網頁清單

2014年6月22日 星期日

免費「香港迪士尼」2日1夜之旅 -- 迪士尼好萊塢酒店 (Disney's Hollywood Hotel)

13 May 2014, Tuesday


話說... 舊年12月Openrice聯同Hong Kong Disneyland搞咗個Game -- Open​Rice x 香港迪士尼樂園 - 分享奇妙「滋」旅 贏取奇妙旅程, 於OpenRice提交食評, 獲得最高食評分數的2位食家(金飯碗組及金筷子組各1名), 可獲得香港迪士尼樂園1日門票兩張及迪士尼 好萊塢酒店園林景觀客房住宿一晚(價值港幣$3,540)... 我足足苦戰咗1個月, 充滿淚水與汗水與口水的一戰... 終於抱得美鼠歸!!! Yeah!!! 我得咗喇~~~

原本想去加拿大前LaLa聲去玩咗先, 點知酒店Full Booking, 結果拖到5月中... 貴人出門招風雨... 成個星期都雷暴呀!!! 激屎人...

金飯碗組得獎者人氣Blogger宅女笑我住1晚都要拖喼... 哈哈... 係呀, 我無大旅行袋, 同埋拎旅行袋好重好辛苦, 索性拖喼扮遊客...


今日成29°C熱屎人, 朝早雷暴, 出門時停咗陣雨, 落到地鐵站又再落雨... 3PM去到欣澳站出咗陣太陽, 藍天白雲, 到達酒店時又再落雨了...

香港廸士尼開幕初時, 我地住過1次香港廸士尼樂園酒店 (Hong Kong Disneyland Hotel), 果時都仲未開始寫Blog... 迪士尼好萊塢酒店 (Disney's Hollywood Hotel)反而未住過, 雖然明知不及維多利亞式設計的香港廸士尼樂園酒店般瑰麗典雅, 始終是遊戲獎品嘛, 能勝出已經很高興, 不能要求太完美~


酒店Lobby坐咗好多人, 但排隊check-in嘅人就無, 所以我等都唔使等就check-in完...


Open​Rice x 香港迪士尼樂園 - 分享奇妙「滋」旅 贏取奇妙旅程的遊戲獎品除了迪士尼好萊塢酒店園林景觀客房住宿一晚, 更包括香港迪士尼樂園1日門票兩張, 出發前已盤算定可否加錢Upgrade做年票, Check-in的職員竟然可以幫我處理埋, 唔使走去樂園入口問, 聽到答覆係"可以"時真係超級開心, 每張1日門票加$400就可以升級做年票「奇妙處處通」銀卡... 來緊1年我又會密密去香港迪士尼樂園啦~ 呵呵呵呵~


上房...


酒店房間是以2大2小的家庭為基礎, 2人入住當然寬敞... 房間潔淨, 我今夜有教好瞓...


茶水吧麻雀雖小, 五臟俱全... 右邊牆身的電源轉換插頭對遊客來講肯定是Bonus, 我第一次見酒店包埋... 我地鐘意飲濃綠茶, Call Room Services拎多3個Green Tea Bags都無有Say No, 仲好快送到, 抵讚...


3支免費礦泉水放於浴室內...


衛浴用品一應俱全... 搵唔到牙膏牙刷, 有點擔心... 致電Room Services, 原來收於米奇杯內...


放好行李, 出發!!!

Check-in時酒店送咗張Chef Mickey Dinner Buffet Discount Coupon, 成人每位減$80, 又幾吸引喎... 就係咁, 2個無打算過係廸士尼食自助餐的人, 迷迷糊糊就訂咗早段的枱...

4:30PM 趁無落雨, 到迪士尼好萊塢酒店的後花園散步...





時間尚早, 決定沿海濱走廊散步去維多利亞酒店... 可能就快會落雨的關係, 感覺非常涼快, 空氣亦非常清新... 夜晚離開香港迪士尼樂園時卻非常蟻焗...



香港迪士尼樂園碼頭...


只有西側大堂開放, 東側大堂落了閘... 航班指示牌空白一片...




5:00PM 行咗足足半小時先到達香港迪士尼樂園酒店, 行到腳跛, 好肚餓呀!!!



上次入住時影咗好多相, 今次餓鬼趕住去食自助餐, 酒店大堂1張相都無影, 原來想加條舊Blog Link指返去上次入住時的Blog分享相片, 點知原來已經係好耐之前, 2006年2月14日, 果時都未開始寫Blog, 無得指了...

極速坐Shuttle Bus返迪士尼好萊塢酒店的米奇廚師餐廳 (Chef Mickey)開大餐, Yo~

踏正5:30PM準時入閘... 上演一幕精彩的「餓鬼大滿足之奇妙自助晚餐」~


7:30PM 食完仲趕得切坐Shuttle Bus入廸士尼樂園睇煙花... 今次係輕鬆之旅, 無帶單反無帶腳架, 手震震+傻瓜機+Hea影係咁上下質數...


睇完煙花返到來酒店仲巧遇唐老鴨, 好幸運呀!!!


10:00PM 香港人又點會咁早返房休息吖... 我呢隻大牛龜仲走埋去馬里布遊戲室(Malibu Games)同細蚊仔爭o野玩... 嘻嘻...





玩到10:30PM先返房休息... 太好瞓, 第二朝未夠9AM就自然醒...

 Check-in時職員教路, 我入樂園玩前, 可以免費寄存行李係迪士尼好萊塢酒店, 缺點係玩完要過來拎返... 但樂園入口寄存行李就要收費... 咁... 我緊係選擇免費寄存行李係迪士尼好萊塢酒店啦...

4 則留言: