網頁清單

2007年8月31日 星期五

鐵板燒 Express Teppanyaki



星期一(2007年8月27日)晚去咗太古城美食廣場開餐...

叫左一個羊肉片同一個蒜香雞排,每個餐包一個飯,一個湯,兩樣菜,以為份量少咗d,我就7成飽,羊肉片好有羊味,蒜香雞排好香口,食餐便飯呢講,味道算合格。^_^

 

不過... 冇地方擺袋, 要自己抱住...

是次每人消費約$58元
味道:2 環境:2 服務:2 衛生:3 抵食:4

###

地址:側魚涌太古城中心一期3樓大食代

 


2007年8月28日 星期二

王家沙--撻Q記

上星期四(2007年8月23號)晚放工去王家沙食晚飯, 照平常咁叫菜,過左廿幾分鐘乜都冇得食(平常好快上菜),發脾氣後5分鐘先有個--
排骨抄年糕:一食已經覺得走咗樣,排骨變咗猪排...

之後再上個--
失傳醬咕嚕肉:嘩,離晒譜,一睇個樣已經唔對路,街邊大排檔貨色,連造型同配料都變晒!食落去仲慘,d肉得2mm咁薄,全部都係麵粉,鬼斧神工!個醬仲離譜,變咗街邊貨色(仲差過街邊貨色),我地懷疑個廚走咗,個"失傳醬"都失傳埋...

隔咗好耐,個蕃茄莧菜都未有影,我地懷疑個廚走咗,其他人唔識整,所以咁耐都上唔倒菜!之後黎咗,一睇個樣已經知道唔係以前個味蕃茄莧菜!一食落去,個廚d功夫現晒形...


埋單時,同經理講:"個廚係咪轉咗,今晚d野好難食",佢竟然唔理我,走到出門口先同空氣講:"有乜唔同,咪又係個d野"!哈,呢d係咩野"待客之道",請大家自己係心裡面評下理!!!



我由佢一開張到而家,每星期都去食至小一次,佢全部菜我都食過好多次,d味道一轉咗,我點會唔知!我地兩個禮拜後會再去一次,如果d味道冇返番黎,咁冇辦法喇,唯有同王家沙講聲"永別喇"!!!

是次每人消費約$100元
味道:1 環境:3 服務:1 衛生:3 抵食:1

###

地址 : 側魚涌太古城中心1 樓101號舖(溜冰場側)
電話 : 25603668

 


2007年8月24日 星期五

浪茄 + 蛇灣 一日遊

上星期日(2007年8月19日)honey d friends約咗我地去遊船河, 好緊張呀, 又驚會壞船或者好大風浪(我一生人坐船嘅次數好小, 但壞船同打風嘅比例佔咗7-8成), 又驚暈船浪 (到時又要去睇醫生就慘喇)...

10:30am -- 由西貢碼頭出發, 成個碼頭迫滿晒人, 幾驚佢塌呀... 你睇後面幾多船一齊出發...



行咗半個鐘, 依然仲係好多船係後面...


再行多廿分鐘, 開始見倒d奇石, 成座山都係, 好靚呀, 大自然真係奇妙...


12:00nn -- 終於到達目的地--浪茄, 傳聞係香港最靚嘅沙灘, 船長話唔係成日去到, 因為今日海面好平靜, 先可以黎喎, 唔知真唔真...


沙灘上面唔係太迫人, 仲有大堆人玩緊沙灘波...


週圍勁多船, 熱鬧過彌敦道咁滯...



2:00pm -- honey d friends玩咗一輪(有d游完水, 有d玩完Wake-Board, 有d食零食飲紅酒, 有d上沙灘暴曬, 各式其色)之後, 去咗唔知邊樹食海鮮, 最好味都係椒鹽鮮魷(my飛佛)囉...



食完野咁啱比我地撞到呢個趣怪情景, 中式龍舟+西式帆船, 一齊係大海向前進發... 哈哈, 香港果然係個中西合璧嘅表表者!




