阿詩瑪壹菌 Ashima Yunnan Restaurant : 口感像反沙芋的爆炒蓮藕

31 December 2013, Tuesday



大除夕無出外倒數, 想早點吃完晚飯早點回家休息, 始終在家千日好... 外面人太多, 有點恐懼, 我是不是有自閉症呢?!! 哈哈...


幾個月前見到阿詩瑪舊址正在裝修改為咖啡店, 仲以為佢從此消失, 後來睇報紙見到美食前局長去咗新店試食, 原來又係太古城開翻, 不過就唔係好清楚係邊個位開...

今日口淡淡又想食酸辣米線, 就諗起阿詩瑪, 上網搵下佢的新地址, 雖然唔確定, 都決定去試下搵...

阿一豬扒酸辣米綫 A One : 酸辣? 麻辣咋啩

7 October 2012, Sunday

食店林立的筲箕灣東大街, 一個黑底白字的招牌...  阿一豬扒酸辣米綫, 讓魚貫的途人注目... 更令人注目的是, 門外經常有人等候...

看一看店內, 小小的店子, 客人擠得密密麻麻, 水洩不通...

在門外等候了一會, 終於可以入內, 坐在人來人往的通道上, 不期然向上望, 發現懷舊吊扇和一些老照片, 很有味道...

店內裝修其實不太差, 帶點中國味道, 只是當填滿了客人後, 什麼也被人海掩沒了...

真味豬排酸辣米綫 ($30) -- 其他客人的豬排是用碟上, 看到這個被硬窒入去碗子內的3塊豬排, 心中有點不快, 因為實在太不美觀了... 米綫上鋪了芫茜和很多蔥段, 還下了點椒鹽花生, 儘管如此, 也不能為此碗湯底沒甚香味的米綫挽回一點分數... 很懷念以前公司附近的四川家庭式經營酸辣米綫, 多酸少辣, 很滋味... 一心想回味一下, 可惜, 這裡的酸辣米綫原來是麻辣的, 酸菜沒甚酸味, 基本上只辣到口也發麻, 但一點也不香, 汗是直標, 但有點白流, 如果是又麻又香還可以接受... 米綫更是煮太久了, 腍到一夾起便斷開, 口感很差...

古法手撕雞酸辣蜆殼粉 ($34 連飲品) -- 我原本是叫古法手撕雞酸辣米綫另加鑵裝汽水的($30+$9), 但職員阿叔建議我叫餐, 古法手撕雞酸辣蜆殼粉可轉米綫, 可節省$5, 他的原意是好, 但為何會變了蜆殼粉?!! 因為米綫太腍不好吃, 我冇同職員講我唔係要蜆殼粉, 照食可也... 誰知... 更難吃!!! 比米綫煮得更腍, 入口不用咀嚼已稀爛, 因為太難吃, 所以即使另一半幫我吃了一部分, 我即使不飽仍要吃剩小半碗... 和真味豬排酸辣米綫有著同一樣的湯底, 問題也一樣, 沒甚香味... 酸菜沒甚酸味... 可幸的是, 麻辣油今次很明顯積聚在一角, 我可以用湯匙把它一點一點地撈走, 撈走了8成, 仍是少麻少辣, 皆因辣椒籽藏匿於蜆殼中, 吃了入口才知道... 若不是撈走了8成麻辣油, 肯定難以進食... 雞絲撕得不太碎, 肉質尚嫩, 唯味道已被麻辣油完全掩蓋...

 

一次便夠!!! 它不是我懷念的那一款酸辣米綫...

是次每人消費約 $32 元
味道： 3 環境： 2 服務： 3 衛生： 2 抵食： 5
###
地址 : 筲箕灣筲箕灣東大街30號地下
電話 : 2884 1080

阿詩瑪雲南風味軒 Ashima Yunnan Restaurant (II)

18 May 2011, Wednesday

好耐冇去阿詩瑪食雲南o野啦... 曾幾何時, 我同Honey個個禮拜都會去食, 可能食得多食嫌咗, 又或者係唔鐘意佢裝修後嘅食物同服務同環境...

呢幾日天氣好悶熱, 冇咩胃口, Honey提議去阿詩瑪食酸辣米線...

時間尚早, 仲有卡位, 正!!!

前菜青瓜好好味, 花生都好味...

唔想諗, Order咗二人餐...

烤夫拼茄子--好好味呀D茄子, 不過醋落得過多, 太酸, 如果落小D醋就Perfect喇... 烤夫都好味...

山珍氣鍋雞--OK吖...

