係呀, 又係寫2個月前的飯局呀!!!因為呢餐飯係同感情最好的同學「黃毛仔」食嘅, 仲係我強求佢出來食嘅, 所以一定一定一定要記錄低, 食咩唔重要, 最重要係可以由6PM傾到11PM...
我呢期真係都爆忙, 忙到都無時間搵餐廳, 好似係飯局前1日先臨急臨忙搵, 真係有位訂就算囉, 都無時間慢慢揀...
首要條件 : 無用餐時限!!! 我地大把「情深說話未曾講」...
唔知幾解, 我第一時間就聯想到灣仔QRE Plaza... 成揀大廈都係餐廳, 地點偏僻, 夜晚水靜鵝飛, 無理由會有用餐時限啩... Bingo!!!
見到90%食評都係熟口熟面的Food Bloggers寫, 對餐廳的質數都抱有好大懷疑... 屎就屎啦... 一齊去大冒險!!! (我真係好忙無時間再慢慢搵)
餐廳雖然係全層, 其實都唔係好大... 餐枱的Size更是大縮水, 座椅亦好細, 仲要椅貼椅, 迫過乜!!! 食物份量唔多但隻碟大到離奇, 如果飲品已經上桌, 同一時間2碟食物係唔可以共存...
4人卡位睇落舒服, 實際迫到暈, 我見之後來的客人因同對面頂腳而坐到側晒身出走廊...
招牌水果茶 (熱) $42 (凍) $46
-- 酸酸甜甜都幾好味, 煲得好溶, 唔錯... 以Size計, 熱好似抵飲過凍...
蕃茄芝士意大利飯球 $68
-- 飯球外層硬到好似石咁, 內裡的蕃茄味道不太合胃口... 頗失望...
黑松露醬薯條 $68
-- 麥當當薯條可能仲炸得好過佢, 全部都乾硬化... 醬汁味道亦不合口味...
黑松露醬意大利芝士菠菜雲吞 $88
-- 雲吞味偏硬, 味道亦不太好...
奧利朱古力布朗尼窩夫配雪糕 $78 (Half)
-- 賣相不俗, 不過做人要自量下, 無咁大張枱唔好用咁大隻碟... 無位喇!!! 雪糕好味, 窩夫OK啦, 但後面個醬好唔得...
日式香芋麻糬窩夫伴香芋忌廉配雪糕 $88 (Half)
-- 麻糬窩夫好好好得呀!!! 全晚唯一有驚喜的!!! 雪糕都好味, 後面個朱古力醬又係唔掂...
對先前的前菜及主菜非常失望, 想不到甜品卻好OK...
奉勸各位, 飲吓下午茶無妨, 但食晚餐就...
味道：★★★☆☆
環境：★★★☆☆
服務：★★★☆☆
衛生：★★★★☆
抵食：★★★☆☆
Espuma
地址：香港 灣仔 皇后大道東202號QRE Plaza 25樓
電話：+852 2151-9126
網址：http://espuma.com.hk
沒有留言:
張貼留言