網頁清單

2012年5月31日 星期四

大榮華圍村菜 Tai Wing Wah Village Cuisine

23 May 2012, Wednesday

放工落灣仔買o野, 路過「大榮華」, 指定動作... 買南棗合桃糕!!! 呢隻包裝大大件夾抵食, 出面其他牌子賣到好貴, 佢都仲係賣緊35蚊~ 其他中式餅都係7.5蚊1包, 好抵呀!!!


買完o野, 準備走, Honey見到大大張紙寫住「圍村菜」, 佢話不如試吓啦...

上到樓上, 嘩!!! 食神「滔滔」坐鎮呀!!! 我地仲坐正係佢隔離枱呀!!! 之前去九龍灣果間「大榮華」都見到佢係果度坐鎮, 真係好鬼勤力嘅啫~
 
「圍頭小菜」超過100款, 全部都係70蚊~ 點菜紙成張A4紙堆滿晒小菜名, 睇到都有d暈~ 逐樣睇睇都用咗唔少時間~

明火例湯--阿姐熱烈推介是日靚湯, 椰子煲雞... 嘩!!! 70蚊咁大煲?!! 唔使咁抵呀?!! d湯好好飲, 好重椰子味, 同埋雪耳嘅膠質溶晒入碗湯度, 好滋潤呀!!! 姊妹們必飲~

鄉村南乳煎米鴨(半隻)--嘩!!! 75蚊咁大碟?!! 鴨皮冇咩肥膏, 仲煎到脆晒, 南乳好惹味, 鴨胸好鬼多肉, 隻鴨脾仲好大隻添呀, 仲唔使咁足料呀?!!

銀蝦乾韮菜花炒鹹豬肉--鹹豬肉用五花腩, 肉地紮實, 韮菜花爽脆, 香口小菜, 送飯一流~ 蝦乾就失色少少, 冇香味~

砵仔飯--用砵仔蒸飯, 粒粒受熱均勻, 飯身比較乾, 唔會濕淋淋, 再自己加頭抽豉油同豬油撈飯, 都幾特色~ 我要好少豬油得啦, 唔該~ 頭抽多d都冇所謂~


紅豆沙, 麥米粥(送)--Honey話點解個組合同西苑一模一樣嘅?!! 論送嘅糖水, 西苑真係超晒班!!! 呢度... 就真係一般酒樓送嘅質數囉~
 
唔知係咪因為老細坐正響隔離, d員工特別好服務, 經常換碟, 又不停幫我地舀湯~ 比美5星級酒店~

Toilet超乎想像地乾淨, 行入去有香味, 好清潔, 好寬敞, 同九龍灣比較簡直一個天一個地~

埋單時先知道只收CASH, 好彩有足夠嘅現金係身啫~

是次每人消費約 135 元
味道: 3 環境: 3 服務: 4 衛生: 4 抵食: 4
###
地址 : 灣仔史釗域道1號地下及1樓
電話 : 2511 1663

2012年5月30日 星期三

鴻星海鮮酒家 Super Star Seafood Restaurant

23 May 2012, Wednesday

太古坊鴻星12:00前埋單嘅早茶抵食又好食, 特價得o黎唔會將貨就價, 食物質數與正價時段無異, 所以我同Honey經常都會去幫襯... 不過唔知係咪撞正員工用膳時間, 只得3-4個人做o野, 服務接近「零」, 經常都食得幾勞氣, 唔係因為地點方便價錢OK食物又OK, 真係唔會去受氣囉~

今日去到, 如常冇人帶位, 如常自己行入去, 如常服務員見到你都扮見唔到, 如常自己搵位, 如常坐低都係當睇你唔到... 唔想勞氣?!! 唯有自己行去收銀處度拎點心紙, 順便叫佢開埋茶, 跟住就有個「哭喪著臉」嘅阿姐走埋o黎開茶...

