珍寶王國：值得記念嘅日子，搞禍晒！

4 December 2017, Monday

終於... 寫晒１１月打前嘅ＢＬＯＧ！

而家只剩下１２月咋，要努力追追追呀～（１２月尾病咗鬼咁多日，都無咩幾多篇要寫，呵呵）

急著從台灣回港，為嘅係第３次路試！

上星期密集式上堂，今日，終於考到喇！我考到車牌喇！我終於考到車牌喇！哇！（放聲大哭，嗚嗚嗚嗚）

我唔使再黎呢個地方啦～

珍寶王國 Jumbo Kingdom : 末日「浮」牲

22 December 2012, Saturday
多年前睇完「食神」, 見到星爺表演「亨」功水上漂, 唔駛坐駁腳艇仔, 係咁易運吓內功就咁就飛咗埋去海鮮舫度, 勁... 誇張呀!!! 哈哈哈... 之後我同Honey諗住去海鮮舫朝聖, 點知... 去到沙田, 間海鮮舫唔使經水路, 係陸路就行到去嘅?!! 咦... 去錯地方啦... 嘩咔咔咔!!! 套用軟硬金句, 呢鋪真係「超低能, 勁搞笑」!!!

2012年12月21日被廣泛流傳為世界末日, 末日過後, 決定登上方舟, 幫手食一食之前登船避難的剩餘物資(各種牲畜)... 哈哈...

事隔多年, 再到海鮮舫朝聖, 今次終於都冇去錯啦, 係南灣登上駁船...

無論駁船定係海鮮舫, 都係一樣咁古色古香...

九龍吐珠... 好架勢堂呀!!!


海鮮舫有古代海鮮舫的壁畫...

嘩!!! 龍椅呀!!!


剛到埗, 見到有外籍遊客著咗古裝扮皇帝皇后拍照, So Funny!!!

地方都幾大, 分3層, 地下有VIP廳, 2樓同3樓加埋有4個大廳...


豉汁蒸鳳爪 $24
-- 好腍好入味, 色素過剩, 顏色有點恐怖...

紫菜墨魚餅 $28
-- 墨魚好新鮮, 好好味, 熱辣辣, 正呀!!!

鴛鴦芝麻奶黃煎堆 $26
-- 小巧精緻, 不油不膩, 奶黃餡料味道不過不失...

珍寶蝦餃皇 $40
-- 體型細小, 蝦肉新鮮爽脆, 味道略淡, 不過不失...

蜜汁燒風鱔 $45
-- 拉姑強烈推介!!! 蜜汁風鱔略燒至脆口, 蜜汁香甜, 鱔味濃, 好好味!!!

鮑汁豬仔腳 $55
-- 後加項目, 敗筆之作... 腳型巨大, 不似豬仔, 膻臭強烈, 食一啖已想吐, 鮑汁味道亦怪怪的...

咁嘅格局, 仲以為整色整水呃遊客, 估唔到... 整體味道唔差, 服務亦不錯, 價錢比起東區更平, 請客一流... (當然係指外籍人士啦)

是次每人消費約 $140 元
味道： 3 環境： 5 服務： 3 衛生： 3 抵食： 3
###
地址 : 香港仔黃竹坑深灣碼頭徑
電話 : 2553 9111

富臨漁港(香港仔)

上星期日(2007年4月1日，愚人節)去咗香港仔富臨漁港飲IC的滿月酒，原本冇乜特別，但係嗰間酒樓嘅服務質素真係前所未見，高潮迭起，所以想係度同大家分享下我哋嘅奇妙經歷！

 

TO IC：請不要介意，這絕對不是投訴，而係嗰晚實在太“妙”喇，所以先想同大家分享下咁啫...

