稍息：榻榻米咖啡室

19 February 2025, Wednesday

步入2025年，忙到團團轉，百忙之中抽身跑一轉上環，完成工作後，行返去上環地鐵站準備走人之際，見到對面街有間好靚嘅咖啡店……一時衝動想入去飲返杯充充電……

熊拉麵：超水準白湯餚足12個鐘好好味

17 February 2024, Saturday

1點正，門口排緊隊……

排隊期間劃定紙仔落單，一有位入到去寫埋枱號就印印腳等食……

半路咖啡：食咗2幅畫落肚

14 November 2022. Monday

又係出城順便搵食系列～

原本靠GOGGLE MAP係搵唔到嘅～（唔知幾時開始㩒錯咗）

迷失咗一輪，想放棄，又唔知點樣行咗入後巷，打算行返去地鐵站走架啦，居然又路經喎～

Triple King Cafe：露台好CHILL

2 July 2021, Friday

龍媽難得過海，約我食LUNCH，當然要狗衝出去啦～（約約吓變咗下午茶＋晚餐＋飯後甜品＋夜茶😂😂😂）

露台好CHILL呀～

北園酒家 North Garden Restaurant : 環境唔錯

31 March 2013, Sunday

呢篇冇「夜上海」咁離譜, 隔2個月先寫, 呢篇1個月啫, 嘩咔咔咔... (實情係唔打算寫, 唔提就等於唔存在... 不過上星期突發神功, 1星期內完成4個星期的黏土功課, 勁... 攰!!! 又可以Free返少少時間出來寫Blog)

北園其實幾就腳, 上環地鐵站一出過條馬路就到...

朋友訂咗1樓小菜廳, 環境都幾清幽, 人客唔多, 得幾枱, 靜靜地傾計一流...

大家都肚餓, 懶得慢慢揀, 叫咗套餐... 唉... 又唔記得影低餐牌... 唯有出絕招... 斷估冇痛苦!!!

避風塘長腳蟹
-- 炒得好香好惹味, 少少辣多多脆, 金蒜多多益善, 肉地扎扎實實, 正呀!!! 睇落好似份量不足, 食落又食極都有喎, 嘻嘻... 我估我唔聲唔聲靜靜雞都食咗3份1碟, 賺呀!!!

江山薈京川滬菜館 Jiang Shan Hui Chinese Cuisine

8 February 2012, Wednesday

一年一次嘅「印尼幫」團拜又嚟啦啦啦!!! 呢餐飯有D DISLIKE小插曲, 寫咗篇好大篇幅嘅BLOG記錄低, 不過得我自己一個睇到, 哈哈...

職員推介套餐, 不過我地唔鐘意食魚, 所以決定散叫...

(左)前菜--難食!!!
(右)砂鍋雲吞雞煲--味道都OK, 雞肉同雲吞份量都好多...


脆皮素鵝--味道還可以...


鎮江小排骨--嘩!!! D排骨腥嘅!!! 估計係雪味...


回鍋肉炒年糕--年糕都炒得幾煙韌, 醬汁都均勻, 味道都OK...


高力豆沙--細粒咗D, 不過味道都OK, 如果多D豆沙會好D...


桂花湯丸--仲唸住係小丸子, 居然係大粒芝麻湯圓, 味道都OK嘅, 但係酒釀味唔夠...


味道只屬一般... 服務還可以, 因為成晚得幾枱客... 價錢算幾抵, 食咁多嘢先3百幾蚊...

適合唔在乎味道, 只係想平平地, 一大班人傾成晚都唔會比人趕走嘅朋友...

是次每人消費約$115元
味道： 2 環境： 3 服務： 4 衛生： 4 抵食： 3
###
地址 : 上環德輔道中262號一洲大廈2樓
電話 : 2880 9618

大舞臺飯店 The Grand Stage (II)

18 December 2011, Sunday

舊年食過一次位於西港城嘅「大舞臺飯店 (The Grand Stage)」, 食物美味, 環境優美, 留低咗嘅美好嘅印象...

