網頁清單

2014年9月22日 星期一

沖繩「婚紗攝影」2014の酒店篇 Toyoko Inn Okinawa Naha Shintoshin Omoromachi

 13 September 2014, Saturday

由於今次唔係來渡假, 選酒店的大前提係想同攝影團隊下榻同一間酒店, 咁拍攝當日我就可以瞓到最後一分鐘先施施然行到化妝師房間Set頭化妝, Honey又唔使搬住幾袋婚紗坐車來會合...

出發篇提及浪漫一生的天氣保險線, 加上唔想搬住咁多行李去機場轉酒店巴士, 我地決定拍攝後果2日唔搬去中部海邊渡假酒店嘆世界, 4晚都留守係同一間酒店度...

東橫INN 沖繩那霸新都心Omoromachi
地點         ✪✪✪
交通         ✪✪✪✪✪
整潔度     ✪✪
舒適程度 ✪✪
設施         ✪✪✪
員工素質 ✪✪✪
性價比     ✪✪✪✪✪

酒店離國際通的牧志駅只是2個Monorail站, 步行的話只是15分鐘...

乘坐沖繩都市單軌電車 (Okinawa City Monorail), 從那覇空港駅到おもろまち駅大概20分鐘... Omoromachi站旁是DFS免稅店, 過了馬路轉右行幾步便是... (2張照片是站在同一位置影的)




再向前行是當地人也經常光顧的大型綜合購物商場Naha Main Place!!!


商務酒店格局, Lobby面積很細, 一眼睇晒, 客人離開前會將房間鎖匙放低... 


Lobby旁是早餐區... 電腦Printer冰機水機微波爐即棄筷子免費使用, 汽水機洗衣機自費...


睡衣肥皂放在唯一的電梯旁讓客人自取...


酒店只有Economy Double Room (12㎡)同Standard Double/Twin Room (15㎡), 沒有更大的房間, 為了多一點空間放婚紗, 我多付了一點錢, 選了Standard Twin Room... 打算2個人睡1張單人床(110cm寬), 2袋婚紗及行李可放在另1張單人床上打開...


打開房門, 有點奇怪, 與網站展示的Economy Double Room (12㎡)沒分別... 但趕時間, 急著前往餐廳吃晚飯(不想迷路, 想趁天黑前到達餐廳), 匆忙放下行李離開, 無影相, 諗住食完飯返來大把時間...

到Lobby交低房間鎖匙時, 順便問職員我地的房間是否Standard Room (15㎡), 佢話酒店Full了, 如我想要大一點的房要過2日(星期一)先可以安排到... 我重申我係訂了Standard Room (15㎡), 到底佢安排比我的房間是Economy Room (12㎡)還是Standard Room (15㎡), 佢話會問下, 但無咁快回覆到, 又問我究竟想要大一點還是要雙床...  

以上對話主要係職員用國語而我用英語溝通... 都勉強OK溝通到的...

我地出咗去食晚飯, 回來取房間鎖匙時, 職員主動話佢地搞錯咗, 已經幫我地將行李從8/F的Economy Double Room (12㎡)搬到12/F的Standard Double Room (15㎡)... 吓?!! 搬埋行李咁快手?!! Honey話雖然佢地係搞錯咗, 但主動承認錯誤實屬難得...

Standard Double Room (15㎡) 的照片... 床寬160cm... 3㎡應該係多了窗邊的1枱2椅吧!!!



間房大咗都係無位打開行李篋, 唯有玩吓俄羅斯方塊... 即刻有位放2袋婚紗, 仲可以同時打開2個28吋行李篋係地下, 掂晒~



房內有張通告自稱間房好夠空間放行李, 客人可將行李放床底... 我嘗試將行李篋推入床下底, 失敗!!! 行李篋比床架高了1cm左右, 頂住咗, 推唔入...

房內其他設備... 無睇過的電視, 強勁的風筒, 懷疑有紫菜的腥味茶包, 風景被遮擋了一大半的玻璃窗, 標準日本膠浴室...






今朝6:00am起床, 明天8:00am要到化妝師房間化妝, 今晚Target 10:00pm睡覺, 可惜臨瞓前發現大蜘蛛, 如果唔殺死佢, 好驚夜晚會咬到我腫晒, 迫於無奈要用酒店拖鞋拍扁佢, 嚇死我, 瞓緊時好擔心仲有其他蜘蛛, 好驚, 心跳到彭彭聲!!!
再加上個枕頭又扁又無承拖力仲好大陣嘔心臭汗味...
再加上只係得張床褥套, 張薄過紙的被單仲細過床褥套, 搞到我對腳成日掂到個千年無換的床褥套, 好唔自在...
無承拖力的床褥已變得不重要...

全晚失眠!!! OMG!!! 叫我點影婚紗相呀今日!!! 唉... (嘆息)

講講酒店房間個Free WiFi... 好彩我地有租WiFi蛋, 房間Free WiFi永世都Connect唔到, 只有在早上11時大部分客人Check-out後先Connect到但勁勁勁慢, 連Load Google Map都成問題...

Check-in時女性客人會有Welcome Gift... 我全選Masks...


酒店免費早餐, 有粥有飯團, 款式少但味道不錯... 我頭2日都食唔到, 只食了之後2日...



主力食白粥, 加點醃菜... 伴菜每天會有少少唔同...


第4天早上...


第5天早上... 今天的甜品好正, 沖繩風黑糖煮紅豆薏仁, 好好味...


總括 : 價錢係好平, 交通亦方便, 但住4晚有3晚失眠, 有得揀的話唔會再住呢間...


沖繩「婚紗攝影」2014 の 總匯 http://www.kenmerry.com/2014/11/Okinawa.html

4 則留言:

  1. 好細的房間,
    有些焗促,
    如果瞓得唔好就乜都喺假!

    回覆刪除
    回覆
    1. 路霸兄, 完全同意, 我唔需要金碧輝煌, 只要乾淨舒適瞓得著就好滿足~

      刪除
  2. 哎呀,睡眠質數吾好,影響整個人的心情﹗

    回覆刪除
    回覆
    1. 羊羊, 咪係囉, 個樣都殘D, 影響婚紗相的美感 :(

      刪除