網頁清單

2011年10月22日 星期六

添好運點心專門店 Tim Ho Wan, the Dim-Sum Specialists

15 October 2011, Saturday



今年9月之星同10月之星壽宴要合併, D媽媽們話好忙喎, 冇時間分2餐食喎... 是但啦, 我呢D閒雲野鶴, 基本上日日都好得閒... 唉, 不過剩係將就4個媽媽嘅時間, 就已經得番星期六晚上呢個Time Slot... 嘩, 好難啫... 結果搞到一約再約!!! 咁搞法, 學DD話齋, 遲早"月星"變"年星"!!!

人地話人多好辦事, 唔知點解明明有3粒星咁多, 我又已經出咗力搞掂咗第一輪時間表, 到最後搵地點呢個重任又推翻落我身上... DD, 你好o野!!! 「公司壞電腦, 幾日都唔會整好, 上唔到網搵餐廳」呢個大話都比你諗到, 不過... 你又有冇諗過... 大家第一個反應都係「DD屋企部電腦都上到網格!!!」... 嘿... 你D朋友平時扮傻, 你唔好當人真係傻嘅先得o架...

一直都好想去平民米芝蓮點心店「添好運」試吓, 但係真係好驚要企係人多擠迫嘅街道上面等粒幾兩粒鐘, 我驚未食到點心已經要CALL白車...

近日得知佢係深水埗嘅分店原來有得預訂VIP房, 最低消費1000蚊, 仲可以預訂私房點心, OK喎... 好似話幾難BOOK... 事不宜遲, 剩翻10日左右, 即刻打去了解吓先... OH... 竟然仲有位!!! 太好啦!!! 不過就要比500蚊DEPOSIT, 冇得BANK-IN, 要親身去到門市付款, 都幾有難度... 好彩得BOO爸幫忙前往, 呢餐壽宴先成事!!! 感謝~

壽宴前幾日仲擔心「榕樹」直搗香港, 好彩最終後勁不繼, 竟然係海中心消失咗, 哈哈, 真係神化~

VIP房係餐廳樓上, 有幾間房, 我地坐最入果間北京廳, 入面有2張枱, 今晚得我地, 可以放聲大笑, 唔使驚嘈親人, FREE到爆!!!



未人齊, 叫住幾個招牌菜食吓先...

晶瑩鮮蝦餃、香滑馬拉糕、黃沙豬潤腸、潮州蒸粉果--蝦餃皮薄餡靚, D蝦好鮮甜... 馬拉糕蔗糖味重, 好香, 甜度適中, 不愧係招牌菜... 黃沙豬潤腸嘅腸粉好薄呀, 豬潤味濃, 好得呀!!! 遲o黎嘅鑽媽好識貨, 唔知自己食緊咩, 但係話好味要再加單, 呢D就係招牌菜嘅魅力... 粉果唔係話好出眾, 但味道都OK, 而且個皮都晶瑩剔透, 人多都可以一試...



酥皮焗叉燒包、DD私房點心--招牌酥皮叉燒包, 個皮脆得好特別, 好好味, 班友仔之後亂加單, 得9個大人加3個豆丁, 竟然前後ORDER咗12隻, 真係CRAZY!!! 右邊係DD為班豆丁準備嘅私伙牛油曲奇, 我地放上叉燒包隻碟度扮點心比D豆丁食, 又幾襯隻碟喎, 衰鬼...



明明約7:30PM, D人都可以8:00PM先到, 咁算點呀?!! 仲成日話做阿媽身教好重要?!! 得把口講有咩用!!! 點解成日都要好似大明星咁, 要成村人等你遲到+早退?!!  我想講, 我D時間都好寶貴o架!!!

私房點心要2日前落單, 10月15日啱啱換咗新私房菜單, 加入蟹粉類點心... 可能好多人會為之瘋狂, 可惜我地呢班C9次次食親大閘蟹餐都係冇人肯食大閘蟹, 次次都食剩晒... 所以張餐單換上時令大閘蟹反而令我地選擇少咗...

