網頁清單

2012年3月22日 星期四

Antipasto

15 March 2012, Thursday


同早兄嘆完「松記糖水」, 就慢慢散步去「Antipasto」...

今日天氣都幾清涼, 18度左右, 餐廳嘅落地玻璃摺門打開晒, 感覺好歐陸Feel, 好舒服, 一D都唔焗促...

枱上除咗有Candle Light Dinner必備嘅Candle, 仲有意大利菜必備嘅橄欖油同黑醋, 紅酒係裝飾o架咋, 唔好亂咁拎o黎飲呀, 要收錢o架!!! 最讚係... 有2支新鮮玫瑰花, 一紅一白, 好浪漫呀!!!

餐前麵包 (Free) -- 點橄欖油同黑醋食, Yummy!!! 如果係暖嘅就更加Perfect...


Lime Soda 青檸梳打 ($30) -- 餐廳係冇免費茶水供應, 與其7十幾8十蚊Share 1支750ml嘅礦泉水o黎飲, 不如叫3杯Soft Drinks仲化算, 計落差唔多價錢咋嘛... 除咗青檸梳打, 我地仲Order咗可樂同凍檸茶...


Antipasto Misto 雜錦意大利拼盆 ($109) -- 個碟超大, 放咗佢張枱已經冇晒位... 你地睇吓碟邊隻叉就知, 隻叉唔係甜品叉, 而係最大Size果種... 睇真D... WoW... 好多款頭盤呀!!! 一次過最少滿足你5個願望呀!!! 大家唔使心急, 等我介紹吓先... 咳... 有釀焗燈籠椒、巴馬火腿、煙三文魚、莎樂美腸、什錦橄欖... 沙律菜入面居然仲有白蘆筍(Asparagus)添?!!!
釀焗燈籠椒--好甜呀D燈籠椒, 釀焗咗之後就軟熟咗同Juicy咗, 好好味...
巴馬火腿--都唔錯喎... 最鐘意佢呢隻豬唔係太多肥膏...
煙三文魚--好味呀, 好肥美呀...
莎樂美腸--都可以呀...
什錦橄欖--黑橄欖味道都好OK...


Insalata Australiana 澳洲沙律 ($99) -- 好清新嘅沙律呀!!! 好味!!! 雞胸肉烤得好香口冇油又健康... 以前唔太好牛油果, 但係佢嘅牛油果真係幾好食...


BBQ Baby Spare Ribs 風味燒豬仔骨 ($179) -- 食食吓我同力仔都讚呢間餐廳d o野又好食d料又靚, 價錢仲要咁經濟, 真係可以再o黎... 早兄聽見我地咁講, 仲估呢碟豬仔骨起碼要3舊水... 我同佢講話唔過200蚊時, 佢都O晒咀... 豬仔骨燒得又香又Juicy, 好好味!!! 份量一D都唔細, 食極都食唔完, 好爽呀... 薯角雖然好熱氣, 不過好好味!!!


Seafood Delight 海鮮什錦大會 ($115) -- 意大利海鮮薄餅, 材料勁豐富!!! 有蝦、帶子、青口、三文魚、烏賊、三文魚、紅椒片... 全部都好新鮮, 醬汁都好好味, 讚!!! 餅底係我最鐘意嘅薄批, 唔係"PIZZA黑"果種, 人地係真係歐陸式餅底, 同我係巴黎食過嘅一樣, 集薄軟脆於一身, 好懷念...


食食吓, 我擰轉身影相... 早兄好驚咁問我影咩, 可能以為我撞邪, 哈哈哈哈... 我同佢講影吓現場自彈自唱表演者, 佢碌到對眼好大咁話以為係播碟呀, 完全唔知道係Live Show!!! 因為佢嘅歌聲實在太完美!!! 後來佢仲用廣東話唱咗幾句我的驕傲, 好利害呀!!! 枱上有個酒杯貼咗張Tips嘅貼紙, 我地比咗20蚊Tips!!!


大約表演咗1個鐘左右佢就收工, 原來佢剩係星期四先會係呢度表演, 我地真係好好彩呀!!!

環境極之適合想談心嘅情侶, 如果撞啱星期四有Live Show就更浪漫!!! 我遲吓都可以帶Honey o黎試吓!!!

