網頁清單

2017年4月10日 星期一

【苗栗】佔領民宿。客家3日2夜溫泉團(下)

7 March 2017, Tuesday

苗栗3日2夜行程:棗莊(午餐+下午啡)⇨明德水庫日新島(散步+下午茶)⇨竹美山閣溫泉會館(晚餐+留宿+早餐)⇨清安豆腐老街(午餐)⇨龍鳳漁港(賣海鮮)⇨岸之溪休閒會館(晚餐+留宿+早餐)⇨飛牛牧場(午餐+散步)⇨苗栗勻淨湖(下午茶)

完成了第1天比較沒「回憶價值」的行程,第2天大家的搞鬼性格已經熱好身,整裝待發,繼續向世界出發~

先到民宿放低幾兩(6大個行李喼),再開1分鐘車到附近的老街食個Second Breakfast(結果飽到變咗Lunch)。

苗栗第4站—洗水坑豆腐街(清安豆腐老街)


這家豆腐店是最有規模的,在老街的路口。超超超多人,要自己搵位,都等好耐下,可分批去逛街。老街好短,10分鐘咩都行完,買下黑金剛花生、黑糖薑片,土產果D囉,價錢都幾抵嘅,相比起台北超市。





洗水坑豆腐街(清安豆腐老街)
地址:苗栗縣 泰安鄉
電話:+886 3 794-1025
網址:dahu.gov.tw


苗栗第5站—龍鳳漁港






人生第一次到漁港Bid魚!(真相係,漁民先可以Bid)

朋友睇啱咗2條蘇眉,NT$1200,揀魚期間有位靚女,老闆係隔離漁市場有個舖位,佢幫我地落標,拎返舖頭劏,劏好晒仲有發泡膠箱連冰包好晒,服務一流!


跟手大家再係菜市場呢邊繼續買海鮮(蝦、蟹、小卷),食埋個蚵仔煎就兵分兩路,一車衝返民宿煮飯,一車去超市買調味料同飲品小吃。我啦喎,就當然係被編入超市小隊啦~



有人成世人都唔去街市,扮晒o野影相PO上網呃LIKE。(#呃Liker)


買買吓餸,見到綿羊仔緩緩靠近停低抓寶(Pokémon Go),好耐無玩近乎忘記呢個Game嘅我,唔係唔立即開機睇下有咩好o野吓話!

苗栗龍鳳漁港直銷中心
地址:苗栗縣 竹南鎮 海埔131之7號
電話:+886 3 746-4155
網址:

回程在公路上見到好多樓盤廣告牌,好多好/靚嘅獨立大屋,原來係農地,朋友話呢D樓連2萬呎農地都唔洗3百萬港紙,嘩!真唔真呀?!




苗栗第6站—岸之溪休閒會館


露營區只收象徵式1千台幣,可以用民宿的公共洗手間同浴室,好正囉~


Tatami用餐區。


佔領民宿。。。個廚房,並唔係空口講白話!

有請。。。3位「好煮得」嘅團友出場!


我呢D出晒名「食o野唔做o野,做o野打爛o野」嘅癈咖,當然係負責。。。「傳菜」!


全部自己煮,請埋民宿主人一家開餐!(後加1個清炒高麗菜係外藉工人煮,原本朋友都想自己煮,不過咁多好餸攤凍咗就唔多好啦,強烈留人下只好就範假手於人)


救命,個海鮮湯甜到暈!


食神拿手絕活:薑蔥肉蟹粉絲煲,永遠煮多幾多都供不應求。美極煎大蝦都非常美味,可憐被粉絲狠狠打敗。


小卷為普通過普通嘅排骨增添光環,蘇眉炒球清清地食鮮味。


58度酒精,飲完全部癲晒!