食飽飽, 船長再帶我地去近d嘅蛇灣, 繼續暢泳, 繼續玩Wake-Board, 繼續唔理隻香蕉船, 繼續食埋d零食飲埋d紅酒... (基本上, 我全日冇掂過水, 因為唔想着住件"肥熊維尼"泳衣, 比人睇到我肥美嘅肚腩, 誤會我有咗5-6個月身己就唔好喇) 

6:00pm -- 日落西山, 出咗成日汗, 係時候打道回府喇...



回航後, 又要開始我地嘅美食之旅喇... (前文提到, 最後去咗天后嘅粵全食)

 


2007年8月22日 星期三

粵全食 (II)

上星期日(2007年8月19日)游完船河去咗天后揾食, 曬住一日出咗好多汗, 好想飲啖湯! 唸o黎唸去都唸唔倒去邊, honey d friends又未食過粵全食又想試下, 好彩佢仲有位喳, 食到一半時佢已經滿座喇!

我地order咗: -
. 話梅涼瓜 : 上次試過好味, 所以推介比honey d friends試試
. 沙拉骨 : 好味, 但好溜
. 鍋仔菜 (唔記得個名) : 好味 (當我地仲猶豫緊叫邊隻菜好, 老細話兩隻都落d囉, 喂, 唔該晒喎)
. 清遠鷄 : 仲好味, 唔使點醬, 仲好彈牙, d大蔥都好好味
. 砵仔蒸飯 :  (一個梅菜肉崧, 一個黃鱔, 仲有一個唔記得) 好軟熟, 即叫即蒸, 加埋豉油, 好正

因為得魚湯同幾款羹, 所以只order了兩客比honey d friends享用...


飯後送咗類似楊枝金露嘅甜品, 都好正! 哈哈, 但係我地都照原定計劃, 食完飯走咗去晶晶甜品買糖水返屋企食, 仲正, 呵呵呵呵...

是次每人消費約$150元
味道: 4 環境: 3 服務: 3.5 衛生: 3.5 抵食: 3.5

 


意大利芝士番茄沙律 Italian Salad w/ Feta Cheese & Tomato

11 August 2007

Food Menu ~ Quick & Easy Series (Italian Cooking)
拉姑食譜 ~ "我煮到, 你煮到"系列



因為幫無敵買咗支沙律醬, 雖然見到佢幾次都唔記得比佢, 不過都整定個食譜比佢參考定先...

東大門韓國料理 Kim Mi Restaurant


呢幾日都好倦, 日日未夠十一點就瞓, 今日發現堆積咗好多篇blog未寫... 唔得喇, 今晚要拿拿聲搞掂晒去先...

上星期五(2007年8月17日)約咗幾個姊妹(肉酸, 早安喇, 多此一脚)食晚飯, 早安喇提議去東大門食韓國燒烤暴肥... 吓?! 又食暴肥, 靠害咩, 人地減緊肥架...

原本我第一個離開公司, 唸住準時到, 點知係地鐵站撞倒個舊同學, 一傾就傾咗成粒鐘, 搞到遲晒大到...

去到佢地已經燒緊, 一坐低即刻全部人狂夾野比我食, 嘩, 正, 皇帝式享受... 平時都唔覺佢地咁孝順...

最好味係牛仔骨, 羊肉, 猪腳薑, 腐竹蛋糖水, ... 肥牛都唔錯, 我地仲自制金菇肥牛卷添, 好好玩...

點心紙形式落單, 限時食2個鐘, 我地book 7:00pm佢話冇位, 叫我地book 6:45pm, 真係奇, 早15分鐘就會有位?!
部份枱用屏
風間開, 我地坐四人卡位, 私人空間極足, 正!!!
不過嘈過乜, 傾唔倒偈, 結果我地係樓下商場出口傾咗成個鐘(因為食得太飽, 差d笑到嘔出o黎), 仲要約埋之後一餐(8月31號去j.w.marriot食甜品暴肥), 先肯散水...

