花華和食屋：好蟹呀！

11 April 2026, Saturday

今日第4餐……😆😆😆

左揀右揀，終於黎咗我想食好耐嘅日本餐廳，不過就唔係食我想食嘅巨型芭菲“良德街の小霸王”，我完全唔知道呢道原來最正係拉麵～

以我呢個麻麻地鍾意食拉麵嘅人黎講，我都覺得佢個拉麵好好食，咁即係佢個拉麵真係好好好食～😆😆😆

盤子工房：屯門牛，起身食早餐啦喂！

11 April 2026, Saturday

跨越半世紀的約會……完滿落幕！短短的1小時，尋回散失的零碎記憶碎片，為我嘅人生補好補滿！💖💖💖

貓兄先返屋企執吓屋，等陣再會合～

我同老大搵間餐廳食個靚靚早餐先～

JEP by Involtini：屯門牛想食意大利菜唔駛再搭車啦

16 March 2024, Saturday

大長Jump！

入屯門食餐飯車程要2小時，到底要有幾大決心先可以令一條懶蟲躝出屋企門口，仲要走得咁遠？！😂😂😂

Da Da……台山三寶拜年飯！！！🥳🥳🥳

屯門真係變晒，點會想像到屯門都會有米芝蓮餐廳……仲要個環境咁Chill…… 

屯門牛好幸福呀！💖💖💖

秋香：必試鹽燒白鱔煲仔飯

8 February 2023, Wednesday

繼續「開發大西北」系列～

同龍媽去完樂啡嘆咖啡同聽黑膠唱片之後，就行去秋香同貓兄會合～

秋香個名好中式囉，但餐廳個外型好東南亞FEEL，餐牌就玩日式居酒屋……媽呀！我好亂呀！

樂啡：黑膠唱片騎士咖啡師

8 February 2023, Wednesday

上星期先拜完年，駛唔駛咁黐纏呀，又食～

仲要食完元朗又食屯門，知唔知人地一來一回車程要4個鐘架！

龍媽極力推薦！話呢度好正架，可以坐好耐～😂😂😂

對住輕鐵路軌果邊門係入唔到嘅～

Thre3 concept：瓹窿瓹罅都唔一定驚為天人

27 October 2022, Thursday

前文提要……

今日LUNCH同龍媽係大坑炳記飲咗奶茶食咗多士豬扒雞翼，係HEY DAY飲咗咖啡食咗CAKE……

跟住飽住入屯門會合貓兄去頂立又再飲咗咖啡又再食咗CAKE……

我真係飽到隨時嘔得出囉～

我地又行緊去食第4餐啦～

我已經講明你地食啦我每樣咬1啖試吓味架咋～

龍媽真犀利，為咗食，瓹窿瓹罅都搵到～

頂立：烏冬咖啡店

27 October 2022, Thursday

前文提要……

係台灣幫龍媽買咗海邊走走，要盡快送貨……

試完大坑名物炳記，去埋HEY DAY飲咖啡食甜品……

張櫈都未坐暖，貓兄忽然問去到邊？搞到我地要狼吞虎嚥，急急腳坐巴士入屯門……Deliver埋D台灣代購&手信……

好，入返正題～

我地原定計劃唔係去呢間嘅……

千里迢迢去到和洋茶食……拉咗閘……

轉彎去木玥巷……又休息中……

我地想係食晚餐前搵個地方坐低飲杯野啫，都咁難嘅……

再轉彎，就見到呢間烏冬咖啡店……唔想再搵，雖然好創新，即管試吓啦～

隱啡：咖啡果皮茶vs Hidden Coffee Signature

4 September 2021, Saturday

大鄉里入城……

Crazy的一天……

食完Lunch飽到暈，又話行去下個街口飲咖啡，重點係……件Cake喎！

飲完第1餐下午啡，去屯門市廣場行個圈又話飲第2餐下午啡……救命！我識埋D咩朋友呀究竟！🤣🤣🤣

屯門牛居然都會講個「遠」字，記憶中，全個屯門都係用腳行到去，除咗碼頭……

講緊嘅係虹橋，屯門牛形容為「好遠」！🤣🤣🤣

