網頁清單

2007年6月24日 星期日

赤柱露台餐廳 Natural Gourmet Restaurant



平時放假出街食晏, 落得街, 冇2點半都2點喇, 食完飯都冇咗半日! 今朝(2007年6月24日)起身見幾好天, 特然想去下赤柱, 即刻"的"起心肝, 12點正就出咗門口!

去到赤柱, 唔知係咪太早, 週圍好似冇乜人咁, 見到呢間餐廳個露台好似幾舒服咁, 價錢中等, 就揀呢間喇!

我地order咗: -
泰式鮮蝦炒金邊粉--幾好味但份量小咗d, 同;
泰式椰汁青咖喱鴨伴荔枝茄子白飯--好辣呀(我覺得, honey話ok);
埋單成為$160

環境真係幾舒服, 靜靜地, 有海景又有海風, 好relax呀! 食物就... 快餐個隻囉, 哈哈, 你明o架喇! 服務就... 都係快餐個隻囉...

食完行咗去美利樓八下, 見倒有間徳國餐廳有Sunday Brunch, 好吸引, 下次要去試下先! 之後行下海邊長廊, 市集, 然後先搭車去銅鑼灣行街, 去到銅鑼灣先兩點, 仲有大把時間剩! 正!

好耐冇o黎赤柱, 間唔中o黎下真係好舒服!

###

地址: 赤柱赤柱廣場三樓308舖
電話: 2899-0919

The Chater Lounge

終於到咗(2007年)6月23日喇! 期待已舊嘅  Ritz-Carlton Tea Buffet, 今期主題係 TROPICAL TEA BUFFET...

今日嘅食力兵團成員有: 何超, 龍媽, 無敵, 貓頭, 我--拉姑! (排名不分先後)



傳聞年尾會拆, 所以貴一貴(加一後位位$250, 包餐茶)都要去試下! 不過... 可能... tropical... 唔係好啱我地口味, 所以大家嘅comment一般!

頭盤同熱盤的的骰骰, 全部都好好味! 回本必食--鵝肝包, 帶子, 魚生, 吞拿魚, ...
甜品就見仁見智! 有d好好食, 有d太特別一時間適應唔到, ...

 

即制pan-cake冇落槳, 搞到d杧果好酸呀...
雪葩好新鮮, 甜咗d...
杯黃色物體, 寫住coconut, 原來係金桔乜乜, 酸到盲眼嘅都會開番, 引致大家笑到碌地...


服務--3點時侍應們未知是否未warm-up, 連水都唔比杯我地! 但之後質數慢慢提升, 直至6點, d雪葩溶晒, 侍應竟然肯係kitchen攞過比我地, good!

由3點食到6點, 話題不斷, 食完o野一齊去行陣街, 去到ifc又係logon坐低飲o野, 一傾又傾到9:30pm, 利害!

###

地址: 中環干諾道中3號麗嘉酒店
電話: 2877-6666

2007年6月23日 星期六

East End Brewery -- Happy Hour


之前都介紹過呢間食肆, 不過今次唔同, 今次係去happy hour!!!

其實... 老細兩個星期前, 已經話請大家去happy hour, 但o個日個個都話唔得閒, 一約就約到今日(2007年6月22日)!

今日未夠鐘放工, 老細已經叫我落去搵位(打去book位, 話冇得book, 先到先得)! 但係落到去又有留位喎, 奇怪!

好快手咁order咗d小食(happy hour三寳: 水牛鷄翼, 洋蔥圈, 焗薯皮), 幫同事order凍檸水嘅時候, 我見過侍應呆一呆, 好似唔相信自己隻耳仔咁! 到我order凍cappuccino嘅時候, 佢已經適應咗lu!

點解要o黎呢度happy hour? 因為呢度最特別嘅地方係... 食完d花生殼, 係就咁掉落地下嘅, 滿足晒平時唔想守規矩嘅人! 所以亦有人叫呢度做花生吧!

但係... 恐怖嘅事... 係埋緊單時發生... 有隻大曱甴(2吋半長, 逃走時仲識飛o架), 由幅牆爬上我同事身上, 爬過手肘, 手臂, 肩膀, 頸, 然後唔見咗! 我嚇到唔識講o野, 淨係識擘開個口手指指, 其他人開始意識到有d好得人驚嘅o野, 之後先見倒小強, 然後狂奔, 連隔離枱位小姐都跟我地奪命狂奔, 幾搞笑, 但超恐怖! 小強, 最後被侍應送往西方極樂!

另外有一個謎係... 飲到尾聲, 有粒未食嘅花生掉中我隻手, 跟住另一粒仲掉中落我個杯入面, 但見唔倒係邊個做, 不過咁準, 一定係日日練習嘅人嘅所為...

2007年6月18日 星期一

流金歲月 China Gold Cuisine

今晚(2007年6月17日)有5合1慶祝活動... 所以要返屯門食飯...

