網頁清單

2011年12月20日 星期二

玉桃軒酒家 The Graces Restaurant


15 December 2011, Thursday


康怡廣場北座大變身!!!

同一時間執咗3間食肆, 一心諗住開番3間... 點知... 居然拆散做7間定8間, 利害!!! 第時可以多D選擇啦(如果好食嘅話)...

我一向嘅搵食格言係"開唔夠2個月嘅食肆, 千祈唔好幫襯住"...

不過今日都係忍唔住幫襯咗開咗2個星期左右嘅「玉桃軒 (The Graces Restaurant)」, 諗住都係食點心啫, 應該都係Outsource咗o架啦...

餐廳入口都幾寬敞...


一坐低, 聽到3位年輕服務員嘅交談... 服務員A & 服務員B 同服務員C講"不如你試吓開茶"...

吓... 試吓開茶?!! 開茶都未試過?!! 服務員C你返呢間餐廳總共返咗幾多分鐘呀?!!

好恐怖咩?!! 未算... 

南瓜雞絲滑腸粉--都幾特別嘅腸粉... 知唔知佢除咗個餡嘅組合特別之外, 連D味都好特別!!! 係特別在... 淡而無味!!! (最後係明明食唔飽都食剩晒)


家鄉潮州粉果--一放低, 嘩!!! 好細粒!!! 都算... 一放入口, 嘩!!! 好粉!!! 漿實晒個口!!! 差D透唔到氣!!! 仲要唔好味... 點搞o架...


懷舊千層糕(廚師推介)--正面個樣幾吸引, 背面真係嚇死人!!! 大家拉落少少睇吓下一張相, 包你唔想放入口!!! 放咗入口都唔想再食第2啖, 因為都係冇味, 仲有D乾硬!!!




擂沙煎堆仔(廚師推介)--個樣都幾正常, D芝麻餡味道都OK, 但係, 一咬落去...


前面都未咬開, D汁係後面噴晒出o黎!!! 噴到我成部iPhone 4S都係呀!!! 呀!!!!!!!!!!!! (想死-ing)



所有食物一放低好快就凍晒, 連壺茶都未熱過...

11:45AM前埋單有早茶優惠75折... 折咗都98蚊... 嘩!!! 又貴又難食!!! 我返番去太古坊鴻星食好過喇!!!

是次每人消費約$50元
味道: 1  環境: 4 服務: 3 衛生: 3 抵食: 2
###
地址 : 鰂魚涌康山道1號康怡廣場北座M樓1號鋪
電話 : 2513-9107

2011年12月19日 星期一

快船廊 Clipper Lounge

10 December 2011, Saturday
早前9月之星曾經發起去文華東方酒店「快船廊 (Clipper Lounge)」嘆Afternoon Tea Buffet, 不過因為朋友們嘅小朋友好多星期六都要上Playgroup或者興趣班, 所以就唔到時間而泡空...

今日難得Honey肯陪我去食甜品Buffet, 幾大都唔放過大好機會!!!

聽聞文華東方酒店嘅朱古力Buffet好正, 不過已經Promote完... 我地今次去食嘅主題係--Winter Wonderland Sweet Afternoon Tea Buffet!!! 臨近聖誕, 餐廳內都增添咗富節日氣氛嘅裝飾品...

居然有窗邊位比我地坐, 正呀!!!

Baked Clafoutis with Berries, Assortment Christmas Logs--一開波就拎咗個聖誕樹頭蛋糕食, 個餅底好鬆軟, 朱古力Cream唔太甜, 還可以... 第一次食法式莓果布丁, 絕對唔係我杯茶, 感覺有D似麵包布丁...



(左) Linzer Tart, American Chocolate Cake--Honey拎呢個源自奧地利蓮茲嘅Linzer Tart都幾好味,  餡係覆盆子果醬, 少少甜少少酸, 口感有D似蘋果批, 餅底好鬆化, 絕對值得一試!!! 白朱古力Cake上面果幾滴水滴令到件Cake好迷人, 點都要拎番o黎欣賞吓... (中間果件已經唔記得咗係咩)
(右) Bacon Quiche, Sausage Roll, Smoked Salmon Sandwich, York Ham Sandwich--呢碟係跟下午茶自助餐奉上嘅... 個蛋批都幾好味, 腸仔卷好好味, 三文治好快比Honey KO晒...


