26 January 2019, Saturday
唔知邊個咁好雅興,居然提議去沙田龍華食乳鴿懷緬過去~(我懷疑可能係我🤣)
順便提早食埋團年飯啦!
原本已經要攀山涉水,千里迢迢先去到……
唉……仲要遇上幾小時前發生嘅嚴重交通意外所造成嘅大大大大大塞車!(係沙田第一城落車行路過去龍華應該快過轉車😑)
黐鬼線!過咗沙田第一城,轉個彎塞半粒鐘,落車過對面馬路,等巴士又半粒鐘,好唔容易塞到上車門,連落車鐘都㩒唔到,要拜託企係個落車鐘旁邊位男士幫我㩒。人上到巴士,但架車塞到唔識郁!坐咗2個站,又半粒鐘!
*Google Map完全無顯示「紅色」,「黃色」都無囉,條路係「藍色」!(塞到咁都仲算暢通無阻?)
好唔容易落咗車,穿過禾輋邨,再過埋行人天橋,Google map開始亂指一通!!!(越行越唔對路,問咗2次當地人要行到正確嘅路)