點5合1法? 咪係父親節 + 阿媽/大家姐/二家姐生日 + 童童畢業禮 囉! 除咗我同細佬, 佢地全部人下午都去咗參加畢業禮, 肉酸仲爭取代替大家姐上台攞獎, 未免過於投入了吧, 只是幼稚園畢業喳噃!


我早咗半個鐘到, 係電器部撞倒細佬一家三口, 於是一齊去攞位! (因為上次同八美圖去過, 有訂位都要係門口等咗45分鐘, 所以今次早d去登記)

係門口等位時, 細佬太太比佢個心肝掟"酥兒BB"比我抱下, 然後細佬同細佬太太扮bye bye走咗去, "酥兒BB"竟然冇喊, 兩夫婦見狀後, 竟然好放心走咗去行街, 回來時仲食住雪糕, 好o野, 佩服! 佢兩個緊係好耐冇過過2人世界喇, 咁都得!

原本"酥兒BB"一路都冇喊, 但父母回來後就咋嬌狂喊, 蝦死佢地!


因為父親節的關係, 7:00pm入場, 8:30pm就要離場, 但人多(12大4小+"酥兒BB")叫菜特別慢, 最後都要我出手, 亂叫一通, 叫完都冇咗半個鐘! 叫咗11個餸, 唸住好夠食, 點知碟碟都好似d前菜咁細碟, 根本唔夠食, 太離譜, 見倒都冇mood影相, 不過味道就唔錯! 最後都要叫多4個甜品先夠飽!





我地叫咗: -
花雕醉雞
蒜泥白肉
松鼠桂魚
茶香雞
蒜子浸翡翠苗
四季豆
招牌小蘢飽
咖哩蟹 跟蒸&炸銀絲卷
雪菜肉絲炒年糕
石鍋黑豚肉炒飯 (最後溜咗單, 冇得食)
高力豆沙
擂沙湯圓


我嘅"湊仔能力"形象唔知幾時提升咗咁多, 當大家姐問我係咪帶童童去disney嘅時候, 細佬同細佬太太即時叫我帶埋"酥兒BB"去, 喂, 我一個點帶兩個呀? 跟住連姑姐都叫我帶埋佢個女(1997年出世--全年免費入場喎)去, 哈, 你地未免太睇得起我喇啩!

###

地址: 屯門屯門巿廣場第一期2016-2017號舖
電話: 2613 0083

2007年6月12日 星期二

A Touch of Spice


今日(2007年6月11日)真係忙得不可開交, 做咗成朝, 都未完成手頭上的工作, 下午又要連續開兩個會, 好彩趕得切6點開完, 去尖咀同KaKaMa賀牛一!

KaKaMa今次揀咗A Touch of Spice, 多國菜, 網上comment都唔錯!

炸蝦餅: 中規中矩;
沙爹串燒: 鞋咗d, 大大舊;
軟殼蟹沙律: 一般, 似食緊冷麵多過似沙律;
牛柳絲沙律(配糯米): 一般, 熱嘅沙律--有d唔慣;
咖哩羊鞍: 份量太小, 個side dish--蒜蓉包--好好食, d汁點完蒜蓉包, 薄餅, 再點埋糯米, 啱啱點晒;
炒金邊粉: 一般;
蒜蓉包: 唔錯;
薄餅: 一般;
甜品拼盤: 一般;
焗芋X: 勁甜;
椰汁芒果湯丸: 一般;

餐廳環境唔錯, 不過安排我地坐廚房門口位就差d, 又嘈又熱! 埋單仲收多我地3個白飯, 人地都冇食過白飯!

食物方面, KaKaMa同鑽媽都覺得上次間Q Club好食d! 我都係咁話, 連傾心事都係個間正d!

###

A Touch of Spice
地址: 尖沙咀諾士佛臺10號1樓
電話: 2312-1118

2007年6月3日 星期日

麥嘜 & 麥兜 On Ice

今日(2007年6月3日)唸住去太古城"鹿港小鎮'"食晏, 行到去先發現佢摺咗! 唉, 又小咗間飯堂... 唯有即刻轉去"王家沙 "喇!


食飽飽之後, 行去APiTA睇下o野, 路過溜冰場, 見到有幾隻寵然大物正在進場... 嘩!!! 係麥嘜同佢d朋友呀! 音樂開始響起... 哈... 係"肥鵝湖", 然後麥嘜同佢d朋友就開始翩翩起舞, 吸引咗大量唔同國籍嘅小朋友同大人圍觀...


表演咗10分鐘左右完場, 麥嘜同佢d朋友繞場同所有觀眾拜拜, 有個坐住BB車嘅DD, 喊住問佢阿媽"做咩拜拜呀?唔好拜拜呀!", DeeDee, 使唔使睇得咁肉緊呀...