網頁清單

2009年4月30日 星期四

藏戶概念館 KULAKO JAPAN CONCEPT FOOD

尋日(2009年4月29日)貓兄同KaKaMa即興Call食晚飯, 有得食... 我緊出嘅...

KaKaMa儲咗好多印仔, 仲以為每一次惠顧只可以點一樣贈品, 點知... 竟然可以一次過點晒!!! 連個侍應自己都暗嘆"咁抵?!!!"... 我地留番個烤雞沙律比KaKaMa同KaKaBa撐枱腳啦... (其他Order晒, 好冇人性, 嘩哈哈哈)


(用印花換, 免費) 和風冷豆腐--都唔錯呀, 清清地...


(用印花換, 免費) 壽司拼盤八款--不過不失...


(用印花換, 免費) 刺身拼盤七款--都幾新鮮...


煙肉碎配凱撒沙律--做得唔錯...


侍應好好人咁同我地講, d熱食hold起, 等我地食完凍食先再上...夠細心...


(用印花換, 免費) 什錦串燒--雞翼幾好, 雞肉棒都ok... 放咗一陣先食都仲熱架...


三文魚壽司--1蚊1件!!! 每人限叫4件!!! 都幾新鮮, 抵食!!!


鹽燒鮪魚--KaKaMa話好正, 貓頭話太乾太實... 查實我平時唔多食魚, 腥嘅唔使旨意我會食, 佢又唔腥, 味道又ok, 係真係實咗小小, 我覺得合格囉... 所以呢, 人人口味唔同, 睇食評都未必準...


羊仔扒香草燒--KaKaMa話之前食過有3件, 同侍應理論不果, 冇法啦, 餐牌又冇寫明... 味道都ok嘅...


南瓜番薯天婦羅--南瓜同番薯都好味, 炸得唔錯, 冇多餘油份...


牛肉手打稻庭烏冬--牛肉好韌, 冇肉味, 烏冬好正, 勁彈牙...


抺茶牛油蛋糕配雲喱拿--冇乜抺茶味...


芥辣焦糖布甸--好奇怪, 冇芥辣味, 反而似芝士蛋糕味, 焦糖唔硬嘅...


巨蜂雪芭--勁正, 濃郁嘅巨蜂味, 好似真係食緊巨蜂提子咁... 不過貓頭縑太甜... 又一"人人口味唔同"例證...


由於我地張枱盞射燈由頭閃到尾, 原先經理想幫我地換位, 不過我地諗住食埋甜品都走囉, 所以捥拒咗佢...
我仲要講"乜唔係燈光效果咩? 仲以為佢好似夜總會d燈咁閃下閃下"... 夜總會... 明明自己未去過, 點解會咁講嘅呢, 勁癈Up, 哈哈哈哈...
埋單果陣, 侍應話"3個甜品, 經理話送比你地"... 嘩, 咁Jack So??? 多謝晒喎!!!


是次每人消費約$92元
味道: 3 環境: 4 服務:4 衛生: 3 抵食: 5


###
地址 : 旺角西洋菜街1號兆萬中心9樓
電話 : 2783 7618


豬流感殺到!!! 你準備好未???

來勢洶洶嘅豬流感殺到!!! 我上星期日已經四出採購維他命C, 蒜頭丸, 板藍根, 消毒濕紙巾, ...


事隔一日, 再去同一間Mxxxxxxx, 貨架空空如也, 聽到售貨員竊竊私語... "嘩, 頭先成班人沖入o黎搶o野, 好恐怖呀, ..." 當然, 佢地所講嘅果班人, 係有比錢o架啦... 結果, 星期一嘅Lunch Hour, 只可以買到一支貴咗唔知幾多倍嘅火酒...


跟手再去藥房, 都仲有2支酒精搓手液, 係"最後"2支, 又買多一支火酒... 好貴呀!!!


出門口前, 同事L叮囑我"買多D呀!!!"... 我覺得佢見到我呢4支戰利品, 一定會好失望...



下晏開始上網搵自動Dispenser同酒精搓手液, 皇天不付有心人, 竟然比我搵到, 仲要有現貨, 仲要總經理竟然肯親自去提貨(Automatic Dispenser+2公升酒精搓手液), 感動-ing... 
用計數機計一計... 嘩嘩嘩嘩嘩嘩!!! 頭先藥房係4倍價錢呀!!!!!! 搶錢呀!!!
今朝安裝好個Automatic Dispenser之後, 放心晒!!!