(左) Taste of the Legend 文華東方茶--久聞文華東方酒店壺茶好好飲... 之但係我覺得冇咩茶味, 會唔會係我唔識Order呢... 不過值得一讚係佢依然有個茶隔, 唔似上次
半島酒店High Tea咁, 連茶隔都冇...
(右) Yoghurt Panna Cotta with Blueberries, Pumpkin Creme Brulee--意大利奶凍我一向麻麻地, 佢都整得幾滑兼幾重奶味... 法式焦糖燉蛋都幾好味, 不過又話有南瓜嘅, 點解一D南瓜味都冇嘅...


Home-made scones with Rose Petal Jam & Clotted Cream--放耐咗先記得食, 已經濕濕地同涼涼地, 搽咗Clotted Cream味道都唔錯, 遲咗食真係浪費晒...


Square Dark Chocolate Truffles--呢位方型朱古力好好食呀!!! 香濃嘅朱古力味, 幼滑嘅軟心, 而且唔太甜, 真係好想Encore再Encore!!! 不過我都未試得晒所有Buffet Items就已經飽到唔郁得...


Chocolate Spoon--初時見到堆木匙羹亂咁放, 覺得好奇怪... 睇真D... 原來係朱古力o黎o架!!! 好"咔哇依"呀!!! 睇吓, 放落杯熱朱古力度, 真係會溶o架!!! 可惜實在太膩, 飲唔晒...


Chocolate Trifle, Baked Chocolate Mud Pie, Chocolate Truffle Cake--後面杯Trifle係傳統英式聖誕甜品, Creamy又香滑, 有D似朱古力Mousse... 左邊件美式Chocolate Mud Pie我已經放到最後先食, 食完真係食唔落其他o野, 壓到實一實嘅朱古力泥團, 如果有4份1 Portion就Perfect啦!!! 隔離件合桃拖肥蛋糕出奇地好食, D拖肥果陣焦香味真係令人一試傾心, 我最憎食拖肥都覺得佢好食果下勁呀嘛!!! 跟手中間件軟心朱古力蛋糕又係膩到爆, 雖然D朱古力味香到爆燈, 但係我呢個朱古力痴都甘拜下風, Sorry, 我太飽啦, 哽唔落啦,要食剩你啦...


Fresh Fruit, Chocolate Broken Blocks with Maxed Nuts--最後食番D生果消吓膩, D菠蘿應該改名做"超甜菠蘿", 好似"超甜粟米咁"... 左邊果2粒冇名堂嘅朱古力Ball先係全餐最好食, 連Honey食完都要叫我即刻試吓... 又香又濃又滑嘅朱古力, 包住大大粒夏威夷果仁, D朱古力嘅香味係個腦度打咗幾個圈先吞落喉嚨, 最最最可惜嘅係, 我地真係飽到想食多1粒都食唔落啦, 太遲發現啦!!!



好似仲有食其他o野, 不過唔記得影相...

張梳化雖然勁大, 可惜枱與枱之間嘅距離實在太近, 唔闊得過大X樂好多, 隔離講咩都聽到晒...

服務員好好人, 我雙手拎住部相機, 想搵人幫我地影張合照, 見到D人好忙咁藤o黎藤去, 我都未開聲, 佢就已經問我係咪想影相, 仲影咗3張先滿意... 係佢唔滿意頭2張, 唔係我地唔滿意...

老牌5星級酒店嘅High Tea+下午茶自助餐, 呢個價錢絕對係值得!!! 只係我同Honey自己唔掙氣, 唔記得帶齊4個胃去食多D多D再多D...
是次每人消費約$215元
味道: 5  環境: 5 服務: 5 衛生: 5 抵食: 5
###
地址 : 中環干諾道中5號香港文華東方酒店閣樓
電話 : 2825-4007

2011年12月14日 星期三

香港繽紛冬日節 Hong Kong WinterFest

10 December 2011, Saturday

今日去文華東方酒店嘆Afternoon Tea Buffet, 路過皇后像廣場, 見到「香港繽紛冬日節」已經開始咗, 雖然好似冇咩特別咁, 不過都影咗佢, 比各位BLOG友參考吓啦...

來來去去都係得幾棵聖誕樹, 散落係唔同角落, 比大家影吓相...


旋轉木馬唔係太大型, 仲好似要捐錢先可以坐... 我會選擇去DISNEYLAND坐囉...


