網頁清單

2013年6月13日 星期四

澳洲「野生探索」のSeaLion Baby十萬伏特電眼 (袋鼠島上集)




18 March 2013, Monday

Min 13oC, Max 27oC, Mostly Sunny, Warm

是日溫差一再擴大, 單日14度, 明日溫差最大, 有15度...

原本今日應該係去Barossa Valley嘅酒莊一天團, 不過朋友出發前又臨時改變主意, 轉o黎袋鼠島... 出發前係網上搜尋咗數個Day Tour, 最後發現只有Sealink係最平, 其他Agency如Grayline都要貴AU$2, 估計Sealink係獨市的, 其他Agency只是代售... 其實都幾驚朋友臨飛又再改變主意, 皆因個Day Tour一定要預先付款, 如果我比晒錢之後佢先又話要改, 我真係血本無歸...

Kangaroo Island Highlights Day Tour 團費貴得驚人!!! 大人AU$258 (約HK$2050) 小童AU$168 (約HK$1350), 1天本地團的費用, 夠參加坐飛機來回住3晚酒店的4天台灣團!!! 都只係講緊坐Cruise來回, 如果Cruise往飛機返, 大人更要AU$424  (約HK$3400) 小童AU$352 (約HK$2800), 係咪聽吓都想暈先... 

不過咁, 袋鼠島有5個香港島咁大, 只有600個市民, 團費之所以貴, 係因為保育經費非常龐大...

尋晚10PM已經瞓, 不過瞓得唔係幾腍... 今朝06:10AM已經係酒店門外等候... 有個外籍Aunt話我地架巴士已經走咗!!! 唔係呀嘛?!! 我地已經早咗10分鐘出o黎o架啦喎!!! 驚到半死, 走去問酒店接待員, 佢好肯定咁話巴士06:20AM會來... 出去酒店門口等多一陣, 架巴士到啦, 車身冇Logo的...

去到中央巴士站, 見到另一架車身印有Kangaroo Island Logo的巴士, 相信頭先外籍Aunt所講走咗的巴士應該係呢一架...

06:45AM 從Adelaide Central Bus Station出發... 係時候唱首歌先... ♫去旅行... ♪搭車又搭船... ♪好暈呀... ♪快食保X丸... ♫



09:00AM 到達Cape Jervis, 坐(飛機以外)唯一的公共交通工具Sealink雙體船去袋鼠島的Penneshaw... 船上超凍, 我地要著薄羽絨外套... 我地當咗小學秋季旅行咁, 帶埋尋晚係Woolworths買的麵包及香蕉上船當早餐食, 麵包好好味, 香蕉最後都冇食到...


由於袋鼠島位置偏遠, 與世隔離, 包括許多害蟲和疾病, 為了保護袋鼠島, 請注意, 遊客是不可以將以下物品帶到島上: -
1) 蜜蜂, 蜜蜂處理設備和蜂蜜製品
2) 薯仔
3) 狐狸, 兔子和雜草

10:00AM 搭車又搭船4個鐘後, 正式展開旅程?!! No!!! 只係另一程巴士的開始... 下船時真的有點混亂, 幸好有位黑人女士見到我的迷路樣, 與我搭訕, 指示巴士在旅客中心背部, Thank you... 執相時先發現Honey落船時影咗張相, 原來指示非常清晰, 建築物左邊好大個箭咀指去右邊架旅遊巴度, 唯一解釋係當時人太多...


登車時, 工作人員同我講留咗位比我地, 係左手邊, 我仲誤會好似旅行團咁全架車劃晒位, 原來唔係, 原來全架車只有我地一組人有Reserved Seats, 嘩!!! 好尊貴呀!!! 我估因為全車得1個小朋友, 所以留咗3排都幾前的位置比我地, 上落車超方便!!! 好貼心呀!!!


