大榮華酒樓 Tai Wing Wah Restaurant : 人、情、味

30 Sep 2012, Sunday

印象中, 對上一次幫襯元朗大榮華酒樓係小學四年班... 即係幾多年? 哈哈... 秘密!!!

到底大榮華酒樓在此鋪位屹立了多少年呢? 連長輩也答不出來!!! 上網搜集資料... 1975年於元朗安寧路開設大榮華酒樓, 即是... 37年!!! 嘩!!! 利害!!!

出發前致電家住元朗的朋友, 了解一下等位的情況... 朋友說很難搵位, 經常也很多人, 只會跟熟客去, 因為酒樓有位會先給熟客... 聽後有點擔心... 到達後, 原來是派籌的, 要等十數張枱... 最後等了半小時便有位了!!! 但是一定要搭枱!!!


酒樓內環境頗光潔, 與小四的記憶完全兩樣...


在點心紙「奶皇馬拉糕」上方畫了箭嘴, 寫道"要中間", 勤快有禮的服務員跟我說"要中間"3個字下單時入不到電腦, 還建議我到大排檔自取... 大排檔?!! 戰戰兢兢地走到入口旁邊, 收銀櫃再向前行... 不明白為何自己會向那個方向行, 但是真的找到了... 拿回座位後, 服務員又再奉上, 也是中間位置的, 明明已在點心紙上取消了的...

奶皇馬拉糕 (中) -- 三層高的馬拉糕, 每層之間夾著薄薄的奶皇, 頂層與中層有很多氣孔, 發酵得好, 非常鬆軟, 奶皇味道略淡... 底部有點濕...

豉汁蒸鳳爪 (中) -- 豉汁味道濃郁, 鳳爪入味得來很爽口, 比坊間的出色得多...

豉汁蒸排骨 (中) -- 份量十足, 豉汁味道濃淡適中, 排骨軟腍, 肉味重, 好味...

蒜蓉蒸鮮魷 (大) -- 蒜蓉超級多, 蒜味超級強勁, 強勁程度是第一口有點招架不住... 魷魚非常鮮味彈牙, 大大片的, 很好吃, 做的很出色!!!

點了榮華腊味煲仔飯接近1小時仍未奉上, 向服務員問個究竟, 她說一早便售罄, 一般會在出爐後半小時內售罄... 最後我們隨便點多一個點心...

紫薯沙水晶包 (小) -- 好像沒有人推介過, 但超級好味!!! 很有驚喜!!! 用澄麵和生粉搓成粉糰的水晶皮超薄, 包著的紫薯沙顏色很吸引, 而且這樣巨型的水晶包實在前所未見...

咬了一口, 看, 皮居然如此透薄... 紫薯沙更是填滿了整個水晶包, 紫芯番薯的香味濃郁, 清甜味百分百天然, 若不是比原個紫薯幼滑, 合上眼睛真的分不出是紫薯沙, 還以為是原個紫薯...

剛到來搭枱的女士一看到這個紫薯沙水晶包, 都不禁問我"是否甜的? 好不好吃?"... 我用閃閃眼睛猛點頭說"好味", 哈哈, 她點了的點心還未到已經心癢難耐說要點這個紫薯沙水晶包, 連與她一起前來的男士也好奇地探頭一看究竟... 我們離開時這位女士還主動和我說Bye Bye... 這就是老店的魔力, 完全不相識的人, 都可以消除隔膜, 傾談起來, 香港人, 就是需要增加多點人情味...

與我們一同入座, 搭枱的嫲孫更是溫情洋溢, 令人羨慕不已, 事緣同枱少年與嫲嫲爭著找數, 最後還是嫲嫲勝出, 場面一度Sweet爆... 樹欲靜而風不息, 子欲養而親不在... 希望少年可以保持這份孝心一直落去...

雖然要搭枱, 但大家都很有修養, 很自律, 不會滋擾到同枱有緣人, 這一頓午餐吃得很自在, 這一點是有點始料不及...

每次去親大榮華(九龍灣 & 灣仔)都會遇到食神滔滔, 不過今日就見唔到, 有點失落, 我可是滔滔的"粉絲"哦...