如果你有報紙係手, 飲完茶會比d阿姐拎去賣嘅話, 咁就唔同講法喇!!! 你埋咗單起身鬆人阿姐都會企定定同你雞啄唔斷十幾分鐘, 就算其他茶客問佢拎點心紙佢都會視若無睹, 眼中只有你~

如果你係單身中年男士, 睇落生活悠遊, 女部長都會企定定同你雞啄唔斷十幾分鐘, 就算其他茶客三番四次問佢拎點心紙佢都會視若無睹, 眼中只有你~

我地呢d「N無人士」... 嘿~ 今日見到坐輪椅嘅婆婆同我地遭遇一樣, 佢個工人仲企咗十幾分鐘先搵到人Serve佢地~

眼見鴻星近期玩Gimmick推出「三國宴」, 仲出埋「點心篇」, 所以我地都湊吓熱鬧, 點o黎試吓~

桃園三結義--劉備、關羽、張飛被一"籠"打盡?!! 白臉劉備係奶皇包, 紅面關羽係紅豆包, 黑面張飛係芝麻包, 件件都咁好味, 仲好Kawaii呀~

草船借箭--芝士蝦春卷, 比想像中好味, 亦好脆~


蒸鳳爪--好腍好入味, 鐘意食鳳爪嘅朋友必定要Order~
豆腐花--必吃, 好滑溜~
 
平時o黎飲完茶會派9折劵下次用, 可惜之前2次唔知點解都冇派, 我冇理到... 上次見有茶客問, d阿姐先比呢個Memo Pad連9折劵, 我坐隔離枱, 啱啱埋完單, 佢都唔派比我, 因為我冇嘈住要9折劵...

今次去到, 睇清楚宣傳單張, 任何時段惠顧, 就會獲得一本...

埋單時問阿姐拎, 佢唔知真定假, 我講完佢唔打算比, 我指住宣傳單張頌讀一次條款及細則, 佢竟然話"呢個9折咋嘛", 實在溝通唔o黎, 我最後補一句"你拎1本比我", 佢就咁就走咗去... 部長找錢時, 我再問佢拎, 佢好似好唔願意比咁, 之後等咗好耐, 佢先拎比我地... 咁唔想比就唔好攪宣傳啦, 唔該!!!

是次每人消費約 50 元
味道: 4 環境: 4 服務: 1 衛生: 4 抵食: 4
###

地址 : 鰂魚涌英皇道979號太古坊濠豐大廈2樓
電話 : 2628 0110

2012年5月29日 星期二

和亭日本料理 WATEI Japanese Restaurant

22 May 2012, Tuesday

有次路過呢間餐廳, 見佢Lunch Hour大排長龍, 唔通好好食嘅?!! 今日去開北角做o野, 終於有機會去試試啦~

我12點去到, 可以直入, 2個人坐4人枱, 唔使搭枱真好~

餐廳以柔和簡潔為主, 座位都幾寬敞舒適~

睇睇餐牌, 定食&餐飲嘅選擇同食開嘅「和民」有9成相同, 但明顯「和亭」嘅價錢平「和民」少少...

我地Order咗炸豬扒咖哩定食同埋壽司定食, 因為「和民」冇呢2個午市定食~

落單後, 隔離枱換咗1轉客, 我地d食物同飲品居然去晒佢地張枱, 好彩佢地Order嘅食物同飲品完全唔同, 我唯有極速同服務員講, 果d食物同飲品係我地o架~ 我驚唔叫住佢, 我嘅午餐唔知要遊幾多個花園之後先回投入我嘅懷抱~

跟餐沙律--同「和民」一樣, 唔係太新鮮, 但可以接受~

跟餐飲品--冇「和民」嘅蜂蜜梅蜜梳打, 唯有叫柚子蜜, 冇蜂蜜梅蜜梳打咁好飲~

炸豬扒咖哩定食--唔夠咖哩汁, d咖哩汁比飯吸晒, 攪到好似食炸豬扒+咖哩飯咁~

壽司定食--個樣欠缺光澤, 尚算新鮮, 欠缺鮮味~ 但以咁嘅價錢o黎計, 好OK嘅啦~

冇咩驚喜, 之後都係去翻就腳d嘅「和民」算lu~

是次每人消費約 60 元
味道: 3 環境: 3 服務: 3 衛生: 3 抵食: 4
###
地址 : 北角英皇道560號健威坊高層地下U39號舖
電話 : 2565 9611

