洋紫荊維港遊

20 March 2010, Saturday

舊年去唔成法國, 下定決心今年一定要去, 已經計劃好晒, 準備報6月尾出發嘅團... 可惜... 最後發現撞正同事放產假,  Oh No......

所有之前Research好嘅資料同Plan好晒嘅o野, 一下子冇晒用, 激死人啦......

無計可施嘅情況下, 唯有搵舊年帶我地隊嘅導遊, 問下佢5月有咩團推介... 咁啱原來佢地公司呢個星期六有新團發報會, 就叫咗我地去睇下...

發報會係船上面舉行, 係北角瑪頭上船... 我咁大個女, 都係第1次去北角瑪頭咋, 平時坐小巴係出面條路路過就試過...

我地早咗半個鐘到, Honey話大把時間, 不如影下相先啦... 好... 等我補補妝先...

OK! Camera, Take One...

嘩, 原來船上面好大o架, 足足擺咗26張枱... 超過250個翠明之友聚首一堂...

小吃同飲品以自助形式無限量供應... 仲有三文治同炸春卷炸咖哩角之類...

開船啦...

發報會主要講解郵輪旅遊... 嘩... 去25日要8萬幾蚊呀... 好Crazy呀!!! 之後會有小小時間講解下其他皇牌行程, 我地就睇啱咗東歐10天, 5月中出發, 貪佢已經成咗團, 唔使臨出發前7日先知唔成團又要煩餐死!!!

發報會完成後, 我地就即場報埋名... 原來係發報會即場報名, 除咗有"早報名"優惠, 仲有不定額嘅"私人醒"優惠o架!!! Yeah!!! 慳唔小呀!!!

報完名都仲有D時間剩, 可以上夾板吹下海風, 影下相, 欣賞下風景... 呢個免費嘅假日節目真係唔錯!!! 係唔記得食暈浪丸, 又冇帶話梅, 搞到有小小暈船浪啫....

IMAX 3D AVATAR

17 March 2010, Wednesday

12月果時想去睇, 可惜D飛買到2月尾都買晒... 見週圍都落晒畫, 仲以為已經冇得睇... 點知... 上星期五同貓兄去睇3D Alice, 上網買飛時, 發現阿凡達仲有得睇... 可惜去到3月尾都係Full晒... 但係如果平日Office Hour就有大把位揀... 咁... 唯有掉假啦...

我地坐尾二個行, 一D都唔覺得暈, 係個眼鏡太緊, 整到塊面好多紅印, 過咗半個鐘先退晒...

呢間戲院嘅等候區好正, 好多位, 仲有空中花園, Very Good!!!

由於套戲D時間好咔啦, 所以我地去睇之前, 食咗個豐富早餐, 睇完戲就係番iSquare食下午茶... 呢間餐廳, 我懷疑得3個員工... 經理就同人開緊會... 男侍應長期消失, 只會係上菜時出現... 女侍應更加有一段長時間比男侍應CALL咗入廚房, 店面完全進入真空狀態... 我Order嘅呢個士多啤梨吐司, 塊麵包仲燶過日本卡通人物"烘燶麵包", 仲要半粒鐘先上到, 我勁懷疑係個男侍應(貌似16歳)整嘅囉... 咁究竟廚房有冇請人架... 我地入去坐時, 全店得1枱客, 仲要係1個人食緊, 另1個人等緊, 點解我個餐都要等咁耐架...
呢間野, 絕對冇下次!!!

食飽飽去咗旺角報名去旅行, 不過最後都未報, 等星期六先報...

之後去埋MK1換銀行禮品, 全日行程極之緊密!!!

晚飯係佐敦醉X樓食客家菜... 同幾年前食果陣, 實在差太遠...
侍應迫我地Order 2-4人餐, 結果我地要打包2大盒餸走...
仲要當晚食完勁口渴, 肯定落咗味精!!!
仲要第二日Lunch叮黎食完之後, 飲咗10杯水依然口渴, 更更更肯定落咗好多味精!!!
結果, 第二日Dinner要煲D清水, 滾熱D食物, 將D味精迫番出黎, 呢餐食完終於冇勁口渴...