 
### Tiffany & Co. 閃爍喜悅 冬日 愛 ###

2011年11月25日至2012年1月1日

Tiffany & Co. 延續傳統,於這個冬天繼續把愛傳遍每個角落,成為「香港繽紛冬日節」的一大亮點。一棵大聖誕樹將矗立於皇后像廣場之上,繽紛璀璨的裝飾為四周增添一份迷人魅力。您可與摯愛同坐旋轉木馬;與家人在樹下細聽聖誕佳音;或寄出寫上祝福的 Tiffany 明信片,傳播愛的訊息。

http://www.discoverhongkong.com/winterfest/tc/html/tiffany_treasures.jsp

2011年12月13日 星期二

紅月夜

10 December 2011, Saturday

我同Honey並唔係天文發燒友, 不過今晚嘅月全食唔使專程坐車去D山卡啦嘅地方, 又唔使挨更抵夜, 只要食飽晚飯, 落街抬起頭望向東面就已經清楚可以見到, 仲唔需要D咩特別儀器, 所以我地都要湊吓熱鬧...

追月一族係寒冷天氣警告之下, 瑟縮一角, 為咩??? 咪都係為咗影低紅月亮嘅美態...


由9點吹風吹到11點, 終於交到功課!!!

紅月亮真係好靚呀!!!

Canon EOS 550D f/5.6 1/3sec ISO-400 135mm 

我部傻瓜機影出o黎真係唔同D...

Sony DSC-WX5 f/5.9 1/8sec ISO-800 21mm

唔止得我地o架, 仲有好多街坊都有落街觀賞o架...



### 月全食小檔案 ###
月全食發生在2011年12月10日晚上10時06分,歷時52分鐘,望向東面找尋月亮就可以見到。
由晚上8:45分開始月偏食,直到晚上10:30分月全蝕,月亮會呈現紅銅色,整個過程會係凌晨1:30分完結,歷時接近六小時。


 

2011年12月12日 星期一

La TASCA

9 December 2011, Friday

11月之星嘅壽宴終於排到期食啦!!! 今次貓兄搵咗西班牙菜... 原本打算去諾士佛臺食, 點知打去Book位時先知間餐廳已經變咗日本菜... 最後轉戰La Tasca!!!

KaKaMa由12點幾開始打電話打到3點幾先有人聽, 仲同佢講Full咗要Walk-in... 我因為唔知KaKaMa已經打通咗, 3:45pm心血來潮又試吓打去, 有人聽喎, 講咗幾句, D職員叫我講英文, 結果比我Book到位喎... 即刻Call KaKaMa先知佢早過我打咗去, 但係話Full咗囉... 呢單真係十大奇案一宗!!!

查實我好驚自己聽錯咗, 好驚去到D職員同我講原來我係Book唔到位嘅囉... 好彩, 最後都真係有留枱比我地... 原來間餐廳得幾張枱o架咋, 好多人Walk-in都撲空...

我地7點正去到, 正值Happy Hour (4-8PM), Sangria同Tapas都會平D...

難得咁高興, 一於飲番杯先!!!

Traditional Sangria Tinta (1 Liter Jar)--餐廳用紅酒加入自己嘅特制配方同埋新鮮蘋果炮製而成嘅西班牙國酒「血紅雞尾酒」, 大家都一致認為好飲!!! 滴酒不沾嘅我都忍唔住湊吓熱鬧飲咗一杯, 好彩第二日唔使去睇醫生啫... 唔知係咪酒精影響, 大家吹水都吹得特別放... 餐廳方面又播放超大聲嘅音樂, 咁我地幾大聲講o野同喪笑都唔驚嘈到隔離枱啦...


遲咗20分鐘都未見人嘅KaKaMa, Send Message話仲要遲多15分鐘先到... 佢嘅好友鑽媽今日破格準時出席, 大叫肚餓, 唯有叫住D Tapas(西班牙小菜)比佢食住先啦...

我比較少食西班牙菜, 所以好多字都唔識, Order前都要查吓字典先... 好鬼大鄉里呀, 哈哈哈...

Serrano Ham and Melon--哈密瓜超甜呀!!! 不過D Ham一味得個鹹字, 冇咩肉香...


Potato and Chorizo Tortilla--煎蛋餅好好味呀!!! 整多幾舊o黎都食得落呀!!!


Serrano Ham w/ Crusty Tomato Bread--呢個Tapas都好味呀!!! 個包好脆, 加埋D蕃茄粒, 好清新呀!!!