跟手我又係籠底搵番沙士果陣嘅防禦裝備... DaDaDaDa... 就係紫外光燈 同 紅外線溫度計... 真係超誇張...



再點算下其他存貨... 除咗普通口罩, R95 同 N95 都有大量!!! 眼罩都有??? 會唔會過多呀D存貨量???



仲有呢10套董太戰衣!!! 相信大家都記得, 董太帶住大班軍隊著住呢套衫, 殺入牛頭角下村果一幕...



好彩我公司冇審計部, 唔係, 又比人抽抨我地大花筒, 亂買o野都有之...


2009年4月21日 星期二

老上海飯店 Hong Kong Lao Shang Hai Restaurant

星期日(2009年4月19日)約好拉力早敍餐, 搵地方嘅先決條件係... 要中午時間唔使搵位之餘, 兼可以任坐唔嬲冇人趕你走, 仲要靜靜地方便傾計, 價錢又要中等, 食物質數又要有番咁上下, 地點又要唔好太僻... 咁難搵嘅地方... 竟然係灣仔出現...


醉雞--好奇怪, 好有雞味, 但酒味小得緊要, 自己o係屋企用李X記醉雞汁整雞翼d味都濃過佢好多, 好彩冇貪心叫半隻啫(半隻要成150蚊o架)...


雞絲粉皮--OK, 粉皮大大片, 有d酒樓切到青瓜絲咁好難夾... 醬汁好夠, 食到尾都仲有好多醬汁, 有d酒樓食到一半已經冇晒汁要齋食...


小籠包--不過不失, 尚算皮薄...


上海粗炒--合格...


坐足3粒鐘, 得5-6枱客, 好寧靜, 唔使講到拆破喉嚨, 職員多過客, 完全冇人趕你走, 任你坐, 又不時refill熱水, Good Good!!!


是次每人消費約$85元
味道: 3 環境: 4 服務:3 衛生: 3 抵食: 3


###
地址 : 灣仔謝斐道238號世紀香港酒店地庫1層
電話 : 2827 9339


2009年4月12日 星期日

泰昌餅家 Tai Cheong Bakery

食完陸羽嘅蛋撻(離奇地細而味道又唔出)之後, 心裡面只得一個念頭, 就係去試下肥彭極力推介嘅泰昌...


我地係唔知間鋪搬咗去邊嘅情況之下, 響中環逐條街搜... 搜呀搜... 搜呀搜... 終於比我係天橋上面見到人龍, 落去睇睇先... 皇天不負有心人, 終於比我地搵到...



排隊期間, 店內閃光燈閃過不停, 好多人都係帶單反機去影相, 店員已經習以為常... 亦聽到有食客討論緊"係呢一間先最好食, 其他分店冇咁好食"...
排我前面呢個後生仔, 居然買咗6打... 買咁多食唔食得晒呀你... 搞到我要等咗好耐, 等第二底新鮮出爐先買到...


5蚊1個又大又靚, 淨係色澤都贏晒啦, 頭先陸羽10蚊1個又細又冇光澤...


嘩, 你睇入面, 厚到吖, 成碗燉蛋咁呀, 仲好滑好好味添呀, 連一生人都唔肯食蛋撻嘅我, 都要企係佢門口隊晒先肯走, Yeah, 我比100分佢!!!
經常食蛋撻的honey話"目前食過嘅蛋撻o黎講, 排名算數一數二, 皮夠脆, 餡夠多, 夠新鮮"!!!


是次每人消費約$5元
味道: 5 環境: 2 服務:2 衛生: 2 抵食: 5
###
地址 : 中環擺花街 35 號地下 (近閣麟街)
電話 : 2544 3475


陸羽茶室 Luk Yu Tea House

復活節假期第三日, 冇約人, 可以瞓晏d... 睇完螢之光大結局都仲未唸到去邊度開餐...


礙於好多食肆2點就Last Order, 陸羽係唯一一間5點Last Order, 所以決定試下佢... 之不過d網民話好Full好難Book位, 所以我係戰戰兢兢嘅心情下打電話去問有冇得Book位... 對方答"o黎啦!!!"... 又冇問我姓乜幾位...


成日聽到佢嘅大名, 食都係第一次... 擠身米芝蓮評審員的推介榜, 好似有d理所當然...


