬呀...


香蒜拍青瓜--都好一般咋喎...


至尊原盅燉湯--嘩... 好勁當歸味呀... 又可能係黨參... 好難頂呀... 不過飲飲下就覺得冇咁難頂... 之但係可能太噪, 所以飲一碗已經喉嚨痛... 同埋好多魚骨, 凍咗之後都幾腥...


石窩燒海斑件--呢個係全晚至美味, 而且海斑件好大舊, 又彈牙, D汁仲好入味, 一流...


翠玉炒鮮蟹鉗--個蟹鉗都好細隻吓, 但又勝在夠鮮, 而且一D都唔硬, 算唔錯...


沙溪燒米鴨--嘩, 又一好味之作!!! D皮燒到又香又脆又美味, 仲要一D肥膏都冇, 食到差D連骨都冇剩...


原湯泡田園青蔬--清清地, OK啦...


呢個一人一小煲嘅梅菜肉餅蒸飯, o係套餐餐牌係冇列出o黎嘅, 所以開頭侍應放低果陣, 我地都有D愕然... 但係... 呢一樣... 竟然最能夠同時奪取我地3個人嘅歡心... 仲要餸都唔食住, 係咁博命"爬"晒碗飯... 無他嘅, 只係因為呢碗飯, 好有童年時阿婆煮嘅飯嘅感覺... 童年回憶, 永遠最令人回味...


套餐餐牌上嘅蕃薯糖水, 最後竟然變成紅豆沙, 落單時又唔講, 激死...


是次每人消費約$333元
味道: 4 環境: 1 服務: 1 衛生: 4 抵食: 1
###
地址 : 旺角洗衣街121號
電話 : 2392 5184


2010年2月9日 星期二

新春拜年必備佳品... 3合1電動魚蝦蟹+大細+大話骰

8 February 2009, Monday


今日食完Lunch, 同C9同事去咗惠X掃糖果擺全盒, 收穫都幾豐富... 行到去收銀附近, 比我發現D好o野...


登...


電動版魚蝦蟹, 仲可以玩埋大細同大話骰... 好正呀!!! 只係28蚊咋, 比普通版貴DD, 好搞笑呀!!!


我決定咗初一帶佢返錦田大殺四方, 初五再帶佢去鑽宅亮相, 就算大家唔玩都有得笑下...



買定離手, 開))))))


2010年2月8日 星期一

Applegreen

6 February 2009, Saturday


今日中午去咗旺角火車站搵食... 都唔記得咗之前係邊個提過想去Applegreen, 不過就一直冇機會去...


入到餐廳, 只係見到一個頭頂, 唔使搵, 呢個一定係力仔... 都成12點幾, 唔早o架啦喎, 點解會冇人o架入面...


我地今次又係之前1晚已上網做定Research, 寫定菜, 一坐低唔使諗, 好快有得食, 哈哈...


 Iced Mocha--都幾滑, 咖啡味唔算好濃, 大大杯, 幾抵飲...



加州棒棒雞沙律(芝麻薑汁)--材料都幾豐富, 味道亦幾清新, 估唔到塊麵包仲幾好食...



芝士芥辣脆片(半份)--查實都唔知自己食咗D咩野落肚, 不過唔算難食嘅...



鼠尾草炭燒美國穀飼豬扒--個汁好正, 豬扒好軟好Juicy, 伴菜都好好味, 個薯條架好有氣勢, 好似營火會個火架咁, 好想圍住佢跳, hahaha...
另加伴菜蒜蓉包--賣飛佛, 包嘅底面都揸滿蒜蓉醬, Yummy...



焗蘋果酥--賣相一流, 我對蘋果批其實麻麻地, 但佢的確整得好食, 撈埋雪糕食更美味...



唔知係咪因為太早起身, 仲未瞓醒, 加上係屋企食咗個包當早餐, 所以冇咩胃口, 黑洞+百慕達都食唔晒D野, 好浪費...