冷氣有點不足, 比較焗...

連續3年獲選米豬蓮精選食肆, 必定有它的原因... 點心份量十足, 食物質數味道皆好, 價錢便宜, 服務不差, 環境比蓮香樓衛生, 若然你也想感受一下老店那一份情懷, 我強烈推介你來元朗大榮華!!!

是次每人消費約 $50 元
味道： 4 環境： 3 服務： 3 衛生： 3 抵食： 5
###
地址 : 元朗安寧路2-6號2樓
電話 : 2476 9888

北京樓 Peking Garden Restaurant : 沒有期望, 自然沒有失望

28 September, 2012, Friday

中秋佳節將至, 是夜邀約幾位同事慶祝一番...

數天前才訂位, 還擔心到處也Fully Booked, 但出奇地... 有位!!! 還不需要分時段(6-8; 8-10)進食, 真的嗎?!!

坦白說, 北京樓的門面著實一點也不失禮...

店內裝潢亦瑰麗堂煌...

不錯的前菜... 青瓜爽脆, 清甜多汁... 豆干彈牙...

研究了一會, 決定吃4人餐 (原價$1420, 優惠價$830)... 因為懶惰不想用腦...

燕山涼拌海蜇拼揚幫水晶肴肉 -- 水晶肴肉有鹹香, 但肉過硬, 吃了1件, 我的胃也實了...

翡翠明蝦球 -- 蝦球爽脆彈牙, 惜沒有鮮味, 西蘭花賴新鮮, 很難出問題...


紅煨雞絲翅 -- 曾在外國生活多年的同事很大反應, 我們即時解釋不可能真的給你魚翅, 應該是粉絲來的... 他無奈吃下... 嘿, 對不起了, 我吃罷後相信應該也有數絲魚翅在內吧... 味道與飲宴上吃到的一樣, 不難吃, 但不可以用美味用形容...


烤北京填鴨 -- 片皮前先奉上讓你看一個全相, 然後拿到放在一旁的工作枱片皮...

服務員端第1碟上枱的時間, 我已經覺得很足本, 能切到那麼多肉... 萬萬想不到, 之後還有1碟!!! 怎可能切到也麼多呀?!! 可惜鴨皮不是太脆, 鴨肉又乾又韌...

北京糟溜魚片 -- 這個魚倒是有點出乎意料之外, 魚肉入口滑嫩, 帶點酒味, 頗香醇...

無錫灌湯小籠包 -- 不濟!!! 咬開一點也不熱, 一滴汁也沒有, 還自稱灌湯?!! 餡料豬肉一點也不鮮, 又硬又實...

暢春園核桃酪 -- 單看名字還誤會是核桃糕點, 可惜, 原來是核桃露, 還是開粉的... 味道偏淡, 不太甜...

餐廳方面與其費心在設計累贅的菜名, 不如認真地研究一下如何把食物味道提升...

如此的食物, 難怪大節當前, 也坐得這麼鬆動...

是次每人消費約 $240 元
味道： 3 環境： 4 服務： 3 衛生： 3 抵食： 3
###
地址 : 太古太古城道18號太古城中心二期2樓201號舖
電話 : 2884 4131

Sugar (Bar.Deck.Lounge) : 愛與痛的邊緣

27 September, 2012, Thursday

吃罷「大班樓」, 計劃前往位於太古城的東隅酒店頂樓的人氣酒吧Sugar嘆一杯...

進入酒店大堂升降機後按32樓多次, 電梯門關上, 停留不動... 走到大堂接待處問個究竟... 原來Sugar在閒日5時才營業, 所以5時前升降機不能到達32樓... 噢... 白行一趟...

飯氣攻心, 回家休息一會, 順便致電訂座, 聽說露天位置要預訂... 可惜... 得到的回覆是「滿座」, 接線生建議我可嘗試Walk-in... 這個Happy Hour可謂一波三折...

接近5時, 再度出發!!! 順利進場, 室內暫時未有客人, 環境好像不錯, 若是炎炎夏日, 我只會選擇坐於室內...

