網頁清單

2008年12月21日 星期日

The Day The Earth Stood Still 地球停轉日

趁中銀咭優惠仲有幾日就完, 拿拿聲去嘆多一次先...



任飲汽水... 任食爆谷... Cool...



電影都未開始, D食物已經比我地"對"得七七八八...



套戲就冇想像中咁激(Classify為睇完唔需要睇多一次), 劇情就唔講啦, 大家自己入場睇啦... ^o^


睇完出o黎, 有位女士可能第一次o黎, 覺得實在太正太好feel, 竟然即刻同d職員講要包場, 跟手唔知係邊樹有個職員飛撲埋o黎, 坐低同佢傾細節... 查實如果24,25,31號包個場同成班friends開心下, 又唔使好多錢, 仲平過去卡拉ok, 都幾抵玩架, 仲有戲睇埋, 絕對超值啦!!!


www.thedaytheearthstoodstillmovie.com



2008年12月20日 星期六

大黃蜂


 
 救命呀!!! 大黃蜂呀!!! 停咗係我屋企個玻璃窗外面呀!!! 好彩我當時已經閂晒窗準備出門口喳, 唔係嘅話, 比佢飛咗入o黎就閉啦!!! (標汗-ing)





佢仲係度捽腳... 快D走啦, 唔該你...





2008年12月18日 星期四

倚窗閣 The Window Cafe

 
又到聖誕... 又到聖誕... Wow... 期待已久嘅4傻聖誕敍餐終於來臨... 今年仲有力仔請客, 爽爆...


原本訂咗日航, 之後九龍酒店4點幾先打o黎話有位, 即刻轉陣地...



一人一客嘅焗帶子, 仲以為好矜貴, 味道好一般啫, 仲要個殼都唔係個粒帶子嘅...



鵝肝牛柳都OK, 鵝肝白鱔好唔掂, 其他一般啦...



焗蠔同鐵板虎蝦都要等好耐先有, 焗蠔好"Send", 虎蝦又係味道一般... 雞翼就冇可能唔OK啦, 燒牛肉好"Un"呀...



甜品反而滿意D, 木糠蛋糕好食過威尼斯人, 芒果布甸都好甜, 和果子Kawaii呢, 朱古力毛士最好味, 燕窩桂花糕都OK...



雪糕係Häagen-Dazs... 一次過食晒芝麻、紅豆、綠茶、芒果、紅莓雪葩... 嘩!!! 超滿足!!!



食完甜品先食冷盤, 藍青口好好味, 其他都係一般啦, 但係八爪魚刺身好"Send"...



芝士都好好味...



論食物選擇, 呢度真係好多, 仲有現場做嘅Pizza同印度薄餅我地都冇試, 但係味道真係好一般... 而日航就選擇小味道佳... 下次... 都係去番日航...


食飽飽就到交換禮物時間, 今年收到嘅聖誕禮物全部都好啱用呀... 臨走見到有得訂Barbie蛋糕, 好靚呀!!!



之後我地行咗去Harbour City睇燈飾, 再沿星光大道行去尖東睇燈飾...

好大風呀, 好凍呀, 好小燈飾呀...


 我拉姑預先係呢度對大家講聲"聖誕快樂 Merry X'massss"!!!


是次每人消費約$400元
味道: 3 環境: 3 服務:3 衛生: 3 抵食: 2


###
地址 : 尖沙咀彌敦道19-21號九龍酒店2樓
電話 : 2734 3803


2008年12月14日 星期日

骨煲皇 King of Hot Pot

聞名已久嘅大角嘴豬骨煲, 尋日(2008年12月13日)終於有機會去試啦!!!


拉力早推介--蕃茄咸菜蟹煲!!! 估唔到D蟹會咁新鮮同咁多膏囉!!! 蕃茄湯底酸咪咪好開胃!!!



自助調味枱--任你自己調配心水口味!!!



火鍋配料都幾大碟, 手打四寶丸好彈牙呀, 象拔蚌仔同脆鯇片都好新鮮, 粟米勁甜, 最正嘅竟然係烏冬, 吸收晒個湯, 好好味!!! 至滿足係有得食唐蒿, 平時唔係度度有, 亦唔係人人肯叫o架!!!