是次每人消費約$212元
味道: 4 環境: 4 服務:3 衛生: 4 抵食: 2 
###
地址 : 旺角太子道西193號新世紀廣場7樓713-715號舖
電話 : 2628 3711


板長壽司 Itacho Sushi

4 February 2009, Thursday


今年第一餐團年飯係同王者食, 完全諗唔到... 查實係佢2009年嘅生日飯, 個期一改再改... 原本都要改期, 但之前1日又話唔改, 真飄忽... 都係果句, 同佢食飯, 至小要改期10次8次以上, 最高紀錄係14次, 所以我通常都準備定, 比佢放飛機時嘅後備節目...


我之前食過2次板長... 1次係8號風球, 趕頭趕命, 食而不知其味... 另1次係約咗王者, 等咗佢成個鐘都唔見人, 仲要失去聯絡, 加上我3點半都未食LUNCH, 餓到暈, 唯有入板長食3舊SUSHI頂住先, 一坐低佢就打比我, 又要我極速鯨吞...


呢間餐廳嘅裝修都算唔錯, 大部分都係梳化位, 環境都幾清靜, 可惜SERVICE真係一如網民所言, 差到不得了, 我開頭仲諗"係D人要求高咋嘛?", 點知原來唔係, 個WAITER全晚無故黑面, 好似D客殺死咗佢全家咁...





三文魚腩壽司--個樣都OK... (我冇食)
三文魚壽司--個樣都幾垃圾, 我係Jusco超市買嘅都靚過佢... (我冇食)
立魚壽司--我冇食, No Comment...



金三文魚壽司--個樣正常得多, 同埋厚D囉切得, 味道淡咗D...
秋刀魚壽司--平時其他地方多數係煎, 所以先叫o黎試下... (我冇食)



鵝肝壽司--鵝肝味偏淡...



特上海鰻壽司--嘩!!! 好長呀!!! 幾好味, 但好似甜咗D...



炸蠔--好熱呀!!! 辣嘴到吖!!! 蠔味都幾淡...



炸墨魚軟骨--味道尚可...



軟殼蟹卷--激死, Order錯咗... 一D都唔好食... 結果要再Order軟殼蟹手卷...



軟殼蟹手卷--買飛佛!!! 不過... 好似同元氣差不多咋喎...
南瓜天婦羅--南瓜肉好淺色, 一D都唔甜, No Good...



~ 第 2 Round ~


牛油果蟹肉沙律--超超超失望!!! 全碗都係生菜, 面頭有PAT牛油果, 蟹肉小到差D搵唔到, 連沙律汁都冇, 我比零分...



佐賀和牛壽司--唔係呀嘛... 生嘅!!! 大拿拿35蚊1粒!!! 我唔食咪好唔抵!!! 激死!!! 唯有合埋眼吞咗佢... 查實味道同熟嘅冇咩大分別, 不過成晚形住形住想嘔, 好彩最後都挨過咗, 冇事啫...
立魚壽司--我冇食, No Comment...
油甘魚壽司--我冇食, No Comment...



粟米沙律壽司--我冇食, 原本應該係No Comment... 但眼見黑面WAITER將原本個樣好正常嘅軍艦, 拎到我地身後時作一個大反身, 軍艦解體, 幾名船員跌咗落海, 佢SORRY都冇聲, 亳無悔意地放低, 我冇辦法唔將呢件事公諸於世...



北寄貝壽司--我冇食, No Comment...



呢間板長已經係咁多間之中, 係OPENRICE排名最高, 係味道我唔覺得值呢個價錢, 服務更係嚇死人, 我都係去番元氣吧啦...


是次每人消費約$170元
味道: 3 環境: 4 服務:1 衛生: 4 抵食: 2 
###
地址 :   尖沙咀亞士厘道9-11號順豐大廈地下
電話 : 2314 4033