澳洲「野生探索」2013の首日血拼Rundle Mall

17 March 2013, Sunday
 
Min 14^oC, Max 24^oC, Mostly Sunny, Mild 

到酒店Check-in時收到朋友的留言, 我地上房放低行李, 雖然十幾個鐘冇瞓過, 但係都第一時間Call朋友, 約好係Lobby集合一齊出發...

關於間酒店, 遲吓先報導, 大家先跟我地去市內八卦吓先啦...

從酒店出發, 大約行5分鐘左右就去到Rundle Mall... 好靚的Building呀, 其實Adelaide市內到處都係咁靚的Building, 來自石屎森林嘅我, 真係好羨慕澳洲人呀...

右下角係澳洲最古老的以家族擁有的Haigh’s Chocolates老店, 1915年開始於Beehive Corner營業至今, 即係仲有2年就剛好100週年, 好利害呀!!! 原本我地想過2日去佢嘅Visitors Centre參加20分鐘Free Guided Factory Viewing Tours, 但係因為臨近復活節, Guided Tours會取消一陣子, 好彩有Send Email去Reserve, 不至白走一趟...

吃不到的Jimmy Choo是酸的

5 April 2013, Friday

多年冇見的舊同事約埋一齊食Cake Buffet, 大家都對近日文華酒店推出的Mo Bar Jimmy Choo Afternoon Tea非常非常非常之有興趣... 

於4月1日至5月5日期間供應...

4月2日夜晚打電話去訂位, 已經話咁多日都Full Booking... 唔係呀嘛?!!

職員叫我Walk-in坐High Table... 與舊同事們商討後, 好, 去排隊!!!

3:00PM開始, 我地2:00PM約埋一齊出發, 去到中環文華東方酒店大約2:15PM, 入到Lobby, 唔見有Mo Bar... 問吓職員, 唔係呢間文華東方酒店, 唔係呀嘛?!! 乜有第2間文華東方酒店嘅咩?!! 置地文華東方酒店?!! 有間咁嘅o野嘅咩?!! Oh No!!!!!!

朝早仲雷暴+黃雨, 好彩而家只係微雨, 冒雨行去Landmark, 又潮濕又翳焗, 好辛苦... 去到Landmark, 都要問2個職員先搵到...

搞一搞, 已經2:30PM, 眼見只有2組人(3+3)企係門口左右兩邊, 去問Reception係咪企係門口排隊, 佢只係答2:45PM先會開始登記... 再問究竟有幾多High Table, 佢話入面果堆High Table加埋Bar枱都係Walk-in... 咦... 理應掂硬喇...

酒店方面冇提供排隊方法, 咁我唯有自己問吓企係Jimmy Choo Afternoon Tea大廣告牌隔離果3位女士係咪排緊Jimmy Choo下午茶啦, 佢答係, 咁我地自律地排係佢地後面, 坐係對面的3位美少女見狀, 即刻走返過o黎, 插咗係果3位女士前面... 好快, 我地後面已經出現十幾人以上的長龍...
 
2:45PM 職員開始放人入去... 第一組3位美少女被安排坐係門口位置... 第2組3位女士被安排坐係Bar枱... 到我地, 就話冇3人枱!!! 我眼前佢頭先講果堆High Table都未有人入去, Bar枱都仲有位, 職員只係不停強調有個男人, 有個男人, 有個男人, 未有3人枱, 未有3人枱, 未有3人枱... 無奈下留低手提電話號碼, 佢地話會幫訂咗位的客Hold枱15分鐘, 如有人No Show就會係3:15PM Call我地, 咁我地坐咗係門口張藝術品度等...

點知... 竟然... 排我地後面的人, 都可以入座, 搞錯呀!!! 唔公平呀!!!

雖然氣憤, 但佢強調咗好多次未有3人枱, 咁當佢真係冇3人枱啦... 等了又等... 眼見外面馬路勁塞車, 又落緊雨, Mo Bar一直只有客人離開, 未見有客人進入, 唔知係咪d闊太落雨唔出街, 3:09PM職員終於Call我地...

