網頁清單

2012年1月30日 星期一

2012 國泰航空新春國際匯演之夜 Cathay Pacific Intl CNY Night Parade

23 January 2012, Monday

大年初一嘅必備節目一定係拜年啦!!!

中午係夫家拜完年, 就趕入新界食盤菜喇!!! 今年天氣寒冷, 得果10度唔夠, 再加上落雨, 但係千人盤菜宴依然座無虛席, 利害利害!!!


夜晚係娘家拜完年, 就趕去尖沙咀「國泰航空新春國際匯演之夜」睇花車巡遊...

舊年睇過一次, 今年又凍又落雨, 原本已經決定唔去睇... 坐緊車返屋企時又心思思想去, 最後都決定去...

打頭陣嘅依然係國泰航空嘅花車—「國泰伴你  展翅高飛」...

因為落雨, 冇帶單反機, 剩係用部Sony Cybershot WX5影, 所以D相麻麻地... 剩係POST D比較OK嘅相, 唔POST晒所有表演隊伍啦...

泰國政府旅遊局嘅花車中泰同歡樂 ‧ 雙龍齊獻瑞...

韓國全羅南道道立國樂團... 嘩!!! 個皇帝同皇后向住我地揮手呀!!!


第N次舞獅...


中華人民共和國國家旅遊局的「2012中國歡樂健康遊」

義大利奇趣樂團...

香港海洋公園嘅花車—「海洋公園精彩樂聚35年」...

英國Rampage嘉年華...

荷蘭蝴蝶高蹺人... 我好鐘意呢個高蹺表演, 表演者好似蝴蝶咁媥媥起舞, 好靚好優雅!!!


第N+N次舞獅...

香港賽馬會嘅花車—「駿馬金龍耀明珠...

香港迪士尼樂園嘅花車—「反斗奇兵玩餐飽」...

第N+N+N次舞獅...

日本佐賀唐津大節鯛魚花車... 全場至正!!!

香港旅遊發展局嘅花車—「亞洲國際都會」...

表演完畢, 離開時撞啱英國Rampage嘉年華嘅表演者, 佢地已經表演完兼回到起點, 好好人企定定比我地影張相... Thank You!!!

今年好離奇地坐番上年個位...


同舊年一樣, 每個座位都有1袋小禮物...


好彩成晚都冇落過雨, 實在太好啦!!! 不過D風勁大勁凍, 凍到手腳都僵硬晒... 但係現場睇真係好FEEL過電視睇好多!!!

花車巡遊小檔案: -

http://www.discoverhongkong.com/chinesenewyear/tc/night_parade_overview.html

日期 : 2012年1月23日(年初一)
時間 : 晚上8:00至9:30 (無線電視翡翠台現場直播)
路線 : 從尖沙咀香港文化中心廣場出發,沿廣東道、海防道、彌敦道
及梳士巴利道前行,以香港喜來登酒店為終點。


2012年1月27日 星期五

住家菜 Home Feel

16 January 2012, Monday

繼續一月之星大飯局... 龍媽今次揀呢間「住家菜」真係冇得彈, 比個讚佢!!! 點正法?!! 睇吓咪知囉, 拎定口水肩喎!!!

鑑於部份菜式需要預訂, 而且餐廳話明多人等候的話要8:30PM交枱, 咁如果我地7:00PM去到仲要等齊人先慢慢開始討論揀咩餸, 睇怕到8:30PM都冇咩食到落肚囉... 有見及此, 龍媽一早就預訂定個6人餐(鑽媽同無敵表明會缺席), 價錢唔係太貴($888), 又有齊D招牌菜...

過咗10分鐘都仲未齊人, 上住D頭盤食住先啦... 唔係驚等陣8:30PM收枱我地食唔切... 好彩一上D前菜就齊晒人, 可以即刻上埋其他啦...

前菜小品5選4...

(右)卥水牛展--OK喎, 幾入味...
(左)豉油皇鴨舌--都OK喎... 不過原來唔係人人都食舌, 所以我1個人食咗半碟...


