蝦佬喂 @ 蘭桂芳 Halloween @ Lan Kwai Fong

29 October 2011, Saturday

舊年正日o黎蘭桂芳迫蝦佬喂, 都未入到去已經要掉頭走... 實在太多人, 加上D人流管制措施管到去冇雷公咁遠... 行咗1個鐘都未入到去蘭桂芳...

今年再接再厲, 因為唔係正日, 所以唔係太多人, 可以直入蘭桂芳...

而家先9:00PM, 時間尚早, 未有太多嘩鬼...

最離奇係呢3位人兄, 究竟佢地扮乜鬼??? 定係比人劏死牛, 劏剩條屎片???



9:30PM已經行完搭車返歸, 真有效率, 呵呵~

2011 香港美酒佳餚巡禮 Hong Kong Wine and Dine Festival

28 October 2011, Thursday

去過一次「2009香港美酒佳餚巡禮」, 嘩... 好鬼辛苦, 曬住日頭, 天氣又熱人又多, 而且當時仲係沙地, 沙塵滾滾咁, 去一次就怕怕...

今年見天氣轉涼, 同埋係夜晚去, 好啦, 再試一次啦...

係港鐵九龍站A出口有免費Shuttle Bus直接去到, 正!!! 我地坐5:30PM第一班車, 去到時冇咩人, 可以盡情影相...

入口擺放咗幾架老爺車, 好有型呀~

新鮮羅漢果煲薑茶

26 October 2011, Wednesday


今晚放工去吉豬島睇吓有咩生果好買... 咦... 點解生果櫃擺咗D迷你冬瓜係度嘅?!! 打晒BOW呔帶晒皇冠咁, 使唔使咁KAWAII呀?!!

睇真D... 哦... 原來係新鮮羅漢果o黎o架!!!

仲有張POSTER教大家點煲羅漢果薑茶, 好似幾好咁喎, 呢幾日翻風, 可以滋潤吓DRY到爆嘅喉嚨...

「兩餸套飯」の 南乳腐竹炆排骨 + 薑酒芥蘭炒臘腸

25 October 2011, Tuesday


好耐冇再重踏我嘅學廚之路啦, 尋日又突然好有衝勁, 好, 今日又試吓煮新o野先...

原本想試吓炒銀芽, 可惜去到吉豬島唔見有, 唯有買番近期練習緊嘅芥蘭...

雅敍一堂 Lis Kitchen (II)

21 October 2011, Friday

之前介紹過呢間午餐好食又抵食, 所以今晚食過翻尋味, 可惜...

一坐低就整碟白雲鳳爪o黎, 自從睇過江湖傳聞話白雲鳳爪係點解不經人手去骨之後, 我都冇再食過... 我相信呢個世界係冇免費前菜嘅... 一來唔想浪費食物, 二來唔想蝕比佢, 咁就唯有食落肚啦... 味道偏淡, 而且唔夠酸... 食完一D都唔開胃...

我地叫咗任選二款小菜嘅晚市套餐...

家廚老火湯--今晚係鱆魚蓮藕煲唐排, 味道不錯... 有足足6碗之多, 啱晒我地呢D冇住家湯飲嘅上班一族...

太爺雞(例)--好唔掂!!! 得D頭頭尾尾, 同埋雖然茶味同煙燻味都好香, 但係超鹹... 上次係午市食嘅太后雞好得多...

金瑤蝦干豆豉鯪魚油麥菜--好好味喎!!! 又唔太油, 豆豉配油麥菜真係絕配... 金瑤都好香... D蝦干就得人驚D, 仲黑過D豆豉...


冰梅錦江骨(送)--係屋台屋食LUNCH時派咗張COUPON... 豬軟骨3舊... 冰梅醬味道好怪... 同D豬軟骨格格不入... 唔好味...


個套餐就話$178, 不過加加埋埋, 埋單都$240... 以佢碟太爺雞咁嘅質數, 我就覺得唔抵食啦... 下次再o黎時要試吓其他餸菜得唔得先...

呢度有少少家庭式工業FEEL, 所以服務水平都係家庭式工業嘅質數, 所以, 唔好要求咁高, 會食得開心D...

