前晚一到埗就係對面胡同食燒肉，估唔到隔咗唔夠2日又黎呢條街暴食。
尋晚朋友鐵觀音當普洱咁比我飲，夜晚3點都瞓唔著！OMG！即刻拎本書睇吓先開始打喊路咋！（最慘越坐越肚餓）
今朝唔夠瞓，個人「溫溫燉燉」，約咗大家11：30，居然10：45就去到。
成個東區D舖頭都未開，成地小強，踩扁嘅、反肚嘅、跑黎跑去嘅都有。我想入Family mart都比小強擋住係門口！（Okay，咁我去7仔囉）
香港唐宮過黎開檔，但唐宮個名已經被人用咗，被迫改名！
入門口張乒乓波枱睇到都忍唔住笑，鬼馬鬼馬得佢吖～
餐廳入面裝潢以Tiffany blue為主色調，睇嚟主打OL跟闊太市場。
嘩，隻碟咁多蟻嘅？！
茶葉有碧螺春，同樣嘅價錢，識得揀一定係揀佢！
—酒釀馬蹄見到未見過，桂花蕃茄都係賣飛佛，2樣都好味，蟲草花好鬼辣，仲諗住叫黎補下身。
點籠來聚聚
—5小碟包括墨魚蝦餃、黑松露水晶餃、奶黃流沙包、棗皇糕和小小橘子，比較適合1個人用餐但又想試多幾樣點心嘅多心人……
蝦多士做得有啲失色，蝦尾冇向天～（比香港乾身，食完唔會一口都係油）
啤梨造型特別，視覺上覺得係甜嘅，咬開竟然係鹹嘅，口味唔係我杯茶～
避風塘乾炒牛河居然又OK喎，係台灣食過嘅炒河黎講，暫時佢算最好，至少炒得均勻～（當然唔可以用香港水準）
鮑汁鳳爪又淋又入味～
嘩！十三么呀！（椰汁布甸造型活靈活現，味道就一般般啦）
嘩……個楊梅酸到呢，我以為係甜品，廚師好認真咁加咗啲白色酸沙係表面，咬一啖即刻醒一醒。
唔夠喉？再加單！
鯉魚芒果布甸，等我切頭切尾，𠝹開中間淋啲白色豉油先～
我明明有將信用卡交畀職員，台灣朋友一支箭飆出去收銀機，搶住埋單，結果……我輸咗！（激屎我咩？！生日果個爭住比錢，我又無買生日禮物，我仲邊有面面對壽星呀）
下一站：內湖Costco Crazy Shopping
味道：★★★★☆
環境：★★★★☆
服務：★★★★☆
衛生：★★★★☆
抵食：★★★☆☆
唐點小聚 市民店
地址：台北市 大安區 市民大道四段102號
電話：+886 2 2771-5808
網址：www.facebook.com/SocialPlaceTW/
沒有留言:
張貼留言