網頁清單

2013年11月14日 星期四

PizzaExpress : 面膜水貨客分贓緊急晚宴

5 November 2013, Tuesday

又 PizzaExpress ?!! 唔係9月尾先食過咩?!!

係... 不過E4吹雞開八婆會, 吖, 唔係, 其實重點係水貨客在 Gmarket 訂了面膜急於分贓, 哈哈...

咁為咗就近水貨客, 係apm食最理想... 咁朋友想食PizzaExpress 或 Pokka Cafe, 2間我都經常食, 對我來講揀邊間都冇分別, 就由得朋友決定啦...

特別鳴謝水貨客及大戶將Cutie到不得之了的贈品朱古力化妝袋送給我, You're so sweeeeeeeet!!!




呢度裝修都幾靚, 而且仲有特大橢圓形梳化, 我地坐果張是圓形的, 好舒服哦... 嘆嘆...


落單前問清楚有咩優惠, 我9月尾申請的會員卡仲未收到, 服務生話冇卡冇得儲分, 好絕情哦... 服務生話有Citibank卡或唔記得咩卡有9折仲抵啦... 好, 我地有!!! (1星期後的今天終於收到會員卡了)

由於只可以逗留90分鐘, 7:00PM入座, 8:30PM要交枱, 都好趕下, 水貨客仲話想竄出去工廠區買手機電, 我即時阻止佢, 理據係佢竄返來時都冇咗一半時間... 服務生話唔會趕人走, 到頭來咪又...

時間緊迫, 急急選了4人餐... 張單比龍媽拎咗去Redeem Free Car Park, 網站又冇咗套餐的餐單, 總之我地埋單簽卡就$510鬆少少, 已包括9折及餐飲附加費(3杯紅莓汁+1杯多檸走冰Unlimited Refill凍檸檬茶)... 4個人夾, 都抵啦...

"PizzaExpress"布斯加達麵包 (蕃茄、紅洋葱、蒜蓉、香草汁)
-- 點解4人餐得3件?!! 問咗講英語的服務生, 佢又搵個講廣東話的服務生來, 個妹妹好好人咁話個套餐咁包3件, 但可送多1個比我地, 咁正常人都估比多1件總共4件啦, 點知, 佢竟然比多3件, 佢口中的1個=3件!!! 噢... 太讚啦!!! 超級驚喜!!!
麵包厚厚的, 口感又香又鬆軟, 蕃茄好清新, 香草汁好滋味!!!


蒜蓉包
-- 口味像白薄餅, 沒有任何配料, 外圍烘得脆脆的, 帶點焦香, 蒜蓉味適中, 濃淡得宜...


紅菜頭沙律 (紅菜頭、意大利藍芝士、菠菜葉、火箭菜、合桃、黑醋沙律汁)
-- 很新鮮的紅菜頭及火箭菜, 意大利藍芝士不是人人接受得了, 口感怪怪的, 朋友倒了太多黑醋沙律汁, 好酸呀!!!


蔬菜芝士薄餅 (蘆筍、烤洋薊、蘑菇、燈籠椒、車厘茄、橄欖、蒜蓉、香草汁)
-- 好正的素Pizza, 色彩豐富, 酸酸的蕃茄醬餅底, 加上香草汁, 味道一點也不寡, 吃完1件又1件...


香辣蒜蓉意粉 (蒜蓉、辣椒、蕃茜、特純橄欖油)
-- 好多紅色點點, 好辣呀!!! 但食落又好惹味, 夾了1注想再夾時碟已清...


朱古力蛋糕配 XTC 雲呢拿雪糕
-- 朱古力蛋糕不太甜, 朱古力味不太濃, 我是朱古力怪, 可能你會覺得朱古力味爆燈, 因為朋友們讚好味... XTC 雲呢拿雪糕是有雲呢拿籽(黑色點點)的呀, 天然的雲呢拿真係好香, 正!!!


甜品拼盤 (芝士蛋糕、意式芝士餅、焗麵包球配朱古力榛子醬)
-- 朱古力榛子醬係我玩完東歐咳咗2個月的元兇, 因為自助早餐時日日勁食!!! 芝士蛋糕唔係我杯茶, 意式芝士餅已不再是10年前的PizzaExpress Tiramisu...


味道中規中矩, 環境舒適, 服務很好, 價錢公道, 儘管只能吃1.5小時, 還是覺得抵吃...

話明開八婆會, 緊係唔可以就咁打道回府啦... 轉場去Food Court買杯Happy Lemon繼續八卦!!!

是次每人消費約 $130 元
味道: 3 環境: 4 服務: 5 衛生: 4 抵食: 5
###
地址 : 觀塘觀塘道418號創紀之城五期(apm)1樓L1-1號舖
電話 : 2389 1916

2 則留言:

  1. 我都鐘意食pizza express, 佢 d pizza 真係好味
    有機會你試下响11st 到訂野呀, 買滿只定金額free shipping 的, 所以我覺得好抵, 不過free shipping only 1st time.. but u can use another account in order to have such offer.

    回覆刪除
    回覆
    1. wakakaka... 次次訂都開新戶口, Little Ting Ting好醒目呀!!!

      刪除