嘩!!!!!! 沒想像過景色會如此優美!!! 安坐一個位置已可盡覽東九龍景致, 令人心曠神怡, 室外的梳化舒適自在, 有點Resort Feel...  

大班樓 The Chairman : 城中之醉...... 蟹

27 September 2012, Thursday

久仰大班樓大名, 一直未有機會一試, 直至大班樓今年榮獲米豬蓮一星榮銜, 都有少少擔心, 相信不少食家都欣賞過米豬蓮流星雨並身陷其中... 即使如此, 我都要儘管一試... 今日終於有機會朝聖啦!!!

我並非中區人, 在上環地鐵站出閘後, 一直向中環方向行行行... 越行越遠... 居然行到中環街市?!! 開始發現自己行錯路... 唯有轉上山, 再向上環方向行... 一直於橫街窄巷之中穿插, 充滿尋幽探秘之情懷... 終於... 迷路迷到蓮香樓, 驟然發現, 蘭桂芳酒店就在眼前!!! 我搵到喇!!!

大班樓位處九如坊尾段唐樓地鋪連1樓, 如果未聞其名而路過, 有眼不識泰山的機會率是99.99%...

在2星期前預訂, 被安排坐在1樓的落地玻璃窗旁, 偌大的水晶吊燈, 好難想像現在置身於唐樓之中...

店內座位不多, 1樓只有十多張枱, 地下入口我只見到數張枱, 難怪如此難訂位, 動輒便要2星期...


店內掛了1幅畫, 巨蟹躺在秤上流露出霸氣, 像在跟你說:「來! 和我比試一下拗手瓜吧!」... 相信店主對自家出品的蟹餚一定信心十足!!!

午市供應的行政午餐, 分為三道菜($178)和四道菜($198), 菜色有很多選擇, 頭盤有10款、主菜有20款、湯2款、甜品2款... 嘿... 我的選擇障礙症又來了!!!

既然來到, 必定要品嚐一下這裡的招牌菜--雞油花雕蒸花蟹配陳村粉!!! 普通(12兩)的要加$450... 大的更要加$750!!! 晚上來吃的話, 緊記要預訂, 否則很大機會會撲空...

正當我們討論著到底要十八味豉油雞好, 還是要話梅肉桂糖醋排骨好, 服務員很細心地建議我們可選十八味豉油雞, 然後另加2件話梅肉桂糖醋排骨來試試味... 呀!!! 太好了!!! 真的為我們這些貪吃的人想的很週到, 兩口子吃中菜經常遇到這種情況, 又想吃這又想吃那, 可惜肚皮只有2個, 叫多了會浪費... 好, 就來2件吧!!!

當我一口氣點了頭盤、主菜和湯, 正想點甜品的時候, 服務員給了一個溫馨提示, 說我可以吃罷所有東西, 還想再吃甜品時才決定也可以... 噢... 從來只有服務員硬銷人客多點菜色, 服務員這個溫馨提示, 我就好好地接受吧...

服務員還提醒我們午飯的繁忙時間, 上菜會比較慢一點, 我不加思索便答道:「沒問題! 慢一點更好!」...

龍井菊花煙燻乳鴿 -- 上桌時也被它嬌小的身形嚇一跳, 心想:「不用一口, 半口也沒了, 如何慢慢品嚐?」... 色是沒有了, 來看看香和味如何吧... 用鼻子一嗅, 煙燻的味道和龍井的茶香很對板, 急不及待放入口, 肉質柔軟, 鴿身融合了濃郁煙燻香味與茶葉幽香, 只是鴿翼, 我也可以涮完又涮, 真的有點不捨得把它放下... 吃罷後, 煙燻的香氣在口中歷久不散...

咸蛋黃乾葱伴涼瓜 -- 爽脆香甜, 真的是苦瓜嗎? 苦瓜煮得不夠會又硬又苦, 平常吃到的都是煮至腍腍爛爛, 但這苦瓜咬落爽脆有勁, 而且味道還是甜中帶香, 不是很神奇嗎?!!