甜品暴肥係我個御用營養師提議去架, 你地話喇, 幾時見過d營養師叫個client去食暴肥得架, 頭先仲狂夾烤肉比我食, 唉... 真係比佢激死...

是次每人消費約$130元
味道: 2.5 環境: 2.5 服務: 2.5 衛生: 3 抵食: 4

###

地址 : 旺角西洋菜街51號友誠商業中心5字樓
電話 : 2398-3777/2398-1077

 


2007年8月17日 星期五

怡東軒 Yee Tung Heen

前文提到, 上星期日(2007年8月12)去咗The Excelsior Hong Kong(怡東酒店)Marina Rooms(岸濤廳)飲茶...


其實d點心係怡東軒供應, 個邊滿座, 呢邊一樣滿座!


原來呢度係冇點心紙o架, 有幾架鐵皮銀色點心車係度推下推下, 揀好咗點心, 個侍應會攞去你張枱 , 好好feel架! 唔想行, 你亦都可以舒舒服服坐係位度, 叫個侍應過o黎落單嘅!


我地每次只order兩至三款, 食完先再order, 可以慢慢嘆, 搭真d味道: -
. 貢菜鷄粒飽魚餃 -- 超超超超好味, 一粒餃有3種味道, 3種口感, so special...
. 魚翅灌湯餃 -- 一般, 魚翅都足料
. 欖仁蒸肉排 -- 好味, 最正係冇肥肉, 欖仁味好特別
. 蝦醬蒸鮮魷 -- 好味, 蝦醬好香, 鮮魷好鮮


. XO醬煎腸粉 -- 一般, 都係"前"東海最好食
. 奶皇馬拉盞 -- 一般
. 帶子燒賣 -- 超超超超好味, d帶子超新鮮, 又彈牙又鮮甜, 正呀...
. 炸蟹拑 -- 好味, 好彈牙, 比起平時仲大舊好多 (零零丁丁要廚房炸一隻咁大把, 真係有d唔好意思)




已經飽到嘔, 但係仲要繼續order落去, 點解?! 咪因為仲有quota剩囉, 好辛苦呀... 好飽呀...


. 酥皮蛋撻 -- 好味 (大家係咪好奇怪, 我明明係唔食蛋撻o架喎! 但係我今年終於克服心理陰影, 食咗人生中第一隻蛋撻啦, yeah...)
. 木瓜燉奶 -- 超超超超好味, 木瓜超甜, 燉奶超滑
. 栗子西米布甸 -- 超超超超好味, 栗子同西米味道好夾



講真, 通常食飽咗, 再食d野落去會覺得冇咁好食, 但係佢d甜品仍然係好好好好食呀!!!


平時去開鴻星, 東海, 西苑, 漢騰閣呢幾度地方飲茶, 都覺得唔錯喇! 但係飲完今餐茶之後, 我只可以將個4間飯堂評為中級價錢+中級味道, 而怡東軒就係高級價錢+高級味道, 雖然佢咁貴, 但係依然唔接受walk-in, 佩服!


埋單成為??? 其實我地都唔知食咗幾錢, 因為個經理話冇超過張coupon嘅銀碼(好似話剩番三個幾), 冇單, 可以走得! 張coupon係$488, 咁我估我地食咗大約$484.x啩! honey一路走一路話我好勁, 可以計到咁準! 喔呵呵呵呵... 使乜講, 我出晒名係"精算師"黎架啦, 喔呵呵呵呵...


是次每人消費約$0元
味道: 5 環境: 4 服務: 4 衛生: 4 抵食: 5 (因為唔使錢)


###


地址 : 銅鑼灣告士打道281號怡東酒店2樓
電話 : 2837-6790/2894-8888

 


2007年8月12日 星期日

朱古力拿破侖蛋糕@二德惠






明天(2007年8月12日)是honey牛一, 我今日特登去咗灣仔整番個蛋糕, 同佢慶祝下...


