網頁清單

2015年8月29日 星期六

Ocean Park Summer Fever : 久別重臨, 全新體驗

24 August 2015, Monday

下星期就要飛啦, 行李都未執, 好多事情都未準備好, 忙到有氣無掟抖...

明明連好好休息的時間都無, 我呢個暑假好似中咗魔咒咁, 唔辛苦嘅都唔做...

今日應該都係Happy Summer最後一擊啦啩, 我身心都就快支持唔住啦~ 我好需要一個悠長假期...

「阿四」姑媽o黎啦~~~ 我唔係排第四, 我今日係o黎做阿四, 哈哈...

早上遲到咗少少, Sorry... 要你地去排隊先, 辛苦晒啦... 一去到巴士站就有得上車, 呵呵~


有生以來, 第一次無帶相機去海洋公園, 天氣太熱啦, 仲要湊住2件, 我要盡量減輕負擔... 好彩部手機今日又好似好Work喎...

入場前一齊影返張大合照是常識吧...


夏水禮LINE FRIENDS集郵...



地圖得返英文, 好彩有拎, 好多年無來, 好多設施都未見過, 好陌生...

先去海洋奇觀排隊...




臨走見到樓上有餐廳, 送咗佢地去玩夏水禮先... 等陣先返轉頭舒舒服服嘆個Lunch...

唔想做Wet妹, 唔想帶咁重裝備, 輕輕的我走(去食Lunch)了, 你地係度慢慢玩喇~


路過... 估唔到今日無入去睇熊貓...


12:30PM前來到位於「海洋奇觀」2樓的餐廳--「海龍王餐廳」

餐廳內有2個有特大玻璃窗可以望到「海洋奇觀」內的魚魚, 我覺得Concept係抄沖繩黑潮之海...

成班LINE FRIENDS陪你食飯, 係咪會開心D? 咁就值得收貴D? 唉... 講出o黎唔好鬧我... 我對LINE FRIENDS無特別情意結的... 




3百幾蚊1個Set Lunch, 加埋一要4百蚊呀, 好貴呀!!!

無理由而家先轉身走o架, 咁肉酸... 而且外面咁熱, 要搵個有冷氣又坐得舒服的地方坐1個鐘, 呢度係不二之選... 唯有硬著頭皮落Order...

先上Salad... 煙三文魚不太好... 沙律菜OK新鮮, 醬汁醒神, 2粒羊奶芝士好食但唔夾個沙律...


南瓜湯味道濃郁, 口感豐厚, Yummy...


主菜的羊肉好唔掂, 仲以為係羊架, 點知竟然係將羊肉碎壓埋一舊, 肉質乾爭爭, 亳無羊味... 醬汁少得可憐...


主菜食到一半, 店員突然奉上麵包... 吓?!!


完全食唔落, 原本打算放棄, 一諗到4百蚊一個午餐, 即刻叫店員比個紙袋包走D麵包... 好彩有打包咋, 2隻姪玩完夏水禮不知幾餓, 一陣間就食清光袋麵包...


4百蚊1個午餐, 我對甜品好有期望... 店員放低杯雪糕時, 我O晒嘴完全唔知講咩好... 大家睇下賣相幾咁精美...


比得4百蚊, 食完都繼續坐下先... 坐得近餐廳入口, 見到不少騎呢事...

騎呢1) 隔離枱明明坐咗對情侶, 強國遊客伯伯無啦啦坐落人地張枱度, 嚇死人... 職員問佢做咩, 佢話攰, 職員即刻搬佢坐緊果張椅出門口比佢慢慢坐...

騎呢2) 有對強國遊客細路衝入來Zip係人地張枱前面望魚, 被Zip的一家三口應該都係佢地同胞, 職員苦勸要求對方父親處理無效, 開始提高聲浪... 搞咗好耐先將佢地送返出去... 

收到通告, 2位老細玩完夏水禮, 可以去匯合... 佢地食完我D麵包又點會夠飽吖, 弟婦再買雞脾同燒魷魚比佢地食, 填一填個肚仔又再出發... 原來香港老大街好多特色小食, 不過好悶熱囉...


玩咗2個攤位遊戲, 中咗2隻毛公仔, 好好成績...


之後佢地去到小童天地, 坐完旋轉木馬又就換衫玩水, 我就坐係旋轉木馬度乘涼...

N年無來過海洋公園, 對上一次來都仲未有海洋列車... 就算姪女係都要坐Cable Car我都當耳邊風, 今日我一定要坐到海洋列車!!!


趕上山睇餵海獅, 原來要另外加錢的... 緊係唔加啦...

睇完企鵝同海獅, 2隻細嘅又被攤位遊戲吸咗埋去... 

日落的景色... 空氣好差... 


落山時天已黑晒, 黑麻麻連路都睇唔到...

巴士站超多人... 好彩有的士經過... 要去天后會合細佬食泰國菜... 姪女知道後好興奮大叫 : 我要食菠蘿炒飯...

今日好辛苦, 但好開心...

嘩... 原來今日影咗33張相咋, 仲少過去食餐Buffet影的相... 証明我都無影相病態啫, 哈哈...

4 則留言:

  1. 個午餐好貴,一點都不值﹗

    回覆刪除
    回覆
    1. 覺得值得的機會率好低...
      首先要係熱戀中的情侶仲要唔介意用錢買浪漫, 然後要無排過隊入海洋奇觀 XD

      刪除