今日同Honey重回舊地, 對今日發生嘅一點一滴, 實在難以忘懷!!!

由於已經接近2點, 所以唔使等位, 直入...
 
開咗壺龍井, 好好飲, 好濃郁嘅茶味...

1:55PM 已經畫好點心紙, 交咗比服務員A... 

未有o野食, 用iPhone 4S影吓相先...


等食期間, 隔離枱位小朋友不停係枱與枱之間遊走, 好唔耐煩咁話「唉... 45分鐘都埋唔到張單... 做咩o架?!!」... 當時都GET唔到佢講咩...

過咗20分鐘, 仲未有得食, 開始搵服務員A睇睇... 服務員A堅持有入單, 叫我等一陣就有得食...

再過10分鐘, 搵服務員B睇睇, 佢用D唔鹹唔淡嘅廣東話好HILL咁同我講「今日部電腦壞咗, 落單後要半個鐘先有得食, 冇人同你講咩(咩字高8度)???」... (聽完氣頂到不得了)

再過10分鐘, 搵服務員C睇睇, 佢都係象徵式走入廚房走番出o黎, 都係果句「等一陣就有得食」...

再過10分鐘, 搵服務員D睇睇, 佢都係象徵式走入廚房走番出o黎, 連交帶一聲都冇, 就永遠遠離我地張枱... 其他服務員都係一樣, 遊到有咁遠得咁遠... 連附近D枱走咗半粒鐘都唔封枱...

再過5分鐘, 服務員E自己遊埋o黎, 問我想要D咩...

我真係火起喇!!!
 
我餓到暈吓暈吓, 冇力叉腰拍枱, 冇力大大聲講o野, 只可以好虛弱咁丙佢「我想食o野囉!!! 我坐咗係度1個鐘, 1碟o野都未o黎過!!! 我嘅容忍已經到咗極限!!! 如果你5分鐘內拎唔到D食物出o黎, 我即走!!!」...

服務員E急步步入廚房, 跟手唔夠3分鐘, 所有點心一擁而上!!!

豈有此理!!! 我同Honey講, 點解D人咁衰, 係要人發火先肯認真D, 好聲好氣就當你死嘅, 搞到人想高貴D都唔得!!!

係呢D點心拎出o黎之前, 只係見到服務員不停埋單, 廚房一碟食物都冇拎過出o黎...

梅頭叉燒腸--好味o架係, 可惜一肚火, 真係好難用好Enjoy嘅態度去食... Honey話個廚房成粒鐘都冇o野做, 大把時間比佢慢慢整得好味...


瑤柱菜苗餃--又係好食!!! 睇相都睇到D皮有幾薄, D菜苗有幾脆綠... 可惜... 都係氣頂...


古法馬拉糕--又係好食!!! 上枱時服務員將佢HIGH咗落D唔知咩度, 嘩!!! 好唔合衛生啫!!! 佢當冇件事, 我已經虛弱到講多句都冇力, 唯有MET走果PART, LALA聲食完LALA聲走...


金瓜芋絲夾--又係好食, 等咗成個鐘都覺得佢好食, 問你服未?!! 不過可能係因為我地餓過龍, 擺咩入口都覺得好食!!!


極速食完即閃!!! 留多一陣都火滾!!!

而家D人, 冇咗電腦就唔識做o野嘅啦咩?!! 我地入座後, 再入座嘅都唔夠3 PAIR人, 就算要你拎番我地張點心紙出o黎, 重新用白紙寫4個點心嘅名拎入廚房, 都唔係好難啫吓話!!!

冇咗電腦, 當你冇埋計數機, 小學生都識加減數啦, 你用紙筆去計, 都唔使45分鐘都埋唔到單吓話!!!

對住呢D咁高質數嘅香梘人, 只有... 無言!!!