2012年5月28日 星期一

廣東道駭人事件薄

19 May 2012, Saturday

話說我約咗朋友去Marco Polo Hong Kong 嘅 Cucina 嘆 High Tea, 咁坐地鐵去, 就一定要途徑廣東道...

行到海防道垃圾站對面, 天橋底停咗部垃圾車, 途人已經掩住口鼻飛奔, 咁我都跟埋一份~

無啦啦有隻飛行物體降落咗係我左耳背, 嘩!!! 好驚呀!!! 用手潑開咗之後, 即刻搵消毒紙巾徹底清潔, 毛管都棟起晒~ 我估係飛蛾之類, 希望唔係曱甴~

之後行到斑馬線, 令人更作嘔嘅事就發生喇...

有個西人, 男嘅, 6呎以上, 橫切面都好闊吓, 用右手按鼻, 我已經擦身而過咗... 之後我聽到聲... 好接近我... 係有人運勁將鼻涕噴出嘅聲音, 好驚呀!!!!!! 拎轉頭一睇, 見到有舊白色物體由個西人個頭飛向地面, 好嘔心呀!!!!!! 點會咁o架?!! 好恐怖呀!!! 諗起都想嘔呀!!! 我以後都唔想再o黎廣東道呀!!!


2012年5月25日 星期五

Cucina

19 May 2012, Saturday

今日同小馬去嘆High Tea, 搵咗幾間尖沙咀嘅酒店, 話大部分都要$250以上, 係呢間$150左右, 個賣相都OK吸引, 所以就揀咗呢度~

因為商場3樓裝修緊, 搵咗好耐個酒店入口都搵唔到, 行咗幾個圈, 好彩有d清潔阿姐路過比我問吓路~ 果條通道鬼鼠到呢, 迷路時以為佢係d通去廁所嘅後巷呀~

Afternoon Tea Set for Two~


頂層 Sandwich~
Salmon roll, cream cheese, sour dough bread -- 三文魚包住cream cheese同火箭菜, 朋友勁鐘意食~
Shrimp, mango, mayonnaise, tortilla -- 薄餅入面包住蝦同芒果, 都幾Salad Feel, 好清新~
Smoked turkey, apple, ranch dressing tortilla -- 火箭菜again... 又成為朋友嘅囊中物~
Roast beef, dill pickle, whole wheat bread -- OK啦~
Cucumber, cheddar cheese, white bread -- OK啦~
Egg salad, white bread -- OK啦~


中層 Pastry~
Vanilla cheesecake with blueberry -- 寫Blog時睇翻Menu先知係Vanilla~
Chocolate crispy hazelnut bar -- 朱古力慕絲好難唔好食, 全餐唯一驚喜位係... 個脆米餅底有爆炸糖!!! 係個口入面狂爆, 果種刺激感, 好耐冇試過啦~
Mango and chocolate macaroon -- 居然少咗2件Macaroon?!! 明明見Blog友4月20日食都仲有4件!!! 我唔制呀!!!
Lemon madeleine tea cake -- "加鈍"檸檬卷咁...
Fruit tart with vanilla custard -- 一般過一般~


低層 Scone~
Plain, raisin, clotted cream, lemon curd, fruit preserve -- Scone味道一般, 塗抹好多cream都係咁上下, 塗lemon curd都仲好少少, 酸酸地感覺開胃d...