 食完成身暖晒... 美中不足係尋日回暖, 如果有寒冷天氣警告就perfect啦!!!


我地尋日係去棕樹街分店, 係openrice只可以search到杉樹街總店同塘尾道分店...


呢度個門面都ok, 都坐得ok舒服, 但係個toilet就恐怖囉... 大家如非必要, 就無謂參觀啦!!!


o黎咗2 round drink, 埋單1人唔使$150, 飽到唔郁得, 好抵呀!!!


是次每人消費約$147元
味道: 3 環境: 2 服務:2 衛生: 2 抵食: 3


###
地址 : 大角咀棕樹街
電話 : 23804221


~特別新聞~
(我地當時正前往中原電器, 去到門口見到佢被警方封場, 都唔知發生緊咩事, 好彩我地行得慢啫, 行快2步嘅話, 後果真係不堪設想...)


http://hk.news.yahoo.com/article/081213/4/9pyh.html


旺角擲通渠水樽灼傷46人
 (明報)12月14日 星期日 00:00
兩個載有腐蝕性液體的膠樽,從旺角西洋菜南街高處墜下,灼傷46人,警方一度封鎖現場調查。


在下午5時多,兩個載有腐蝕性液體的膠樽,由高處墜下。45人被灼傷,其中40人分別被送往廣華醫院及伊利沙伯醫院。而其餘5人自行步行到醫院就醫。


目擊者表示,當時大家以為只是普通的水,不以為意,但其後感到灼熱,立即用清水清洗身體及眼睛,有人更脫下衣服。部分女傷者擔心傷勢,在現場哭泣。


警方到場後,立即封鎖現場,並派出警員,上樓調查,並用紙皮箱,將兩個涉案通渠水膠樽遮蓋。


警方表示,相信有人蓄意從高處擲下膠樽,他們高度重視有關案件,將全力調查。


2008年12月9日 星期二

Ocean Park 七節

一早玩完烈火雄心, 趕頭趕命去灣仔接暈妮... 點解要接暈妮??? 係咁嘅... 原先係約定大夥人係金鐘坐專車入去, 後尾鑽媽話去中環坐車去香港仔隧道落, 咁我屋企樓下有車到香港仔隧道, 我無理由去中環啫, 咪自己去囉... 點知隻暈妮9點幾仲係大埔未上車, 要我去灣仔陪佢入去, 如果我唔應承, 以佢嘅性格, 一定會轉身返屋企瞓教囉... 唉... 仲要一拎起電話硬食佢一句"咁衰o架你, 做咩自己去, 唔同其他人一齊去...", 頂...


隔多一陣, 貓頭又打o黎... "嘩, 你仲係屋企?!"... 仲以為佢打o黎丙我添, 原來係打o黎叫我拎張SD Card比佢, 嚇死...


出門口已經10點9, 自知自己遲, 坐的士落灣仔, 去到檀島又搵唔到暈妮, 打電話又唔聽, 唔係咁大鑊呀嘛...


會合後去修頓球場等車, 先發覺係反方向嘅, 明明出門口之前係www.nwstbus.com.hk查清楚先出發, 真係比個website玩死... 之後行去對面線, 一路行... 一路行... 結果要行到去鵝頸橋先有車, 死未... 仲要係我屋企樓下有得坐個隻車... 入到海洋公園都過咗12點...



假熊貓 vs. 假熊貓... 哈哈...


估唔到暈妮好鐘意玩呢d攤位遊戲...



VIP位果然與別不同, 你睇後面d人坐得幾迫...



去到觀光塔, 有幾十個同胞堆咗係龍外面唔跟指定路線排隊, 仲見到有個導遊揮揮旗就有剛到嘅團友插隊, 所以我決定以其人之道還其人之身, 學佢地咁靜雞雞行去個堆人嘅龍頭嘅側邊, 企咗一陣就揮手指示好友們企去我前面, 竟然成功, 勁!!! 正所謂大雞唔食細米, 個堆同胞大大話話都有20-30人o架!!!