是次每人消費約$90元
味道： 4  環境： 4 服務： 1 衛生： 3 抵食： 2
###
地址 : 上環德輔道中323號西港城2樓
電話 : 2815 2311

梨花苑韓國料理 Korean Garden Restaurant

11 February 2011, Friday (年初九)

今晚約咗我第一次坐飛機時認識嘅團友食晚飯... 都好多年前囉...

想當年, 剛剛出o黎社會做事, 想試下坐飛機去旅行, 比大家姐老點咗去印尼, 話HK$999, 唔使一千蚊, 好抵玩咁話喎... 當時嘅我, 都未知印尼有幾亂(離開後一星期總統夫人死咗, 發生大暴動), 膽粗粗就報咗名, 然後就係旅途上認識咗呢幾位妙齡少女(當年, 而家係師奶)... 至今都接近17年... 幾個對對方一無所知嘅女仔(當年, 而家係師奶), 今時今日仲可以一齊出o黎食飯, 無所不談, 簡直係奇蹟...

由於LUNCH剩係食咗1個魚柳包, 放工時餓到手震腳震, 所以搭車前要食番個蛋卷, 飲番包豆奶, 先有力出發... 間餐廳嘅入口比較難搵, 係樓下走咗幾個圈先搵到... 等咗一陣先齊人, 好彩預先打咗底, 如果唔係, 暈咗係街都似...

我地ORDER咗3人餐, 貪佢咩都有, 散叫隨時仲貴...

前菜8小碟--碟碟都咁好味, SALAD係出奇地好味囉...

烤雞肉--好好味呀, 又大大片, I LIKE IT!!!

烤牛肋骨肉--仲好味呀, 都係大大片, 讚讚讚!!!

炒什錦菜--都係好好味, 不過蒜蓉味太勁, 食完傾計好驚對方聞到我有口氣...

人參雞湯--好好味呀, 似足係韓國首爾東大門食果D一樣咁好味...

石鍋什錦飯--都幾好味, 可能其他食物太出色, 顯得佢冇咁好味... 又或者我地落得唔夠辣醬...

之前食咗幾次飯, 都唔記得影相, 今日難得大家好興緻, 終於記得趁青春留倩影, 嘩咔咔咔...

我一直以為自己係去咗梨花園, 原來唔係, 係去咗梨花苑, 所以上開餐網站搵唔番間餐廳, 好搞笑!!!

是次每人消費約$210元
味道：4；環境：3；服務：3；衛生：3；抵食：3
###
地址 : 上環德輔道中247號德祐大廈1樓
電話 : 2542 2339

桃花源小廚 Tim's Kitchen [少林食神の推介(一)]

1 November 2010, Monday

今日Honey約咗少林食神一齊去《2010米芝蓮指南》(Michelin Guide)嘅二星食肆試招牌菜... 所有招牌菜都要預先Order, 否則坐足3個鐘都冇得食...

留家廚房的創辦人--著名食家劉健威先生正正坐係我後面... 即刻覺得自己都有小小食家FEEL... 呵呵~

一掃全景... 冇影到佢個露台花園, 好優雅... 我地坐係2樓, 地方好寬敞...

酸薑皮蛋--酸薑冇渣架, 唔太辣... 皮蛋查實我一向都麻麻, 味道怪怪的...

玻璃明蝦球--好爽口呀... 塊金華火腿先係重點, 伴住蝦球一齊食, 好好味呀... 最重要係, 咁大粒明蝦球, 裡裡外外都口感一致, 少林食神話好考功夫, 不過我"中"人痴呆症發作, 已經將佢本食經忘記得一乾二淨... 哈哈~

蝦籽炆柚皮--我第一次食柚皮... 軟棉棉咁... 蝦籽好濃...

