網頁清單

2013年12月28日 星期六

鉅龍酒家 Royal Dragon Seafood Cuisine : 龍躉翅=天九翅?

21 December 2013, Saturday

今年聖誕節2日假期, 不同家庭成員各有Christmas Party要去, 聖誕節後的星期六又有喜宴, 不如早幾日慶祝聖誕+做埋冬...

2位阿姐話要試太子新開的龍躉宴, 4千蚊1圍 (未計加一茶芥), 嘩!!! 咁捨得?!! 大家見有鎮店天九翅食, 是但喇, 捨命陪君子...

事前訂了位7:00PM, 後來餐廳方面又話要分6-8PM/8-10PM, 6PM太早未齊人, 只好揀8PM...



8PM前我地已經係阿姐屋企舉行了快速而簡單的聖誕禮物交換儀式... 我親手裝飾的Happy Snowman Cupcakes都OK受歡迎吖, 呵呵...

去到餐廳門口, 要等, 之前枱客仲未走... 餐廳裡面唔知係咪得2張大枱, 係正大門口魚缸旁, 路人可透過魚缸清楚看到店內的情況...

等候期間, 無所事事, 小朋友就最開心, 又要同大魚影相, 又要睇阿拉斯加長腳蟹同龍蝦, 唔夠高睇麵包蟹仲要我捧起佢, Arrr... 我條腰呀!!!


有圖有真相, 2位阿姐Whatsapp給我們看時, 千真萬確, 清晰可見, 鎮店天九翅!!! 就等我帶大家見識一下佢嘅真身!!!


野生石斛燉煙斗骨
-- 第一味已經係湯, 仲以為係金沙骨做前菜之類... 用龍躉的九節骨+雞腳+廋肉+豬腱石斛燉, 清熱解毒, 味道甘甜, 湯渣多得緊要, 好足料...


XO醬爆珍菌聖子皇
-- 一般來講, 貝類海產我都唔適宜食, 不過... 今晚要豁出去喇!!! 聖子皇好大隻, 爽脆彈牙, 好鮮味呀, XO醬非常惹味, 食到唔停得口, 好彩第2日唔使去睇醫生啫...


砵酒脆焗龍躉球
-- 好地地的健康食物, 點解要拎去炸做唔健康食物呢?!! 炸漿不太脆, 有點腍, 龍躉球好滑溜, 但有骨, 比幼童食的話要小心一點, 砵酒做得出色, 甜甜的酒香, 令整道菜生色不少...


鎮店天九翅
-- 上天九翅時, 大家也呆了!!! 天九翅唔係平時去飲, 撈少少醋一齊飲的湯羹嗎?!! 點解會係煲魚尾?!! 訂枱的2位阿姐找職員問個究竟, 對方一味話啱... 有點被騙的感覺, 大家四目交投, 居然無人發爛, 想必只因大節當前, 一家人想吃得好一點, 不想掃興, 無奈下, 略過了... 平時只吃魚尾的我, 今天不太想吃, 只吃了1-2口, 心裡不爽, 吃龍(躉)肉都無味, 醬汁味道稍濃, 像平時吃到的栗子排骨煲, 吃魚我都係傾向鍾意清清地...


珊瑚蟹蓋蒸龍躉唇
-- 終於有清清地的蒸魚食喇... 龍躉唇加蒜蓉放係蟹蓋上蒸, 蒜蓉味強勁, 龍躉唇好重膠質, 咀嚼時感覺粘粘的, 間中吃到好香的蟹膏, Yummy!!! 不過... 隻蟹蓋... 會唔會係菠蘿炒飯個菠蘿的朋友?!!


石窩葱燒龍袍 (真身 : 石鍋醬燒龍躉腩)
-- 上菜時見有個石頭飯咁嘅窩裝住, 又有幾條葱, 問上菜阿姐都係一味話啱, 咁正常都照食啦... 感覺係... 好油囉...


古桐麻香雞 (真身 : 石窩葱燒龍袍)
-- 理論上應該得返雞同菜, 睇個樣又係魚咁嘅?!! 問上菜阿姐都係一味話啱, 今次問多咗1-2個職員, 都係一味話啱... 無奈下咬一口, 又係魚, 不過係好厚好厚嘅魚皮, 成片膠啫喱咁, 味道都唔錯... 我已經食到有點反胃, 全餐都係魚, 我真係唔慣... 正當大家高談闊論緊《商品說明條例》(香港法例第362章), 真係忍唔住氣, 再問第4個職員, 終於話我地碟雞未上!!! 吓?!! 之前幾個職員都堅持指魚為雞喎!!! 咁之前果碟又係咩呢?!!