是次每人消費約$120元
味道： 3 環境： 3 服務： 3 衛生： 3 抵食： 2
###
地址 : 太古太古城衛星閣地下1008-1009號舖
電話 : 2967 0777

行山遇故友

16 October 2011, Sunday
尋晚係「添好運」食得太飽, 今朝一早起身, 食咗4塊麥芽餅就一口氣衝咗上山, 我都覺得自己好勁!!!

因為有冷鋒南下, 天色超好!!! 香港難得的藍天白雲, 一定要影低以作留念...

對面海都好清, 難得, 難得...

水塘同陽明山莊都清晰可見...

4塊麥芽餅頂到而家, 勁!!! 上到大風坳11:30AM都未夠, 好, 食番個Second Breakfast先!!! 我第一次帶生果上o黎食咋, 平時成日見到D阿嬋響樹MET生果, 嘖嘖稱奇, 今日自己都加入埋佢地嘅行列啦!!! 係可喜??? 抑或可悲??? 個梨好多汁, 一路食一路滴, 條褲都滴濕晒, 照誇張!!! 而家天氣咁乾燥, 食完真係舒服晒, 好滋潤呀!!!

都已經秋天o架啦, 點解D花都仲開得咁燦爛嘅???

喂... 呢D... 咩果o黎架??? 個樣咁奇怪嘅???


落山時巧遇好耐冇見嘅同學仔, 我地一路傾一路落山, 2個老人家懷愐吓昔日學習點滴, 好開心呀!!!

添好運點心專門店 Tim Ho Wan, the Dim-Sum Specialists

15 October 2011, Saturday

今年9月之星同10月之星壽宴要合併, D媽媽們話好忙喎, 冇時間分2餐食喎... 是但啦, 我呢D閒雲野鶴, 基本上日日都好得閒... 唉, 不過剩係將就4個媽媽嘅時間, 就已經得番星期六晚上呢個Time Slot... 嘩, 好難啫... 結果搞到一約再約!!! 咁搞法, 學DD話齋, 遲早"月星"變"年星"!!!

人地話人多好辦事, 唔知點解明明有3粒星咁多, 我又已經出咗力搞掂咗第一輪時間表, 到最後搵地點呢個重任又推翻落我身上... DD, 你好o野!!! 「公司壞電腦, 幾日都唔會整好, 上唔到網搵餐廳」呢個大話都比你諗到, 不過... 你又有冇諗過... 大家第一個反應都係「DD屋企部電腦都上到網格!!!」... 嘿... 你D朋友平時扮傻, 你唔好當人真係傻嘅先得o架...

一直都好想去平民米芝蓮點心店「添好運」試吓, 但係真係好驚要企係人多擠迫嘅街道上面等粒幾兩粒鐘, 我驚未食到點心已經要CALL白車...

近日得知佢係深水埗嘅分店原來有得預訂VIP房, 最低消費1000蚊, 仲可以預訂私房點心, OK喎... 好似話幾難BOOK... 事不宜遲, 剩翻10日左右, 即刻打去了解吓先... OH... 竟然仲有位!!! 太好啦!!! 不過就要比500蚊DEPOSIT, 冇得BANK-IN, 要親身去到門市付款, 都幾有難度... 好彩得BOO爸幫忙前往, 呢餐壽宴先成事!!! 感謝~

壽宴前幾日仲擔心「榕樹」直搗香港, 好彩最終後勁不繼, 竟然係海中心消失咗, 哈哈, 真係神化~

VIP房係餐廳樓上, 有幾間房, 我地坐最入果間北京廳, 入面有2張枱, 今晚得我地, 可以放聲大笑, 唔使驚嘈親人, FREE到爆!!!

未人齊, 叫住幾個招牌菜食吓先...

晶瑩鮮蝦餃、香滑馬拉糕、黃沙豬潤腸、潮州蒸粉果--蝦餃皮薄餡靚, D蝦好鮮甜... 馬拉糕蔗糖味重, 好香, 甜度適中, 不愧係招牌菜... 黃沙豬潤腸嘅腸粉好薄呀, 豬潤味濃, 好得呀!!! 遲o黎嘅鑽媽好識貨, 唔知自己食緊咩, 但係話好味要再加單, 呢D就係招牌菜嘅魅力... 粉果唔係話好出眾, 但味道都OK, 而且個皮都晶瑩剔透, 人多都可以一試...

