Ken & Merry 為食男女，遊走世界!!!

2007年2月17日星期六

維園花市

今日(2007年2月16日)收5點，去天后食完少少嘢當晚餐，跟住去維園行花市。由7點行到8點幾，唸住食飯時間冇咁多人，結果都係好多人。行完再去天后會honey友人，飲啖茶，唱陣水，然後先打道回府！

今日lunch麥兜兜(仲讀緊幼稚園)打電話比我，講咗十幾廿個揮春四字詞，我要收線時佢先問我會買d乜嘢新年禮物比佢，見佢咁努力(講祝賀句)，所以我咪係花市度係咁意買d小禮物比佢囉，希望佢鐘意喇！

2007年2月14日星期三

Pizza Express San Marzano

今朝(2007年2月14日)一返到公司，d同事古古怪怪咁陰陰嘴笑，返埋位發現原來已有束花放在桌上，怪唔得佢地咁嘅表情喇！Honey唔會年年買花，不過佢話今年係10週年，所以一停要買花喎。係我最鐘意嘅白玫瑰加紫色包裝，好靚呀，Thank You！

而我送比honey嘅就係一頓美味嘅情人節晚餐。之前同事C多次強烈推介呢間餐廳，雖然日日放工都會路過，但始終冇衝動入去試試。前日問honey去呢間好唔好，佢好興奮咁答好，昨天打電話去book位，但8-10pm已full，唯有book 6-8pm喇！所以今日放工要"拿拿聲"趕去，坐低先發現留咗部手機係公司，激死！

情人節套餐包括2杯餐前酒、2份Starter、2份Main Course、2份Dessert。

Starter#1--Baked Mushrooms(蘑菇--我唔食得；小麵包--好好味呵！)
Starter#2--Caprese(d菜好新鮮，仲配埋我至愛嘅mozzarella同沙律汁--正！)
Main Course#1--Pollo ad Astra(雞胸pizza好好味，食咗3分1已經食唔落，打包聽晚再嘆過！)
Main Course#2--Cannelloni(菠菜pasta卷配tomato醬--一流！)
Dessert#1--Tiramisu(跟足傳統做法--滿分！)
Dessert#2--Chocolate Fudge Cake(比個樣嚇一跳，但食落暖暖地又唔太甜，都幾好味！)

餐廳內9成係情侶，由於大家都輕聲私語，所以環境很優靜。待應都好nice，d客叫他們幫手拍照留念，佢地都好樂意。而使用這裡的洗手間更是一種享受。honey同我都認為『可以再來』！

地址: 側魚涌太古城高安閣G517號舖
電話: 3150-8800
www.pizzaexpress.com.hk

2007年2月11日星期日

粵全食

請問大家覺得相中食物似唔似生蠔呀？嘻嘻，其實係茄子呢o架！

上次去天后揾『別的鍋』嘅時候，無意中發現隔離有間『粵全食』，所以今日(2007年2月11日)lunch同honey特登去試下。

我地點咗：-
. 話梅涼瓜
. 蒸茄子夾
. 梅菜肉崧砵仔飯
. 糯香排骨
. XO醬煎蝦米腸

食物很有創意，外表特別，味道又好，質數很高--我地會再去。裝修都唔錯，環境又清淨，服務又認真，不過得嗰3枱人，唔知點解上菜上到好似食西餐咁，食完一味第二味先上。

正想埋單，待應無端端捧上一盆生菓，唔係呀嘛，咁大盆生菓要收幾多錢呀？再睇真d張order紙，右下角原來印咗『餐後(送)健康生菓盤』，呵呵、、、咁又幾正喎！

冰震生菓盤包括紅毛丹、2隻黃帝蕉、枇杷芒、數粒黄色蕃茄仔、數粒紅色蕃茄仔、黑布冧、仲有數粒綠色不知名物體。

我最鐘意係個盆，好靚呀！

地址: 銅鑼灣天后清風街5-7號
電話: 2111 4149

永別了--貓貓篋

昨天(2007年2月10)真是晴天霹靂的日子！

上次去Bangkok時，嗰旅行喼爆咗碌之後，我一直四出尋找維修服務，可惜一直都揾唔到！

尋日同貓頭夫人及KaKaMa係Marco Polo Prince食完Tea Buffet之後，返咗TKS同honey會合。跟住係WingOn見到佢有得買新款嗰隻貓貓喼(隻hello kitty係向你單眼嘅)，咁咪試吓問佢有冇得維修囉，跟住sales姐姐好好人，比咗張咭片我，叫我打去問吓。