入到去, 都係比門口邊的2人枱... 2人枱... 2人枱喎!!! 既然都係比2人枱, 點解頭先唔比我地入座, 仲放咗咁多排我地後面的2人組合入座?!! 對我地好唔公平囉!!!

都算喇... 跟住職員同我地講, 要4:30PM還枱, 否則不能入座... 4:30PM?!! 咪連90分鐘都冇?!! High Tea喎, 80分鐘內要狼吞虎嚥晒所有食物, 仲點High呀?!!

都算喇, 睇吓餐牌, 提都冇提所有報章雜誌各大傳媒所提及的Cake Buffet, 餐廳內亦唔覺得有Buffet枱, 細問之下, 原來星期六日先有!!! 唔係呀嘛?!! 報紙都唔係咁講嘅!!!


HK$260+10%一個人, 只可以坐80分鐘, 3個人坐2人枱, 仲要排隊時受到不公平的安排, 仲要只差1日, 人地比多HK$20有Cake Buffet我地冇... 綜合多項Unsatisfied因素, 我地決定離開, 唔食!!!

雖然我內心有掙扎過, 我真係好想食Jimmy Choo牛奶朱古力高跟鞋同埋荔枝、玫瑰及紅莓慕思白朱古力手袋, 但我冇理由迫舊同事每人拎HK$286出o黎陪我係一個不公平待遇下癲80分鐘... Sorry, 我做唔出!!!

澳洲「野生探索」2013の從香港到阿德萊德

16 March 2013, Saturday
 
20^oC, Cloudy 

朋友一家三口到達機場後去咗開餐, 食飽飽就Whatsapp我地, 原來去墨爾本同去悉尼的航班登機閘口都只係隔離左右... 我地離開香港機場貴賓室, 去到登機閘口同朋友影返張合照Upload去Facebook, 之後就要分道揚鑣... 聽日係阿德萊德見喇, Bye~

Adelaide係南澳嘅首府, 居然得國泰有直航?!! 直航當然好, 但我地想去埋Sydney同Melbourne, 國泰飛來回2程嘅價錢, 等於澳航飛5程... 無言... 國泰Fans輸咗喇... 反正朋友已經出咗澳航機票, 坐同一班機去Adelaide應該會開心d... 但係落實出機票都係2月頭, 只係遲咗幾日Confirm, 就要1個人貴千幾蚊, 無奈下決定同朋友分開飛, 佢地飛Melbourne轉機, 我地飛Sydney轉機, 我地係香港遲朋友5分鐘飛, 但係要遲2個鐘先到Adelaide, 激死... 最激氣係比晒錢之後冇耐, 國泰就出特價機票...

我同Honey第一次坐A380, 好興奮呀~

架飛機大咗, 要早d寄行李之餘, 登機時間都要早d... 登機通道內中途設咗安檢站, 個大嬸撿查Honey背包時, 揑落單反相機支長鏡, 居然話係水樽?!! Honey同佢講係相機, 佢唔理, 繼續大力狂揑!!! 我心諗 : 揑夠未呀? 咁大力, 爛啦!!!

我好似係排第一登機, 當然係我之前, 有長者及小童優先登機... 平時我一定揀窗口位, 不過根據以往經驗, 坐長途機d人瞓到死豬咁, 3-4-3的座位設計, 2個人坐窗口位, 好難出入去Toilets, 所以今次破天荒, 係有得揀嘅情況下揀咗中間果排...

架機唔滿, 有d窗口位只係坐咗2個人, 正到暈... 我都好彩, 隔離的2位單身少女都比較纖弱, 唔會太迫...

架A380好新淨呀~ 等我神經企鵝走出o黎搶吓鏡先!!! 今次行程嘅其中一個重要環節, 係去Phillip Island探我嘅老表神仙企鵝...