(右)黃金海蜇頭--嘩... 好硬...
(左)香蒜拍青瓜--OK, 幾爽, 係鹹咗少少...


老火湯--好味呀!!! 大家一致讚同好甜!!! 冇留意係咩湯, 不過見到煲入面有粟米, 紅蘿蔔同廋肉...


清蒸海上鮮--是日靚魚係西曹, 可以清蒸或者豆豉蒸, 我地幾個都揀豆豉蒸... 條魚都幾大條, 仲蒸到啱啱好, 熟得o黎又唔韌, 我地冇為意個餐有跟飯, 仲叫咗2個白飯撈汁食, 好正!!! 我由頭帶到落尾, 食咗起碼3份1條...


雞類(半隻)3選1...

招牌阿嫲雞(要預訂)--份量都唔少, 大家都讚味道幾好, 一陣間就清晒成碟...


海虎蝦(每位1隻)做法6選1...

豉油皇海虎蝦--都好大隻吓, 好好味, D蝦肉就唔夠爽, 淋咗少少...


我地一路食一路笑話咁多餸, 好似做緊節咁... 而家寫BLOG睇番個餐牌先知, 原來呢個係冬至嘅餐牌... 唔怪得D餸咁做節FEEL啦...

冬至特選6選1...

蠔皇花膠燴海蔘--花膠唔夠膠, 海蔘都OK... 蠔皇味唔夠入味...


各式小菜9選2...

脆香琵琶豆腐(要預訂)--幾鹹同埋好大陣冬菇味, 我個人o黎講, 麻麻地鐘意D豆腐咁樣撈完再炸...


鮮雜果咕嚕肉--未見過咕嚕肉有火龍果, 幾新奇呀吓... 味道都幾好味, 估唔到...
 
腐竹蝦乾浸時蔬(散叫)--見個套餐冇咩蔬菜, 所以另外加多1個餸... 呢味我麻麻地好, 因為個湯好似幾重白果味...


太極兩儀飯(可選金菇肉鬆燒伊麵)--食完晒咁滯佢先上, 見到咁大碟飯都O咀, 早知唔食白飯啦... 頭先唔肯食白飯果班友仔, 又狂食呢個飯, 搞到我都忍唔住要食2啖睇吓係咪真係咁好食... 咦... 又真係幾好食喎... 左邊係薑粒蛋白炒飯, 右邊係糯米飯, 店員再三提醒一定要撈勻食, 如果唔係, 蛋白炒飯會太乾硬, 糯米飯就會太濕...


是日糖水--腐竹糖水, 外表平平無奇, 飲1啖... 嘩!!! 好重勁嘅腐竹味, 仲幾"傑"吓, 甜度適中, 正到痺!!!


壽包(送)--餐牌冇寫明話送, 所以唔知點解有得送, 唔知係咪因為有人生日就有, 大家要自己打去問清楚... 食咗幾啖, 覺得D蓮蓉有桂花香味, 不過其他人好似食唔出咁, 仲話果D係蓮蓉味... 唔通我有幻覺?!! 唔緊要啦, 總之係"好味"係啦...


第一次食生日飯食到好似團年飯咁, 真係好搞笑... 之但係區區6位女士就可以幹掉以上所有食物(除咗打包走少少飯), 的確係能人所不能!!! 哈哈哈哈...

接近尾聲, 原來個餐仲有啤酒汽水o架!!! 唔係呀嘛, $888個餐包咁多o野?!! 呢度話晒都尖東喎?!! 雖然飽到嘔, 都夾硬飲咗鑵忌廉, 呵呵呵呵, 超滿足呀!!!

又汽水又湯又糖水又茶, 真係成肚水... 好彩商場嘅Toilet超乾淨...

最後我地係傾到10點幾先走囉, 冇比人趕走到, 真係Unexpected!!! 讚!!!

是次每人消費約$180元
味道: 4 環境: 3 服務: 4 衛生: 3 抵食: 5
###
地址 : 尖沙咀麼地道68號帝國中心UG50-57號舖
電話 : 3105 0515

2012年1月26日 星期四

金饍韓國料理 KimChee Korean Restaurant

15 January 2012, Sunday

康怡廣場北座大變身測試第2激!!!