為咗健康著想, 我唔會再去醉X樓食飯架啦, 好恐怖呀!!!

嚐越 Deli Viet

15 March 2010, Monday

上星期五先同貓兄見完, 今日又再見啦!!! 我地一齊嘆完咖啡, 然後就去IKEA行街街, 多謝貓兄杯咖啡先...

行到8點就去餐廳同KaKaMa會合... 印象中... 已經好耐冇一齊食飯...

我地Order咗1個2人餐, 再散叫小小野, 已經放到張枱爆晒... 睇到坐係附近嘅幾對小情侶眼突突...

(餐)串燒沙嗲豬牛伴水晶粉沙律--唔好食!!! 冇肉味, 亦冇燒味!!! 水晶粉個樣勁唔吸引, 冇嘗試去食...

(餐)法國牛油焗大頭蝦伴濱海--個蝦都OK!!! 嘩... 個濱海... 冇味嘅...

(餐)馬拉盞炒海鮮--呢味出奇地美味...

(餐)嫩湯野菜鍋--貓兄話好正喎, 我就覺得同清水冇分別...

(餐)嫩菜湯粉--完全冇味!!!

(餐)蕉葉椰香甜米卷--都唔知自己食緊咩...

(1蚊小食)青瓜雞絲沙律--嘩!!! 好苦呀!!! 好難食!!!

嚐越脆春卷--OK!!!

翠苗酥炸軟殼蟹--OK!!! 好足料!!!

嚐越咖哩牛腩--好味!!!

煙肉蒜茸包--唔覺有煙肉, 蒜茸味好勁!!!

總括黎講, 散叫嘅食物OK, 但信用卡套餐同1蚊食物好唔掂!!!

是次每人消費約$180元
味道： 2 環境： 3 服務： 3 衛生： 3 抵食： 4
###
地址 : 九龍灣偉業街33號(港鐵九龍灣站上蓋)德福廣場第二期510-513舖
電話 : 3694 0329

愛麗絲夢遊千両 Alice in Sen-ryo

12 March 2010, Friday

我的第一次... 就咁就比咗貓兄啦!!! 哈哈... 唔好諗錯隔離, 我係講緊第一次睇3D電影... 同埋第一次去The Grand Cinema... 同埋第一次去千両...

睇戲前去咗千両醫肚, 因為D網友講到起碼要排1個鐘以上, 所以我地都係諗住見機行事... 點知... 6點半去到, 排咗一陣就入得啦, 好o野...

吉列炸蝦卷--哈哈哈... 實在太肚餓啦, 攪到一人隊咗一舊炸蝦卷先醒起未影相... 熱辣辣... 正!!!

日本特大帶子壽司(左)--好鮮甜呀, 冇得彈...
劍魚腩壽司(右)--唔記得問貓兄嘅意見添...

鱈場蟹壽司--人間極品, 啖啖肉, 好新鮮, Ichiban!!!

海蟃壽司--又一人間極品, 淡淡的蟃魚味, 超幼細嘅魚骨, 軟棉棉嘅肉, Yummy!!!

左口魚鰭軍艦--店員極力推介!!! 食落煙煙韌韌, 有D似魷魚... 有小小小小腥... 貓兄話好正!!!

三色軍艦--我食咗中間嘅帶子軍艦, 好鮮甜, I Like It!!!

厚燒甜蛋--燒得好乾身, 唔散, 不過我鐘意甜D...

鰻魚壽司--個皮燒得好香, 強勁嘅鰻魚, 買飛佛!!!

慘啦, 佢好食過X氣好多呀, 點算呀... 我驚我第時會忍唔住成日去呀... 貴咁多, 成日食唔多掂喎...

是次每人消費約$180元
味道： 4 環境： 4 服務： 3 衛生： 4 抵食： 3
###
地址 : 尖沙咀柯士甸道西1號九龍站圓方1樓1086號舖
電話 : 2196 8209

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

食飽飽仲有廿分鐘就開場, 時間啱啱好!!! 我地今晚去The Grand Cinema睇3D愛麗絲夢遊仙境... 坐最後一行嘅中間位置, 套戲好正好好睇呀!!! 不過睇完個頭有小小痛, 同埋胸口有小小翳悶, 要快D瞓教教豬先得啦...