事緣我地行緊去隱啡，我唔知點解覺得再向前行就係虹橋～🤣🤣🤣

Kaleido Coffee：屯門牛嘅咖啡店

4 September 2021, Saturday

大鄉里入城……

食完Lunch飽到暈，又話行去下個街口飲咖啡，重點係……件Cake！

Crazy的一天……正式展開！！！🙈🙈🙈

唔係講少，真係轉個彎就到～

好彩早黎咋，仲有位，間舖得6張2人枱，之後眨吓眼就Full晒啦～

彩虹煮意：屯門牛指定餐廳

4 September 2021, Saturday

大鄉里入城……

貓兄二話不說就話要去Rainbow……真係咁好味？

離鄉別井幾廿年，唔認得路是常識吧～（關咩事吖，有人係上環就已經搵唔到巴士站，差D追車尾要等20分鐘先有下一班車呀！）

一落巴士，一過對面馬路……嘩！而家真係屯門好多牛呀！勁擠擁，以前係呢邊想搵隻人睇吓都無架！

跟住……我又盪失路喇！🤣🤣🤣

到咗商場，行咗3邊都無果間餐廳，入埋商場入面搵都無，原來係第4邊！

無得訂位，要一早去門口排隊，我地計好時間去食第2輪，好彩係門口傾咗陣都唔駛半個鐘就有位喇～

好日子

13 February 2011, Sunday (年十一)

今日E5的團拜日子, 又凍又落雨, 千里迢迢咁入到屯門, 竟然冇得同宇宙最強＠妹妹玩, 又冇得同勁舞DANCING豬＠妹妹玩, 我唔制呀))))))

感謝貓兄幫忙等位, 辛苦晒!!! 大時大節, 中午時段, 等位飲茶絕對係超難...

燒腩仔--都幾香脆, GOOD!!!

蘿蔔絲蝦餅--外表相當嚇人, 但味道都OK喎...

蝦腸--不錯...

炸兩--好似唔記得食...

鳳爪--不過不失...

流沙包--冇機會食, 因為平時唔食野嘅宇宙最強＠哥哥竟然一口氣食咗2個, 相信... 一定勁好味...

腐皮卷--脆脆的, 不錯...

沙律卷--好好味呀!!!

點心拼盤(潮式糯米卷, 蝦餃, 唔知咩餃, 千層糕)--個賣相好嚇人, 好似一打壽包咁大個籠, 送餐放低時, 我仲同佢講我地冇ORDER喎, 哈哈...

燒賣--不過不失...

印象中, 之後KaKaMa一家到臨後, 有加單, 不過大家已經忙於講八卦消息, 所以唔記得影相...

感謝鑽媽請客, 下次黎我地頭, 我請客!!!

飲完茶同貓兄行陣街, 行行下重臨舊地, 感觸良多... 8B成員對呢張相應該一D都唔陌生啦, 哈哈哈哈...

是次每人消費約$90元
味道： 3 環境： 3 服務： 3 衛生： 3 抵食： 3
###
地址 : 屯門屯隆街2號屯門時代廣場北翼地下39號、51-53號舖
電話 : 2618 9392

容龍海鮮酒家 Dragon Inn Seafood Restaurant

6 March 2010, Saturday

是日探訪鑽家, 為遲來的拜年及生日會... 可惜另一小壽星未能出席... 唔緊要啦, 下次啦, 總有機會!!!

貓兄為鑽鑽親自下廚... 登登登登... 朱古力芝士蛋糕!!! 都幾好味呀, 係朱古力味唔夠濃啫, 對於我呢個鐘情Mrs Fields Triple Chocolate Cookie嘅朱古力痴o黎講... HaHaHaHa...

之後我地去咗三聖村買海鮮... 正確D黎講, 係睇人買海鮮... 因為鑽媽識得果度D熟客仔, 熟客仔幫我地揀海鮮, 咁就唔驚比人呃啦... 多謝你呀, 熟客仔先生!!! 店員好Nice, 仲不停問我地要唔要同龍蝦合照...