原隻鮑魚雞粒酥(私房點心)--冇食過鮑魚雞粒酥, 等於冇o黎過添好運!!! 又話9個大人, 點解得8粒?!! 呵呵, 皆因鑽爸冇預先通知不請自來, 抵佢!!! 酥皮好香牛油味, 仲要鬆到一夾即散, 成枱都係幾十年老友, 我都唔客氣啦, 放棄筷子伸手去拎, 真係一D儀態都冇, 哈哈哈... 鮑魚比想像中大, 好有咬口, 個鮑汁煮得好好味, 比米芝蓮三星嘅「龍景軒 Lung Keen Hing」更好味!!! 如果可以打包1隻比Honey食就好啦!!!



燕液滑雞窩(私房點心)--呢個重點係食面頭嘅燕窩, 個包都幾鬆軟, 中間D餡有菇, 搞到我了走咗D菇之後都冇咩餡剩翻低... 又係冇鑽爸份, 錢就照夾, 嘩咔咔咔...



鵝肝醬炸粉果、蟹粉脆鍋巴、蟹粉香蔥煎腸粉、蟹粉雜菜煎餃子(私房點心)--DD原來唔食內臟, 落單前又唔出聲... 鑽爸終於有得食私房點心啦, 嘩咔咔咔... 粉果入面真係好大舊鵝肝醬呀, 好重鵝肝味呀!!! 唯一嘅缺點係太油, 食1件都要好大勇氣... 我驚皮膚敏感, 唔敢掂蟹粉點心, 問咗貓兄味道如何, 節錄如下... 蟹粉類既o野全部都好油吓, 又無得配飯/麵, 不過好有蟹味... 飽魚酥一定最好啦, 其次蟹粉鍋巴好食, 好重蟹味...



食完一輪私房點心, 又食番普通點心...

免治牛肉腸、家鄉咸水角、鳳爪排骨飯、韭黃鮮蝦腸--腸粉真係好得... 排骨飯係叫比D豆丁食... 咸水角都唔錯...



幾輪廝殺後, 清晒枱面, 侍應阿姐幫我地叫起私房甜品...

提子乾花生酥(私房點心)--嘩!!! 好巨型嘅花生呀!!! 好好味呀, 提子乾好香甜, 花生味好重, 餡嘅口感似啱啱整起仲熱辣辣軟淋淋嘅花生糖... 之前我仲為咗冇得食核桃酥而耿耿於懷, 點知花生酥一樣出色!!! 我全晚最鐘意係鮑魚酥, 第二就係呢個花生酥...



煎薑汁桂圓糕(私房點心)--嘩!!! 好夠薑呀!!! 好似過薑!!! 桂圓味比薑味蓋過晒, 隱隱食到桂圓肉... 不過整體都幾好味... 好彩我平時去澳門都會買即制薑糖食吓, 如果唔係可能會食唔落呢個"激"薑桂圓糕...



薑汁撞鮮奶(私房點心)--長頸鹿話好重奶味, 好滑... 佢等呢個即制薑汁撞鮮奶等到條頸好似又長咗D喎, 嘩咔咔咔... 佢都係自己攞o黎, 侍應阿姐問咗幾次起得未, 佢就嫌人地煩, 叫人唔好起住... 結果人地問到第3次定第4次, 佢先比人叫起, 之後又走去嘈人話咁耐都未有得食, 佢好趕時間之類... 點解呢個地球D人咁野蠻o架?!! 仲夠膽屈我冇SEND EMAIL通知大家餐廳名同地址!!! 抵佢要等o架, 嘩咔咔咔...


侍應阿姐全天侯服侍, 大家有講有笑, 雖然唔係酒店級服務, 但係舒服自在, 很棒!!!

有機會都會同Honey一齊再o黎, 不過要搵齊一大班人SHARE MINIMUM CHARGE係有D難度...

