網頁清單

2011年12月30日 星期五

數碼港聖誕嘉年華 Cyberport Christmas Funland 2011

24 December 2011, Saturday


去「南坊」嘆完世界, 就係數碼港四圍逛吓...

到處都係呢隻Rody嘅Poster... 橫掂冇咩做, 就跟佢指示嘅方向去睇睇「數碼港聖誕嘉年華」有咩玩...


行到去露天嘅數碼廣場... 一睇... 嘩... 好大型咁喎...


嘩... 好好玩咁喎... 我都好想玩埋一份呀...


入到數碼港商場內嘅全天候廣場, 嘩... 呢D彈彈馬仔好得意呀, 我都好想玩呀...


好Cool嘅聖誕樹... 我鐘意...


行埋海濱長廊, 就去Starbucks嘆番個下午茶...

渡過咗一個平安嘅下午... 係時間坐車返屋企買餸煮返個愛心平安晚餐啦啦啦...

### 數碼港聖誕嘉年華2011 小檔案 ###

日期:  23/12/2011 至 02/01/2012
時間:  11:00 - 19:00
內容:  今年聖誕12月23日至1月2日,數碼港商場請來受小朋友喜愛的人氣充氣玩意RODY洛迪小馬,與市民一同玩轉「數碼港聖誕嘉年華2011」﹗場內特設多項好玩得意的遊戲、娛樂及親子活動,包括全港獨有超巨型戶外充氣彈跳樂園、刺激好玩有獎攤位遊戲、得意可愛動物農莊,還有由十多位本地設計達人齊齊打造的RODY百變造型展覽和多個音樂及雜技表演等精彩節目,讓一家大細跳跳扎歡度「蹦FUN」聖誕及元旦佳節!
網址: 
http://arcade.cyberport.hk/events/

 


2011年12月29日 星期四

南坊 Nam Fong (II)

24 December 2011, Saturday

聖誕長假第一日, 去邊度食Lunch先可以唔使同人迫呢??? 又冇預先Book位, 應該週圍都冇晒位o架啦噃...

Honey話「有, 我唸到!!! 數碼港!!!」... 好, 打去問吓仲有冇位先... 嘩... 居然仲有位喎, 不過所有Discount今日都不適用, 唔緊要啦, 佳節當前, LaLa聲坐車入去先!!!  

12:30PM未夠去到「南坊」, 居然一枱客都未有, 感覺有如包場, 好爽呀!!! 個廳3面都係落地玻璃, 坐邊個角度都可以一邊食一邊欣賞海景, 我最鐘意佢有D似Green House嘅感覺, 可以享受吓陽光嘅溫暖... 




好鐘意佢入口果幾個雀籠嘅裝飾, 好古色古香...


茶芥--花生銀魚仔不是太吸引, 可能係因為隻牙扭緊計嘅關係啦... 不過杯龍井超正, 好有茶味, 比自家泡嘅更香更濃, I Love It~


黑松露蟹肉餃--片黑松露係好大片, 不過冇Gas爐味喎... 除咗金菇之外, 食唔出有蟹味, 但係Honey話有少少腥...


臘味炒腸粉--好好好味呀!!! 比起平時食慣嘅XO炒腸粉更好味, 因為有D茶樓會炒到好辣但冇味... 而呢個臘味炒腸粉一D辣味都冇, 但係就有好香好濃郁嘅臘味味, 滋味無窮, 食多10碟都冇問題~

 

鮑片糯米雞--嘩... 細隻到... 味道還可以...

栗茸焗西米布甸--好味!!! 栗茸唔太甜, 西米布甸甜度適中, 係香港27年o黎最寒冷嘅聖誕節食呢一個甜品, 簡直暖到入心...


D食物咁的骰, 真係好難填得飽我個"餓底"胃... 之但係... 今日所有Discount都唔用得, 再叫多幾個點心食都好貴吓啫... 一於係度Hea多陣, 嘆飽佢嘅一流環境同Service先, 出去海邊散一陣步, 再搵地方嘆埋個下午茶先番屋企...

