侯斯頓西餐廳 Houston Restaurant & Cafe : 隱蔽美式小店

12 November 2012, Monday

係Mikiki同朋友飲完咖啡, 不想在Mikiki內吃那些連鎖式食店, 決定行過2個街口搵食... 店面位於休憩公園旁, 光線不足, 佑大的鍋貼招牌的強光把我們的視線蒙蔽, 看著地圖也找不到店子, 還行了一個大運, 最後差不多回到起點才找得到...

小店格局, 紅色的磚牆, 深啡色的木制品及天花, 予人溫暖的感覺...


店內還掛滿了美國名人的畫像, 提醒你這裡吃的是美國菜...

晚市套餐包括周打魚湯/田園沙律、主菜(有9款選擇)、咖啡/茶、甜品... 廚師推介的a la carte, 亦可加$40轉為套餐... 看到網民讚賞它的炭燒牛扒, 本想一試, 但礙於友人皮膚敏感要戒吃牛肉, 所以我們選擇了Ribs, 再加1客Risotto來Share...

田園沙律
-- 白醋沙律汁酸溜溜, 很醒胃... 沙律菜很新鮮, 材料很豐富, 除了生菜, 還有粟米、青瓜、車厘茄、罐裝水蜜桃... 份量十足, 吃罷已吃不下主菜...

芝士焗薯皮 +$45
-- 套餐加錢的Side Dish, 薯皮上鋪上芝士及煙肉一起焗, 香脆惹味, 芝士綿密香軟, Yummy!!!

大蝦黑松露忌廉汁意大利飯 $198
-- 大蝦爽脆彈牙, 唯沒有鮮味, 應該是雪藏的貨色... 黑松露忌廉汁很Creamy, 菌味香濃, 想不到的是飯中夾雜了很多菇菌... 意大利飯柔軟中帶點韌勁, 是出色的意大利飯...

Houston 美式燒豬排骨 $148 Half (+$40 轉Set)
-- 很壯觀的場面, Half Ribs居然如此大份, 慶幸沒有眼濶肚窄Order Full Ribs... 燒豬排骨肉質柔軟, 很容易切開, BBQ醬很惹味... 薯角入口香脆, 薯肉粉嫩... 這個廚師推介很美味!!!

熱檸檬水
-- 標準的咖啡/茶選擇, 檸檬角夾在杯上, 很特別... 但水的味道有點怪, 不像平時在家飲用的白開水...

朱古力雪糕配Oreo碎
-- 套餐的甜品可以加錢轉其他的, 不過我們初時一心想到九龍城食糖水, 所以沒有轉... 朱古力雪糕味道濃郁, 入口軟滑, 加上Oreo碎, 口感不錯, 讓平凡的雪糕帶點不平凡... 可考慮在家中設宴時為小朋友們準備這個甜品...

女厠很衛生, 而且香噴噴, 但是超超超超超級狹窄!!! 簡直不正常!!! 洗手盆竟然佔據了座厠上方的空間?!! 我的腰要被洗手盆狠狠地擦過, 才能把身體移近座厠, 彎下身時, 上半身把洗手盆擦得光潔閃亮, 嘔, 我體內的潔癖蟲又開始作動了...

整夜的服務也很好, 店員有禮親切, 直至店主回來後...

與老朋友很久沒聚, 每次吃飯也是雞啄唔斷至11時還捨不得離開, 但今次餐廳10時左右便關冷氣, 不需用這樣的招數趕客吧, 老實一點跟我們說要打烊不成嗎?!! 離開了餐廳, 我們站在道別的街角上繼續傾, 結果還是要傾到接近11時才捨得離開, 哈哈, 真是難捨難離呢... 當然啦, 因為下一次見面可能要等到3月才能再聚...

上次在Mikiki吃台灣菜時, 一田還在裝修中, 感覺這個區域很荒蕪, 離開時已11時半, 我們慌忙中乘Taxi離開... 今次做了功課, 原來餐廳後面有很多巴士站, 可以直達我家樓下的商場, 超級方便的!!!

是次每人消費約 $240 元  
味道： 4 環境： 3 服務： 4 衛生： 3 抵食： 3
###
地址 : 新蒲崗仁愛街50號地下
電話 : 2628 3581

得龍大飯店 Tak Lung Restaurant

20 November 2011, Sunday

我地今日去朋友新居探新B, 原本打算探完就去米芝蓮一星點心「添好運」, 不過朋友推薦另一米芝蓮菜館「得龍大飯店」, 原因係近佢新居... 係MIKIKI過條馬路穿條冷巷就係...

佢冇星o架, 只係被米芝蓮評為美味而價錢合理...

朋友幫我地BOOK咗6:30PM, 去到門口外面見到好多人排緊隊, 入到去餐廳, 舊式小菜館格局, 仲發現7人要坐4人枱, 仲要有條石柱係度, 大家見到咁嘅環境都冇出聲, 只係LALA聲食完走人... 坐響樹真係危機重重... 連圓櫈都放唔落嘅LA位, 竟然繼續成為上菜通道, D燒到熱騰騰嘅鍋響你塊面側邊擦過, 成排挨PAN櫈係你頭頂飛過, 真係食咗都唔消化...