買完海鮮就徒步去容龍"別墅"... 都起碼有廿年冇去過容龍, 細時係屋企人帶去, 想當年果度係有麻雀耍樂嘅...

上湯米--鑽鑽嘅私家食物...

容龍乳鴿--都OK多肉, 味道都OK...

豉油王原隻乾煎大蝦(海鮮加工)--嘩!!! 好好味呀!!! 好大隻, 啖啖肉, 仲好彈牙呀!!! 味道仲啱啱好!!! D殼又甜又薄又脆, 食咗落肚都唔覺...

芝士開邊龍蝦(海鮮加工)--又係大大隻啖啖肉, 用芝士同牛油焗架, 個皮脆脆地, 口感好特別, 一句講晒, 好味呀!!!

豉椒炒蟶子(海鮮加工)--我平時好小食蟶子, 因為覺得佢同生蠔一樣, 滑潺潺, 咦... 怕怕!!! 但係今次呢隻蟶子, 如果上碟時冇咗D殼, 我真係會以為佢係魷魚囉, 大大舊, 好彈牙, 正呀!!! 只可惜... 食到尾有小小沙, 即刻冇Mood...

蒜蓉粉絲蒸元貝--好大粒元貝呀, 好新鮮, 粉絲唔係太入味, 但仍然好正!!!

砵酒焗本地生蠔--生蠔我係唔食嘅, 熟蠔都唔多食, 不過佢呢個都整得OK, 一D腥味都冇, 亦冇滑潺潺嘅感覺... 簡單D黎講... 如果唔好食, 我食1隻就唔肯再食囉... 呢碟... 我前後食咗3隻囉... 呵呵呵呵...

蒜蓉蒸糕蟹糯米飯--嘩!!! 好大籠呀!!! D蟹仲好多膏呀!!! 仲好多蒜蓉同油呀!!! 食完都要側側地面同人講野, 驚人聞到果陣蒜蓉味...

再加個油鹽水浸菜遠, 4大1小, 差不多啦... 有甜品送, 係我至愛嘅紅豆沙... 仲有西瓜送, 都幾清甜呀...

熟客仔介紹, 埋單有9折, 爽爆!!! 買海鮮用咗$6XX, 容龍用咗$623, 即係$3XX 1個大人左右啦... 話好平又唔係, 不過唔算貴囉...

星期日晚坐滿晒客, 都幾嘈下, 8點幾門口都仲有好多人等位...

是次每人消費約$3XX元 (未知買海鮮exactly用咗幾多錢)
味道： 4 環境： 3 服務： 2 衛生： 2 抵食： 1
###
地址 : 屯門青山公路19咪半
電話 : 2450 6366

季季紅乳豬

18 February 2010, Thursday

大年初五原定去鑽鑽屋企拜年, 可惜鑽鑽同鑽媽都病咗, 唯有臨急轉去龍媽度... 鑽鑽, 鑽媽, 你地要好好休息, 快D好番呀!!!

平時好唔認真咁準備食物嘅我地, 今次竟然出奇地認真, 要出動到2個美少婦+2個美少女去買餸... 何超仲一早Order定滔滔推介嘅季季紅乳豬... 當日5點先開始燒... 打開個袋一聞... 嘩... 真係好香呀!!!

呵呵... 開鏡儀式... 剪落去果一下, 係超脆囉...

可以剪到2大碟o架, 放到11點先食都仲係好脆, 貓兄第2日叮o黎食都仲係脆, 學何超Honey話齋, 真係脆得有古怪...

今晚嘅主角出場... 就係2個邊爐鍋!!!

一餐飲咗4個鐘頭嘅茶 @ 喜喜中國廚房

今日(2008年2月17日)係八美圖新春團拜嘅大日子...

 

我今朝8點幾已經起身(早過番工), 10點3出門口, 順利係10點11去到灣仔搭巴士, 可惜... 等咗好耐... 一架巴士都冇... 先發現巴士因為渣打馬拉松改路... 上到巴士都冇用, 全程慢駛, 可能因為對面線d選手仲跑緊... 各位姊妹, 要你地久等, 真係唔好意思...