古桐麻香雞 
-- 佈滿油淋淋芝麻, 雞皮炸到比古銅色更深色, 望一眼都飽, 食一件, 咬唔開, 好韌, 結果, 得2個姪女同姨甥女肯食1-2件, 80%打包走, 無人肯要, 當然係迫住得最近果個打包... 相信係炸得過火了, 未知是否與近日H7N9疫情有關, 炸熟D, 炸死D箘, 等大家食得安心D...


荷塘素燴
-- 食咗咁多舊魚, 終於有其他食物落肚, 即時覺得好味D!!! 豆苗好嫩, 真係抵讚!!! 仲有黑木耳, 車厘茄,草菇, 銀杏, 食咗咁多炸魚之後, 個人即時Green返!!!


西施龍肉泡飯 (真身 : 魚子姜蔥蟹皇炒飯)
-- 根據我嘅飲食記錄, 泡飯, 係應該比湯浸住, 呢碟似係炒飯喎!!! 又問上菜阿姐都係一味話啱, 食咗一半先彈個職員出來話比錯, 但無打算換返個泡飯比我地, 似係早有預謀!!! 不過, Honey話呢個仲啱佢食, 魚湯泡飯佢一定唔食, 我都覺得呢個炒飯炒得好好味, 乾身得來又夠香口...


生磨蛋白杏仁茶
-- 今日自知, 口味都有遺傳!!! 原來阿媽同2個阿姐同我都Dislike杏仁茶, 連姨甥女都一樣!!! 我夾硬吞咗一碗, 其實都煲得幾好, 杏仁真係生磨同埋真係有蛋白花, 好飲過出面飲到的味精杏仁茶好多, 不過都係比個Dislike!!!


敬送2011年智利紅酒一支...


Honey成晚笑話去咗麥兜茶餐廳, 上菜阿姐10碟問佢9碟, 碟碟都話係, 碟碟都話啱... 雞即係魚, 魚即係雞, 無色無相, 四大皆空!!!

從現實世界返回虛擬世界後, 先知道原來間餐廳好出名!!!

9月果時有位仁兄, 救了極度瀕危玳瑁一命, 原來正是餐廳老闆!!! 發現新大陸的我, 即時同Honey講, 點知佢話餐廳門口貼晒出來啦, 你睇唔到咩?!! Arrr... 我當時做緊苦力, 抬緊姪女睇加菲蟹吖嘛...

又原來, 街坊廚神食四方都有訪問過, 我真係唔知囉...

再原來, 幾個月前好多份報紙雜誌都有報導過龍躉宴, 真係寫住鎮店天九翅係炆龍躉翅!!! Arrr... 其實多日來我一路都以為係騙案, 點知原來人地一早報導晒, 只係我地無做Research就走咗去食...

坐巴士返屋企時, 都有驚過會中雪茄毒, 好彩隔咗幾日都無事... 跟手又諗到龍躉瀕危, 罪疚感BaBa聲湧出來... 龍躉宴, 一生人食一次就夠!!!

是次每人消費約 $370 元
味道: 3 環境: 3 服務: 2 衛生: 3 抵食: 2
###
地址 : 太子荔枝角道127-133號D&E舖
電話 : 2868-9863 / 2868-9865

8 則留言:

  1. Happy New Year! Wishing you & your family a wonderful year ahead~
    See ya next year :D

    回覆刪除
  2. 謝謝分享!..✫¸.•°*”祝您˜˜”*°•.✫ 新年快樂 2014
    ☻/ღ˚ •。* ˚ ˚✰˚ ˛★* 。 ღ˛° 。* ° ˚ • ★ *˚ .ღ 。
    /▌*˛˚ ░H░A░P░P░Y░ - ░N░E░W░ - ░Y░E░A░R░ ˚ ✰* ★
    / \ ˚. ★ ˛ ˚ ✰。˚ ˚ღ。* ˛˚ 。✰˚* ˚ ★ღ ˚ 。✰ •* ˚ " ✰ ✿ ✫

    回覆刪除
  3. 新年快樂!
    一切順意:-):-)

    回覆刪除
  4. 祝新年快樂, 也祝你有美好的2014年!

    回覆刪除