澳洲「野生探索」2013の出發鳥

16 March 2013, Saturday
 
20^oC, Cloudy

前文提要, 我地今次突然暴走澳洲, 前後只得個半月時間Planning, 由於對澳洲亳無認知, 導致計劃一改再改, 所有事都勁「臨渴挖井」, 其中一樣係出發前幾日先Book機場Limousine, 結果... Full晒!!! 要坐Taxi去轉機鐵, 有少少冇癮, 因為夜晚7點幾機, A380要早90分鐘Close Check-in Counter, 正值Taxi交更時間, 好驚搵唔到Taxi, 好煩!!!

黑仔事件又何止1件, 出發前眼鏡無端端爛咗, 配Parts都配唔切... 帶Con都被個盒割到手指, 傷口勁深, 黑仔到爆...

咁黑仔, 都係早d出發穩陣d, 反正成朝係屋企都冇o野做, 得閒到上網玩Candy, 又敷Mask, 見個喼仲有位剩, 仲要再塞多幾件衫入去, 仲可以沖埋涼, 出街食埋Lunch, 再返屋企先拎行李, Weekend坐夜晚機就有呢樣好... 和民牛小排熱鍋飯真係超好味...

好彩出發時冇落雨, 順利搵到Taxi, 起飛前3個半小時去到機場, 都已經有人排緊隊寄行李, 排隊時見到指示牌話所有電子產品Spare Lithium Ion電都要Hand Carry, 唯有當眾開喼... 到我地Check-in完, 人龍完全消失... 過X光機時, 排我後面嘅外藉少女除埋對鞋放入膠盤度, 我睇到眼都突埋, 好快佢已經發現佢唔需要除鞋...

順利出境... 咁多時間剩, 去Gate 1隔離嘅Travelers' Lounge八卦吓先...

澳洲「野生探索」2013の「攜帶食品入境」話你知

12 March 2013, Tuesday
 
期待多年的澳洲旅遊, 只限於期待, 從來冇搜集過資料, 到突然話去, 前後只得個半月時間, 呢晒Hea... 奉勸大家一句, 做人切忌「臨渴挖井」!!!

越睇Backpackers' Forum, 個心越亂, 睇睇吓仲發現... 大家都話唔可以帶食物進入澳洲!!! 唔係呀嘛?!! 我唔得o架喎, 我去親旅行都要帶一大袋零食先至有安全感o架喎, 同埋大家都話去大洋路架旅遊巴"浪"到嘔晒電, 我冇話梅跟身唔掂喎!!!

繼續深入調查, 可惜網上資訊超混亂, 加上問過係澳洲住嘅朋友都係話好麻煩, 最後我決定以身犯險, 每樣零食都帶1包, 入境申報時真係唔得的話, 最多掉落「隔離物品」垃圾桶!!!

好, 出發前, 同各位勇士影張大合照先... Cheers...

[試食邀請] Eden Rose Restaurant : 含苞待放之伊甸玫瑰

5 March 2013, Tuesday

老友食家接受到餐廳方面的邀請前來試食, 我同另一位食友又可以跟埋來啦, 呵呵, 我地今晚有口福喇~ 

大廈位於銅鑼灣地鐵站出口, 非常易搵... 準時來到餐廳, 電梯一打開, WoW... 白色的牆壁, 黑色的壁報版, 紅色的絨布座椅, 格調簡潔鮮明而不失高貴優雅, I Like It... 餐廳新開張了不久, 壁報版上貼著剛出爐的剪報, 熱切期待今晚的晚餐呀...

餐廳入口放置了非常時尚的屏風, 還有閃耀奪目的水晶吊燈... 說實話, 不擋風的屏風是第一次見, 所以說它時尚囉... 令我聯想到電影中的太陽能電筒, 嘩咔咔咔...


開放式的酒吧區, 讓人身心放鬆... 


宮廷式絲絨梳化椅配襯黑色餐桌, 餐具經過精心擺設... 餐巾摺疊成水鳶尾(Iris)花型, 靚到唔捨得打開... 配埋Candle Light, 好浪漫呀... 桌上的酒杯仍未斟酒, 就已經開始半醉啦...