奇人奇事(1)--麻雀：

由於7點已經到達，而又未知坐邊張枱，所以諗住坐係麻雀枱唔使企咁耐！得3個人點打呀？咪係打3人麻雀囉，難唔倒我哋嘅！後尾IC介紹舊同事比我哋識，順便加入我哋嘅戰團。第一鋪鑽媽發現得16楝，何超即時指住我話：『實係拉姑多咗喇，楝牌咁長』，後尾我數過冇多，其他人再數都冇多，都大家以為走咗花時，鑽媽又發現有花，最後大家一致决定換隔籬枱副牌，呵呵呵呵... 換咗副牌之後先發覺... 之前副牌除咗唔見咗4隻之外，仲冇骰，亦冇東南西北o架！

奇人奇事(2)--換碟：
食完白灼蝦，循例換碟，但係個侍應竟然放低成叠碟，仲要我地遞自己隻碟比佢，仲要自己係叠碟度攞碟，都算喇，仲要隻隻碟都好似冇洗過咁，第一隻有蝦殼，第二隻有生菜，唉！仲一d歉意都冇，好似好理所當然咁，唉唉！

奇人奇事(3)--蟹拑：
食炸蟹拑之前，侍應竟然收走用嚟點蟹拑嘅甜酸醬，全枱即時有反應話佢做乜收咗嗰醬，可能佢(已轉身離開)係失聰嘅，所以冇理我哋！後來蟹拑嚟時，問佢攞醬佢又唔理我哋，叫部長攞醬又攞碟紅醋嚟，我哋唔肯就範佢先叫人去攞碟甜酸醬嚟，結果等到其他枱都上晒下一道菜，侍應先攞碟甜酸醬嚟，唉唉唉！

奇人奇事(4)--蟹拑：
大家都未食完蟹拑，侍應又急於上下一道菜，何超隻蟹拑食咗半隻(當時佢係用2隻手指攞住隻拑)，侍應就收走佢d碗碟，攪到何超攞住隻蟹拑都唔知點算，好尷尬，同枱嘅人都睇唔過眼，議論紛紛，何超唯有係冇碗碟嘅情況下，繼續食埋剩番嗰半隻蟹拑喇！唉唉唉唉！

奇人奇事(5)--雪碧：
到差不多尾聲時，侍應又出奇招喇！話說何超係飲緊芬達橙汁嘅，而另一位小姐係飲緊熱水嘅，個侍應竟然問佢地：『係咪飲緊雪碧？』，兩位當事人緊係答：『唔係』喇，個侍應攞住罐雪碧話：『呢隻好飲』，兩位當事人答：『唔要』，但個侍應竟然繼續放低“成罐未開過”嘅雪碧，o係兩位當事人嘅杯側邊(一人一罐)，然後就走咗！飲緊熱水嗰位小姐都唔知發生緊乜嘢事，其他人答佢：『佢話呢隻好飲，介紹比你飲喎！』，飲緊熱水嗰位小姐比嗰侍應激到半死，反晒眼咁話：『唔該晒佢喎』。唉唉唉唉唉！

 

奇人奇事(6)--影相：
呢單唔關酒樓事！係我哋未同BB影相就坐咗落麻雀枱，跟住我先醒起，但鑽媽話只有長輩及親人先會同BB影相，在坐得鑽媽一個擺過滿月酒，所以佢係呢方嘅說話多少都有d權威性，攪到我唔好意思走去影... 最後都冇去影... 好無奈，帶晒相機，之前仲特登义足電o架嘛！唉！

懵人懵事：
是夜要11點幾先散席，散席後我哋係香港仔中心巴士站分道揚鑣，何超搭巴士去銅鑼灣、鑽媽搭巴士去中環、我搭小巴去鰂魚涌。架小巴係數碼港開出，等咗陣見有時間咪睇下幾多分鐘一班車囉，點知越睇越唔對路，原來數碼港嘅尾班車係10:30pm開出o架！Oh No... 即刻跑番轉頭跟何超搭巴士去銅鑼灣，但係佢已經上車坐低咗，架車仲開緊走喇，佢見我唔知乜事，大家用身體語言溝通咗幾下，架巴士就走咗喇！唉！唯有等下一架巴士喇！

 

真係冇諗過滿月酒要咁夜先散水！飲開嗰d都係7點幾8點就開始，9點就一定散水，所以之前冇check清楚尾班車時間囉！