酥皮焗叉燒包、DD私房點心--招牌酥皮叉燒包, 個皮脆得好特別, 好好味, 班友仔之後亂加單, 得9個大人加3個豆丁, 竟然前後ORDER咗12隻, 真係CRAZY!!! 右邊係DD為班豆丁準備嘅私伙牛油曲奇, 我地放上叉燒包隻碟度扮點心比D豆丁食, 又幾襯隻碟喎, 衰鬼...

明明約7:30PM, D人都可以8:00PM先到, 咁算點呀?!! 仲成日話做阿媽身教好重要?!! 得把口講有咩用!!! 點解成日都要好似大明星咁, 要成村人等你遲到+早退?!!  我想講, 我D時間都好寶貴o架!!!

私房點心要2日前落單, 10月15日啱啱換咗新私房菜單, 加入蟹粉類點心... 可能好多人會為之瘋狂, 可惜我地呢班C9次次食親大閘蟹餐都係冇人肯食大閘蟹, 次次都食剩晒... 所以張餐單換上時令大閘蟹反而令我地選擇少咗...

原隻鮑魚雞粒酥(私房點心)--冇食過鮑魚雞粒酥, 等於冇o黎過添好運!!! 又話9個大人, 點解得8粒?!! 呵呵, 皆因鑽爸冇預先通知不請自來, 抵佢!!! 酥皮好香牛油味, 仲要鬆到一夾即散, 成枱都係幾十年老友, 我都唔客氣啦, 放棄筷子伸手去拎, 真係一D儀態都冇, 哈哈哈... 鮑魚比想像中大, 好有咬口, 個鮑汁煮得好好味, 比米芝蓮三星嘅「龍景軒 Lung Keen Hing」更好味!!! 如果可以打包1隻比Honey食就好啦!!!

燕液滑雞窩(私房點心)--呢個重點係食面頭嘅燕窩, 個包都幾鬆軟, 中間D餡有菇, 搞到我了走咗D菇之後都冇咩餡剩翻低... 又係冇鑽爸份, 錢就照夾, 嘩咔咔咔...

鵝肝醬炸粉果、蟹粉脆鍋巴、蟹粉香蔥煎腸粉、蟹粉雜菜煎餃子(私房點心)--DD原來唔食內臟, 落單前又唔出聲... 鑽爸終於有得食私房點心啦, 嘩咔咔咔... 粉果入面真係好大舊鵝肝醬呀, 好重鵝肝味呀!!! 唯一嘅缺點係太油, 食1件都要好大勇氣... 我驚皮膚敏感, 唔敢掂蟹粉點心, 問咗貓兄味道如何, 節錄如下... 「蟹粉類既o野全部都好油吓, 又無得配飯/麵, 不過好有蟹味... 飽魚酥一定最好啦, 其次蟹粉鍋巴好食, 好重蟹味」...

食完一輪私房點心, 又食番普通點心...

免治牛肉腸、家鄉咸水角、鳳爪排骨飯、韭黃鮮蝦腸--腸粉真係好得... 排骨飯係叫比D豆丁食... 咸水角都唔錯...

幾輪廝殺後, 清晒枱面, 侍應阿姐幫我地叫起私房甜品...

提子乾花生酥(私房點心)--嘩!!! 好巨型嘅花生呀!!! 好好味呀, 提子乾好香甜, 花生味好重, 餡嘅口感似啱啱整起仲熱辣辣軟淋淋嘅花生糖... 之前我仲為咗冇得食核桃酥而耿耿於懷, 點知花生酥一樣出色!!! 我全晚最鐘意係鮑魚酥, 第二就係呢個花生酥...

煎薑汁桂圓糕(私房點心)--嘩!!! 好夠薑呀!!! 好似過薑!!! 桂圓味比薑味蓋過晒, 隱隱食到桂圓肉... 不過整體都幾好味... 好彩我平時去澳門都會買即制薑糖食吓, 如果唔係可能會食唔落呢個"激"薑桂圓糕...

薑汁撞鮮奶(私房點心)--長頸鹿話好重奶味, 好滑... 佢等呢個即制薑汁撞鮮奶等到條頸好似又長咗D喎, 嘩咔咔咔... 佢都係自己攞o黎, 侍應阿姐問咗幾次起得未, 佢就嫌人地煩, 叫人唔好起住... 結果人地問到第3次定第4次, 佢先比人叫起, 之後又走去嘈人話咁耐都未有得食, 佢好趕時間之類... 點解呢個地球D人咁野蠻o架?!! 仲夠膽屈我冇SEND EMAIL通知大家餐廳名同地址!!! 抵佢要等o架, 嘩咔咔咔...