可能時間尚早(2點左右), 只有3樓有位, 侍應安排咗我地坐逃生通道口, 我食一餐飯, 度門大大話話開咗超過50次, 度門嘭埋個陣, 後巷d風撲向我全身, 令我覺得好討厭, 因為佢所收嘅價錢一d都唔平, 我嘅要求自然會提高啦...


侍應亦冇問我地要茶盅還是茶壺, 一問完要咩茶就隊個茶壺埋o黎, 很無奈... 幸好honey話佢d普洱唔錯, 值回小小票價...



古色古香的裝修...


每個星期都會轉的點心紙...


脯魚蝦燒賣--honey話"唔鐘食燒賣"嘅佢, 都覺得好食...


煎粉菓連湯--很特別, 從未食過, 感覺食起上o黎冇咁油同冇咁熱氣... 上湯味好濃...


擘酥雞蛋撻--冇傳聞中咁好食, 有d失望... (食完即刻心郁郁想去肥彭極力推介嘅泰昌試試)


合桃蓉燒餅--因為點菜時唔知道點心紙會每個星期轉, 見到網友話外面合桃酥裡面叉燒蓉的點心好有驚喜, 所以我誤會咗呢一款係... 不過錯有錯着, 呢個其貌不揚嘅燒餅, 竟然出奇地好食, 有驚喜...


生蹄汁奶卷--後加, 等到d侍應車輪轉咁問你"有冇o野要加?"... 攪咗好耐先到... 跟手就叫你埋單, 話收銀埋數, 叫我地可以坐幾耐都得... 可能佢地心急嘅關係, 我覺得個芯有d凍, 未完全蒸熟晒... 感覺好似將馬碲糕轉成卷狀, 都幾清甜, 冇煎咁香口, 勝在健康d...


"到此一遊"照...


如果大家挨得餓嘅話, 建議你2點半先去, 因為可以坐地下同2樓, 環境會好得多...


是次每人消費約$120元
味道: 4 環境: 3 (因樓層而異) 服務:2 (因人而異) 衛生: 3 抵食: 2


###
地址 : 中環士丹利街24號地下
電話 : 2523 5464


2009年4月11日 星期六

翠園 Jade Garden Chinese Restaurant

復活節假期第二日, 同奶奶去米芝蓮介紹(冇評級)嘅餐廳飲下茶, 吹下水...


佢個魚翅撈飯套餐都幾抵食, HK$198 四位用, 包紅燒竹笙雞絲翅, 瑤柱蛋白炒飯, 豉油皇炒腸粉, 自選點心3款... 5個人食都好夠...



有一個點心個名好特別, 叫"小心流沙麭", 可惜... d皮好厚, d流沙唔識流...
潮州蒸粉果同山竹牛肉球都OK...


食食下見到隔離枱人人都叫一碟好Kawaii嘅龍鬚蛋散, 我地都唔執輸叫番一碟先... Yeah...



呢餐都OK呀, 最正係有得訂位, 環境又唔太嘈, 可以比奶奶盡情話當年...


是次每人消費約$60元
味道: 3 環境: 4 服務:3 衛生: 3 抵食: 3
###
地址 : 九龍灣偉業街33號德福廣場一期F20舖
電話 : 2758 2883


2009年4月10日 星期五

正斗粥麵專家 Tasty Congee & Noodle Wantun Shop

擠身米芝蓮評審員的推介榜, 復活節假期第一日一於專程搭的士去試試...


餐廳嘅裝修古色古香...


前菜醃蘿蔔--食1粒已經覺得好辣, 但係honey話好好味, 食完一碟又一碟...


鮮蝦雲吞麵(大)--大都咁細碗, 細嘅真係唔知點食得飽... 雲吞細細粒, 我就覺得華昌好食d, 但係honey又話鐘意呢度嘅雲吞多d, 因為夠細粒喎... 奇...


皮蛋豬潤粥--粥底好綿, 豬潤勁彈牙, OK...


四式腸粉(蝦, 牛肉, 义燒&冬菇雞絲) -- 腸粉幾滑, 豉油好甜, OK...


鮑汁鵝掌--好爽口, 不過個汁唔夠西苑嘅好味...


對我地o黎講, 交通極之不便, 順路嘅話都可以試多一次嘅...


是次每人消費約$105元
味道: 3 環境: 4 服務:3 衛生: 2 抵食: 2


###
地址 : 跑馬地景光街21號地下
電話 : 2838 3922