到達課室時, 個阿sir已經整好個朱古力蛋糕, 話咩我地整埋實唔夠時間喎! 啍, 你都整咗喇, 咁我整咩呀?! 好掃興呀! 期間不停硬銷product, 好可惡...


到整個酥皮時, 個阿sir又話我整得唔夠長, 我咪再整長d囉, 結果搞到多左二片(原本要三片), 整到咁薄, 成塊薄脆咁, 仲點會酥呀!


到鋪吉士醬時, 又比得小, 又話唔好鋪咁多, "必"晒出黎會好難睇, 後尾唸番... 餅店食個d, 全部都係勁多吉士醬同"必"晒出黎... 唉, 覺得好揾笨...


到餅面裝飾, 每人比得一粒士多啤梨, 沈可可粉時又話唔好沈咁多, 唔係唔比你沈, 不過食個個就慘/辛苦囉... 呵, 唔知咩理論! 好彩我"必"左個心喳, 其他人整好晒之後先見到, 個個不知幾後悔... 因為阿sir話唔夠吉士醬喎, 唔好亂"必"...


honey開頭食時都話冇乜味, 唔夠吉士醬... 之後又改口, 話都好好食呀... 哈... 收到!!!

2007年8月11日 星期六

拿破崙貝殼粉 Conchiglie Rigate (Shells) with Napoletana sauce

11 August 2007

Food Menu ~ Quick & Easy Series (Italian Cooking)
拉姑食譜 ~ "我煮到, 你煮到"系列



A very simple dish. Because it has a very few calories it can be eaten even when you are on a diet.
一個很簡單的菜. 因為有極少數的熱量,它可以吃即使當你正在減肥.

久違了的8號風球

今日(2007年8月10日)真係個個都跌晒眼鏡!!!

今朝掛緊1號ball時, 大夥兒仲滔滔不絕咁話回魂嘅風球特別勁, 但係肯定天文台6點(等人放晒工)先會掛8號ball...

到 lunch hour 落街買飯盒前仲係掛緊1號ball, 一出門口就掛3號ball, 食完飯盒就話3:30pm前會掛8號ball, 大家仲好老定唸住真係3:30pm先掛, 公司仲叫人2:45pm好走, 點知話口未完, 2:30pm已經掛8號, 真係快到有d措手不及(公司冇收音機, 天文台個網頁又halt晒)! d電話又jam晒, 我聽日個cake lesson都唔知點算, 電話又打極都唔通...

新界區同事9秒9即閃, 九龍同事隨即殿後, 至於我... 當然係最遲走o個個喇, 成3:30pm先鬆人, 因為... 我係行路返屋企架o痳!!!

我地離開前, 仲好好興致咁用手電拍低東隧+東區走廊嘅路面情況, d車基本上完全郁唔到!

 
唸住唔使點揼雨可以行到返屋企, 點知d大廈封住晒d當風嘅落地玻璃門, 搞到要兜路, oh no... 失晒預算, 好彩都係中級風力同雨啫, 小小濕+小小狼狽咁囉!


好橋地之前一晚收到2張電影禮券, 仲要係屋企附近間戲院, 所以咪去試下仲撲唔撲到飛囉, 但係honey d friend又約我地去太古城開餐, 於是我地換咗星期日下晏嘅五星鼠! 好耐未見過冇乜大片上都咁多人排隊, 戲院真係要多謝個風...


之後就去咗王家沙開餐, 我地離開時已經座無虛席... 然後... 當然要行條奪命斜上番屋企喇, 因為d小巴收晒工啦!

 


2007年8月10日 星期五

太古城西苑酒家 West Villa Restaurant




早2晚(2007年8月8日)因為係公司做到頭暈眼花, 所以放工唸住食好d, 咁見honey日又就到, 咪心郁郁想去西苑食大哥叉燒囉...