環境浪漫之餘, 餐牌亦相當典雅, 簡約中展現出優雅的歐陸氣質... 


是夜餐廳已為我地準備好4道菜的Tasting Menu, 另外店員極力推薦生牛肉他他... 現時餐牌是暫時沒有的, 是Fine Dining菜色, 有興趣的朋友可預訂... 不吃生牛肉的我, 又再次要聽到2位食友不停講"好味, 好味"...


生牛肉他他的醬汁由乾蔥、洋蔥、芥末子、橄欖油制成, 不用吃入口已經知道味道一定會好香... 將醬汁插在冰杯內上枱, 不論入口溫度如何, 眼睛已先吃了冰淇淋...


Foie Gras Toast $68
香煎鵝肝多士
-- 賣飛佛!!! 鵝肝火喉煎得剛好, 甘香豐腴, 口感綿密軟滑... 多士烘得非常鬆脆, 伴鵝肝同吃, 剛柔並濟... 伴碟的焦糖青蘋果猶如藝術品, 插上花束般的爽脆紅色萵苣(Lollo Rosso), 鋪上用手工拉出一絲絲的糖絲花網, 不禁令人拍案叫絕...


Lobster Ravioli with Lobster Sauce $88
原汁燴龍蝦雲吞
-- 大廚將買回來的龍蝦拆肉再打成龍蝦膠, 包上意大利雲吞皮, 再灑上以龍蝦殼及蝦殼熬制3日而成的龍蝦汁, 美味非常... 雲吞皮軟硬適中, 輕輕咬咬開後能嘗到啖啖龍蝦肉, 加上濃淡得宜的醬汁, 食得份外滋味... 亦份外熱, 進食時請小心...


吃罷頭盤, 等待湯品時, 與店主閒聊之間得知店主開此店的目的是想讓食客以平價享用到有質數的食物... 多遠大的理想... 姑勿論店主的理想能否達到, 但有一點可以肯定的是, 價錢真的不貴, 絕對是物有所值... (去旅行時導遊教我的, 做人唔好咁貪心, 能做到物有所值已經好難得, 大家千祈唔好貪求物超所值)

Cream of Black Truffle $58
黑松露菌忌廉湯
-- 以雜菌、黑松露油及黑松露醬炮製, 菌味特濃, 口感稠密, 不但嗅到強烈的菌味, 更聽到食友們讚好味好味的聲音此起彼落, 聽得我都有衝動想一試...

Lobster Bisque $68
龍蝦湯
-- 以龍蝦殼及蝦殼熬制3日而成的龍蝦湯, 味道頗鮮, 減少了Cream的份量, 口感相對較為稀薄, 怕飲完湯已經飽晒的朋友應該啱飲...


Herb Garlic Bread $32
香草蒜蓉包
-- 法包端上枱時熱辣辣的, 外脆內軟, 香草及蒜蓉味道濃淡得宜, 抵讚... 配冰涼的蕃茄salsa, 一冷一熱, 好有趣... 莎莎醬材料有蕃茄、洋蔥、陳醋、香草, 酸甜中帶醇香, 絕對有驚喜...


品嚐完高質數的頭盤同湯品, 心情真係越來越興奮, 因為今晚嘅主角有我期望已久嘅麵包蟹呀!!! 呀)))))) 麵包蟹呀!!! 麵包蟹呀!!! 麵包蟹呀!!! (傻-ed, arhahahaha)

Edible Crab Risotto with Black Truffle $178
黑松露麵包蟹意大利飯
-- 黑松露麵包蟹意大利飯係餐廳Fine Dining的招牌菜, 將來自法國的麵包蟹拆肉, 蟹肉、蟹膏、忌廉、意大利米同煮, 飯身非常之Creamy, 香濃軟糯, 每一口都包含著蟹肉的鮮甜及蟹膏的甘香, 至今仍然叫人回味... 灑上黑松露油同吃, 與混和在飯內的菇菌來個裡應外合, 菌香四射... 不要單看外表好像份量不多而輕敵, 我地要合3人之力先可以將之幹掉, 強烈建議女士們要Share食...