服務又唔係好似d網友講到咁差, 係就係慢少少, 但係同歐洲比較, 已經算係好快!!! 歐洲d餐廳真係好慢o架!!!

唯一美中不足嘅係, 全晚d梳化都係吉嘅, 都唔比我地坐!!! 只係比2張最差嘅枱我地揀... 我背脊係水吧, 真係好驚D玻璃杯碌落o黎爆我頭...

訂位同落單都要用英文, 埋單時有個西人走埋o黎搭訕派卡片, 原來佢係教Phonics嘅!!! 查實唔知係咪因為服務員同經理問我地好唔好食時, 我地都只係答Nice、Great之類嘅單字, 所以令對方以為有推銷嘅空間呢... 查實就算去食中餐, 我地都只會答幾好呀、唔錯呀之類嘅簡單答案, 絕對唔會同陌生人風花說月!!! 而且今晚2個飲食拍拿都係飲鹹水大嘅中國人, 又何需再學Phonics呢... 你地搵錯對象啦!!!

是次每人消費約$220元
味道: 4 環境: 4 服務: 4 衛生: 4 抵食: 4
###

地址 : 灣仔謝斐道254-272號杜誌台11-12號地舖
電話 : 2877 7040

2012年3月20日 星期二

松記糖水 Chung Kee Dessert

15 March 2012, Thursday

早輪同朋友去「得龍大飯店」食晚飯, 朋友講起佢嘅食經, 滔滔不絕... 之後佢提到食甜品一定要去銅鑼灣嘅松記, 搞到我成日心思思想試吓... 同其他朋友提起時, 人人一聽個名都MARK大晒個口咁話, "我知, 幾時都好多人排隊果間吖嘛!!! 冇可能排到o架喎!!!"... 搞到我都脅脅地...

今晚拉力早難得有飯局, 呢餐基本上係補祝番聖誕節+團年飯... 冇計... 鬼叫大家都咁忙咩...

我向早兄提起松記糖水, 佢一聽就問係咪源自元朗果間... 吓?!! 我唔知喎!!! 跟手上網做吓Research, 原來真係!!! 咁你都知... 勁!!!

我地為免要排餐死, 所以決定今晚食咗糖水先食飯, 嘩咔咔咔!!!

幻彩明珠--人人都好似係為咗呢個招牌菜而去咁, 所以我都唔執輸, 試吓先... 落單時有問我走唔走花奶... 嗯... 走吖, 唔該!!! 一見真身, 嘩, 材料真係超級多款, 有西瓜、蜜瓜、哈密瓜、大西米、黑珍珠、涼粉... 霎時間真係無從入手!!! 最後都係由面食起... 大西米撈芒果汁真係最佳組合, 好味!!! 生果唔夠甜, 黑珍珠同涼粉都唔錯, 整體都好MATCH...

雪糕明珠--早兄明明揀芒果味雪糕o架?!! 同埋自選雪糕明明只係得曲奇、朱古力、芝麻、芒果、紅豆, 點解變咗雲呢拿嘅?!! 睇真D... 哦, 原來係落咗花奶, 嚇死!!! 早兄話都幾好食, 不過冇話好似D人講到咁驚喜囉... 可能因為我地由細到大食慣B仔涼粉, 廿幾年前已經成日食呢類型嘅甜品o架啦...


講開又講, 我地6:45PM去到, 成間鋪頭吉到咁, D職員居然都唔比我地坐梳化位, 要我地坐係門口位, 算點先... 張圓櫈仲要一坐落去搖吓搖吓, 成個人隨時撻得落地咁, 好得人驚囉... D職員見到都懶理, 結果我係自己換過第2張圓櫈先好少少咋... 總之一句講晒, 坐得極之唔聚財!!! 絕對係要LaLa聲食完即撇, 坐耐少少都唔情願!!!


是次每人消費約$25元
味道: 3 環境: 2 服務: 2 衛生: 3 抵食: 2
###

地址 : 銅鑼灣堅拿道西15號永德大廈地下G4-G5號地下
電話 : 3480 7222

2012年3月19日 星期一

譚魚頭火鍋 Tanyoto Hotpot (III)

11 March 2012, Sunday

311一週年, 咁難忘嘅日子, 當然要同當日一齊走難嘅朋友食番餐飽飯... (311當日係冇晚飯食)

上次大家食過「譚魚頭」都覺得唔錯, 所以今次繼續幫襯... 不過今次冇上次咁好彩lu, 冇房坐lu...