另上 Pastry~
Fresh strawberry and marshmallow -- 個樣Kawaii到爆!!! 基本上係比佢個外表吸引咗o黎... 士多啤梨又紅又大粒, OK香甜... 棉花糖係木莓味, 酸得o黎有d似藥水味, 小朋友食咗1粒都唔再食第2粒, 咁你話喇...


Freshly brewed coffee -- 咖啡味道... 一般~ 明明見Blog友杯咖啡係用大杯, 點解隔咗1個月已經變咗細杯, 仲要人地係d奶泡爆到就瀉, 上面仲有灑咗朱古力粉... 我地就係為咗呢d細眉細眼位而揀o黎呢度, 而家覺得Downgrade咗~


Selection of Ronnefeldt tea -- 我揀咗English Breakfast Tea, 大大壺, 抵飲~


座擁無敵維港海景, 可惜尋日先Book位, 已經冇晒窗口位...
 
入座時要問先有Menu, 寫Blog時發現佢呃咗我地半個鐘, Menu明明寫"served from 3:00pm to 5:30pm", 但尋日Book位時就話3:30-5:30pm, 太過分喇!!! 我地搵地方High Tea都係想吹吓水, 2個鐘基本上係唔夠o架囉!!!

匯豐、恆生、渣打信用卡有85折... Oh No... 我地2個都冇呢3張信用卡, 蝕呀!!!

食物味道一般, 想搵個地方靜靜地傾下計, 又唔想排隊, 又唔想過2佰, 對食物味道冇極端追求嘅, 都可以考慮吓呢度...

朋友話大家都係酒店, 上次Feast起碼有件似樣嘅朱古力蛋糕吖... 咁老老實實喇, 如果講好味又平又抵食, 咁Feast真係好好多, 仲要係Buffet喎!!!

是次每人消費約 160 元
味道: 3 環境: 4 服務: 3 衛生: 4 抵食: 4
###

地址 : 尖沙咀廣東道3號馬哥孛羅香港酒店6樓
電話 : 2113 0808

2012年5月24日 星期四

西歐「文藝復興」2012の波恩, 法國 (Beaune , France)

30 April 2012, Monday
 

8oC - 14oC, Cloudy & Windy & Rainy

~ 波恩小檔案 ~

波恩位於巴黎和日內瓦之間,號稱法國東部勃艮第(Burgundy)葡萄酒的首都, 位於葡萄酒之路的心臟(又稱勃艮第的“香榭麗舍大道”)!波恩作為法國的關鍵葡萄酒中心,是法國主要的年度葡萄酒拍賣會的舉行地。波恩被世界上最有名的葡萄酒村莊包圍,許多生產商的設施和酒窖均設立於波恩。


離開瑞士嘅鐵力士峰, 要坐5個鐘頭旅遊巴去法國嘅波恩小住一晚~ 原本係去法國嘅狄莊小住一晚o架, 不過領導話狄莊果邊條路整緊, 所以要改去波恩~
好唔捨得瑞士嘅美景~

2012年5月23日 星期三

西歐「文藝復興」2012の鐵力士峰, 瑞士 (Titlis, Switzerland)

30 April 2012, Monday
 

-4oC - 4oC, Cloudy & Windy
 

~ 鐵力士峰小檔案 ~

鐵力士峰(Titlis),高3238米,位於瑞士阿爾卑斯山脈,是阿爾卑斯山著名的風景區,登上鐵力士峰需要乘坐三種交通工具。第一程是普通六人吊車,在第二個落客點落車。第二程是大型吊車,到達第三個落客點。第三程是世界首創的360度旋轉纜車,可容納80人,每程都會旋轉360度一圈。
 

由琉森出發, 坐1個鐘頭旅遊巴, 就到達鐵力士峰山腳嘅纜車站~


2012年5月22日 星期二

西歐「文藝復興」2012の琉森, 瑞士 (Lucerne, Switzerland)