Roasted New Zealand Rib Eye Steak (10oz) with Baked Potato & Green Salad $178
燒紐西蘭肉眼扒(10oz)配美國煙肉焗薯及田園沙律
-- 到餐廳我不常吃牛扒, 因為我要吃Well Done的, 怕浪費了塊牛扒... 餐廳方面服務很貼心, 食友們要7成熟, 牛扒上枱後, 我地將牛扒切成3份, 我果份就麻煩餐廳幫我煮做全熟, 服務員很友善地幫忙... 我果片全熟牛扒亦不至於會太韌,  個人來講幾鍾意呢個厚度, 太厚個心好生, 太薄又冇口感... 肉味濃, 有咬口, 不用蘸黑椒汁及芥末醬都已經好好味, 薯仔略烤至焦香, Yummy... 伴碟的生菜已灑上陳醋, 與牛扒同吃時可減低膩滯感...


Roasted Sea Bass Fillet Rerered Mixed Vegetables Stock
燒智利白鱈魚伴雜菜魚湯
-- 其實有少少Confuse, Tasting Menu中文係鱈魚, 英文係海鱸, 究竟你係何家的黃花閨「魚」?!! 嘻嘻, 幸好你魚味特濃, 魚油豐富, 我一放入口就已經知道你係...... 鱈魚!!! 魚肉滑溜細嫩, 燒熟後放係以大露筍、車厘茄、西芹熬成的鮮甜什菜湯上面, 不單賣相誘人, 而且味道仲好好, 我包底清晒, 一滴湯都冇剩, 正... 想試就要預訂, 餐牌暫時未有...


Lemon Sorbet $38
檸檬雪葩
-- 食完主菜, 係時候上甜品啦... 第一款甜品, 不單單係一個甜品, 更可以幫大家清一清味蕾, 真係一舉兩得... 以新鮮檸檬皮包住檸檬雪葩, 驟眼睇根本分辨唔到佢係雪葩, 仲以為係個檸檬, 哈哈... 以冰杯盛載, 可以減慢雪葩溶化的速度, 外型又吸引, 大廚真係好有心思... 入口清香而酸甜, 整個口腔的餘味都被檸檬味沖刷得乾乾淨淨, 再加上薄荷葉幫手, 我地已經準備好迎接下一道甜品喇...


Green Apple Pie
青蘋果批
-- 蘋果批?!! 一聽到係蘋果批就開始冒汗, 皆因我好怕肉桂味... 閒談之間, 得知食友們都唔鍾意食蘋果批, 原因竟然都係因為唔鍾意食肉桂味, Oh, 又會咁夾嘅... 蘋果批係餐牌內暫時未搵到, 預訂Fine Dinning先有機會品嚐到... 上枱時見到外表有別於以往食過的蘋果批, 嚐一口, 出奇地接受!!! 第一, 佢冇我地怕怕嘅肉桂味, 抵讚!!! 第二, 佢冇咗中間果層果蓉餡, 果層果蓉餡腍黐黐又係好多人都怕, 抵讚!!! 批身其實係幾層酥皮叠起, 再放上青蘋果薄片同焗, 酥香鬆軟, 唔會太甜太膩, 好有驚喜!!! 再加埋香滑Vanilla Ice Cream係面, 一冷一熱, 忽然接通...


Chocolate Parfait $58
朱古力芭菲
-- 花花形狀的朱古力甜品, 好可愛呀!!! 用上75%的朱古力混合Vanilla而成的芭菲, 口感界乎Mousse與雪糕之間, 不會太軟, 又不會太硬... 服務員係我地面前淋上朱古力醬, 暖暖的, 帶點酒香, 醬內更有香脆的焦糖榛子, 與幼滑的Mousse及鬆軟的海綿蛋糕碎在口感上形成強烈對比, 伴碟的薄荷葉及藍莓亦係濃郁的朱古力味中滲出一絲絲的清香及果酸, 在味覺上提供多重享受... 我就已經愛上佢喇, 咁你又點呢?!!