Honey忽然話想試吓間新開嘅韓國餐廳... 又試新o野?!! 唔通已經忘記咗上次「玉桃軒」嘅教訓?!! 不過呢間「金饍韓國料理」4年前同早兄係旺角食過, 都唔錯, 好, 就去試吓啦...

餐廳入口都裝修得幾靚o架, 帶位員仲著晒成套傳統韓國服飾, 好認真...


餐廳入面大部份都係梳化位, 都坐得幾舒服... 仲有好多韓國調味料做裝飾品, 唔知廚房煮煮吓餸會唔會走出o黎拎D去用嘅呢...

Order咗2個Set Lunch試吓...

初時見到經理抽住2個木架仔, 仲以為咁有型, 前菜都上到好似High Tea咁?!! 原來唔係, 個木架只係用o黎運送前菜, 係唔上枱嘅...

套餐包3款指定配菜--O晒咀!!! 食咗幾十年韓國菜, 第一次見... 得2個人食, D前菜竟然係重複2份嘅囉!!! 咁都得?!! 唔係呀嘛?!! 重要係勁難食嘅囉!!!

左邊嘅快餐專用伴菜真係掂都唔想掂, 我而家唔係o黎食港式快餐呀, 唔該...
中間嘅KIMCHEE亦食得出冇誠意, 只係食咗一啖...
右邊嘅炒粉絲落重黑椒, 得個辣字, 唔掂!!!

泡菜櫻花豚炒年糕--辣到食一啖已經食唔到, Honey都要浸落D牛肋骨汁度洗吓先食... 年糕唔太彈牙, 唔夠QQ...

炆牛肋骨飯--牛肋骨勁多, 抵食!!! 味道都OK, 如果個汁再香D濃D就正喇... 唔知點解咁孤寒, 呢個Set Lunch居然會冇餐湯...


整體食物有待改善, 咁嘅價錢, 暫時都係去番「名家韓國餐廳」好D... 果度雖然冇人著傳統韓國服飾, 但係大部份服務員都係韓國人, 食客亦好多都係韓國人, 感覺上地道好多...

是次每人消費約$80元
味道: 2 環境: 4 服務: 3 衛生: 3 抵食: 2
###
地址 : 鰂魚涌康山道1號康怡廣場北座3樓1號鋪
電話 : 2628-0266

2012年1月20日 星期五

甜蜜蜜甜品專門店 Happy Together

13 January 2012, Friday

去「Our Wonderland」食飯之前, 逛咗一陣街, 路過厚福街時, 見到呢間「甜蜜蜜甜品專門店」門口貼滿晒「甜姐兒」嘅海報, 所以就提議大家o黎呢度食飯後甜品...

9點鬆D去到, 要等4張枱, 都唔算多喎... 等咗一陣間就入得, 居然仲有靠牆位置坐, 正!!!

如果坐門口位置會比較迫D囉...
 
4個人Share 3個甜品...

迷你大堆頭--居然用IKEA膠碗上, 有少少反胃... 味道還可以, 龍媽話好食過B仔...

炸香芒春卷伴芒果沙巴翁--上枱時, WOW WOW聲... 造型100分!!! 雖然話係春卷, 不過唔脆, 淋淋地... 芒果餡勁甜, 我地估加咗好多糖, 因為芒果味唔出... 個芒果沙巴翁唔蘸會好D, 蘸埋會好膩...

焗酥皮豆腐花伴朱古力汁--全餐最敗筆之作!!! 仲要等咗30分鐘先有得食!!! 酥皮一般酥, D豆腐花整到碎濕濕咁, 個朱古力汁又稀NEL NEL同個豆腐花好唔夾, 個酥皮就更加同豆腐花冇計傾...


鬆人時, 門口已經迫滿晒人...

都唔係咁好食啫, 又貴, 都唔知點解會咁多人...

之前睇電視晚晚睇到流晒口水, 仲以為樣樣都好好味, 原來只係咁... 唉... 又再被老點...