是次每人消費約$160元
味道: 4 環境: 5 服務: 5 衛生: 4 抵食: 3
###
地址 : 薄扶林數碼港路100號數碼港艾美酒店3樓
電話 : 2980 7410


2011年12月28日 星期三

雅敍一堂 Lis Kitchen (V)

23 December 2011, Friday

聖誕長假開始, 又有得日食夜食啦... Yo!!!

我同Honey近年每逄聖誕節都會避開D專做聖誕大餐嘅餐廳, 因為多數都係又貴又迫又趕又唔好味... 

近期我地經常去「雅敍一堂」, 貪佢有啖住家湯水飲吓, 又冇西苑咁貴咁Heavy... 每次幫襯後仲送1張Coupon, 儲齊4張就送半隻古法太后雞, 都幾抵o架~ 寒冷天氣警告生效緊, 食羊腩煲就最一流!!!



茶芥--最愛佢嘅蜜餞合桃, 甜甜脆脆, 好味又補腦, 讚!!!


住家老火湯--晚晚不同, 足料味美, 1煲都有6碗以上o架, 啱晒我地呢D無飯夫妻~


古法太后雞(半隻)--豉油雞係玫瑰花芯點綴下, 頓時散發高貴嘅氣質, 搖身一變成為太后雞!!! 雞肉嫩滑彈牙, 調味適中, 唔太鹹唔太淡, 啱啱好... 送嘅贈品都咁足料咁好味, 真係抵讚!!!


古法雙冬羊腩煲(加菜)--個煲好似唔係好大, 但係入面好足料, 唔會比個大煲你再加大堆骨... 羊腩炆得好淋, 唔係太重羊味, 完全唔"蘇", 冬菇都好大舊, 馬碲同腐竹都好多, 生菜都好新鮮...

今晚呢餐Pre-Christmas Dinner真係『大滿足』~

是次每人消費約$150元
味道: 3 環境: 3 服務: 3 衛生: 3 抵食: 4
###
地址 : 太古太古城衛星閣地下1008-1009號舖
電話 : 2967 0777


2011年12月25日 星期日

海逸軒 Hoi Yat Heen (II)

21 December 2011, Wednesday

聽日就「冬至」啦, 時間真係過得好快, 咁又一年喇!!! 同事們今日預早一日一齊食返餐, 去咗半年前食過一次嘅「海逸軒」做冬!!!

半年後再食, 今次D櫈加番金色櫈套啦, D酒店味出番晒出o黎, 即時High Class翻晒, 哈哈哈~

同埋今次D服務好過上次好多, 回復酒店級基本水平, 食得開心又稱心~


天寒地凍, 齋食點心點夠飽喎... 好想食煲仔飯... 餐牌話"需時約30分鐘", LaLa聲Order咗先... 不過落單時經理話"今日忙D, 要45分鐘先得"... 查實都有少少驚會好似果日西港城咁o架, 不過真係好想食, 所以最後都Order咗... 結果... 真係45分鐘準時拎出o黎, 抵讚!!!



揀點心時, 同事話一樣價錢, 緊係Order D特別D嘅o野啦... 最後... 我地Order埋D帶子呀, 鮑貝呀, 鵝肝呀, 黑松露呀咁... 嘩嘩嘩... 好豪呀!!!

翡翠帶子豆苗餃--上一次試過覺得幾好味, 今次又再Order, 叫做有D菜食吓嘛... D豆苗好清淡, Good!!! 不過鯨吞咗之後先醒起, 唔記得咗嗒真個帶子呀!!! 帶子呀帶子, 你係咪真係落咗我個肚o架?!!




蟹籽鮑貝燒賣--寫BLOG先見到上次都有食... D鮑貝好明顯, 可以用肉眼見到, 不過冇咩味... 粒燒賣依然結結實實, 穩打穩紮, 可以一試...