 

蜜汁叉燒--味道好一般, 肉質乾咗D, 又唔夠幼嫩, 西苑好食好多...

馳名得龍燒鵝皇--味道好一般, 例牌都算幾多肉, 不過上枱時已涼涼地, 唔係熱辣辣...

嘩!!!!!! 咩o黎o架??? 個煲吉嘅入面???

原來D煮熟咗嘅菜係o黎到你面前, 先倒落個鍋度嘅...

蝦乾啫啫唐生菜--好香蝦醬味, 不過可能過多蝦醬, 所以鹹咗D, 菜嘅份量亦少, 2啖就冇晒...

山楂咕嚕肉--食唔到山楂味, 同普通咕嚕肉冇分別!!! 而且炸粉好多, 有幾啖咬落去一D肉都冇, 全口都係炸粉... 咦...

上湯肉鬆浸菜苗--都幾好味喎, 一D菜苗嘅青草味都冇... GOOD!!!

原籠金蒜糯米蝦--開邊蝦有D腥, 食一粒已經唔想再食... 糯米飯淋PAT PAT, 濕淋淋, 唔係一粒粒, 食剩一半都冇人願意打包, 服務員問咗幾次, 唯有比佢包起, 不過最後都唔覺有人拎走囉...

桂花糕, 紅豆沙(送)--桂花糕好香桂花味, 好得, 同埋足料到呢, 竟然冇紅棗係入面, 仲好冰凍添呀... 紅豆沙起沙又唔太甜, 味道都OK, 起碼冇打獻吖...

 

唔試過又點知麻麻呢... 評語 : 價錢的確便宜, 一試無妨!!!

是次每人消費約$130元
味道： 2 環境： 1 服務： 2 衛生： 1 抵食： 3
###
地址 : 新蒲崗康強街25-29號地下
電話 : 2320 7020 / 2322 3783

一台．台食 Perfect Match Taiwanese Cuisine

31 August 2011, Wednesday

同朋友探完B, 就去咗附近新開嘅「譽港灣商場 Mikiki」八掛吓兼搵食... 聽聞遲吓會開一田呀... WoW... 正呀...

落到LG好似入咗地盤咁, 好混亂呀!!! 加上指示不清, 我地係一步一驚心嘅情況下向前摸索... 哦... 原來好近就有幾間新開嘅食肆... 有泰式, 有韓式, 有台式... 朋友問我想食邊間, 我話好簡單, 邊間最多人就入邊間... 就係咁... 揀咗「一台．台食」!!!

定食唔包飲品, 所以我地一人叫一杯特調特飲...

宇治金時--嘩!!! 中招!!! 全杯都係碎冰o黎嘅?!! 餐牌都冇講!!! 仲要好專心都只係飲到好虛弱嘅抺茶味, 杯底有少少紅豆, 不過冇紅豆味... 唔通又玩1比99???
黃金歲月--朋友果杯都唔好得幾多...

定食包王功蚵仔湯或台南豬血湯... 朋友同我都接受唔到呢2種湯, 落單時講明唔要, 上菜時都夾硬每樣拎1碗出o黎... 搞咩呀?!! 我地又冇要你退番碗湯嘅錢, 你可唔可以唔好夾硬o黎呀, 你知唔知浪費食物好拆墮o架?!!

原來定食仲包台灣黑白切豆腐, 滷鵝翼, 頭份醋溜木耳... 我而家寫BLOG睇番個餐牌張相先發現咋... 除咗滷鵝翼係食咗落肚, 真係見唔到有豆腐同木耳囉... 唔通魚蛋係台灣叫黑白切豆腐??? 酸瓜係台灣叫頭份醋溜木耳??? 當時掛住雞啄唔斷, 真係咩都冇為意, 蝕底晒啦!!!

三杯雞定食--份量唔細, 三杯雞味道都OK, 滷鵝翼都入味, 粒魚蛋都可以... D酸瓜見到個樣已經決定放棄... 碗湯就更加唔會掂啦...

四季麻油雞定食--朋友都食得晒, 應該唔難食嘅... 碗湯同D酸瓜都係冇掂...

服務員都OK有禮貌嘅, 由得我地傾到10點, 佢地都收工先提醒我地離開...

當時都冇為意幾錢... 而家拎張單出o黎一睇... 嘩!!! 好似貴咗D喎... 好食就話幾貴都抵啫...

雖然2邊有SOFA位同卡位, 但係我地都係座中間一排排嘅長枱, 我當食快餐咋... 冇估過會過佰囉... 未體驗到個商場有幾貴氣(裝修-ing), 已經體驗到D餐廳好貴!!!

是次每人消費約$110元
味道： 2 環境： 3 服務： 3 衛生： 3 抵食： 1
###地址 : 九龍城新蒲崗太子道東638號譽港灣商場(Mikiki)LG7號鋪
電話 : 3579 4248