大家對餐牌所講嘅「8大名菜」都好感興趣... 就試吓干煸湯丸同黑椒醬燒牛肋骨啦, 再加多2個小菜...

黑衣人落完單, 隔咗好耐, 另一個黑衣人拎住張單走埋黎, 話睇唔見之前個黑衣人寫咩... 嘩... 鬼畫符咁, 仲要個個餸都得2隻字, 真係連我地都唔知佢寫咩... 最後... 重新落單...

干煸湯丸--上枱時大家都嘩嘩聲!!! 真係未見過湯丸可以咁整!!! 初時我唸入面嘅餡應該係鹹嘅, 點知... 居然係甜嘅黑芝麻湯圓, 真係估佢唔到!!! D湯圓好煙韌, 伴埋D辣椒, 蔥粒, 肉鬆, 真係好冶味, 食完湯丸, 撈D辣椒同蔥粒同肉鬆落白飯度食仲正!!!


黑椒醬燒牛肋骨--上枱時大家又嘩))) 咁大碟嘅?!! 都未影相啫, 第3個黑衣人就已經一刀插入個牛肋骨切開緊... 入口即溶, 黑椒醬甜甜地唔太辣, 都幾好味, 仲啖啖肉食到大家都飽晒...

馬友蒸肉餅--都幾好喎, 肉質好柔軟, 唔會太乾身, 件鹹魚都幾好味, 唔太鹹...
 

我地仲食咗琵琶豆腐, 嗯... 麻麻地...

甜品就食咗紅豆桂花糕, 好好味呀!!! 好香桂花味, 紅豆甜甜地好足料, 正!!!

今日每一碟餸都要等好耐... 見佢廚房出親都係火鍋配料... 真係等到頸都長... 搞到我唔可以專心吹水...

臨埋單時, 有黑衣人埋o黎推銷VIP卡, 申請1張要300蚊, 即送200蚊現金劵可以即日用, 仲有88折... 真係幾抵, 朋友即時申請咗... 佢地都申請咗囉, 咁即係我地唔使申請啦, 呵呵呵呵... 又慳一筆...

是次每人消費約$105元
味道: 4 環境: 3 服務: 3 衛生: 3 抵食: 3
###
地址 : 太古康山道1號康怡廣場3樓
電話 : 2870 0238

2012年3月15日 星期四

微型公仔屋 の 迷你麵麵觀 (Dollhouse Miniature の Noodle)

8 March 2012, Thursday 

新一季1:12微型公仔屋迷你店舖課程又開學啦!!! 今次已經係第3個COURSE啦!!! 連星期日都肯去上堂, 簡直越玩落去就越不能自拔...

今次玩破格, 先o黎一個KERORO微型劇場!!!

KERORO X「微型公仔屋 の 迷你麵麵觀 (Dollhouse Miniature の Noodle)」第7場TAKE 3... ACTION!!!

KERORO : 我做瀨尿蝦, 你做牛丸...
TAMAMA : 唔得!!! 我要做瀨尿牛丸!!! (TAMAMA準備爆樽)


2012年3月13日 星期二

微型公仔屋 の 自制小道具 -- 筲箕 (Dollhouse Miniature)


8 March 2012, Thursday

之所以話自己沉迷袖珍藝術, 係因為我除咗跟MISS學微型黏
土之外, 仲買咗一大堆書都不特上, 仲專程走去圖書館搵相關嘅書睇... 哈哈... 中學畢業之後都冇去過公立圖書館搵書...

以下嘅微型小道具係為咗我間「微型公仔屋 の 迷你果汁店 (Dollhouse Miniature の Fresh Juice Shop)」而制作o架!!!

我地平時洗菜洗生果都會用到嘅... 筲箕!!!


2012年3月12日 星期一

微型公仔屋 の 迷你果汁店 (Dollhouse Miniature の Fresh Juice Shop)

8 March 2012, Thursday
 

DaDaDaDa... 大家快D o黎睇吓我嘅「第4間」1:12微型公仔屋啦喂!!!