侍應阿姐全天侯服侍, 大家有講有笑, 雖然唔係酒店級服務, 但係舒服自在, 很棒!!!

有機會都會同Honey一齊再o黎, 不過要搵齊一大班人SHARE MINIMUM CHARGE係有D難度...

是次每人消費約$160元
味道： 4 環境： 3 服務： 3 衛生： 3 抵食： 3
###
地址 : 深水埗福榮街9-11號地下
電話 : 2788 1226

新斗記 Xin Dau Ji

11 October 2011, Tuesday

去完Yahoo搞掂咗個BLOG, 就去近近地嘅Times Square搵食...

附近開咗新斗記, 幾年前同朋友食過佐敦長樂街嘅總店, 美味回憶歷久不衰... 點可以唔同Honey去品嚐吓呢...

5:30PM入座, 一個客都未有, 所有職員仲Briefing緊, 我地坐低飲住杯茶先...

滷水鵝掌翼--好入味呀, 又淋喎, 好正呀!!!

Yahoo! BLOG升級 の 艱辛經歷

11 October 2011, Tuesday

Yahoo! BLOG升級已推行一段日子, 聽到好多BLOG友都有彈冇讚... 而自己一直升唔到級, 我仲以為自己係Yahoo! BLOG排名太低, 所以第一階段唔比我升級...

直至近日收到Yahoo! BLOG升級嘅e貓, 話咩香港Yahoo! BLOG升級過程將於10月12日進入第二階段... 咁我Click咗升級條Link都係冇反應... 後尾發現... 佢話我未夠13歲, 所以唔可以升級!!! 未夠13歲??? 唔係呀嘛???

搞咗好多日, 都係冇頭緒, 最後唯有嘗試係網上聯絡客服... 居然... 真係有人覆o架喎!!! 平時嘅回覆太官方, 攪到我成日覺得係電腦自動回覆, 哈哈哈...

經過一輪e貓往來, 終於... 客服叫我上佢Office比張身份證佢對一對... WoW... 我第一次上Yahoo咋, 幾大都上去參觀吓啦~

上到去, 客服比咗張Form我填, 再對一對身份證, 當晚已經可以升級!!! 真係鬆一口氣!!! 之前好擔心冇晒寫咗幾年嘅BLOG, 已經做好心理準備, 以後都唔再寫BLOG, 心情真係好低落... 多謝Yahoo客服嘅幫忙, 我今日又再可以寫BLOG啦~

不過, 升級後嘅系統比舊系統功能上差好多, 反應又慢, 好多o野都冇得SET, 我想要番舊系統呀!!!

不可不提, 坐響Yahoo門口個Receiptionist, 態度就... 

事緣我係會議室問客服Toilet點去, 佢話可以問Receiptionist拎鎖匙, 咁我去問Receiptionist啦, 佢不肖地慠慢地冷漠地沒有禮貌地叫我去對面街嘅商場, 嘩!!! 呢下真係超級Hard Feeling!!! 喂, 我好趕呀, 你仲叫我去對面商場??? 我鬼唔知對面Lee Gardens有Toilet咩!!! 我而家唔係謬謬然走入o黎問你借Toilet, 你同事連我身分證都睇埋啦, 你咁大間公司打開門做生意, 平日一定有好多客戶或者Partner上門開會, 你冇理由唔比佢地去Toilet啩, 又叫人去對面街嘅商場呀???

真係激死我!!! 你好聲好氣解釋, 我會嘗試去理解同接受, 但係佢個表情同態度同語氣真係好差!!! 呢個世界點會有D咁嘅人o架!!!

茶道 の 初體驗

5 October 2011, Wednesday

Honey之前興起想學嘆茶, 我作為佢嘅最大擁躉, 又點可以唔全力支持呀!!!

為咗買呢套茶具, 我花咗好多時間學人「淘寶」o架!!! 剛好趕得切係10月1日假期前送到~ 暫時都仲係得個擺字, 唔知幾時先開光, 哈哈哈~

重陽節, 登高去~

5 October 2011, Wednesday


今日重陽節, 傳統留落o黎嘅習俗係登高避瘟疫!!!

我同Honey都唔執輸, 上山趁吓熱鬧... 不過天氣就麻麻地, D煙霞好勁... 行行吓仲落大雨, 搞到要即時閃人...

