網頁清單

2013年12月25日 星期三

馬哥孛羅咖啡廳 Cafe Marco : 選擇頗多的下午茶自助餐

14 December 2013, Saturday

Gmarket水貨客1個月內3度分贓, 密到咁, 會唔會有少少病態呀?!! 哈哈哈... (今次無我份, 我無中Shopping毒)

原本佢地係上星期分贓的, 果日貓兄因一點小插曲, 被困家中, Afternoon Tea Gathering順延至今個星期, 咁我又可以出席埋一份喇, 呵呵呵, 天助我也~~~ (小插曲唔關我事, 我無用念力)


仲有10日就到平安夜, 餐廳已經進入聖誕Mode, 添上聖誕裝飾, 枱上也有聖誕小擺設...




Hmm... 查實... 我好飽!!! 出門前煮了香草露筍彩椒火腿意粉給Honey吃, 最後自己又吃埋一份...

暫時未有食慾, 就讓相機先吃吧!!!

Tea Buffet都有凍蝦同青口?!! 少見喎!!!


Party小吃有6款, 還會轉換款式, 我之後見到德國腸...


蛋糕亦換上聖誕舞衣...




仲有粥檔, 麵檔, 刺身壽司檔, 燒牛肉車, Pizza, 蒸籠點心, 三文治, 雪糕車... 影唔晒咁多, 影咗一陣已經被眼望望喇...

相機食飽, 到我開動引擎喇!!! Yo... 先來一Round Party Food... 咖啡角熱得燙嘴, 貓兄讚好味... 其餘的都是一般水準...


第 2 Round衝著瑞士Mövenpick雪糕車而去... 明明要減肥, 但唔食又對唔住自己... 個荷包!!! 哈哈... Passion Fruit & Mango好酸好開胃, Swiss Chocolate香濃甜入心, 正!!! 南瓜批清香少甜, 但太飽肚, 淺嚐1件夠了... 朱古力Tart都好重朱古力味, Yummy...


第 3 Round剛巧梳乎厘(Soufflé)焗好, 就比佢打尖啦... 當廚師遞上制成品時, 一睇, 心也寒了, 有點後悔... 這個比蛋撻還要扁的東西, 可以稱呼為梳乎厘嗎?!! 朱古力梳乎厘沒有半點朱古力味, 口感是BB糊仔... 可以在相片頂部加上烏鴉飛過留有Dot Dot Dot痕跡的畫面嗎?!!


第 4 Round : 窩夫質數不俗, 羊奶芝士多士略欠膻香, 香檳啫喱好勁香檳味喎...


第 5 Round : 各式沙律!!! 差不多食完先記起未影相, 真係飽到呆咗... 蔬菜幾新鮮, 但我忘記了自己唔食得生洋蔥, 隨即有火燒心的感覺, 好痛苦...


Last Round : Mövenpick Never Die!!! Crème Brûlée釋放奶香與蛋香, Strawberry散發草苺的酸澀, Tiramisù滲出誘人的咖啡香, 我想再食多N Round呀!!!


貓兄試玩自助Pancake機... 我地笑塊Pancake似貓腳印...


飽 x 飽 = 飽2

我已經唔可以再食啦!!! 今日食得好少款食物咋!!! 飽肚的Sushi、粥、粉麵、三文治、湯、麵包、中式點心、Pizza... 通通都唔敢食... 呢度食物真係好多選擇, 雖然味道唔係太標青...

Arrr... KaKaMa叫我同大家講, 墨西哥脆片唔脆!!! (遲來的貓兄拎果批就OK喎)

見到其他食客拎羊架, 但我就點都搵唔到, 燒牛肉師傅仲話Tea Buffet唔會有羊架, 唔通我見到嘅係污糟o野, 但明明其他人都見到喎, 集體7-14?!!

貓兄今日遲大到, KaKaMa好勞氣, 我又無咩感覺喎, 食Buffet遲到最蝕係佢自己, 嘿嘿...

我來之前無問幾錢, 心裡盤算都係$2xx左右... 埋單先發現原來貓兄用公司卡有85折, 佢仲有300蚊Coupon, 埋單一人$120有找, 嘩嘩嘩!!! 抵到爛呀!!! (原價每位要$228+10%)

離開Marco Polo Hong Kong Hotel時見到糖果屋同走動中的聖誕火車...




一行人往Harbour City聖誕燈飾進發, 冷鋒壓境, 下著毛毛細雨, 配合燈光效果, 好似去咗廸士尼飄雪樂園咁, 聖誕氣氛即時爆燈!!! 


是次每人消費約 $120 元
味道: 3 環境: 4 服務: 3 衛生: 4 抵食: 5
###
地址 : 尖沙咀廣東道3號馬哥孛羅香港酒店1樓
電話 : 2113 3912

沒有留言:

張貼留言