離開間鋪後，我忍唔住即刻打去問下。點知、、、

電話裡面嗰位妹妹大約說了：『買咗幾耐？』『唔、、、隻hello kitty係咪單眼o架？』『吓，唔係單眼嗰款呀，冇得整o架喇，冇零件o架喇』『你攞個舊喼嚟trade-in，新款嗰喼可以半價』等等。收綫後，我返回之前間shop睇睇，HK$11xx拆實HK$7xx(攞去九龍站trade-in咪都要$600，咪玩喇)，冇360度4碌設計，大家都係cabin size但係新款仲細過用開嗰款，隻色又核突，隻貓又醜樣，總之冇樣好，最後當然冇買到喇！

唔係冇錢買過個新嘅，但係真係唔捨得呢個舊嘅！佢跟住我征戰沙場無數--福岡、關島、漢城、北海道、星加坡、愛爾蘭、巴黎、台北、曼谷、、、載過無數戰利品回來，知道佢冇得救嗰一刻，心情真係好沉重。嗚嗚嗚嗚、、、我唔制呀、、、

開始投入服務--Fukuoka--1998年10月1日

告別戰--Bangkok--December 2006

2007年1月30日星期二

抺窗風波

今朝(2007年1月30日)一早起身，極速梳洗，準時9點正坐定定等清潔公司嚟抺窗。

等到9點25分，仲未有人到，唔係呀嘛！打個電話去清潔公司問吓，佢反問我：『仲未到咩？我今朝8點已經見到佢地個囉噃！』

收咗綫5分鐘，就有兩個金毛青少年到來，剎氣好重，搞到我驚到唔比honey返工，迫佢留係度陪我。

兩位少年用咗個半鐘就話已經抺完全屋嘅窗，經我檢查之後，發現有3個窗根本冇抹過，而其他窗大部分竟然仍然係鋪滿漬，同冇抹過冇分別，佢地仲死撐話呢d係“魚鱗漬，抹唔到過喎...”，我即時打去清潔公司問過究竟... 結果係... 之前抹開嗰位人兄自己過嚟睇睇。等到12點半，終於到達，佢向我講解一輪後，就攞支藍色嘅水出嚟話係抹窗專用嘅葯水 ...

最後都抹乾淨晒，但係就要請多半日假清理現場--因為以前嗰位人兄會移開晒窗台d什物先開始抺窗，抺完窗又會抹乾淨晒d地方，再放番d什物去窗台，好好服務；但嗰兩個金毛居然乜都冇移開，仲又坐又踏我盒紙巾嚟抹窗，又整爛咗成個百葉窗都唔出聲，搞到d地方污糟邋遢之後就更加冇抹番乾淨，你話有冇搞錯。清潔完之後見3點幾，咪順手擦晒d鞋，唉、、、辛苦過返工！

係嗰位人兄到達前，我上internet揾過關於"魚鱗漬"嘅資料，但完全揾唔到！只找到"...清除窗的水漬可用藍威宝..."之類，嗰位人兄攞住嗰支抹窗專用嘅藍色葯水究竟係咪...

等待期間更聽到兩個金毛青年喁喁細語"...唔係呀，即刻投訴..."，唉，我點可能唔打電話問清楚呀。之後擔心他們會跌落街而望兩眼--卻遭惡睥，唉，比錢人抺窗都攪成咁，我以後都唔會再揾人抹窗！

後記：

何超問(1)如果唔滿意，咁點算？(2)咁早抹，到新年都污糟邋遢喇，點解唔遲d抹呀？

其實呢間清潔公司唔係咁差嘅，如果唔係我點會用咗咁多年呢。
1) 抺窗服務係抹完滿意才付款的；
2) 因為2月1號到農曆新年期間會加價，所以我貪小便宜揀咗1月尾抹囉，嘻嘻。

2007年1月3日星期三

泰梳乎2006--豬仔團

做完spa，check-out埋，Half Day Tour的導遊已在lobby等待兩隻懞然不知的小肥豬喇！

為何會join "Half Day Tour"？大家可記得我提及機場Arrival的Tour Service Counter呢？那位笑容滿面的肥大嬸，派完地圖後不停sell我哋，又話有專車在lobby等你、一個司機加一個導遊、行李可放在車上、參觀完一個又一個景點後、還可以車你到機場、而且還是promotion price來的哦、是旅遊局sponsor的哦、、、咁多優點，點會唔上當！

女導遊妹妹的英文很好，在車上講了很多泰國的風土人情、宗教、文化、發展、等等。

景點一：

忘記了這佛寺是什麼名堂了，只記得右下角的佛像是很有紀念價值的。
女導遊妹妹說很想學好普通話，可以接待一巴士滿滿的內地遊客，當時我們還不以為言呢、、、