出發前係匯江南食個午餐先, 不過食咗等於冇食, 落山之後要再去Pizza Hut食多一次Lunch...

上海粗炒--唯一食得落肚嘅食物...

最拿手--紅色嘅, 應該唔熟... 同埋得皮, 冇肉, 一舊都冇食到... 


九菜餃子--酸嘅... 唔敢吞落肚...


是次每人消費約$40元
味道： 1 環境： 3 服務： 3 衛生： 3 抵食： 1
### 地址 : 鰂魚涌英皇道1010-1056號香港水族廣場地庫2-3號舖
電話 : 2561 1192

峇里園印尼餐廳 Bali Garden Indonesian Restaurant 1968 (II)

4 October 2011, Tuesday

之前食過一次Lunch, 得幾枱客, 食物都幾好味, 仲坐得好鬼舒服, 所以今晚拉力早敍餐又再o黎幫襯過...

可惜, 可能因為今日全場爆滿嘅關係, 所以食物味道跌晒Watt不特止, 而且寧靜嘅環境變到嘈爆, 服務更由零級變為零++級!!!

在場9成人都係食套餐, 好似幾抵咁, 不過唔係我地想食嘅o野, 所以決定散叫, 少咗D唔飲嘅湯同小吃同餐飲, 仲平...

加多加多沙律--嘩!!! 用豆腐泡做沙律, 沙嗲醬做沙律汁... 好奇特嘅配搭...
真係唔多啱胃口囉... 印尼最出名嘅炸蝦片竟然又淋又凍又濕, 最後食剩大半... 唉...

馳名炭燒沙嗲併盤(豬+牛)--用爉燭座熱住咁上, 等D沙嗲暖暖地Keep住最好味嘅溫度, 原本好抵讚... 可惜除咗食到燒焦咗嘅炭之外, 在場人士完全食唔出邊支沙嗲係牛邊支沙嗲係豬...

招牌新鮮海南雞(半隻)--朋友勁讚話D雞好滑, 好好味...

咖喱牛腩--乾硬如柴, 冇人肯食!!! 應該話, 想食都食唔落, 用牙o趙極都o趙唔開... Texture完全唔似牛腩... 真係好想叫佢回水!!!

印尼特色炒飯--炒飯依然美味!!! 掀起塊葉仲出煙架!!! 呢2串沙嗲雞又好正常喎... 果隻煎蛋個樣簡直不堪入目, 不過味道係正常嘅... 呢塊特大蝦片就似樣喇D口感, 咬落去好實在...
嘩!!!!!! 依家寫BLOG先睇到, 樹葉上面個4口釘書釘好嚇人呀!!!!!! 平時D餐廳好似係用牙簽o架嘛?!! 唔小心食咗落肚點算呀?!!

印尼雞肉炒金邊粉--冇上次豬肉炒金邊粉咁好味, 不過都幾好味!!! 以今晚嘅標準o黎講, 佢算係比較好味嘅頭三甲食品...

朋友叫咗杯紅豆冰, 好耐都未到... 搵經理催咗1次, 年青男侍應竟然好猶豫咁拎咗去隔離枱擺低走咗去... 查實我見到杯紅豆冰同佢個猶豫樣, 我已經揮晒手, 可惜佢都當睇唔到... 結果又要再搵經理, 經理都覺得奇怪, Check完機又返轉頭Check我地張枱, 見到杯紅豆冰去咗隔離枱都好無奈... 最後, 朋友終於有紅豆冰飲喇...

一對年青男女侍應全晚只顧企係廚房門口, 四目交投咁傾計, 完全無視自己D同事踢晒腳跑o黎跑去, 完全無視全場客戶狂揮手尋求服務... 坐我隔離枱客頂唔順, 拎住餐牌走埋去佢地面前落單... 落完單佢地繼續原地踏步, 四目交投... 我嘅奇遇真係日日新鮮!!! 對呢對神奇男女, 我比8個珍!!!

經理, 真係辛苦晒你喇!!! 感覺上, 全間餐廳得你一個人做緊o野咁... 咁搞法, 真係有三頭六臂都頂唔住啦!!!

是次每人消費約$155元
味道： 3 環境： 4 服務： 2 衛生： 3 抵食： 3
###
地址 : 旺角太子道西193號新世紀廣場6樓601號舖
電話 : 2619 1926