On the way司機兼導遊Robert叫我地望吓樹林中的枯草叢中, 有一大堆袋鼠, 說時遲那時快, 急忙中舉起相機, 一切已太遲... 相機都未開著, 已離袋鼠而去... 之後整日都冇見過Lu... 打破咗之前網友所講嘅"袋鼠島冇袋鼠"嘅謠傳... 沿路不時見到路旁有完整的袋鼠骸骨, 相信死了很久...

剛才坐船船身兩邊浪吓浪吓, 加上係袋鼠島大部分都係泥路, 車身非常之CHOK, 我出發前食咗暈浪丸所以好好瞓, 可憐小朋友亳無準備加上年紀尚小, 開始覺得唔舒服, 扭計要落車, 好彩扭咗半個鐘, 都未嘔出o黎... 妹妹, 比10個叻你~

11:30AM 又坐多個半鐘巴士, 到達Seal Bay Conservation Park... 由朝早06:20AM開始坐車坐船坐車, 咩都未做過就已經冇咗5粒鐘...


海豹灣自然保護公園遊客中心內擺放了各種在海豹灣附近找到的海洋生物的皮革或骨骼, 讓遊客觸摸, 感受一下海洋生物的各種形態, 包括海獅的主要食物墨魚, 被食剩吐出來的骨(白色一大片)...


Beach Walk只可以係Seal Bay中心的導遊帶領之下進行... 另有不需導遊帶領的Broadwalk可供選擇...


一行數十人向著Seal Bay一步一步邁進...


第一樣見到的... 嘩!!! Kawaii)))))) 好可愛嘅海獅BB呀!!! OMG!!! 想殺死人咩?!! 生得咁鬼可愛!!! 仲得意過卡通公仔呀!!! 海獅BB見到咁多人, 表現得非常好奇, 望吓左又望吓右, 不停眨動佢嘅Blink Blink眼, 噢!!! 我比佢電到暈喇, 開始腳步浮浮...


仲學人咪起對眼放生電, 問你死未~ SeaLion Baby使出的「超強十萬伏特」電眼, Angela Baby都冇得揮...


繼續向前行, 海邊大風到呢... 雙手舉起相機, 對手都比風吹郁幾cm, 誇唔誇先...


一落到沙灘, 竟然有隻海獅企停停係樓梯底度等我, 當時係零距離, 我只要伸直隻手就可以觸摸到佢, 當然我知道唔可以咁做, 我舉起相機, 企係佢身旁的管理員好細聲咁講咗2次"Too Close", 我唯有無聲地退後幾步, 先舉起相機影低咁歷史性的一刻... 之後管理員解釋返, 海獅會突然高速衝落海, 我地企得太近的話, 會有危險, 係我地會有危險, 唔係海獅...


我地要同海獅保持一定的距離, 只可以企成一條直線近距離觀察... 隔成十幾個身位都算近距離?!! 哈哈, 算最近o架啦, 我已經非常非常滿足!!! 人生至此, 夫復何求?!!


Ken & Merry與海獅ABC合照...


點解佢地唔係叫海豬呢?!! 你睇佢地幾懶... 哈哈, 其實呢, 佢地已經出海搵食3日3夜, 所以返上沙灘後要好好休息, 養足體力再出海繼續為口奔馳... 大家要靜靜地觀賞, 切勿打擾...






根據遊客中心的資訊, Seal Bay有1000多隻野生澳洲灰海獅聚居, 係最稀有的海獅之一, 全世界只剩14700隻, 大約有12500隻係南澳沿海生活, 其餘2200隻就係西澳海岸線棲息... 大多數海獅一生都會係Seal Bay生活, 繁殖, 直至死亡... 每年6月為交配期, 每產3隻幼海獅, 只有1隻可以存活, 壯健的海獅壽命可長達20年以上, 以捕食魷魚、章魚、鱗魚及甲殼類海洋生物為主...