櫻桃椒爆花枝片--點解我見唔到有類似櫻桃椒嘅物體... 反而覺得係XO醬炒咁嘅... 花枝片都好新鮮... 唔知綠色一片片嘅係咩o黎...

糖醋里脊--好味喎, 似咕嚕肉, 但真係啖啖肉, 唔係一味得骨同粉, 正!!!

酸辣雜醬米線--必吃Item... 好味...

套餐甜品--有涼粉同玫瑰湯圓揀... 涼粉口感似蒟蒻, 佢落咗D糖漿, 甜甜地, 幾好味... 玫瑰湯圓有酒味, 清清地, 都OK...

坦白講, 服務就唔好Expect啦, 我地食完好耐, 清晒枱, 等人問我地要咩甜品, 等咗好耐都冇人問, 要自己主動問, 餐廳當時又唔係多人... 經理長期同一個客打牙骹, 打咗半粒鐘都有... 其他侍應都好似中學生咁, 完全Feel唔到佢地有工作經驗...

是次每人消費約$150元
味道： 4 環境： 4 服務： 3 衛生： 4 抵食： 3
###
地址 : 太古太古城道18號太古城中心地下005-006號舖
電話 : 2560 9666

碌咭奇遇記 @ 阿詩瑪雲南風味軒

星期三(2007年10月10日)個晚, 諗住去阿詩瑪食米線, 點知個餐牌改到冇晒米線, 淨係叫套餐先有米線跟, 咁即係逼人食套餐啫... 最後... 我地決定散叫, 唔食米線...

 

經過一輪商議後, 決定Order D 新o野試下(除咗湯之外): -

. 氣鍋雞 : 一貫水準

. 嘶嘶雞 : 好辣, 但好惹味, 食到嘶嘶聲

. 水晶麥 : 溜單, 仲收晒我地d碗筷, 話比佢聽溜單要取消, 順便埋單, 佢竟然夾硬整出o黎, 仲要咸到嘔, 好難食呀))))))

 

到咗真係埋單嘅時候啦... 如常碌咭, 個侍應之前已經唔係好態度, 都算喇, 費事同佢計, 點知佢見到要碌咭, 就話部機壞咗要我地比現金, 但係honey冇現金係身, 叫佢試下碌咭(因為我地唔信部機壞咗), 點知... 佢竟然當住我地面"藐嘴藐舌", 唔係輕輕個隻, 係好大動作個隻... 諗落都拍得住咪咪姐個"藐嘴藐舌"樣...

我心諗: "啍!!! 有冇攪錯!!! 有問題嘅係你, 唔係我地呀..."

 

佢死死地氣攞張信用咭去收銀度, 唔夠1分鐘又過番o黎, 話"碌唔到呀, 唔信你自己試下喇"... 

嘩!!! 唔係呀o痳!!! 碌咁多年咭, 第一次比人叫我自己行入收銀部碌咭, 呵呵... 好, 咪試比你睇囉! (我估計佢係諗住我地攪唔掂, 要我地死咗條心)

 

行到入收銀部, 一睇... 吓... 唔係呀o痳... 咁都得?!

 

第一, 個收銀(有幾分姿色, 操半咸淡廣東話)竟然將叠Signatory Slip就咁放係個碌咭機嘅出紙位, 不停強調"部機壞咗, 插唔到紙入去, 所以碌唔到咭..."

第二, 叠Signatory Slip係放到"底面" & "前後"都錯, 錯成咁, 都真係幾有難度...

第三, 就算比佢成功插到叠Signatory Slip入去碌咭機嘅入紙位, 都唔係就咁插入去就得o架, 仲要用手卷張紙上o黎先得o架...

 

我一路整緊, 佢一路用半咸淡廣東話係度講"喎能住叻地油綠開咭, 實識整...", 佢老闆吖, 佢冇碌過咭咩, 咪一樣唔識整, 除非佢係火星o黎o架啦!!!

 

攪掂離開時, 個個四萬咁口揮晒手"唔該晒, 拜拜", 但係唔知我地走咗之後, 佢地會唔會即刻搬番o個個"藐嘴藐舌"嘅嘴臉出o黎呢...

 

好掛住以前o個個貼住"笑笑口貼紙"嘅經理, 今日唔見咗佢, 唔通轉咗工?

 

是次每人消費約$110元
味道： 3 環境： 3  服務： 1 衛生： 3 抵食： 2
戰鬥指數

 
###

地址 : 側魚涌太古城中心地下005-006舖
電話 : 2560-9666

###

備份網站: http://ken-merry.blogspot.com/