鵝肝白玉炸茄子--上枱勁熱, 茄子夾住鵝肝同豆腐炸, 好特別!!! 今次我地好小心咁細細啖食, 以免唔小心一啖就吞咗D鵝肝, 哈哈哈... 食到一半, 終於見到粒鵝肝啦!!! 粒鵝肝都有2cm x 2cm咁大, 算足料, 淡淡嘅鵝味, 唔係太油, 不錯嘅做節之選!!!



香煎松露鮮肉餃--個皮煎到好似咸水角咁, 個餡都幾油, 我地好小心咁食都只係見到D 2-3mm嘅疑似黑松露碎片, 松露味欠奉!!!


馬拉盞蝦乾煲仔飯--估唔到全餐最好味係呢一味!!! 蝦乾係大大隻結結實實, 同事仲讚佢隻蝦乾好有誠意!!! 味道都好好味, 濃濃嘅蝦醬味, 鋪滿飯面嘅梅菜豬肉, Yum Yum!!! 落單時經理話有3碗, 我覺得佢有6-8碗囉, 幾抵食!!! 食到尾開始見到D飯焦, 大大片好脆口, 同事食咗成碗... 拉姑誠意推介!!!

食飽飽, 繼續努力, 期待下一餐大餐!!!

是次每人消費約$130元
味道: 3 環境: 4 服務: 4 衛生: 4 抵食: 3
###
地址 : 北角英皇道665號北角海逸酒店3樓
電話 : 2185 2788


2011年12月22日 星期四

大舞臺飯店 The Grand Stage (II)



18 December 2011, Sunday


舊年食過一次位於西港城嘅「大舞臺飯店 (The Grand Stage)」, 食物美味, 環境優美, 留低咗嘅美好嘅印象...

今日同Honey重回舊地, 對今日發生嘅一點一滴, 實在難以忘懷!!!

由於已經接近2點, 所以唔使等位, 直入...
 
開咗壺龍井, 好好飲, 好濃郁嘅茶味...

1:55PM 已經畫好點心紙, 交咗比服務員A... 

未有o野食, 用iPhone 4S影吓相先...


等食期間, 隔離枱位小朋友不停係枱與枱之間遊走, 好唔耐煩咁話「唉... 45分鐘都埋唔到張單... 做咩o架?!!」... 當時都GET唔到佢講咩...

過咗20分鐘, 仲未有得食, 開始搵服務員A睇睇... 服務員A堅持有入單, 叫我等一陣就有得食...

再過10分鐘, 搵服務員B睇睇, 佢用D唔鹹唔淡嘅廣東話好HILL咁同我講「今日部電腦壞咗, 落單後要半個鐘先有得食, 冇人同你講咩(咩字高8度)???」... (聽完氣頂到不得了)

再過10分鐘, 搵服務員C睇睇, 佢都係象徵式走入廚房走番出o黎, 都係果句「等一陣就有得食」...

再過10分鐘, 搵服務員D睇睇, 佢都係象徵式走入廚房走番出o黎, 連交帶一聲都冇, 就永遠遠離我地張枱... 其他服務員都係一樣, 遊到有咁遠得咁遠... 連附近D枱走咗半粒鐘都唔封枱...

再過5分鐘, 服務員E自己遊埋o黎, 問我想要D咩...

我真係火起喇!!!
 
我餓到暈吓暈吓, 冇力叉腰拍枱, 冇力大大聲講o野, 只可以好虛弱咁丙佢「我想食o野囉!!! 我坐咗係度1個鐘, 1碟o野都未o黎過!!! 我嘅容忍已經到咗極限!!! 如果你5分鐘內拎唔到D食物出o黎, 我即走!!!」...

服務員E急步步入廚房, 跟手唔夠3分鐘, 所有點心一擁而上!!!

豈有此理!!! 我同Honey講, 點解D人咁衰, 係要人發火先肯認真D, 好聲好氣就當你死嘅, 搞到人想高貴D都唔得!!!

係呢D點心拎出o黎之前, 只係見到服務員不停埋單, 廚房一碟食物都冇拎過出o黎...

梅頭叉燒腸--好味o架係, 可惜一肚火, 真係好難用好Enjoy嘅態度去食... Honey話個廚房成粒鐘都冇o野做, 大把時間比佢慢慢整得好味...