在沙灘上逗留了15分鐘左右, 便要依依不捨地返回觀賞台, 除鞋一睇, 成對鞋都係沙!!!!!! 當場倒咗8-9成, 之後每日都倒, 返來香港後又再倒咗幾個月, 都不時仲有餘黨出沒, 幸好d沙真係超超超超超幼滑, 基本上感覺唔到佢嘅存在... 難怪隻隻海獅係沙灘上面都瞓到死獅咁啦...


返到香港執相, 先發現Honey影咗張"02照", 有位紅衣女子係矮樹叢中扮海獅, 驚嚇度80!!!


遊客中心外擺放了世界上最大嘅齒鯨--抺香鯨(Sperm whale)的上顎, So Big... 咁珍貴的物品, 就咁掉係地下, 無遮無掩, 日曬雨淋, 那怕你被侵蝕, 大把貨, 澳洲人, 受到上天的厚待, 的確豪得起...


♫ 太陽出來了 ♪ 雪人溶化了♫ 溫度開始上升, 薄羽絨外套可以收埋... 又再開始30分鐘巴士旅程, 下一站, Vivonne Bay Bistro!!!

1:00PM 肚仔餓, 唔使怕...


自助餐, 任飲任食, 正!!! 不過話實, d路咁崎嶇不平, 架巴士全程顛簸行駛, 都驚食得太飽再拋幾拋真係會嘔出o黎, 所以只係食少少就算喇...


沙律全部勁勁勁新鮮, 西瓜甜甜甜到暈, 乾蕃茄Pasta都Very Nice.. 坐完長途機, 住完1晚酒店, 個人Dry到爆, 食到咁鮮甜多汁的蔬菜, 猶如久旱逢甘露, 即時成個人醒晒...


擦掉美味沙律, 咬一啖腸仔, 由天堂掉落地獄, 藥散味, Two Two Two... 烤雞肉質鞋鞋地, 但味道OK的, 應該係話泰式雞醬的酸甜味道OK...


蘋果批味道真係Very Nice, 出自一位最憎食Apple Pie的人的口, 應該非常有說服力, 佢唔同平時笠黐黐腍Pat Pat的傳統蘋果批, 酥香鬆軟, I'm loving it~


由於要繼續趕路, Lunch只有30分鐘時間... 團費只包午餐, 晚餐就要自己係船上搞掂...

待續... 澳洲「野生探索」の南澳絕世筍工辦公處 (袋鼠島下集) http://blog.yahoo.com/ken-merry/articles/1441101/index
~~~ 相關網址 ~~~

SeaLink - Kangaroo Island, South Australia
www.sealink.com.au



位於南澳的袋鼠島, 長155公里, 540公里的海岸線, 佔地約4500平方公里, 是澳洲的第三大島, 僅次於Tasmania and Melville Islands... 島上超過三分之一的面積是國家公園和保護區, 四處可見到天堂袋鼠, 小袋鼠, 負鼠, 蛙, 袋狸, 樹熊, 鴨嘴獸, 海獅和毛皮海豹, 在海灘、過馬路或住宿附近都會遇到野生動物, 被譽為“沒有圍欄的動物園”...

建議最至少入住3晚, 住5-7晚就更好, 1天團實在是走走走馬看花!!!

