網頁清單

2014年6月19日 星期四

米奇廚師餐廳 Chef Mickey : 餓鬼大滿足之奇妙自助晚餐

13 May 2014, Tuesday

話說... 舊年12月Openrice聯同Hong Kong Disneyland搞咗個Game -- Open​Rice x 香港迪士尼樂園 - 分享奇妙「滋」旅 贏取奇妙旅程, 於OpenRice提交食評, 獲得最高食評分數的2位食家(金飯碗組及金筷子組各1名), 可獲得香港迪士尼樂園1日門票兩張及迪士尼 好萊塢酒店園林景觀客房住宿一晚(價值港幣$3,540)... 我足足苦戰咗1個月, 充滿淚水與汗水與口水的一戰... 終於抱得美鼠歸!!! Yeah!!! 我得咗喇~~~

原本想去加拿大前LaLa聲去玩咗先, 點知酒店Full Booking, 結果拖到5月中... 貴人出門招風雨... 成個星期都雷暴呀!!! 激屎人...

Check-in時酒店送咗張Chef Mickey Dinner Buffet Discount Coupon, 成人每位減$80, 又幾吸引喎... 就係咁, 2個無打算過係廸士尼食自助餐的人, 迷迷糊糊就訂咗早段的枱... 無記錯應該係5:30PM食到7:30PM... 食完仲趕得切坐Shuttle Bus入廸士尼樂園睇煙花...



今日Lunch只吃了即食麵, 剛才Check-in後又散步去維多利亞酒店, 行到腳跛, 好肚餓呀!!! 踏正5:30PM準時入閘...



訂枱時職員話比張近Buffet吧的枱比我地, 我好緊張咁同佢講"唔好呀, 我地鐘意靜靜地, 越隱蔽越好"... 哈哈哈... 唔知佢會唔會以為我係小三呢?!! 結果... 比咗呢張窗口位大圓Sofa我地, 夠晒靜局, 舒服到暈, 可以好好Enjoy今晚的晚餐... 


唔知係咪雷暴關係, 唔多見香港人, 5:30PM就要食晚飯實在太早, 內地遊客亦少, 結果, 今晚早段得十幾枱客, 唔使搶食, Very Nice!!!

食物款式實在太多, 不能盡錄, 只好Post一部分Buffet吧相片...







Caution!!! 餓鬼出籠啦!!! Bee Boo Bee Boo...

識食當然要食長腳蟹!!! 好粗呀隻腳, 仲要開晒邊, 用叉一拮就輕易成隻放入口, 大滿足呀!!! 我好似食咗2 Round... (因為我係淑女, 要保持儀態, 唔可以好似其他食客咁疊起3-4層蟹腳係碟咁肉酸)


羊奶芝士好羊奶呀... 膻到呢... 咩咩聲... 正!!! 南瓜意大利飯好Creamy呀, Unexpected咁有水準...


*0* WoW... 羊架呀!!! 翻本之作!!! 瘋膻入骨, 肥美肉厚... 10個正!!! 廚房阿姨好好人, 我見羊架血淋淋, 問廚房阿姨羊架可唔可以要熟D, 廚房阿姨即刻話"緊係可以, 要幾多件?"... 真係唔該晒...


印度咖喱同炒飯都好好味, Honey拎完又拎...


沙律款式多... 邊食邊玩尋找米奇遊戲...


中式食物就一般般啦...


同場較量, 壽司相對質數較低...


甜品味道不過不失... 勝在款式幾多, 有米奇公仔的當然較吸引(外型上)...




全晚見到最多人食的... 軟雪糕是也!!! 可以自己唧, 好好玩...


自助晚餐包餐飲1杯... 識飲當然飲熱檸茶... (消滯良伴)


食物質數唔太差, 味道比想像中好, 未食之前仲誤以為佢的食物只會賣萌, 原來都唔係嘅...

自助晚餐成人每人HK$358, 再加一, 扣埋Check-in時酒店送咗張Chef Mickey Dinner Buffet Discount Coupon的HK$80, 2人承為HK$627, 都算OK抵啦~ 而家係市區都好難搵到呢個價...


今晚仲見到好多奇妙遊客景象... 有大嬸取整個大Pizza回座位, 佢得2個女人3個小童, 食完都滯晒啦, 仲點食其他o野呀?!! 又有大叔一拎就拎1座山的燒賣, 保守估計30粒以上, 嘩, 鐘意食都唔使拎咁多吓話, 佢都係1家3口, 食燒賣食滯啦... 之後見到好多小朋友的軟雪糕都係淨雪糕, 雪糕Corner明明有好多醬汁同裝飾食用配料, 點解唔裝飾下呢, 味道同口感都豐富D啦... 綜合以上幾點, 佢地仲未識真正享受人生...

是次每人消費約 $315 元
味道: 3 環境: 4 服務: 4 衛生: 4 抵食: 3
###
地址 : 大嶼山香港迪士尼樂園迪士尼好萊塢酒店
電話 : 3510 5000

4 則留言:

  1. 你好叻呀!!!!!
    我係火龍果度見到米奇手~~~好得意呀~~
    最吸引都係甜品~~因為d米奇造型好得意呀!!!

    回覆刪除
    回覆
    1. 多謝小T (面紅-ing)
      火龍果米奇手前面個西瓜米奇頭仲得意 :)

      刪除
  2. 攞埋金飯碗獎,真係好叻。
    呢間酒店我一家人住過一晚,大約迪士尼開張冇耐,當時我們住園林房二間,連入埸券四張,包括早餐3000元有找,食早餐的地方就是你吃自助餐的餐廳,都唔知晚上有如此正的晚餐,仲要搭車去東涌揾食,個陣真係冇啖好食。

    回覆刪除
    回覆
    1. 我只係低班金筷子組, 金飯碗組係高班(戰況比殺戮戰場更慘烈)~
      開張冇耐時我住過維多利亞式果間, chekc-in時想book呢間buffet都話full晒~

      刪除