雖然係星期三, 但係去到時都好full, 好彩仲有幾張近門口嘅細枱!


我地order左: -
. 大哥叉燒 -- 必吃, 香甜鬆軟, 3分肥, 7分廋, 不過好多時遲左去就會買晒, 冇得食
架喇;
. 例湯 (蘋果雪梨煲豬展) -- 好甜呀, 好好飲呀! honey叫我第時煲比佢飲, 我明明
幾年前煲過喇, 佢個時唔肯飲, 仲要我自己一個人飲晒去呀!
. 肉碎抄涼瓜 -- 嘩! d涼瓜苦到吖! 我真係唔識欣賞, 留番比honey自己一個慢慢嘆
喇;
. 沙爹粉絲牛肉煲 -- 好治味, 食埋d粉絲好鬼飽, 早知唔使叫白飯


外傳: 隔離枱2位女士, 食緊個每人$698嘅黃油蟹套餐, 到隻十兩重嘅黃油蟹出場時, 見倒佢地好勞氣咁同d侍應理論, 大致上係話隻黃油蟹唔足十兩, 估計侍應講左d"Y"理(估計係生時足十兩, 熟後會變細之類), 個位女士即刻還以超級金句"而家我第一次食咩, 以前未食過咩...", 然後有個侍應攞隻生蟹出黎比個位女士睇, 個位女士都唔就範, 佢見我地影緊相, 佢又用手電影底隻生蟹做證據, 之後經理一手攞住個磅, 一手攞住第二隻生蟹(呢隻我離遠用肉眼睇都肥大好多), 磅比個位女士睇, 終於收貨! 好野, 我要向個位女士敬禮, 因為真係覺得佢好勁, 比着我, 比人呃咗都唔知呀!


是次每人消費約$180元
味道: 4 環境: 4 服務: 4 衛生: 4 抵食: 3


###


地址 : 側魚涌太古城中心二期二樓208號
電話 : 2885-4478

 


2007年8月9日 星期四

Lego X Keroro

上星期行過Apita, 又受唔住引誘去咗玩具部睇下... 咁啱佢做緊特價, 咁啱仲比我發現咗全套Lego版Keroro呀, 好得意呀, 發達喇!!! 呵呵呵呵...



呢隻snoopy係之前見同事係m記換咗, 自己又受唔住引誘去換番隻, 佢最特別係按頭上隻xx, 個藍球會圍住個肚腩轉轉轉, 勁得意! 不過... 不嬲對snoopy都痳痳地嘅我, 好快就唔想再見到佢係我張辦公桌上, 因為幾"左訂"下, 所以上星期五QQ同佢阿媽黎揾我飲茶嘅時候, 就黎手送左比佢囉!!!


 


2007年8月7日 星期二

Thai Orchids


上星期六(2007年8月4
日)honey d friend又call我地開餐, 由於我倆已經回家, 所以
不想去太遠, 最後叫左佢地去(大家都想去好耐嘅)太古坊嘅Thai Orchids...

初時d侍應安排我地坐係落地玻璃窗側邊, 餐廳最入嘅位置, 加埋佢唔錯嘅裝修, 原本好好feel... 但係個厨房門竟然長開, 而入面個look同茶餐廳厨房冇分別, 嘔...

更差嘅係, 入面一煮野, d超級油煙味狂飆出黎, 未食已經覺得好膩, 嘔...

唔得喇, 我地一定要轉位!!!