錯有錯着嘅電熱毯

9 March 2010, Tuesday

二月尾永安大減價, 當時我貪平, 買咗張想買好耐嘅電熱毯, 買咗之後都幾後悔, 因為... 為咗慳小小錢, 蝕咗足足1年保養...

勢估唔到, 到咗三月都仲會低過10度...

機不可失, 拎出黎用下先...

個盒嘅設計就真係麻麻... 乜後生仔就唔可以怕凍嘅咩...

容龍海鮮酒家 Dragon Inn Seafood Restaurant

6 March 2010, Saturday

是日探訪鑽家, 為遲來的拜年及生日會... 可惜另一小壽星未能出席... 唔緊要啦, 下次啦, 總有機會!!!

貓兄為鑽鑽親自下廚... 登登登登... 朱古力芝士蛋糕!!! 都幾好味呀, 係朱古力味唔夠濃啫, 對於我呢個鐘情Mrs Fields Triple Chocolate Cookie嘅朱古力痴o黎講... HaHaHaHa...

之後我地去咗三聖村買海鮮... 正確D黎講, 係睇人買海鮮... 因為鑽媽識得果度D熟客仔, 熟客仔幫我地揀海鮮, 咁就唔驚比人呃啦... 多謝你呀, 熟客仔先生!!! 店員好Nice, 仲不停問我地要唔要同龍蝦合照...

買完海鮮就徒步去容龍"別墅"... 都起碼有廿年冇去過容龍, 細時係屋企人帶去, 想當年果度係有麻雀耍樂嘅...

上湯米--鑽鑽嘅私家食物...

容龍乳鴿--都OK多肉, 味道都OK...

豉油王原隻乾煎大蝦(海鮮加工)--嘩!!! 好好味呀!!! 好大隻, 啖啖肉, 仲好彈牙呀!!! 味道仲啱啱好!!! D殼又甜又薄又脆, 食咗落肚都唔覺...

芝士開邊龍蝦(海鮮加工)--又係大大隻啖啖肉, 用芝士同牛油焗架, 個皮脆脆地, 口感好特別, 一句講晒, 好味呀!!!

豉椒炒蟶子(海鮮加工)--我平時好小食蟶子, 因為覺得佢同生蠔一樣, 滑潺潺, 咦... 怕怕!!! 但係今次呢隻蟶子, 如果上碟時冇咗D殼, 我真係會以為佢係魷魚囉, 大大舊, 好彈牙, 正呀!!! 只可惜... 食到尾有小小沙, 即刻冇Mood...

蒜蓉粉絲蒸元貝--好大粒元貝呀, 好新鮮, 粉絲唔係太入味, 但仍然好正!!!

砵酒焗本地生蠔--生蠔我係唔食嘅, 熟蠔都唔多食, 不過佢呢個都整得OK, 一D腥味都冇, 亦冇滑潺潺嘅感覺... 簡單D黎講... 如果唔好食, 我食1隻就唔肯再食囉... 呢碟... 我前後食咗3隻囉... 呵呵呵呵...

蒜蓉蒸糕蟹糯米飯--嘩!!! 好大籠呀!!! D蟹仲好多膏呀!!! 仲好多蒜蓉同油呀!!! 食完都要側側地面同人講野, 驚人聞到果陣蒜蓉味...

再加個油鹽水浸菜遠, 4大1小, 差不多啦... 有甜品送, 係我至愛嘅紅豆沙... 仲有西瓜送, 都幾清甜呀...

熟客仔介紹, 埋單有9折, 爽爆!!! 買海鮮用咗$6XX, 容龍用咗$623, 即係$3XX 1個大人左右啦... 話好平又唔係, 不過唔算貴囉...

星期日晚坐滿晒客, 都幾嘈下, 8點幾門口都仲有好多人等位...