夜晚Honey Join埋我地去元氣食壽司, 估唔到佢個紅豆雪糕會咁大杯, 仲好好味添呀!!!



而家先發現, 個日冇同鑽媽合照添!!!


2008年11月28日 星期五

香港萬豪酒店大堂酒廊 The Lounge

上星期六(2008年11月22日)係11月之星嘅大日子... 我同貓兄事前去咗灣仔行下建材街先... 個buffet可以由1pm食到6pm, 唔使趕頭趕命, 又大把時間傾計...


一坐低先食一輪冷盤... 三文魚刺身同煙三文魚都唔錯...



之後就攻Organic Food... 估唔到朱古力最好味, 另外當然唔小得我至愛嘅車厘茄配羊奶芝士啦...



再攻杯裝haagen-dazs雪糕... 食多幾杯嘅話真係咩本都返番晒o黎...



跟手o黎一轉甜品... 燕窩蛋白tart好多燕窩, 朱古力cake好味, 個strawberry批最好食, 最難食係杯白桃jelly...



休息一陣就食芝士, 除咗吞唔落blue cheese之外, 全部cheese都好正...



暈妮最勇, 咁大碗生滾粥都夠胆拎, 比咗幾啖我地試, 又真係幾好味喎衰鬼...



DD拎咗朱古力cake同strawberry macaroon都話甜過龍, 叫我試下味, 我又唔覺得好甜喎, 仲比佢笑我味蕾有問題添呀... 哈哈哈哈...


飲埋2杯special drink之後, 已經飽到想嘔, 早知唔飲西瓜個杯, 又唔好飲又頂實個胃, 但係綠茶個杯就勁正, 必試...


被迫坐在酒吧區, 原先已經坐得好唔舒服, 之後坐坐下仲熄燈, 攪到黑麻麻咩胃口都冇晒, 仲要開到d音樂鬼咁嘈, 傾計傾到喉嚨痛...


是次每人消費約$215元
味道: 4 環境: 2 服務:3 衛生: 4 抵食: 3


###
地址 : 金鐘金鐘道88號太古廣場香港JW萬豪酒店大堂
電話 : 2841 3846 / 2841 3836


有骨氣海鮮酒家

上個星期三(2008年11月19日)四塵俠又再出動, 為貓兄同鑽媽賀壽...


好攪笑地, 鑽媽係灣仔撞到我地嘅舊同學--梁先生, 佢明明約咗人去九龍, 都比我地夾硬迫佢過o黎銅鑼灣, 同我地打個招呼, 哈哈, 勁強人所難... 最慘係KaKaMa對佢完全冇印象, 佢就好似做咗幾年透明人一樣...


有骨氣做緊"會燶咭"$98蚊任食... 我地一坐低即刻揀咗豬骨煲湯底... 都未定神已經Order咗一大堆食物... 我至愛嘅水晶叉燒麭當然唔小得... 肥牛好似唔多肥... 之前有嘅肥羊今次冇咗... 我博命食南瓜同超甜粟...


因為honey唔多食hotpot, 所以我一年至多都係打1-2次邊爐, 近2-3年仲要次次都係o黎呢一間, 貪佢有水晶叉燒麭... 呵呵...



原本話任食2小時, 不過可能因為d枱坐唔滿, 而我地又冇再加order, 所以坐耐咗都冇人迫我地埋單...


臨走前, 聽到侍應同隔離枱嘅離奇對話... 估計係客人用信用咭埋單, 侍應叫客人比cash, 客人問: "唔係xx咭有85折咩?", 侍應答: "你比現金我照比85折你, 我地需要現金!!!", 當時好唔明點解, 不過返屋企見新聞話有間facial集團執晒, 第2朝有間sushi集團又執晒, 新聞話因為銀行拖長咗90日先找數比商戶所致... 咁我先如夢初醒...


是次每人消費約$145元
味道: 3 環境: 3 服務:3 衛生: 3 抵食: 3


###
地址 :   跑馬地摩理臣山道84-86號
電話 : 2312 1212