網頁清單

2014年6月16日 星期一

Showbiz Bar : 坐低慢慢傾

7 June 2014, Saturday

眾里尋他千百度,驀然回首,那人卻在燈火欄柵處... 命運的紅線, 有時候真的很玄妙...

出席完U Lifestyle x YA KUN Coffee & Toast 的 Private Party後, 有食友推薦附近新開的甜品店Passion by Gerard Dubois on Mody Road, 幾位同道中人昂首闊步前往朝聖, 可惜... Full House!!! 更遇到等位中的客人不禮貌對待, 真想同佢講一句 : 「放鬆點啦, 香港人」...


極速離開... 躊躇之際, 食友們提議到附近1間佢地之前去試食過的Dabyida Restaurant and Bar... 可惜... 坐低後先發現, 如果唔食Tea Set for 2的話, 並無任何小吃供應, Drink List更只有酒精飲品... 

再次極速離開... 隔1個舖位見到有間酒吧, 今次我地要企係門口認真一點睇清楚個餐牌先... 


猶豫之際... 店員飛身撲出, 我厚住面皮問店內會唔會有凍檸茶之類, 店員答「第2個就無, 你就有」, 我心想「咁即係有啦」... 

雖然是1間酒吧, 但眼見店內裝修都幾Stylish, 又好整潔, 座位又舒適, 得1-2枱客, 好適合靜傾吓計, Happy Hour價錢又合理... 反正星期六係尖沙咀週圍都難搵位, 就決定入去博一博...


Snack Menu有6款選擇, 全部$68...

Deep Fried Rice Ball with Mushroom & Truffle Fillings
-- 樣子不太吸引, 但切開後驚為天人...


原來炸飯球入面係用意大利燴飯的, 外脆內軟, 入口好Creamy, 味道非常好, 正!!!


原來酒吧以前係無小吃供應, 係近幾個月先有, 關鍵正是剛才飛身撲出的店員, 6款小吃正是佢的傑作, 佢之前係Cova做過, 認識Cova的意大利總廚, 店員來到酒吧後便發揮所長...

Virgin Colada $40 (Happy Hour價)


Strawberry Kiss $40 (Happy Hour價)


Stella Artois $48 (Happy Hour價)


Oreo Speed $60 (Happy Hour價)


5個女人幾多個墟?!! 我唔識計...

傾到另外2枱客都走埋, 我地變相包場... 戰地記者再深入少少酒吧區影多幾張相... WoW... 有Live Muic Show...


老闆一眼就睇得出我用Sony Cybershot DSC-RX100咁利害?!! 仲讚我識貨... 細問之下, 原來佢自己都係用呢部機, 唓, 即係你讚緊自己識貨啫...

玩樂區...


3點坐到5點, 坐足2個鐘, 傾得好滿足, "星爸爸"價錢, 5星級酒店享受, 好自私咁諗, 唔好話比人知, 如果唔係下次來肯定無位... 不過又做唔出, 始終我唔係黑心人, 都想同各Blog友分享, 等大家去到尖沙咀想搵地方飲杯o野坐吓傾吓計都有地方落腳... 

店內沒有半點酒吧必有的異味(煙味, 嘔吐的酒味)... 正!!!

Happy Hour時間超長, 星期日至四 中午12點到晚上9點, 星期五至六 中午12點到晚上8點...

離開時店內開始亮燈, 氣氛更浪漫, 熱戀中的情侶Must Like...


是次每人消費約 $70 元
味道: 4 環境: 4 服務: 3 衛生: 3 抵食: 5
###
地址 : 尖沙咀棉登徑8號地下9號舖
電話 : 2722 0050

6 則留言:

  1. 呢個炸飯球是意大利餐的 arancini ,墨爾本有一條街叫Lygon St. 有小意大利的別稱,差不多間間都有供應。

    回覆刪除
    回覆
    1. 嘩, 你好勁呀, 我完全未聽過arancini, 多謝你教識我一樣新野, 呵呵, 即刻袋入袋先~

      我舊年去墨爾本無去過Lygon St., 如果有機會再去一次, 一定要去試下d意大利餐 :)

      刪除
    2. 勁乜呢?你咪仲叻,寫幾百篇食評,我就唔識寫,只識睇人食評跟食,因為我老婆懶,唔鍾意煮,而且又話唔識,咪成日出街食咯。

      刪除
    3. wakakaka... 我都係無(煮)飯太太, 我老公都好慘, 咁多年來都成日出街食 XD

      刪除
  2. 點解被人……,喺咪有誤會
    幾舒服,人客少,食物唔錯
    但酒吧都咁早開,生意難做

    回覆刪除
    回覆
    1. 唉... 我諗住等位, 見有個男人企係九里遠望住同一張大枱, 佢得1個人, 我地5個人, 當時有張吉的2人枱, 我咪問佢"唔該, 你係咪等緊呢張枱?", 佢兇神惡殺咁答"唔係我企係度做咩"... 我都懶得再同佢講野, 即刻轉身背住佢... 我地離開餐廳後, 我見到佢係餐廳週圍行, 望入D廚房度, 根本無等位~

      刪除