網頁清單

2012年11月12日 星期一

三木韓國料理 Sam Mok Korean Restaurant : 果然海鮮

9 November 2012, Friday

仲以為11月之星壽宴要等到12月先有得食添, 點知... KaKaMa朝早只係問一問大家邊日方便, 居然即晚齊人出席賀壽, 又會快到咁嘅?!! 原來食飯真係要講即興!!!

有網民提過呢間三木嘅Minimum Charge同交枱時限係海鮮價, 咁神奇?!! 今晚一試, 果然海鮮!!!

Book咗7點, 龍媽6點半已到, 職員好唔客氣咁話要人齊先入得, 又叫佢自己入去搵吓我地到咗未, 又話我地冇Book位, 之後都冇人理佢... 到我來到時, 職員又話唔人齊入都得, 不過燒烤個半鐘交枱, 唔燒烤1個鐘交枱... 結果出奇地, 我地未夠7點已經齊人, 準時到呢... 勁!!!

好, 人齊喇, 殺入去!!!

其實餐廳入面得1-2枱客, 都唔明, 早少少放我地入去會蝕咩... 環境都幾新淨光猛... 我地呢張係6人卡位, 5個人都坐得幾舒服...

我地呢班餓鬼瘋狂落單之後, 又冇咗Minimum Charge同埋交枱時限啦喎, 仲唔係海鮮價?!! 即係話, 人均消費夠高就可以食耐d, 人均消費唔夠高就要限呢樣限果樣...

前菜
-- 有8碟之多, 碟碟都幾有水準... 麵豉薯仔又香又甜又粉, 最好食... 麻辣蒟蒻好特別, 第一次食, QQ彈牙, 麻香帶辣... 煎餅同炒粉絲都係高成本之作, 現在已很少有...
 
烤什錦牛肉 $420
-- 烤什錦牛肉包括牛肋骨肉、薄切西冷、牛舌... 牛肋骨肉質柔軟, 醃料微甜, 未有掩蓋牛肉的鮮, 肉汁多d會更好... 牛舌爽彈... 薄切西冷沒有牛肋骨的甜, 但牛味亦濃... 整體都算唔錯, 不過大家都係覺得韓松嘅牛肋骨好味d...


因上菜速度奇快, 我地顧住食前菜, 炒粉絲、炒年糕、煎泡菜餅一湧而上, 顧得熟嘅又顧唔到生嘅, 所以服務員剪完牛肋骨肉就順手幫我地放落個爐度烤, 真係唔該晒... 食到呢度, 大家都醒起係錦城果次比阿珠媽鬧嘅事件, 詳情可瀏覽韓國錦城飯店 http://blog.yahoo.com/ken-merry/articles/80066

嘻嘻... 唔知點解, 今餐我又唔係壽星, 居然可以食到殘廢餐, KaKaMa, 辛苦晒~


韓式炒粉絲  $120
-- 味道都唔錯, 炒得好香, 味道好均勻, 好多牛肉, 好足料...

炒年糕 $120
-- 冇被汁浸住的年糕微辣, 浸住的好辣, 鑽媽以為係茄汁, 大大啖咁食, 大叫好辣, 哈哈... 年糕軟腍不彈牙, 但係口感都OK嘅... 好鍾意豆腐皮, 大大片, 幾有咬口...

煎泡菜餅 $100
-- 張枱已經擺到滿晒, 1個服務員仲幫我地烤緊肉, 另1個服務員建議幫我地係第2張枱分好個煎泡菜餅, 所以未有影到全相... 煎餅又香又薄又脆, 泡菜好惹味, 蘸少少辣椒豉油, 好味呀!!!

煎泡菜餅嘅顏色之所以咁奇怪, 係拜窗外面嘅霓虹燈招牌所賜...


海鮮煎蔥餅 $100
-- 食完煎泡菜餅, 一向練仙嘅鑽媽居然話要叫多1個煎餅, 嘩, 真係估你唔到... 結果我地又叫多1個海鮮煎餅, 呢個厚身d, 腍d, 有d腥, 冇鮮味... 我鍾意煎泡菜餅多d...

辣海鮮鍋 $380
-- 嘩!!! 好大條八爪魚呀!!! 唔知邊個問個服務員, 條八爪魚唔郁嘅?!! 見到服務員想笑又唔敢笑, 答佢話"係呀, 我地呢度d八爪魚係唔郁o架", 我笑咗囉...


貓兄驚我唔受得辣, 所以要求辣醬另上, Thank you呀!!! 未落辣醬前, 飲咗啖湯, 超鮮甜呀, 仲好重蟹味, 好正!!! 反而加咗辣醬之後, 剩係得個辣字, 失色好多...

感謝KaKaMa主動幫我夾起隻八爪魚比我影相... 亦感謝貓兄主動幫我夾起片烤肉比我影相... 有你地嘅支持, 我可以影得更輕鬆啦...

個鍋入面有好多材料, 除咗八爪魚, 仲有蝦、帶子、魷魚、魚、蟹、豆腐、金菇、蔥、黃芽白, 好豐富!!! 蟹肉好霉, 蟹身黑忟忟... 豆腐唔滑... 帶子縮水後好細粒... 魷魚鮮味彈牙...
 
後面張枱全程超嘈, 嘈到卡位塊木板都震埋, 全場至嘈, 我地好大聲咁講o野都聽唔到, 喉嚨都痛埋, 根本傾唔到計!!!

食完冇糖水/茶送, 冇生果送, 冇香口膠/香口珠送, 百無!!!

唯有轉場去The One食乳酪, 先可以真真正正傾一陣計...

5個人埋單唔使千五蚊, 比想像中抵食, 味道中上, 服務係入席前差d, 之後都幾OK, 座位都相當舒適, 係嘈d囉... 韓國菜o黎講, 都係一個唔錯嘅選擇...

是次每人消費約 $270 元
味道: 4 環境: 3 服務: 3 衛生: 3 抵食: 3
###
地址 : 尖沙咀堪富利士道12-16號宏貿發展大廈2樓
電話 : 2721 8970

沒有留言:

張貼留言