瑤柱菜苗餃--又係好食!!! 睇相都睇到D皮有幾薄, D菜苗有幾脆綠... 可惜... 都係氣頂...


古法馬拉糕--又係好食!!! 上枱時服務員將佢HIGH咗落D唔知咩度, 嘩!!! 好唔合衛生啫!!! 佢當冇件事, 我已經虛弱到講多句都冇力, 唯有MET走果PART, LALA聲食完LALA聲走...


金瓜芋絲夾--又係好食, 等咗成個鐘都覺得佢好食, 問你服未?!! 不過可能係因為我地餓過龍, 擺咩入口都覺得好食!!!


極速食完即閃!!! 留多一陣都火滾!!!

而家D人, 冇咗電腦就唔識做o野嘅啦咩?!! 我地入座後, 再入座嘅都唔夠3 PAIR人, 就算要你拎番我地張點心紙出o黎, 重新用白紙寫4個點心嘅名拎入廚房, 都唔係好難啫吓話!!!

冇咗電腦, 當你冇埋計數機, 小學生都識加減數啦, 你用紙筆去計, 都唔使45分鐘都埋唔到單吓話!!!

對住呢D咁高質數嘅香梘人, 只有... 無言!!!

是次每人消費約$90元
味道: 4  環境: 4 服務: 1 衛生: 3 抵食: 2
###
地址 : 上環德輔道中323號西港城2樓
電話 : 2815 2311

2011年12月20日 星期二

玉桃軒酒家 The Graces Restaurant


15 December 2011, Thursday


康怡廣場北座大變身!!!

同一時間執咗3間食肆, 一心諗住開番3間... 點知... 居然拆散做7間定8間, 利害!!! 第時可以多D選擇啦(如果好食嘅話)...

我一向嘅搵食格言係"開唔夠2個月嘅食肆, 千祈唔好幫襯住"...

不過今日都係忍唔住幫襯咗開咗2個星期左右嘅「玉桃軒 (The Graces Restaurant)」, 諗住都係食點心啫, 應該都係Outsource咗o架啦...

餐廳入口都幾寬敞...


一坐低, 聽到3位年輕服務員嘅交談... 服務員A & 服務員B 同服務員C講"不如你試吓開茶"...

吓... 試吓開茶?!! 開茶都未試過?!! 服務員C你返呢間餐廳總共返咗幾多分鐘呀?!!

好恐怖咩?!! 未算... 

南瓜雞絲滑腸粉--都幾特別嘅腸粉... 知唔知佢除咗個餡嘅組合特別之外, 連D味都好特別!!! 係特別在... 淡而無味!!! (最後係明明食唔飽都食剩晒)


家鄉潮州粉果--一放低, 嘩!!! 好細粒!!! 都算... 一放入口, 嘩!!! 好粉!!! 漿實晒個口!!! 差D透唔到氣!!! 仲要唔好味... 點搞o架...


懷舊千層糕(廚師推介)--正面個樣幾吸引, 背面真係嚇死人!!! 大家拉落少少睇吓下一張相, 包你唔想放入口!!! 放咗入口都唔想再食第2啖, 因為都係冇味, 仲有D乾硬!!!




擂沙煎堆仔(廚師推介)--個樣都幾正常, D芝麻餡味道都OK, 但係, 一咬落去...


前面都未咬開, D汁係後面噴晒出o黎!!! 噴到我成部iPhone 4S都係呀!!! 呀!!!!!!!!!!!! (想死-ing)



所有食物一放低好快就凍晒, 連壺茶都未熱過...

11:45AM前埋單有早茶優惠75折... 折咗都98蚊... 嘩!!! 又貴又難食!!! 我返番去太古坊鴻星食好過喇!!!