~~~ 相關網址 ~~~

在2007年的國家地理雜誌, 被評為亞太地區最佳度假島嶼, 調查選取的全世界111個島嶼評選中, 袋鼠島名列第七位, 排名超過了歷來被認為是度假勝地的夏威夷群島, 綠島, 塔斯馬尼亞島, 馬爾代夫和費沙島... 由522名專家組成的委員會對參選島嶼的旅遊狀況和環境保護等方面進行了比較, 評委們對袋鼠島的評價是「保存著最原始質樸的環境, 未被文明腐蝕的旅遊勝地」, 當時的南澳州長Mike Rann說「就像著名的厄瓜多爾的加拉帕格斯群島, 袋鼠島一直被海外遊客認為是接近土著野生動物和深切體驗自然與生命魅力的旅遊勝地, 證明袋鼠島在發展可持續的生態旅遊方面取得了成功, 與世界級的美食和品酒相結合, 袋鼠島使遊客們能夠享受非凡的度假經歷」
[調查資料來源  http://www.aubest.com/big5/news/2007-11/07-11-2-2.html]


~~~ 後記 (6月20日) ~~~

回港後玩了South Australian Tourism Commission (Hong Kong) 南澳州旅遊局在Facebook專頁(www.facebook.com/AdelaideSouthAustralia.HK)的遊戲--“投選「最喜愛的南澳一刻」照片”, 6月14日掀盎, 我竟然有幸成為10位幸運兒之1, 贏得可愛限量海獅公仔!!!


WoW, 超興奮!!! 時間剛好係呢篇Blog成為Yahoo!今日人氣話題的2天前, 簡直雙囍臨門, 今日急不及待去拎, 再影埋合成照同大家分享!!!



澳洲「野生探索」2013 の 總匯 http://www.kenmerry.com/2014/07/2013.html


12 則留言:

  1. 恭喜你成為今期精選:)我都好鍾意呢篇^^
    [版主回覆06/19/2013 23:42:52]Thank you so much~ 我自己都好鐘意!!! 我都恭喜你長期成為人氣精選!!!

    回覆刪除
  2. SeaLion Baby好攪笑呀,勁可愛!
    [版主回覆06/19/2013 23:46:06]一見到佢, 即刻將5粒鐘的坐車坐船苦楚拋諸腦後

    回覆刪除
  3. Kangaroo Island 真係好正,係島上所種既蔬果係最靚最貴架~~~
    [版主回覆06/19/2013 23:46:49]同意, 絕對係最新鮮~

    回覆刪除
  4. 噢!地利 Oh!tria2013年6月19日 下午3:13

    SeaLion Baby太Q la.
    [版主回覆06/19/2013 23:47:49]Yeah, 就算冇暈船浪暈車浪都好, 一見到佢都暈晒浪~

    回覆刪除
  5. 海獅BB真係好得意~
    [版主回覆06/19/2013 23:50:12]Yes, 真係唔想佢長大, 長大咗之後, 就好像果班海獅佬咁笪晒係沙灘上面~

    回覆刪除
  6. so cute and innocent!
    [版主回覆06/22/2013 01:02:33]對任何新事物都非常好奇 :)

    回覆刪除
  7. 好想摸下海獅BB佢地呀!!! 佢大約幾大隻?!
    [版主回覆06/22/2013 01:04:06]我都好想摸, 不過唔可以呢, 眼看手勿動呀... 應該長60CM左右 :)

    回覆刪除
  8. 海獅真的很可愛
    有機會都好想去下袋鼠島
    [版主回覆06/22/2013 01:04:53]一生總要豪一次, 袋鼠島係你嘅必然選擇

    回覆刪除
  9. 放電般的小海獅好得意呀 !
    [版主回覆06/22/2013 01:05:15]迷C人

    回覆刪除
  10. 真的好開心, 我原全 感受到你的 興奮呀...
    有機會去澳洲, 我也想去, 請問 近 那一個 省呢.?
    [版主回覆06/23/2013 00:48:11]事隔3個幾月, 仍然興奮
    [版主回覆06/23/2013 00:47:42]南澳首府阿得萊德(Adelaide)

    回覆刪除
  11. 早晨!拾幾年前去過一次,好似無乜改變,果時澳元7仟蚊就可以在袋鼠島買到一間好大嘅屋喇!
    多謝分享!
    [版主回覆06/27/2013 12:19:37]WoW... 好羨慕呀!!!
    [Flora回覆06/27/2013 11:33:44]我響阿德萊德住過拾幾年架!
    [版主回覆06/23/2013 23:51:14]嘩!!!!!! 咁抵?!!

    回覆刪除
  12. 真係可愛到暈
    [版主回覆06/29/2013 21:21:32]現場睇好震撼人心, 勁想尖叫~

    回覆刪除