進餐時, 餐廳內有客人慶祝生日, 餐廳方面捧出生日蛋糕並唱著生日歌, 雖然我地唔認識對方, 都好投入地唱埋一份, 希望壽星可以有一個難忙的晚上啦, 雖然我打錯晒拍子, 呀哈哈哈...

享受完豐富又美味的晚餐, 與店員閒談間得知此處為求婚聖地, 試過有男仔要求餐廳係Cream Brulee隻碟度用朱古力寫上"Will you marry me?", 然後係Lemon Sorbet度插上求婚介子, 當然唔少得遞上預先準備好的鮮花... 嘩嘩嘩!!! 好浪漫呀!!! 如果係我, 一定會答應囉...

此店現在猶如伊甸園中含苞待放的玫瑰, 食物有水準, 味道及賣相俱佳, 餐廳環境浪漫華麗, 服務員非常親切, 最重要係價錢合理, 絕無開天殺價, 相信好快會成為城中熱店, 期待佢成為城中盛開的玫瑰, 綻放耀眼光芒... 下次重臨之時, 唔知會唔會已經要幾個星期前Book訂定位呢?!!

是次每人消費約 N/A 元
味道： 4 環境： 4 服務： 4 衛生： 4 抵食： 4
###
地址 : 銅鑼灣軒尼斯道499號永光商業大廈19樓
電話 : 2836 6880

[試食邀請] 饗 Kyo Japanese Restaurant : 學前午餐

2 March 2013, Saturday

今天約了老友食家去學做麵包同Pizza, 上課前要先填飽肚子... 不算早起, 但未睡醒, 沒有什麼胃口, 決定來1客午市定食...

午市定食多達22款, 我的選擇障礙症又發作了... 考慮良久, 終於選擇了吃雞扒...

照燒雞扒定食 $68
-- WoW... 色彩好豐富喎... 定食包括前菜, 沙律, 漬物, 白飯, 味噌湯, 份量十足... 有菜有肉有飯, 非常均衡的飯食組合... 我最鐘意綠色的蘿蔔粒, 撈飯食一流... 沙律頗新鮮... 照燒雞扒醬汁香甜, 味道不錯, 肉質略為結實...

第2次來到Kyo, 店員都很友善, 感覺很親切, 在這裡渡過一個悠閒舒適的週末, 是一個不錯的選擇...

 

是次每人消費約 $N/A 元
味道： 3 環境： 4 服務： 3 衛生： 4 抵食： 3
###
地址 : 銅鑼灣登龍街28號永光中心11樓
電話 : 2833 1067

[試食邀請] I-Amina Italian & Oyster : 「意」味深長

26 February 2012, Tuesday

是夜老友食家受到餐廳方面邀請前往試食, 我有幸同另一食友跟埋一齊去, 一嚐意式風情夜宴, 在此多謝老友食家的邀請~

餐廳位於唐樓內, 就係Q-PETS樓上, 白色窗框果一間... 我地係Times Square等埋一齊出發, 轉來轉去, 先發現其實餐廳係Hysan Place斜角, 大家係Hysan Place出發會方便d, 抬頭一望就會見到...

嘩!!! 呢種Lift... 咪要自己手動打開度門, 再手動打開趟閘果種?!! 好多年冇見過啦喎!!! 哈哈... 我地好奇地諗, 如果部Lift未到時, 打開咗度門咪會跌落去, 好奇心驅使其中一人伸手去打開度門睇睇, 哦... 部Lift未到時度木門原來係打唔開嘅, 咁都安心d... 同埋原來入面已經轉咗電動門, 唔再係手動趟閘...