冬瓜原隻鮮蟹拑--超超超超超超超超超超美味!!! 冬瓜同蟹拑都入晒味, 冬瓜軟棉棉, 蟹拑好大隻呀~ 比手掌更長的特大美味蟹拑, 每隻承惠HK$180, 加埋一接近HK$200... 全力推介!!!

鮮蓮冬瓜盅--好清甜呀, 好多蟹肉...

脆皮炸子雞--少林食神話呢隻係"100日大的雲英雞", D肉實而彈牙... 嘩... 好有學問呀~

上湯浸豆芽--豆芽??? 乜呢D唔係豆苗咩??? 原來係豆苗芽, 即係豆苗最幼嫩嘅葉尖, 要加20蚊o架... 真係超超超美味囉... 相信如果我地唔係跟住少林食神去, 部長絕對唔會問我地要唔要豆芽... 少林食神話佢D上湯好靚, 所以D'讓"到D豆苗咁好味...

我超超超超超滿意呢一餐, 真係不仼此生...

是次每人消費約$520元
味道： 5 環境： 5 服務： 4 衛生： 4 抵食： 2
###
地址 : 上環文咸東街84-90號地下A舖及1樓
電話 : 2543 5919

大舞臺飯店 The Grand Stage

18 July 2010, Sunday

遊完數碼港同HKU已經接近1點, 我地決定行落去西港城嘆一盎兩件...

D點心竟然樣樣都好好味, 出乎意料之外... 仲諗住賺遊客錢嘅地方只會又貴又唔好味嘅添...

環境超懷舊... 同埋好寧靜... 價錢仲平過太古城... 仲要唔使等位... 好正呀...

是次每人消費約$80元
味道： 4 環境： 4 服務： 4 衛生： 4 抵食： 4
###
地址 : 上環德輔道中323號西港城2樓
電話 : 2815 2311

五樓廚房 Fusion 5th Floor Friendly's Kitchen

今晚(2007年4月28日)honey好友當主持的『志X飯局』又有新目標！(註：不是無X那個節目)

 

志X夫人之前去過兩次『五樓廚房』，覺得幾好食，環境又唔錯，咁啱佢地有個朋友返咗o黎香港，所以唸住揀間好d嘅，結果一行六人去咗呢度食囉！

佢有6道菜surprise menu，但要到佢上每一道菜時，你先會知自己有乜食，too risky，所以我地冇人揀呢樣！

 

最後我同honey都揀咗4道菜 menu，我揀咗：
頭盤：鵝肝--外脆內軟，超好味！(伴菠蘿、蘋果，清新味蕾)；
湯：粟米湯--一般；
主菜：龍蝦、海鱸--幾好，配菜唔錯；
甜品：Tiramisu伴mint galeto--幾好，之前未食過mint galeto，好味！

 

honey揀咗：
頭盤：有機蘑菇沙律--幾好；
湯：都係粟米湯；
主菜：極黑豬--好正，又香又Juicy；
甜品：Cream Brulee--店員推介，幾好！

**其實甜品佢仲有Warm Chocolate Ganache(心太軟)，不過因為自己做過之後已喪失興趣，所以冇揀。

**包埋一杯咖啡/茶。

好友們仲叫咗紅酒，只有我冇飲，蝕抵晒！

佳餚美酒，大家又傾得好開心，環境唔錯，啱晒聚舊。情侶的話，可選擇露天茶座，情調一流！

 

小插曲：食甜品前志X夫婦正討論見倒有位食客勁似楊采妮(入緊洗手間)，志X夫人就話完全唔似，之後仲叫我跟個食客入去洗手間睇睇，見佢兩個咁有興致，我唯有照做(冇計)... 最後... 答案係... 如假包換--正版楊采妮！

是次每人消費$450元 (個人認為味道、環境、服務都好，但係唔值咁嘅價，食鮑魚抵d)
味道：4；環境：4；服務：4；衛生：4；抵食：3

###

地址: 上環文咸東街22-26號柏廷坊5樓
電話: 2854 1801