食完晒3個Tapas, KaKaMa都仲未見人, LaLa聲叫D職員收走晒D碟扮冇事發生過啦, 嘩咔咔咔... (當然, 我地明知KaKaMa睇Blog都會見到我地嘅惡行啦, 正所謂天理昭昭, 真係有做過嘅事又點可能隱瞞到呢... 不過咁, KaKaMa, 冤有頭債有主, 都係鑽媽嘈住話肚餓咋, 你要搵就搵佢啦, 哈哈哈哈)

食完一輪又再Order第2輪, 落完Order, KaKaMa終於都現身喇!!!

Mussels Vinaigrette--我覺得好好味喎!!! 大大隻青口上面鋪滿蕃茄粒洋蔥粒青椒粒, 配埋白醋醬汁, 好清新, 食落開胃又醒神!!! 不過鑽媽話青口冇咩青口味喎... 又真嘅...


Beef Nachos--呢個芝士玉米片好好味喎!!! 同平時食過果D唔同, 呢個玉米片暖暖地, 好脆口, 芝士都幾香, 食到唔停得口, 我比個"讚"佢!!!


Lamb Ragout--呢個蔬菜燉羊肉都好正, 雖然好細碟!!! 羊肉好淋, 一D都唔酥... 配埋熱辣辣脆Pop Pop嘅麵包, 正!!!



Paella (Spanish Fried Rice with Sea Food)--呢個西班牙海鮮炒飯就麻麻地啦... D飯唔夠濕, 乾硬咗D, 香料味亦不足, 偏淡... 蝦冇了走D黑蚊蚊嘅蝦腸, D蝦肉都唔彈牙...



Pata Crujiente (Crispy Pork Knuckle "Spanish Style" served with crust potato and white cabbage salad)--呢隻西班牙烤豬手真係最晚最差嘅一味, 肉質比美乾柴... 配菜薯蓉就幾好食, 好香牛油味... 嘩, D酸菜真係酸到打冷震, 不過聽貓兄指示將酸菜同豬手一齊放入口, 又即刻冇咁難食喎真係...

餐廳入面嘅燈光極之昏暗, 加上門口2張枱不停煲煙, 我地又飲咗酒, D音樂又嘈到頭都爆, 所以一食飽咗個人就開始暈吓暈吓...

鑽媽個女又發燒, 老公又出Trip, 所以大家一食飽就要散水...

一步出餐廳, 寒風澟澟, 即時成個人醒晒!!! 同貓兄&龍媽散步去永安Shoppong... 行完一陣成個人舒服晒... 餐廳入面真係太焗啦... 

行到永安都閂門, 我地仲落西鐵站飲o野繼續吹水, 吹到11點幾先散水, 好Crazy... 不過好Happy!!!

後話 : 鑽媽叫我一定要寫低D咩係Blog, 以防佢忘記咗... 之但係... 我未趕得切寫Blog記低就已經忘記咗啦... 哈哈哈... Sorry呀鑽媽, 請你原諒我呢個比你更"老人痴呆"嘅人...

是次每人消費約$220元
味道: 3  環境: 3 服務: 3 衛生: 3 抵食: 4
###
地址 : 尖沙咀河內道8號地下
電話 : 2723-1072

2011年12月9日 星期五

悅香飯店 Yuet Heung Restaurant


8 December 2011, Thursday
今日落灣仔做完o野, 順便食埋晚飯... 朋友推介「悅香」, 見近近地, 咁我就去試吓啦...

金牌香妃雞(半隻)--雞脾打人牙骹軟!!! 食完呢隻又滑又彈嘅巨型雞脾, 副牙骹好難唔軟... 淡淡嘅鹹味, 好適中... 呢隻雞果然係招牌貨, 讚!!!


土魷蒸肉餅--食落好似唔係熟透咁, 土魷有D軟殼未清, 肉餅切粗粒, 口感好過免治肉餅, 正所謂有咬口!!! 仲有... 食肉餅有肉餅味, 哈哈哈~


餐廳裝修似60-70年代, 仲有樓上, 一層唔係好大, 10張枱左右...


個收銀阿毛唔知係咪唔開心, 定天生係個嘴向上彎, 鎮守係大門口... 如果唔係朋友推介, 我真係唔敢入o黎食...

服務員都係上咗年紀一族, 食完半隻雞都冇換過一次碟, 我都冇怪佢地嘅... 起碼我覺得佢地都OK有禮貌嘅...

個厠所就真係倒胃口... 得1格, 似係好多人用過都冇水沖厠, 堆積咗好大堆嘅厠紙同液體, 餐廳方面亦冇提供水桶比客人自行沖水, 可能因為個厠所細到放水桶嘅位都冇... 而家諗起都仲有少少反胃...