是次每人消費約$50元
味道: 1  環境: 4 服務: 3 衛生: 3 抵食: 2
###
地址 : 鰂魚涌康山道1號康怡廣場北座M樓1號鋪
電話 : 2513-9107

2011年12月19日 星期一

快船廊 Clipper Lounge

10 December 2011, Saturday
早前9月之星曾經發起去文華東方酒店「快船廊 (Clipper Lounge)」嘆Afternoon Tea Buffet, 不過因為朋友們嘅小朋友好多星期六都要上Playgroup或者興趣班, 所以就唔到時間而泡空...

今日難得Honey肯陪我去食甜品Buffet, 幾大都唔放過大好機會!!!

聽聞文華東方酒店嘅朱古力Buffet好正, 不過已經Promote完... 我地今次去食嘅主題係--Winter Wonderland Sweet Afternoon Tea Buffet!!! 臨近聖誕, 餐廳內都增添咗富節日氣氛嘅裝飾品...

居然有窗邊位比我地坐, 正呀!!!

Baked Clafoutis with Berries, Assortment Christmas Logs--一開波就拎咗個聖誕樹頭蛋糕食, 個餅底好鬆軟, 朱古力Cream唔太甜, 還可以... 第一次食法式莓果布丁, 絕對唔係我杯茶, 感覺有D似麵包布丁...



(左) Linzer Tart, American Chocolate Cake--Honey拎呢個源自奧地利蓮茲嘅Linzer Tart都幾好味,  餡係覆盆子果醬, 少少甜少少酸, 口感有D似蘋果批, 餅底好鬆化, 絕對值得一試!!! 白朱古力Cake上面果幾滴水滴令到件Cake好迷人, 點都要拎番o黎欣賞吓... (中間果件已經唔記得咗係咩)
(右) Bacon Quiche, Sausage Roll, Smoked Salmon Sandwich, York Ham Sandwich--呢碟係跟下午茶自助餐奉上嘅... 個蛋批都幾好味, 腸仔卷好好味, 三文治好快比Honey KO晒...


(左) Taste of the Legend 文華東方茶--久聞文華東方酒店壺茶好好飲... 之但係我覺得冇咩茶味, 會唔會係我唔識Order呢... 不過值得一讚係佢依然有個茶隔, 唔似上次
半島酒店High Tea咁, 連茶隔都冇...
(右) Yoghurt Panna Cotta with Blueberries, Pumpkin Creme Brulee--意大利奶凍我一向麻麻地, 佢都整得幾滑兼幾重奶味... 法式焦糖燉蛋都幾好味, 不過又話有南瓜嘅, 點解一D南瓜味都冇嘅...


Home-made scones with Rose Petal Jam & Clotted Cream--放耐咗先記得食, 已經濕濕地同涼涼地, 搽咗Clotted Cream味道都唔錯, 遲咗食真係浪費晒...


Square Dark Chocolate Truffles--呢位方型朱古力好好食呀!!! 香濃嘅朱古力味, 幼滑嘅軟心, 而且唔太甜, 真係好想Encore再Encore!!! 不過我都未試得晒所有Buffet Items就已經飽到唔郁得...


Chocolate Spoon--初時見到堆木匙羹亂咁放, 覺得好奇怪... 睇真D... 原來係朱古力o黎o架!!! 好"咔哇依"呀!!! 睇吓, 放落杯熱朱古力度, 真係會溶o架!!! 可惜實在太膩, 飲唔晒...


Chocolate Trifle, Baked Chocolate Mud Pie, Chocolate Truffle Cake--後面杯Trifle係傳統英式聖誕甜品, Creamy又香滑, 有D似朱古力Mousse... 左邊件美式Chocolate Mud Pie我已經放到最後先食, 食完真係食唔落其他o野, 壓到實一實嘅朱古力泥團, 如果有4份1 Portion就Perfect啦!!! 隔離件合桃拖肥蛋糕出奇地好食, D拖肥果陣焦香味真係令人一試傾心, 我最憎食拖肥都覺得佢好食果下勁呀嘛!!! 跟手中間件軟心朱古力蛋糕又係膩到爆, 雖然D朱古力味香到爆燈, 但係我呢個朱古力痴都甘拜下風, Sorry, 我太飽啦, 哽唔落啦,要食剩你啦...