「微型公仔屋 の 迷你果汁店 (Dollhouse Miniature の Fresh Juice Shop)」 正式開業啦!!! 

2012年3月9日 星期五

微型公仔屋 の 迷你糖水車仔檔 (Dollhouse Miniature の Sweet Soup Trolley)

8 March 2012, Thursday

DaDaDaDa... 大家快D o黎睇吓我嘅「第3間」1:12微型公仔屋啦喂!!! 呀... 係公仔車先啱!!!

「微型公仔屋 の 迷你糖水車 (Dollhouse Miniature の Sweet Soup Trolley) 出場!!!

「走鬼糖水檔」每碗10蚊!!!

2012年3月6日 星期二

譚魚頭火鍋 Tanyoto Hotpot (II)

27 February 2012, Monday

今晚氣溫急降至10度!!! 呼)))))) 好凍呀!!! 食咩好呢... 忽然好想打邊爐... 早排去「譚魚頭」食小菜, 見佢有一人一鍋, 未試過, 好想試吓...

(前) 特色味碗--好好好味喎!!! 有冬菜, 蔥, 辣椒, 辣醬, 芫茜, 花生... 服務員強調加D熱湯底, 好味過豉油... 平時絕對唔食蔥同芫茜, 今日一試難忘...
(中) 金湯海鮮鍋--超特濃雞湯... 居然真係有海鮮, 大大隻青口都OK, 隻蝦就梅嘅... 仲有粟米同紅蘿蔔, 好足料!!!
(後) 招牌蕃茄鍋--超特濃茄味... 好似成鑵茄膏咁...




招牌炸響鈴--上枱時碌咗1舊落地, 蝕咗... 係其他地方食過, 好似人地好味D, 佢呢個一熝就散開一片, 冇響鈴效果...


草原羊肉片--個樣靚到冇得彈, 大片到呢... 不過一熝就散開好多片, 同埋冇咩羊味...


水晶叉燒包--呢個超好食!!! 叉燒好足料, 叉燒醬甜甜地, 好正!!! 最鍾意佢熝熟之後晶瑩剔透嘅外表, 好吸引...


(前) 韓國年糕條--煙煙韌韌, 好得意!!! 嫌烏冬米粉之類食得多太悶嘅另類選擇...

(後) 牛根丸--好重黑椒味, 味道OK...


個電磁爐嘅火力都相當之猛, 食慢少少D湯滾得好勁... 一人一鍋都幾好, 又唔洗驚洗筷子, 又唔使驚D食物放咗落去會比人夾咗, 仲唔使驚唔知人地幾時重複落咗食物, 好容易夾錯咗D未熟嘅就弊...

我地坐係入門口嘅4人卡位, 超寬敞!!! 不過每逢有客人入o黎, 都會談論到我地食緊嘅一人一鍋, HONEY話我地做咗SAMPLE... 我覺得自己做咗海洋公園嘅大熊貓...

服務員都好落力, 態度都幾友善...

成餐都食得好開心... 一埋單... 嘩!!!!!! 4百幾蚊... 好貴呀!!! 我冇過囉, 我預3百幾蚊o架咋!!! HONEY話都幾好味呀, 一次半次, 都值嘅, 又唔係成日食... 係啫... 我都仲係有少少接受唔到囉... 個價錢實在太出人意表...

朋友話呢個價可以食火鍋放題啦... 不過又咁講, 火鍋放題我都食過幾間, 就算幾出名平時幾好食都好, 一到做火鍋放題D料就好垃圾...

今餐又的確幾好味嘅, 火鍋放題絕對唔可以相提並論...

呢個驚喜嘅代價真係大...

後記 : 咁多日冇寫BLOG, 因為我食完呢餐病咗成個星期... 咁我又唔係話佢D食物唔乾淨, 只係我自己體質問題, 每次一打完邊爐都會中招, 今年打2次就中2次喇... 醫生叫我以後都唔好再打邊爐呀... 嗚嗚嗚嗚...

是次每人消費約$220元
味道: 4 環境: 4 服務: 4 衛生: 3 抵食: 2
###
地址 : 太古康山道1號康怡廣場3樓
電話 : 2870 0238