是次每人消費約$130元
味道: 3  環境: 2 服務: 2 衛生: 1 抵食: 2
###

地址 : 灣仔譚臣道105-107號地下
電話 : 25747110 (上層) / 2575 5367(下層)

2011年12月8日 星期四

輝哥海鮮火鍋 Fai Seafood Hot Pot Restaurant

3 December 2011, Saturday

好凍呀... 今日!!! 著咗抓毛外套都唔夠暖, 點算好呀?!! D溫度又會DROP得咁急嘅??? 唔係啦, 搵個邊爐打吓, 暖吓身先... (我同Honey 1年都打唔夠5次邊爐, 今日緊係凍到傻咗定喇)

諗住CALL埋太古之友一齊食, 點知佢地已經BOOK咗位, 利害!!!

BOOK咗7點, 我地早咗10分鐘到, 原本帶位要我地坐入口路邊位, 我唔肯, 明明大把好位, 又未有客, 點解要比張最差嘅枱比我?!! 最後安排咗梳化位, 仲有私人掛牆電視, 5個人可以圍埋一路打邊爐一路睇電視, 咁先係o架嘛~


7:15PM 都仲未見人嘅?!! 好少可咁遲喎... 服務員突然走埋o黎問我地用咩名BOOK枱, 答完佢就人影都唔見埋, 都唔知發生緊咩事之際, 朋友就出現, 仲大發雷霆!!! 原來個帶位帶咗佢上3樓之後, 隔咗十幾分鐘, 竟然鬧佢做咩坐咗人地張枱!!! 吓?!! 十幾分鐘前你帶佢上去叫佢坐低o架喎!!! 失憶呀?!!

終於人齊, 仲未有o野食... 混醬!!!



招牌清湯--仲以為清湯係得2粒X樂牌雞粉開水, 原本都有D材料o架喎... 呢輪真係睇得太多廣告啦, 洗晒腦, 哈哈哈... 嫌呢個湯底太清??? 唔緊要, 仲有16款比你揀, 緊有1款啱你口味...

手切鮮肥牛--D肥牛個樣都幾得, 雪花分佈唔及和牛, 但係都還可以啦... 肉嘅色澤都唔錯, 絕對新鮮... 仲一開二咁切到好似大大片咁, 好刀法!!! 食落口都唔韌喎, 都有少少牛肉味, 唔錯, 唔錯...


什錦餃子盆, 手打墨魚丸--餃子皮超薄, 睇D皮似係新鮮整, 唔似街外貨, 味道都OK... 手打墨魚丸好膠呀, 都幾彈牙, 仲好新鮮, 總之就係好味啦!!!


鮮付竹--OK呀...


野生黑木耳--點解... 係啡色嘅??? 切得好大塊吓喎... Honey話都食落都OK...


哎呀!!! 最好味嘅超甜粟米冇影相添!!! 我地仲食咗生根, 白菜仔, 手打烏冬... 飲埋幾支啤酒, 再加1 JAR酸梅湯1 JAR竹蔗水... 埋單210蚊1個人, 都唔算平, 不過食物質數都OK, 坐得都幾舒服, 再食都無妨~

吖... 個厠所先經典!!! 入去見到2個鐵水桶扮洗手盤, 厠枱係用鐵皮分隔, 木門嘅鎖係古時一條木打橫"恤", 稱唔上係鎖, 好攪o野~

是次每人消費約$210元
味道: 3  環境: 4 服務: 3 衛生: 3 抵食: 2
###
地址 : 灣仔謝斐道313-323號1-2樓
電話 : 2832 2836/2832 2062

2011年12月7日 星期三

華麗銀幕聖誕 Silver Screen Christmas Delights

2 December 2011, Friday

踏入12月, 到處都開始佈置好聖誕裝飾, 太古城亦唔例外... 華麗銀幕聖誕 (Silver Screen Christmas Delights)... 好華麗嘅主題!!!


我要做冰雪女巫!!!



獅子...


皇宮...

### 華麗銀幕聖誕 小檔案 ###

http://www.cityplaza.com.hk/eng/hot_promotions/event_calendar.htm

搜羅國際知名奇技藝人、音樂劇團及魔術師連續三星期帶來幕幕精彩演出!

日期 : 1/12/2011 - 2/1/2012
地點 : 2樓中庭