這2道前菜都很出色, 難怪大家都熱烈推介呢...

老火靚湯 -- 今天是的老火靚湯是花旗參燉竹絲雞, 湯料十足, 用上花旗參、柱貝、桂圓、竹絲雞、廋肉, 花旗參不是一片片的, 而是參鬚, 有些更像筷子頭般粗壯, 難怪參味如此強勁, 回甘良久... 竹絲雞用上雞腿部分, 湯內一點油也沒有... 柱貝的鮮, 桂圓的甜, 加上竹絲雞及廋肉的香, 令整碗湯的味道變得很有深度... 簡單一點來說... 太好喝了!!!

十豆蟲草鬚湯 -- 加入十種豆類慢煮蟲草鬚, 湯內盡是蟲草精華, 味道濃郁甘香, 多喝有益...

終於到了今天最緊張的時刻!!! 有請... 主角出場!!!

雞油花雕蒸花蟹配陳村粉 -- 聞名不如見面, 蟹未到, 甘香醇厚的花雕己撲鼻而來... 花蟹排列工整, 沉醉於花雕之中, 無法自拔...

服務員隨即端上呈半透明狀態的陳村粉, 瞬間便鋪到碟上, 讓陳村粉盡吸雞油與花雕的精髓...

說時遲, 那時快, 花蟹已被陳村粉造成的暗湧推到岸邊... 海面湧起的浪很大, 還把大量海底的海草捲到海面... 哈哈哈... 好一個無聊的旁白...

將陳村粉放入口, 還未開始咀嚼, 強烈的花雕酒香已猛衝入喉嚨, 咳咳咳... 一時間有點招架不住... 好利害呀!!! 再細味陳村粉, 柔軟滑溜, 吸收了鮮雞油與陳年花雕的香、花蟹的鮮, 與香蔥同吃, 實在太美味!!! 我們絕對沒有來錯!!! 一下子被美味沖昏了頭腦, 居然用手拿著蟹來吃, 雞油花雕流到手上, 還吃到啜手指, 請恕我有點失禮, 哈哈!!! 蟹肉鮮甜, 多肉結實, 不用蘸汁也很好吃, 但當你要面對的是這碟雞油花雕, 就什麼也會忍不住亂蘸一通, 我們還打算用來蘸白飯吃呢... 

「此蟹只應天上有，人間那得幾回嚐」... 哈哈哈... 又來多一個無聊的旁白...

十八味豉油雞 -- 以18種藥材浸煮三黃雞, 上枱時散發出強烈的香味, 雞肉滑嫩彈牙, 連皮吃一點也不覺得肥膩, 每咀嚼一口也吃到不同的香味, 味道複雜有層次... 放涼了才吃也很美味...


話梅肉桂糖醋排骨 ($60) -- 熱騰騰的排骨, 酸酸甜甜, 肉桂香味偏淡, 味道不錯, 可惜與花雕蟹及十八味雞同枱較量, 被狠狠地被下去, 可以不需另加... 伴碟的脆片有點不協調, 但撈粥吃很不錯...

午餐包括銀杏白粥/白飯1碗... 白粥很有驚喜呢... 綿滑有米香, 口感厚稠, 很好吃呀!!! 銀杏不苦的呢...

是日甜品--甜品有杞子雪糕/子薑雪糕, 我選了很多人都推介的杞子雪糕... 以冰凍的小碗盛載, 有點像士多啤梨雪糕, 外型很可愛, 討人歡喜... 雪糕口感有點像雪葩, 混入了杞子, 口感有點粗糙, 而且味道偏淡, 但很有創意, 而且杞子很有益, 還是值得一試...

生磨杏仁茶 -- 杏仁味濃, 甜度適中...

服務很好, 服務員都輕聲說話, Honey去洗手間時因為有人正在使用, 回來坐了一回, 服務員隨即通知他洗手間可使用了...

環境不及酒店, 簡潔舒適, 遠離繁囂, 不失為用餐的好地方...