我地一行五人order左: -
. 西柚沙律 -- 算係最ok
. 燒穌魚 -- 算係最ok
. 菠蘿炒飯 -- 碟上, 冇菠蘿道具, 冇乜味
. 泰式curry炒大頭蝦 -- 冇乜curry味, 奇
. 泰式炒雜菜 -- 冇乜味
. 蒜蓉包 -- 一般
. 椰青, 青檸梳打 -- 一般
. 泰式甜品拼盤  -- 一般

d野食真係好一般, d食物嘅賣相就更加一般(搞到我都冇心機影相), d侍應就越叫越走(成間餐廳先得果5-6枱客), 真係比佢外表呃晒! 以後都係去番Island Golf Club間Island Thai Bar & Restaurant, 個間係我係香港食過最好嘅泰國餐廳(以佢咁低嘅價錢黎講)!!!

是次每人消費約$120元
味道: 2 環境: 3 服務: 3 衛生: 3 抵食: 2

###

地址 : 側魚涌糖廠街39號地下
電話 : 2856-9848

 


2007年8月2日 星期四

Pizza Express


今晚(2007年8月1日)因為貓頭同KaKaMa要去尖沙咀做d野, 所以call埋我出黎食飯!

貓頭尋晚揀咗pizza express, 我7:30pm去到, 環境都唔錯! 但當佢地黎到之後, 間餐廳開始多人, 好鬼嘈呀, 成間傳統中式茶樓咁呀, 我地唯有鬥大聲, ah.... 而家個喉嚨好痛呀! 扣分!

Order時驚叫得太多o野食, 點知又食得晒, 食力超乎常人!
. Garlic Bread Quattro Formaggi 焗四色芝士麵包 : 期望過大, 冇乜特別
. Nostrana 牛油果鷄肉沙律 : 最好味同最有新鮮感! 但焗麵包球唔比醬我地點, 要問先比一款醬, 扣分!
. Penne al Salmone 煙三文魚長通粉 : ok
. Cannelloni 芝士婆菜麵卷 : 原來上次食過, 自己都唔記得晒


. Porchetta XX薄餅 : 好味, i love pizza...

  (最好笑我食剩晒d菇, 貓頭話點解我可以食剩咁多菇而佢好似冇食過菇咁)

. Tiramisu 意式芝士餅 : 太古分店好味d--酒味重d同埋大件d, 扣分!

臨走去toilet時入錯廚房, 個侍應鬼咁大聲叫"小姐... 小姐..."好多次, 搞到成間餐廳都知我去錯, 好鬼瘀, 貓頭仲笑住話"咁你返去寫blog咪有o野寫囉"! ah.... 瘀爆!!!

個人認為味道, 環境, 服務--都係太古分店好得多! 如果要再食, 我只會去太古分店!

飲埋無限潻飲凍檸茶, 是次每人消費HK$220元
味道: 3.5  環境: 3 服務: 2.5  衛生: 4 抵食: 3

###

地址 : 尖沙咀尖沙咀亞士厘道35號
電話 : 2317-7432

 


2007年8月1日 星期三

富豪酒家 Fu Ho Restaurant

今日(2007年7月31日)同客食lunch, 之前一路誤會係約去富豪酒店, 點知臨出門口先搞清楚係富豪酒家, 好緊張, 一o黎第一次去, 二o黎唔知邊個找數(希望唔係我)...

早左小小到達, 睇下餐牌, 都有4餸套餐, 先HK$3xx, 可接受吖!!!

個客到達後... 落order時間到... 呼... 好彩佢叫點心食啫!!!

d點心味道都ok, 最特別係杏仁茶, 有d蛋白係入面, 唔錯!!


下次可以約埋honey黎食lunch, 先再影相比大家睇喇!

服務唔錯, 環境亦寧靜, 最好就係唔使我比錢喇, 呵呵呵呵...

後記: 返到office, 將呢件事話比"何超自然"知, 佢竟然笑我咁早(lunch hour)想食飽魚, 唔係呀化!!! (因為我諗住招牌菜係阿翁飽魚, d食評又只題飽魚, 就誤會左去親呢度就係食飽魚, 哈... 妄想症發作... 冇計)

###

地址: 銅鑼灣駱克道454-456號
電話: 2893-6565