是次每人消費約$3XX元 (未知買海鮮exactly用咗幾多錢)
味道： 4 環境： 3 服務： 2 衛生： 2 抵食： 1
###
地址 : 屯門青山公路19咪半
電話 : 2450 6366

京笹居酒屋 Kyozasa Restaurant

2 March 2010, Tuesday

拉力早開年飯, 一定要食好D!!! 原本Book咗"和光鐵板燒日本料理"嘅和牛放題, 可惜18:00實在太早, 趕唔切, 唯有轉陣地... 去番就腳嘅尖沙咀...

一坐低, 隔離枱2個剛落單嘅男西人係度多多小動作, 作狀話D枱咁近, 可以夾埋我地張枱D食物, 我地呢D高貴嘅Ladies, 當然會當睇佢唔到聽佢唔到啦, 以免佢地全餐搭訕...

嘩... 埋單好奇怪... 多咗1行60蚊嘅唔知咩... 原來碟醃蘿蔔同茶要收每人20蚊o架... 仲要我地飲乾晒成杯茶, D侍應都唔加茶, 要叫先加... 20蚊... 邊樹值呀!!!

清酒煮蜆--D蜆大大隻, 好重清酒味, 正!!!

鹽燒原隻鮑魚筒--買飛佛! 好彈牙又唔Un, 好味!

鹽燒牛舌--牛舌薄切, 燒得好香, 鹹鹹地, 好食!

雜錦串燒--雞肉大蔥燒得最好味, 雞肉棒都好味, 青椒仔好辣, 冬菇完全冇人吼!

碎吞拿魚腩青瓜壽司(左上)--都幾特別呀, 第一次試...
雜錦壽司(一人前)--我地原本想Order雙倍價錢嘅雜錦壽司, Order時, 侍應問我地係咪要"一人前"(餐牌入面冇), 咁我地就是但啦... 後來隔離枱2個男西人原來Order咗2份1人前, 個樣勁唔吸引... 我地即刻叫住侍應, 想轉番例牌, 佢竟然話"已經整緊, 唔得"... 問題o黎喇... 例牌都包括一人前果幾舊壽司, 咁係一人前加多幾件咪例牌囉, 點解唔可以轉呀???

門口嘅舊餐牌好多o野食揀, 又圖文並茂, 仲要價錢係平D嘅... 呃咗我地入去之後, 個新餐牌咩都冇, 得字, 仲要價錢貴咗, 好有被騙嘅感覺!!!

牆上貼咗好多中日對照菜單, 似足日本地道居酒屋做法, 可惜... 冇英文, 令到2位男西人不停望住我地D食物, 再望住自己果2個一人前雜錦壽司, 個樣好黯然!!! 仲要D侍應冇比前菜佢地, 搞到佢地想問又唔敢問, 真係好想知佢地張單有冇收果20蚊!!!

老闆唔招呼港客, 有日本人叫佢就係水吧飛身撲出, 勁大細超!!!

侍應除咗唔自動加茶, 仲唔會自動收吉碟, 所以... 我1蚊小費都唔比, 等佢自己檢討下!!! 埋單$610, 咁嘅Service, 唔抵!!!

去廁所條路好迂迥曲折, 係後樓梯度, 一個人唔敢去... 仲要細到離奇, 一彎腰就撼頭... 喂, 老細, 我地唔係男人呀, 唔係企係度去廁所o架!!!

是次每人消費約$203元
味道： 3 環境： 2 服務： 1 衛生： 2 抵食： 1
###
地址 : 尖沙咀海防道32-34號寶豐大廈1樓
電話 : 2376 1888 / 2376 2318 

~~~~~~~~~ 飯後甜品 ~~~~~~~~~

食唔飽, 要去厚福街入面嘅糖仁街兜一轉先得啦...

我今次Order灰姑娘(南瓜), 淡咗D啫... 同埋我唔鐘意個玫瑰味嘅醬, 好香精Feel...

力仔Order嘅黑色誘惑(可可+香蕉), 都幾好味呀, 朱古力好濃, 香蕉又香...

早兄Order嘅伯爵奶茶, 依然係超正!!!