 

屈指一算, 我地好多年冇咁齊人同咁早一齊飲茶, 今次都算利害...

 

呢度d點心都幾特色, 好似腸粉(一條過)呀, 馬拉糕(一籠6件)呀咁, 我都未見過咁有型有款嘅買相...
坐位又極度舒適, 裝修又靚, 新年仲唔加價, 最重要係有得book位, 正!!! 唔該晒dd幫手book位, 謝謝!!!

 

睇下張枱d氣勢幾強勁勁勁勁勁!!!我地幾顛, 總共食咗49個點心呀(吸到張點心紙都冇咩位剩)!!!

 

由於暈妮2點57分先到達(我地開頭約12點正, 後來想多d時間傾下計, 所以改為11點30分), 結果... 呢餐茶飲咗超過4小時, 大家仲幫我諗埋今篇blog嘅主題, 喂, 唔該晒喎...
由於接到好多讀者熱烈要求, 要將暈妮呢位大美人嘅樣貌, 原汁原味放上blog, 仲唔要公仔遮面, 咁我唯有就範啦, 不過... 始終做唔出手, 唯有幫佢整番個黑超啦!!!

 

P.S. Miss Chan Chan, 唔好意思呀, 就唔到你d時間, Sorry Sorry!!!

 

是次每人消費約$100元
味道： 4 環境： 4 服務： 4 衛生： 3 抵食： 3

戰鬥指數

###

地址 : 屯門海榮路22號屯門中央廣場1樓
電話 : 24410313 

流金歲月 China Gold Cuisine

今晚(2007年6月17日)有５合１慶祝活動... 所以要返屯門食飯...

點５合１法? 咪係父親節 + 阿媽/大家姐/二家姐生日 + 童童畢業禮 囉! 除咗我同細佬, 佢地全部人下午都去咗參加畢業禮, 肉酸仲爭取代替大家姐上台攞獎, 未免過於投入了吧, 只是幼稚園畢業喳噃!

我早咗半個鐘到, 係電器部撞倒細佬一家三口, 於是一齊去攞位! (因為上次同八美圖去過, 有訂位都要係門口等咗45分鐘, 所以今次早d去登記)

係門口等位時, 細佬太太比佢個心肝掟"酥兒BB"比我抱下, 然後細佬同細佬太太扮bye bye走咗去, "酥兒BB"竟然冇喊, 兩夫婦見狀後, 竟然好放心走咗去行街, 回來時仲食住雪糕, 好o野, 佩服! 佢兩個緊係好耐冇過過2人世界喇, 咁都得!

原本"酥兒BB"一路都冇喊, 但父母回來後就咋嬌狂喊, 蝦死佢地!

因為父親節的關係, 7:00pm入場, 8:30pm就要離場, 但人多(12大4小+"酥兒BB")叫菜特別慢, 最後都要我出手, 亂叫一通, 叫完都冇咗半個鐘! 叫咗11個餸, 唸住好夠食, 點知碟碟都好似d前菜咁細碟, 根本唔夠食, 太離譜, 見倒都冇mood影相, 不過味道就唔錯! 最後都要叫多4個甜品先夠飽!

我地叫咗: -
花雕醉雞
蒜泥白肉
松鼠桂魚
茶香雞
蒜子浸翡翠苗
四季豆
招牌小蘢飽
咖哩蟹 跟蒸&炸銀絲卷
雪菜肉絲炒年糕
石鍋黑豚肉炒飯 (最後溜咗單, 冇得食)
高力豆沙
擂沙湯圓

我嘅"湊仔能力"形象唔知幾時提升咗咁多, 當大家姐問我係咪帶童童去disney嘅時候, 細佬同細佬太太即時叫我帶埋"酥兒BB"去, 喂, 我一個點帶兩個呀? 跟住連姑姐都叫我帶埋佢個女(1997年出世--全年免費入場喎)去, 哈, 你地未免太睇得起我喇啩!

###

地址: 屯門屯門巿廣場第一期2016-2017號舖
電話: 2613 0083