30 April 2012, Monday
 

6oC - 15oC, Cloudy 
~ 琉森小檔案 ~

琉森(Luzerne)是瑞士中部琉森州的首府,位於琉森湖畔。面積約24平方公里,人口約:5萬7千人,擁有4種官方語言,包括德語、法語、義大利語、羅曼斯方言。
琉森最著名嘅標誌係卡佩爾橋(Kapellbrücke)和水塔。卡貝爾橋又稱教堂橋, 全部由木板建成,座落於羅伊斯河上,建造於1333年,全長204米,1993年發生火災後重新修復。


2012年5月21日 星期一

西歐「文藝復興」2012の夜遊琉森, 瑞士 (Lucerne, Switzerland)

29 April 2012, Sunday
 

13oC - 22 oC, Rainny 

~ 琉森小檔案 ~

琉森(Luzerne)是瑞士中部琉森州的首府,位於琉森湖畔。面積約24平方公里,人口約:5萬7千人,擁有4種官方語言,包括德語、法語、義大利語、羅曼斯方言。
琉森最著名嘅標誌係卡佩爾橋(Kapellbrücke)和水塔。卡貝爾橋又稱教堂橋, 全部由木板建成,座落於羅伊斯河上,建造於1333年,全長204米,1993年發生火災後重新修復。 


係米蘭坐咗5個鐘頭旅遊巴, 終於去到琉森, 好彩有大量涼果照住, 暈車浪, 使乜驚呀!!!瑞士的確係受到上天嘅特別眷顧, 旅遊巴一進入瑞士國景, 眼前所見盡是氣氛磅礡得令人透不過氣嘅迷人美景!!! 相機嘅咔喳聲不絕於耳!!! 呢3張相隔住玻璃窗影都可以靚到咁, 我醉啦~

2012年5月18日 星期五

西歐「文藝復興」2012の米蘭, 意大利 (Milan, Italy)

29 April 2012, Sunday
 

13oC - 22 oC, Rainny 
~ 米蘭小檔案 ~

米蘭是義大利的第二大城市,也是義大利工業化最深的城市之一。目前有132萬居民,但如果將郊區的居住人口計算在內,則大約有400萬人,是歐洲最大的都會區之一。總面積約有1,982平方公里 ,每平方公里超過2,000人居住。
生產總值佔義大利國內生產總值的4.8%,這個地區也被稱為藍香蕉(Blue Banana),是歐洲人口最密集與工業最發達的地區 。


2012年5月17日 星期四

西歐「文藝復興」2012の維羅納, 意大利 (Verona, Italy)

28 April 2012, Saturday
 

12oC - 27 oC, Sunny 
~ 維羅納小檔案 ~

維羅納位於義大利北部威尼託大區阿迪傑河畔的一座歷史悠久的城市,人口約260萬人。坐落在阿達湖和威尼斯的附近,成為旅遊勝地和威尼托地區的經濟中心。莎士比亞的名作《羅密歐與茱麗葉》以此城為背景。2000年入選聯合國教科文組織的「世界文化遺產(UNESCO World Heritage)」。
 
離開威尼斯, 坐2個鐘頭車就到達, 旅遊巴要泊係城區外, 然後步行入城~

2012年5月16日 星期三

西歐「文藝復興」2012の威尼斯, 意大利 (Venice, Italy)

28 April 2012, Saturday
 

12oC - 27 oC, Sunny 
~ 威尼斯小檔案 ~

威尼斯是意大利東北部著名的旅遊與工業城市,人口約160萬人。威尼斯曾經是威尼斯共和國的中心,十字軍進行十字軍東征時也曾在這裏集結,而且也是13世紀至17世紀末一個非常重要的商業與藝術重鎮。
威尼斯的水道舉世知名。潟湖上的118座群島約由150條水道交織而成。構成威尼斯的島嶼約擁有400座橋樑。在古老的城市中心,運河取代了公路的功能,所以主要的交通模式是步行與水上交通。中心舊市區街道狹窄,為步行區,是歐洲最大的無汽車地區。
「貢多拉」是威尼斯最具代表性和道統的水上代步小船。但現今威尼斯人通常會使用較為經濟的水上巴士穿行市內主要水道和威尼斯的其他小島。
威尼斯和附近的潟湖在1987年被列為「世界文化遺產(UNESCO World Heritage)」。