是次每人消費約$160元
味道: 4 環境: 3 服務: 3 衛生: 3 抵食: 3
###
地址 : 深水埗福榮街9-11號地下
電話 : 2788 1226

7 則留言:

  1. 你想多啦,我無當你,我講既係事實,我公司要排隊,唔係話有事就立即整,整電腦sir每日只係公司一陣,整唔好就第日,老闆親戚黎架,私人野夜晚我無時間攪,如果無去街,回家後立即掃地,拖地,洗衫,收衫,摺衫,打機,沖涼,10:30pm就煮飯,跟住就睇番褔綠壽,阿pro sir,麵包王金卓求,iris,全部錄唔洗浪費時間等廣告,已經過2:00am,星期六,日仲要睇番咩健康嘜嘜,明珠台成星期錄既野,雜誌,去街,邊得閒,你應該明白興趣多多既人係好忙架,新韓劇,韓文,烘焙都未攪到呀
    [dd913回覆11/07/2011 15:36:12]你有你想法啦!之前我搵地方,den又話我自已要主意,文華食唔到,九龍城又唔喜,搵又話唔搵又話
    [版主回覆11/04/2011 15:58:21]唔記得問,有邊個回家後唔使掃地,拖地,洗衫,收衫,摺衫,打機,沖涼,睇電視,雜誌,去街...呢個唔係你可以唔搵地方嘅理據囉~
    [版主回覆10/27/2011 20:54:34]=___= 得一雙眼睇唔睇到咁多o野呀?!! 食番D杞子補一補好喎~

    回覆刪除
  2. Boo爸問點解佢無"原隻鮑魚雞粒酥"做獎勵!
    [版主回覆10/27/2011 20:55:41]呀哈哈哈... 又係喎!!! 佢早響嘛, 要預訂o架嘛!!! :p

    回覆刪除
  3. 我都唔想遲到架,但係阿女跳完舞要棉一棉先得,佢未醒已經俾我叫左起身,盡趕了!
    [版主回覆10/28/2011 13:20:35]聽講你去食飯途中買了件南瓜衫, 的確係"盡趕"~

    回覆刪除
  4. 嘩!好味 + 唔敢搭咀....
    [版主回覆10/28/2011 14:22:07]的確好味!

    回覆刪除
  5. 都係順便啫,用左都冇十分鐘。
    [版主回覆10/29/2011 23:45:14]借問聲, 有冇聽過以下呢D順口黃???
    1) 錯就要認, 打就要企定~
    2) 解釋即係掩飾, 掩飾即係冇出色~

    回覆刪除
  6. SORRY,冇聽過喎,不過我都冇話自己啱,亦冇掩飾甚麼,只係我真係已經盡趕,或許有小朋友的媽咪會明。
    [版主回覆11/04/2011 15:49:34]明知自己已經遲大到, 仲妄顧成枱朋友呆等緊, 走咗去Shopping, 可能你都仲係覺得自己係啱嘅, 之但係, 唔該你唔好話自己「已經盡趕」!!! 真係有「盡趕」嘅話, 冇可能仲走去Shopping囉!!!
    [版主回覆11/04/2011 15:48:44]最後, 唔該你唔好再搬D咩「有小朋友的媽咪會明」呢D似是而非嘅道理出o黎!!! 因為, 你阿女瞓到幾點你可能控制唔到, 但係你去買南瓜衫呢個動作絕對係你個人控制得到, 唔關你阿女事!!!
    [版主回覆11/04/2011 15:48:30]再者, 你話你買南瓜衫係順便, 用左都冇十分鐘... 好, 就唔計你兜路去兜路回, 齋講果10分鐘, 如果你冇遲呢10分鐘, 你已經唔係最遲果個, 所以, 10分鐘都好緊要!!!
    [版主回覆11/04/2011 15:48:19]查實... 我BLOG度講緊果個都唔係你, 不過我見你自己"對號入座"衝出O黎咁FUNNY, 咪同你嗲吓囉... 乜你有「成日話做阿媽身教好重要」咩??? 乜你有「成日都要好似大明星咁」咩???

    回覆刪除
  7. C房點心又幾特別~~~~

    回覆刪除