Fresh Fruit, Chocolate Broken Blocks with Maxed Nuts--最後食番D生果消吓膩, D菠蘿應該改名做"超甜菠蘿", 好似"超甜粟米咁"... 左邊果2粒冇名堂嘅朱古力Ball先係全餐最好食, 連Honey食完都要叫我即刻試吓... 又香又濃又滑嘅朱古力, 包住大大粒夏威夷果仁, D朱古力嘅香味係個腦度打咗幾個圈先吞落喉嚨, 最最最可惜嘅係, 我地真係飽到想食多1粒都食唔落啦, 太遲發現啦!!!



好似仲有食其他o野, 不過唔記得影相...

張梳化雖然勁大, 可惜枱與枱之間嘅距離實在太近, 唔闊得過大X樂好多, 隔離講咩都聽到晒...

服務員好好人, 我雙手拎住部相機, 想搵人幫我地影張合照, 見到D人好忙咁藤o黎藤去, 我都未開聲, 佢就已經問我係咪想影相, 仲影咗3張先滿意... 係佢唔滿意頭2張, 唔係我地唔滿意...

老牌5星級酒店嘅High Tea+下午茶自助餐, 呢個價錢絕對係值得!!! 只係我同Honey自己唔掙氣, 唔記得帶齊4個胃去食多D多D再多D...
是次每人消費約$215元
味道: 5  環境: 5 服務: 5 衛生: 5 抵食: 5
###
地址 : 中環干諾道中5號香港文華東方酒店閣樓
電話 : 2825-4007

2011年12月14日 星期三

香港繽紛冬日節 Hong Kong WinterFest

10 December 2011, Saturday

今日去文華東方酒店嘆Afternoon Tea Buffet, 路過皇后像廣場, 見到「香港繽紛冬日節」已經開始咗, 雖然好似冇咩特別咁, 不過都影咗佢, 比各位BLOG友參考吓啦...

來來去去都係得幾棵聖誕樹, 散落係唔同角落, 比大家影吓相...


旋轉木馬唔係太大型, 仲好似要捐錢先可以坐... 我會選擇去DISNEYLAND坐囉...


 
### Tiffany & Co. 閃爍喜悅 冬日 愛 ###

2011年11月25日至2012年1月1日

Tiffany & Co. 延續傳統,於這個冬天繼續把愛傳遍每個角落,成為「香港繽紛冬日節」的一大亮點。一棵大聖誕樹將矗立於皇后像廣場之上,繽紛璀璨的裝飾為四周增添一份迷人魅力。您可與摯愛同坐旋轉木馬;與家人在樹下細聽聖誕佳音;或寄出寫上祝福的 Tiffany 明信片,傳播愛的訊息。

http://www.discoverhongkong.com/winterfest/tc/html/tiffany_treasures.jsp

2011年12月13日 星期二

紅月夜

10 December 2011, Saturday

我同Honey並唔係天文發燒友, 不過今晚嘅月全食唔使專程坐車去D山卡啦嘅地方, 又唔使挨更抵夜, 只要食飽晚飯, 落街抬起頭望向東面就已經清楚可以見到, 仲唔需要D咩特別儀器, 所以我地都要湊吓熱鬧...

追月一族係寒冷天氣警告之下, 瑟縮一角, 為咩??? 咪都係為咗影低紅月亮嘅美態...


由9點吹風吹到11點, 終於交到功課!!!

紅月亮真係好靚呀!!!

Canon EOS 550D f/5.6 1/3sec ISO-400 135mm 

我部傻瓜機影出o黎真係唔同D...

Sony DSC-WX5 f/5.9 1/8sec ISO-800 21mm

唔止得我地o架, 仲有好多街坊都有落街觀賞o架...



### 月全食小檔案 ###
月全食發生在2011年12月10日晚上10時06分,歷時52分鐘,望向東面找尋月亮就可以見到。
由晚上8:45分開始月偏食,直到晚上10:30分月全蝕,月亮會呈現紅銅色,整個過程會係凌晨1:30分完結,歷時接近六小時。