2012年5月15日 星期二

西歐「文藝復興」2012の佛羅倫斯, 意大利 (Florence, Italy)

27 April 2012, Friday
 

11oC - 27 oC, Sunny 
~ 佛羅倫斯小檔案 ~

佛羅倫斯是義大利中部托斯卡納大區和佛羅倫斯省的首府,擁有366091名城市人口,是該地區面積最大、人口最多的城市,以及主要的歷史、文化和商業中心,曾一度是義大利統一後的首都(1865—1871年)。
佛羅倫斯被認為是文藝復興運動的誕生地,藝術與建築的搖籃之一,擁有眾多的歷史建築,和藏品豐富的博物館。歷史上有許多文化名人誕生、活動於此地,比較著名的有詩人但丁、畫家李奧納多·達·文西、米開朗基羅、政治理論家馬基維利、雕塑家多納太羅等。佛羅倫斯歷史中心被列為「世界文化遺產(UNESCO World Heritage)」。
徐志摩在詩集《翡冷翠的一夜》中將此城名稱譯為「翡冷翠」。

 

2012年5月14日 星期一

西歐「文藝復興」2012の羅馬, 意大利 (Rome, Italy)

26 April 2012, Thursday
 

9oC - 22 oC, Sunny

~ 羅馬小檔案 ~

羅馬為義大利首都,世界著名的歷史文化名城,古羅馬帝國的發祥地,因建城歷史悠久而被暱稱為「永恆之城」。其位於義大利半島中西部,市中心面積有1200多平方公里。羅馬與佛羅倫斯同為義大利文藝復興中心,也是第二次世界大戰中少數沒被戰火波及的城市之一,現今仍保存有相當豐富的文藝復興與巴洛克風貌;1980年,羅馬的歷史城區被列為「世界文化遺產(UNESCO World Heritage)」。


一落機就要趕去羅馬鬥獸場... 今日好好天呀!!! 太好啦!!! 


2012年5月11日 星期五

西歐「文藝復興」2012の出發喇!!! 趴地企鵝勇闖西歐!!!

25 April 2012, Wednesday

因為Honey近呢一年激忙嘅關係, 所以已經好耐冇出國旅行, 亦都冇唸過今年可以有得去旅行... 但係... 曙光突然出現!!! 原來激忙係會有真空期, 所以我地又急不及待繼續我地嘅環遊向世界大計~

2月尾一見旅行社出價目表就即時報團, 3月13日果晚已經成咗團, 太好啦!!! 唔使成日心掛掛唔知成唔成團~

不過後尾先發現, 原來5月出發嘅團先有得去比薩斜塔o架!!! Oh... 我地係4月最後一團, 即係跟住我地果團就有得去啦...

今次嘅主題係... 「趴地企鵝闖西歐」!!! 隻趴地企鵝係舊年聖誕節去「」飲茶時, 聖誕老人送比我o架!!! Honey話近年掀起咗「趴地」相嘅熱潮, 所以我都要湊吓熱鬧先~ 


2012年5月10日 星期四

西歐「文藝復興」2012の整裝待發

22 April 2012, Sunday

每次出發去旅行之前, 總會借機瘋狂購物!!! 嘻嘻... 今次都唔例外~

多年o黎盛傳意大利嘅治安好差, 所以我專登買番個斜孭袋, 冇咁易比人搶手袋...

再買個肚腩袋比Honey咩係T-Shirt入面, 可以放Passport同後備現金...


2012年5月9日 星期三

西歐「文藝復興」2012の酒店茶會

17 April 2012, Tuesday
 

跟團去旅行就跟得多, 係酒店入面嘅餐廳開茶會, 今次都算係第一次!!! 仲要係High Tea!!! 好High呀!!!