一場到來, 若然不吃雞油花雕蒸花蟹配陳村粉, 就實在太失色了... 撇除了雞油花雕蒸花蟹配陳村粉, 單計$198四道菜午餐, 有數間城中食府也能有如此質數~

完成了今天的美味之旅, 正如Honey朋友所講一樣... The Best in the Town!!!

是次每人消費約 $500 元
味道： 5 環境： 4 服務： 5 衛生： 4 抵食： 3
###
地址 : 中環九如坊18號地下
電話 : 2555 2202

微型公仔屋 の 自制小道具 -- 紙箱及時鐘 (Dollhouse Miniature)

23 September 2012, Sunday

以下嘅微型小道具係為咗我間「微型公仔屋 の 迷你燒臘店  (Dollhouse Miniature の Roast Meats Shop)」而制作o架!!!

我用曲奇餅嘅紙袋, 剪貼成紙皮箱...

微型公仔屋 の 迷你燒臘店 (Dollhouse Miniature の Roast Meats Shop)

23 September 2012, Sunday

接近半年冇發報我嘅微型工程啦, 因為之前去咗旅行, 荒廢咗業務, 加上早前貪心, 一次過同一時間上2個Courses, 基本上所有時間都用晒係黏土食品制作, 更加冇時間為之前欠下嘅裝修開工... 雪球越滾越大, 欠下嘅裝修工程高達3間迷你店舖!!! 所以我痛定思痛, 暫停咗今季嘅課堂, 務求盡快完成手頭上嘅工程, 希望趕得切係11月前全部完成, 可以再報Course...

三妹燒臘開張喇!!!

生原創(蛋包飯) Omerice : 真正的蛋包飯

22 September 2012, Saturday

北角清風街近年發生大變天, 由數年前只有數間食店, 發展至今天十數間, 以往清風街以車房及夜冷店作主導, 今日車房及夜冷店仍在, 只是數目減少了...

夠膽量將食店開在車房旁邊, 店主對自家出品的食物似乎信心十足...

昨天才吃過CoCo壹番屋的蛋包飯, 今日又再吃蛋包飯?!! 我都估唔到會食得咁密, 不過既然順路, 就食咗先啦...

唔識字?!! 唔緊要!!! 剩係睇門口個招牌都知呢度係賣蛋o架啦!!!


店內充滿日式味道, 坐係吧台嘅客人可以感受到百分百日本Feel...

吧位旁邊有數張枱, 牆邊設有衣架掛外套, 這個設備在日本很常見... 但座位超級擠迫, 我地坐係大門口旁邊的2人枱, 擠迫程度更甚, 連坐低及離座都有困難...

店內除供應蛋包飯之外, 仲有烏冬、串燒、魚生及日式料理...

Order蛋包飯, 可加$8配汽水, 原來係支裝汽水, 即刻覺得抵d...


蛋包飯可以配茄汁/咖喱汁/白汁... 尋日先啱啱食完咖喱, 今日唔食住啦, 試吓茄汁啦...

噴香牛肉蛋包飯 ($78) -- WoW... 好靚呀!!! 咁樣先叫做蛋包飯吖嘛, 尋日係CoCo食果d太唔似樣...

切開o黎睇吓先... 牛肉同飯一齊炒香咗先再用蛋衣包住上碟, 飯身濕濕地, 盡吸牛肉精華, 隱隱滲出黑椒味, 蛋味濃郁, 好好味呀!!!

 

沖繩風涼瓜肉末蛋包飯 ($60) -- 咦... 單憑外表, 真係好難分到入面係咩餡料... 會唔會好易撈亂呢?!!

切開睇吓先... WoW... 沖繩風涼瓜呀, 一d都唔苦o架!!! 炒飯味道同我碟牛肉飯差不多... 應該係用同一隻汁炒...

 

味道好好, 服務都OK, 環境都好好, 但唔好坐囉... 都值得再食嘅, 但唔適合一大班朋友慢慢坐邊傾邊食...