餐廳有d似私房菜的形式, 從大廈外睇唔到餐廳招牌, 大堂信箱亦冇貼招牌(其他信箱貼滿晒Logo, 包括阿貓地攤), 上到樓, 終於見到門外貼咗張印有餐廳名的A4紙, 唔知收工時係咪會撇走... 隔離單位門外好多風水o野, 仲用單車鏈鎖住鐵閘, 唔知撈邊行, 都幾特色...


進入餐廳後, 果真有「柳暗花明又一村」之感... 古時的詩人真偉大...


穿過長長的走廊, 首先見到嘅係Oyster Bar, 然後就到用餐區... 餐廳以黑白色調為主, 水晶吊燈及布藝窗簾有d宮廷Feel, 簡約中不失貴氣... 燈光比較昏暗, 加上柔和音樂, 私隱度高, 非常適合情侶用餐...


店內的Menu每月更改, 甫坐下, 店主已為我地敲定是夜晚餐的組合, 並詳細解說...

Bread with Homemade Sauce
麵包配自製特式醬
-- 先來1客餐前麵包, 口感有d似法包, 脆脆地... 大廚話麵包從上環的麵包店訂購, 由於商業秘密, 不便透露店名... 自製特式醬有2款... 1款係油醋, 即係橄欖油+陳醋, 呢1款我家都有自制... 另1款係藍莓梨醬, 味道酸中帶甜, 好重梨味, 非常清新, 有d似新鮮果Jam但糖份比較少稠度亦較低, 有驚喜...


店主推介來自法國的2款生蠔, Ancelin及有蠔后之稱的Gillardeau... Ancelin蠔香味十足, 富海洋風味, 既有甜味又有海鹽味, Aftertaste會有西瓜味, 好神奇... Gillardeau肥美鮮甜, 海水味濃烈, Aftertaste長達5分鐘以上... 店主建議先吃Ancelin, 然後再吃Gillardeau... 本人不吃生蠔, 只有看的份兒...


Kobe Beef Tartare M6
澳洲和牛他他
-- 我唔食生牛肉, 只可以聽住2位食友不停讚好食... 店主解釋加入了洋蔥的和牛, 吃起來會較膩, 加點Cracker同吃可消除膩滯感...

Cool Smoke French Duck Breast, Blood Orange

凍煙法國鴨胸, 血橙蓉

-- 西班牙血橙之所以叫血橙, 係因為橙肉的顏色紅噹噹, 何解血橙蓉的顏色會咁橙?!! Anyway, 橙蓉味道同Texture都唔錯, 酸甜帶果香... 法國鴨胸切成立方體狀, 很可愛, 鋪上翠綠的菜葉, 整體色彩極為豐富... 鴨胸味道有點似金華火腿, 肉質柔韌帶鹹香, 一改我對鴨胸的印象...

Cream of Mushroom
白菌忌廉湯
-- 我唔食菌, 只可以聽住2位食友不停讚好飲... 將3種唔同Texture嘅白菌, 包括切碎、打爛、生的放埋一齊, 為白菌忌廉湯帶來3重口感, 湯頭非常稠密, 菌味爆燈...

Tomato Gazpacho with Grape, Berries
西班牙蕃茄冷湯
-- 西班牙蕃茄忌廉湯加入洋蔥辟腥, blend完隔渣, 不加調味, 只加新鮮提子及藍莓吊味, 湯頭清新, 蕃茄味道溫和, 配上酸酸甜甜的果肉, 很特別, 最緊要係好健康, 堪稱「無添加」... 湯的溫度亦適中, 不會太冰凍, 消除了我對胃部添壓的憂慮...

Scallop with Parma Ham
香煎帶子風乾火腿
-- 巨型魚生帶子略煎至表面金黃, 外熟內生, 將鮮味濃縮至非常鮮甜, 入口柔嫩細緻有彈性, 好好好味呀!!! 巴馬火腿鹹香油潤, 與帶子頗匹配... 諗起都流口水呀...