影相時終於記得教番去PRESET MODE, 不過竟然係教咗去美肌模式, 到尾聲先發現SET錯MODE, 唔係呀嘛?!! 痴呆-est...

是次每人消費約$30元
味道: 2 環境: 2 服務: 3 衛生: 3 抵食: 2
###
地址 : 尖沙咀厚福街5-6號地下2號舖
電話 : 2311-6078

2012年1月19日 星期四

Our Wonderland

13 January 2012, Friday

一年容易又過去, 轉眼間壽宴嘅Cycle又再由一開始喇... 新一年新開始, 本應要有個好開始先係, 不過... 明明由鑽媽提供嘅一千零一日, 佢居然都放大家飛機?!!

由於時間緊迫, 一月之星好果斷咁揀咗壽宴嘅地點「Our Wonderland」, 仲Book埋位先發通知比大家, 好勁呀妳D效率!!! 比10個讚妳!!!

臨放工先醒起今日係黑色星期五(Black Friday), 希望唔好有咩事發生啦...

放工時交通出奇地好順利, 一早就去到尖沙咀, 仲可以行陣街先上餐廳... 我同貓兄早到咗, 而其他人就...

間餐廳嘅格局實在簡潔過簡潔... 好彩都坐得幾舒服... 不過Book位同入座時都講明9點要還枱, 感覺有D趕咁囉, 唔可以傾耐D計...


睇完餐牌都決定唔到食咩好, Order個4人餐, 唔使煩...

意大利香草包--包身比較乾硬, 香草味不足, 同埋個包唔暖, 有被大家嫌棄嘅感覺...


是日餐湯--輕輕飲咗一啖... Oh No!!! 蘑菇湯!!! 放棄...


頭盤3選2...

蘋果鮮蝦沙律配柚子汁--配搭幾新鮮, 味道都幾清新, 份量只夠1人1啖...


芝士肉醬焗薯角--薯角淋PAT PAT, 芝士肉醬一D都唔好味...


Pizza 3選1...

意大利水牛芝士薄餅--D芝士一D都唔似水牛芝士, 個薄餅味道好淡, 餡料又少, 個餅邊又燶又硬, 唔多Alright...


飯麵4選1...

海鮮墨魚汁意大利飯--貓兄話個樣似豆豉飯... 我都覺得個賣相極之唔吸引... 味道只有一個鹹字... 不值一試...


是日甜品--士多啤梨雪糕伴Brownies, 塊Brownies細得可憐, 但係佢係全晚最好食嘅!!! 暖暖地, 好濃朱古力味, 讚!!! 士多啤梨雪糕味道都OK, 可惜冇果肉, 應該唔係貴價雪糕...


餐飲--咖啡或茶加10蚊可以轉其他飲品, 咁緊係全部人都轉啦... 原本我想飲榛子咖啡, 不過被貓兄阻止, 所以轉飲榛子朱古力... 味道都OK, 賣相都唔錯...


入座時見到DXS卡/COMPXSS卡有9折, 但係冇人有帶係身, 好彩原來餐係冇折嘅, 呵呵, 太好喇, 冇蝕到...

食到尾聲, 無啦啦發生爆炸巨響, 嚇死人咩?!! 咩料呀?!! 定一定神, 嘩!!! 原來係KaKaMa打爛咗隻玻璃水杯, D玻璃碎飛到週圍都係!!! 搞咩呀?!! 職員都好緊張, 即時撲出o黎問大家有冇受傷, 知道係我地自己打爛個杯都冇黑面, 仲比咗一大堆紙巾比我抺乾D衫, 仲極速清走D玻璃碎...

服務真係冇得彈!!!

今日專登帶咗部SONY相機o黎影靚靚食物相, 不過唔記得教去美食MODE, 結果D相影到黑麻麻... 老人痴呆症又再嚴重咗...

是次每人消費約$180元
味道: 2 環境: 3 服務: 5 衛生: 3 抵食: 2
###
地址 : 尖沙咀金馬倫道5號太興廣場5樓
電話 : 2312 2213