是次每人消費約 $80 元
味道： 4 環境： 3 服務： 3 衛生： 3 抵食： 3
###
地址 : 天后清風街3號地下
電話 : 2512 1809

CoCo壹番屋 CoCo Ichibanya : 一切有待改善

21 September 2012, Friday

最近CoCo壹番屋殺入康怡吉之島, 每次面對新食店開張, 都永遠都將自己的搵食格言(未開夠2個月唔好試住)忘記得一乾二淨...

唔好以為冇人食, 實情係幾張枱一齊埋單走咗, 外面排緊隊嘅客人未入座, 先比我地捕捉到呢個鏡頭... 環境都OK舒適, 未算好坐, 因為後面d通道人來人往, 同坐路邊冇分別... 枱與枱之間只有條狹縫, 雖未至於搭枱, 但感覺上無異...

o黎得呢度, 就緊係食咖喱o架啦!!! 見到有奄列咖喱飯, 好吸引喎... 就試吓啦!!!

散叫食物, 加錢可以轉做套餐, 可選配例湯、迷你沙律、甜品、飲品... $15任選2款, $20任選3款, $25任選4款... 我地決定試齊4款...

落單需要重複複述好多次, 落單速度有待改善...

迷你沙律 (套餐) -- 服務員放低時講咗句豉油汁... 咁強調豉油汁?!! 唔通有其他沙律汁揀?!! 落單時冇問過我地喎!!! 後尾上網調查, 原來可以揀芝麻醬or豉油汁o架!!! 乜咁o架... 人地鍾意芝麻汁o架嘛... 生菜都幾新鮮, 豉油汁味道似酸醋汁... 都幾清新開胃...

例湯 (套餐) -- 嘩!!!!!! 打瀉鹽呀?!! 鹹到苦!!!!!! 又話蕃茄唔知咩湯, 一D蕃茄味都冇, 而且稀到水咁, 好難飲呀!!!

飲品 (套餐) -- 見隔離枱杯凍檸茶幾靚咁, 所以忍唔住要叫o黎飲吓... 外表就唔錯嘅, 糖漿仲要係獨立包裝, 方便衛生, 可惜茶冇茶味, 檸檬冇檸檬味, 1:99咁... 仲要只係比支飲管, 冇比茶匙, 叫人點拮d檸檬呀?!!

蕃茄蘆筍奄列咖喱飯 ($60) -- 以蛋包飯嘅標準o黎睇, 唔合格!!! 佢只係以未炒至全熟嘅蛋鋪係舊飯上面, 太唔似樣!!! 以咖喱飯o黎講, 相當OK, 咖喱汁特多, 辣味屬於中辛至大辛級別, 珍珠米粒粒都相當飽滿, 蕃茄嘅酸味同咖喱唔係太夾, 蘆筍都幾爽脆, 整體味道OK, 份量雖然大, 但可以全碟KO!!!

吉列豬扒奄列咖喱飯 ($70) -- 都係個蛋唔得, 豬扒個皮炸得好脆, 肉質唔Juicy但未至於太硬, 撈咖喱汁食真係一流...


甜品 (套餐) -- 全晚驚喜所在!!! 甜品竟然係雙色雪糕, 仲要係士多啤梨雪糕 + 曲奇雪糕, 仲要咁大球, 好抵食喎!!! 士多啤梨雪糕有士多啤梨果肉o架, 甜甜酸酸, 滑滑溜溜, 好好味呀!!! 曲奇雪糕都好好味呀, 真係有曲奇碎係入面o架...

如果大家想轉套餐, 我會建議大家加$15選迷你沙律同甜品, 例湯同飲品可以不理...

食完晒先留意到有呢2樽配料, 原來係漬蘿蔔, 都幾爽脆, 我見到幾位女顧客都勁落大半樽囉... Hot Spice就無試啦, 因為d咖喱對我o黎講已經幾辣...

 

唔知係咪因為咖喱加埋炸豬扒太熱氣, 夜晚舌尖好痛, 臨瞓前要飲杯清熱X先可以去瞓... 過一排先再比多一次機會佢...

是次每人消費約 $85 元
味道： 3 環境： 3 服務： 2 衛生： 3 抵食： 3
###
地址 : 太古康山道1號康怡廣場吉之島1樓
電話 : 3572 0881