Foie Gras with Apricot Jam, Baguette
香煎鵝肝配黃梅醬多士
-- 鵝肝是我的心頭好, 一次吃4-5塊都可以面不改容... 表面略煎至金黃的鵝肝, 味道甘香, 口感幼滑綿密, 配上以杏脯乾、橙、蜜糖等煮成的醬汁, 味道討好, 酸甜果香減低咗鵝肝的油膩感, 同吃份外滋味... 鋪底的多士比較腍身, 唔知係咪因為我地影相影得太耐所致呢?!! 如果鵝肝表面可以煎得再脆一點更好, 純粹個人偏好...

Sorbet of the day
水果雪葩
-- 吃主菜前, 先來1客蕃石榴雪葩清一清味蕾... 蕃石榴果香濃郁, 味道清甜, 有別於一般冰塊較多的Sorbet, 呢個Sorbet偏Creamy了一點... 我個人來說, 非常喜歡...

Lobster with Ravioli, Carol Mussels
焗龍蝦生湖蚌伴意大利雲吞
-- 意大利雲吞體積小巧, 一口一件, 本身沒甚味道, 蘸忌廉汁同吃味道剛好... 生湖蚌同龍蝦及意大利雲吞好似有點格格不入... 龍蝦好新鮮, 肉質爽嫩有彈性... 將龍蝦拑起肉咁貼心實在抵讚...

Confit de Canard
法式油封鴨腿
-- 鴨腿先醃3日, 再以Slow Cook的煮法煮熟, 然後略煎至表皮香脆, 再配上以提子、梨、冰糖等煮成的醬汁, 賣相甚佳... 鴨腿帶點鴨膻味, 我愛死, 但食友怕怕, 哈哈, 咁樣算唔算「同鴨唔同味」, 同一隻鴨腿, 唔同嘅人食, 會有唔同嘅感受... 但一致認為過鹹... 鴨腿肉部分偏硬, 部分偏軟, 鴨腿皮脆身, 口感豐富... 鋪底的紅菜頭用鹽、黑椒、醋等浸泡, 味道相對濃烈...

Sea Urchin Risotto
海膽意大利飯
-- 意大利飯的表面加了海膽, 感覺上貴氣了... 醬汁Creamy, 很美味, 可惜飯身非常之硬, 感覺上係8成生米, 大廚話係Tradition... 但我係歐洲食過的意大利飯有點不同, 人地係用20%半生米+80%全熟米, 既煙韌又軟綿... 雖說是意大利的傳統, 如此堅硬的飯身, 恐怕香港人未必接受到...

Dessert of the Day
是日甜品
-- 3款不同味道的小可愛, 加上餐廳名字的Chocolate Signature, 簡簡單單, 不失優雅... 馬卡龍的味道包括雜莓、咖啡、綠茶... 其他食友有檸檬、Cappuccino... 我個人最喜歡莓味, 酸酸的, 不太甜, 可消膩... 眾食客一致認為餡料比坊間的多...


Special Flower Tea
特色花茶
-- 餐後送上特色花茶作總結, 綠茶加入原棵玫瑰花蕾及蜜糖, 清香的茶味中滲出淡淡花香, 蜜糖有滋潤作用, 去除了綠茶的青澀, 增添了甜香... 看著載浮載沉的花蕾, 心情也跟著起伏, 為這頓晚餐添上一份浪漫...

 

總括而言, 店主的服務達到酒店級水平, 雖然慢, 但正常, 起碼比起歐洲算快... 而且經常更換餐具, 亦會觀察食客的進食速度來調節出菜的進度... 態度友善親切, 予人舒適的感覺...

餐後與曾在酒店工作的大廚交流一下, 大廚看來很年輕, 他聽後唔知會唔會開心到瞓唔著呢?!!

晚餐四道菜+麵包+甜品+飲品, 作價$599, 已包括加一服務費, 但要注意的是, 只收現金!!!

是次每人消費約 N/A 元
味道： 3 環境： 3 服務： 4 衛生： 3 抵食： 2
###
地址 : 銅鑼灣富明街寶明大廈4樓J室
電話 : 6688 9301