網頁清單

2009年4月12日 星期日

陸羽茶室 Luk Yu Tea House

復活節假期第三日, 冇約人, 可以瞓晏d... 睇完螢之光大結局都仲未唸到去邊度開餐...


礙於好多食肆2點就Last Order, 陸羽係唯一一間5點Last Order, 所以決定試下佢... 之不過d網民話好Full好難Book位, 所以我係戰戰兢兢嘅心情下打電話去問有冇得Book位... 對方答"o黎啦!!!"... 又冇問我姓乜幾位...


成日聽到佢嘅大名, 食都係第一次... 擠身米芝蓮評審員的推介榜, 好似有d理所當然...


可能時間尚早(2點左右), 只有3樓有位, 侍應安排咗我地坐逃生通道口, 我食一餐飯, 度門大大話話開咗超過50次, 度門嘭埋個陣, 後巷d風撲向我全身, 令我覺得好討厭, 因為佢所收嘅價錢一d都唔平, 我嘅要求自然會提高啦...


侍應亦冇問我地要茶盅還是茶壺, 一問完要咩茶就隊個茶壺埋o黎, 很無奈... 幸好honey話佢d普洱唔錯, 值回小小票價...



古色古香的裝修...


每個星期都會轉的點心紙...


脯魚蝦燒賣--honey話"唔鐘食燒賣"嘅佢, 都覺得好食...


煎粉菓連湯--很特別, 從未食過, 感覺食起上o黎冇咁油同冇咁熱氣... 上湯味好濃...


擘酥雞蛋撻--冇傳聞中咁好食, 有d失望... (食完即刻心郁郁想去肥彭極力推介嘅泰昌試試)


合桃蓉燒餅--因為點菜時唔知道點心紙會每個星期轉, 見到網友話外面合桃酥裡面叉燒蓉的點心好有驚喜, 所以我誤會咗呢一款係... 不過錯有錯着, 呢個其貌不揚嘅燒餅, 竟然出奇地好食, 有驚喜...


生蹄汁奶卷--後加, 等到d侍應車輪轉咁問你"有冇o野要加?"... 攪咗好耐先到... 跟手就叫你埋單, 話收銀埋數, 叫我地可以坐幾耐都得... 可能佢地心急嘅關係, 我覺得個芯有d凍, 未完全蒸熟晒... 感覺好似將馬碲糕轉成卷狀, 都幾清甜, 冇煎咁香口, 勝在健康d...


"到此一遊"照...


如果大家挨得餓嘅話, 建議你2點半先去, 因為可以坐地下同2樓, 環境會好得多...


是次每人消費約$120元
味道: 4 環境: 3 (因樓層而異) 服務:2 (因人而異) 衛生: 3 抵食: 2


###
地址 : 中環士丹利街24號地下
電話 : 2523 5464


2 則留言:

  1. 你叫個D,除左燒賣及粉菓,其他都是甜的,好似好膩。-_- 二佰多元好似唔抵食!
    [版主回覆04/13/2009 15:29:00]我原定計劃係叫4鹹1甜o架, 之但係個點心送到o黎先發現唔係果樣o野... 都要照食o架...
    係唔抵食o架... 所以"抵食"方面我比2分囉 =.="

    回覆刪除
  2. 係喇你地叫咁多甜野架… 雖然幾貴,不過我都想去試試(睇樣幾好食),你幾時再去叫埋我啦,但我要星期六啵,仲有我要食鹹點架!
    [版主回覆05/22/2009 20:53:00]估唔到你有興趣喎... 好吖, 下次一齊去吖...
    都話原定計劃係叫4鹹1甜囉...

    回覆刪除