LA來的朋友叫小老闆開Karaoke比佢用台語高歌一曲「愛拼才會贏」,(笑)震驚全場,小老闆仲Facebook Live,LA朋友唱完認埋老闆娘做「干媽」,仲叫小老闆可以去Korea發展啦,呢度交比佢打理,大家仲唔笑到碌地。(小老闆個樣成個中學生未畢業咁,不老秘方係食多D水果)



瘋癲過後,大家又坐埋茶聚吹水。今餐由我準備,嘩咔咔。


因為食得太太太飽,我同Honey唔敢浸溫泉,決定早D瞓第2朝早D起身浸。


第2朝。。。


露天淋浴設備。打開度門就係朋友嘅露天溫泉(子母房),旁邊再有1度門,行出去係餐廳同露營區。門外櫻花剛開花,都算係一邊賞櫻一邊浸溫泉吧。



露天溫泉,要赤裸裸走出去,圍牆又不是太高,內心難免有點爭扎。。。已走到這一步,最後還是括出去吧!



借用Honey對美腿。。。我的肉腿就免吧!


民宿早餐超正!碗粥超綿,我係台灣第1次食到真正嘅粥,好暖心又暖胃。生果超甜,蔬菜超新鮮,自家制奶酪先係秘密武器,味道有點像腐乳,一放出黎好快無晒。唉,我尋晚已經飽到瞓唔到,今朝諗住唔食o野,如果有碗白粥食下就Wonderful,而家,又忍唔住口瘋狂喪食。(食完相入面果D緊係有再Refill啦)


食完早餐朋友們連水吧都佔領埋,自己磨豆煲咖啡。。。呢班咩人o黎o架究竟?!咁厚面皮嘅,哈哈~

小老闆不甘示弱,即席表演3D咖啡拉花,好勁呀!


岸之溪休閒會館
地址:苗栗縣 大湖鄉 富興村5鄰砲石14-20號
電話:+886 3 794-1921
網址:thank.com.tw

苗栗第7站—飛牛牧場


牛奶火鍋,第一次試,好好味,支凍酸奶都好好飲。D牛肉最後食唔晒,飽到飛起。(借問聲有邊餐唔係飽到嘔)



牛奶布丁要用牙籤拮爆佢,好驚,拮咗好多下都彈返轉頭,結果朋友幫我一拮就爆,唉,覺得自己好癈咖,放我去荒島應該不出48小時就餓死。


餐後餵羊跑山,正!




飛牛牧場
地址:苗栗縣 通霄鎮 南和里166號
電話:+886 3 778-2999
網址:flyingcow.com.tw


苗栗第8站—苗栗勻淨湖








揸咗好耐車先來到,環境係超靚,但食物就麻麻地,只有心太軟做得較有水準。

但我無暇慢慢細味,因團長突然Google Map,突然發現大塞車,突然醒覺我地唔夠時間去桃園機場!OMG!

苗栗勻淨湖
地址:苗栗縣 大湖鄉 新開村70-2號
電話:+886 3 795-1007
網址:lakehouse.tw


趕頭趕命,內心已盤算定如果趕唔切,唯有買第2朝早機返香港。最後非常神奇地緊緊趕到,緊嘅程度係,其實如果多D人排隊等寄行李又或者海關大排長龍,都應該會送機尾。

係登機閘口坐咗10分鐘左右,到咗Boarding時間Last Minute先Announce Flight Delay ,頂!趕到我地隻積咁!佢根本應該一早就知,因為過咗Boarding時間先見到D人落機!

CX Boarding非常混亂,唔係Business Class嘅全部唔排隊扮Business Class!

CX派飛機餐又無派比我,見佢推車走,唔對路,細細聲+揮手都無反應,忍唔住大叫2聲Excuse me先擰轉頭仲要唔知咩事。(我又玩得癲過龍,去緊機場先醒起未 Online Check in,係車上用App Check in,揀位時明明仲有孖位,出Confirmation時先自把自為拆散我地兩夫妻)

落機要分批坐接駁巴士(本人係赤鱲角應該係第1次),過程非常非常非常緩慢,去到行李帶時行李剛出來。好彩,仲坐到Airport Express!下次唔敢再訂咁夜回程。(原本9點幾準時起飛,兼落機唔使坐接駁巴士,都唔算好夜)

又漁港Bid魚又佔領廚房,100%破格嘅旅程,在歡笑聲中落幕。多謝一班不存在於我Facebook Friend List的友人,此行一生難忘。(好耐無係FB加人,Friend List少於150人,都係D親戚呀舊同學呀咁)

些些大家!後會有期,請呀!


沒有留言:

張貼留言