哈魯邦韓國料理 Harubang Korean Restaurant

今晚(2006年9月4日)同舊同學"黄毛仔"做生日，佢四點幾放工打比我，我問佢想去邊度食，佢竟然叫我唸，Oh my god！最surprise嘅係佢竟然主動話可以過海，我緊係"吐"飯應。更神奇嘅係佢竟然仲話不如去我公司附近食，邊有咁大隻蛤蚧隨街跳？！我受唔住誘惑，唸都唔唸就答「好，不如你接埋我放工！」，佢竟然答「好」(It's Impossible)。結果我係公司"印印"腳等佢接我放工，點知，佢去錯隔幾條街嗰間McDonald，又要行番幾條街過嚟，大熱天時，真係辛苦咗佢！Sorry吓！

參觀完我公司，問佢鐘唔鐘意食韓國嘢，佢答「吓！又話食越南嘢！」(嘻嘻，佢搭車嗰陣我已經改變主意)。我同佢講：「同得你食飯，緊係要食d好嘢！」(因為間越南嘢好食但環境唔好)。佢答「韓國嘢，鐘意，你唔記得讀書嗰陣，我哋個個禮拜都去食韓國嘢嘅咩？」，我真係唔知點答佢，因為一時間記唔起已經係十三、四年前嘅事。又要講多聲Sorry！

落到大堂，提起IN小姐買豪宅嘅事，先知黄毛都有睇我嗰blog，又一surprise！不過佢選擇做一個沉默的讀者(淨睇唔回應)。

行咗幾分鐘，去到太古城嘅「哈魯邦韓國料理 Harubang Korean Restaurant」，又係即刻有位(因為都幾貴，所以比較少人)。今次竟然有Set Dinner，之前食過兩次都冇o架！

叫咗D餐(2-3人用)，HK$580，有烤肉拼盤(HK$500)，海鮮石頭飯(HK$130)，6小碟涼伴菜，蘿蔔湯，生菓，免加一，韓國茶任飲。

叫Set真係抵好多！如果唔係，散叫埋單真係要HK$800！

食咗三粒半鐘，天南地北，無所不談。最利害係，兩位小女子竟然成個餐食晒依然面不改容，勁！主要原因係我哋兩個太鐘意食韓國燒烤，而Harubang嘅食物又太好食喇！

食完飯，我好坦白同佢講，其實我唔記得約咗佢，仲執好晒游泳裝備，唸住一放工即刻去博剎！不過，請佢食咗餐好嘅，佢當然冇怪我喇！(哈哈！老人家冇記牲！請勿見怪！)

服務、環境、食物：全部比4粒星！價錢：當然覺得貴咗D，不過好過冇Set仲貴！

 

地址：側魚涌太古城道20號元宮閣G402-03舖
電話：2539 6398 

 

美食博覽

19 August 2006 (Saturday)

今日同貓頭夫人去咗wanchai會展睇美食博覽(2006年8月17-21日)，原本唸住攞VIP飛(免費)唔使排隊，點知又再比食蕉老點(已經係第二次)，跟咗人龍排到正門入口，先見到另一個比工作人員&VIP用嘅入口，好彩人龍冇停過唔使排好耐，如果唔係，一定捉番隻食蕉出嚟丙鑊金！

嘩！入到去好似年卅十晚行維園花市咁多人，好恐佈！仲有d老星出現吓咁啦，包括靈芝三寶，我就同識飲識食嘅蔡san蔡瀾握咗手！

一入去即刻跟場刊coupon行，但95%有欺騙成份，只成功取到免費豉油sample乙份(啋！平時MX買蒸飯都送喇)！行咗一陣都買唔到嘢，因為貓頭夫人話好多都貴過惠康、百佳。好彩後尾再行耐d，開始見到d特別食品，開始買到唔停手。

買到手都軟，試食試到口乾，行行吓見到Papagallo鮮果雪芭(將果肉取出做成雪芭，再放回果皮內)，忍唔住買嚟解暑！極正！好清甜，透心涼！原本有西瓜、橙、青蘋果、火龍果，因為買剩火龍果，所以超殺。最神奇係貓頭夫人唔知點解可以食得咁快，我食完先知佢果個細一半，但都係HK$16一個。

义完電，再博殺！行完一個hall又一個hall。行足3個鐘，體力極度透支，終於要打道回府！

特別推介：

1) 沖澠政府帶來的水雲，類似髮菜：買咗水雲麻蓉包及水雲抹茶桂花糕。

2) 台灣政府帶來的麻糬：買咗黑糖紅豆、綠茶、雪梅娘、等等。

3) 英國商人帶來的美食：買咗BBQ米餅、夏威夷果仁蜜糖cookie、72%Dark朱古力、榛子朱古力。

4) 香港和記隆的傳統小吃：買咗手切南朿糕及花生糖。

5) 中國國綷：中藥！哈哈！因為近期經常冇貨，所以見到咪順手買埋囉！

Harbin Ice Lantern Festival 哈爾濱冰燈節

18 August 2006 (Friday)

今晚同果汁冰冰、QQ、A先生、蟹爪蘭、童童，一行6人一齊去太古城中心，欣賞「哈爾濱冰燈節」！

入場前檢查高度，童童不到120cm所有不用付入場費(HK$20，直接放入慈善捐款箱)，但不可打手印(冇手印唔可以玩冰滑梯)，我見佢眼溼溼(眼淚都停在眼內)，又不敢哭出來，可能驚哭出來便冇得入去玩更要即刻返屋企。

等了30分鐘，終於到我哋入去喇！蟹爪蘭、童童、我都自備寒衣，其他人要穿大會提供寒衣，原來全部都係Columbia，勁新淨又靚，早知唔使自備寒衣咁麻煩喇！QQ、童童仲帶埋士多啤梨Ear乜，冷頸巾，冷手套，設備勁齊全！

Setup好之後，工作人員終於打開雪柜門比我哋入去喇！好緊張吖！入面只有零下5度o架喳！

入口係冰之隧道，然後係冰之琴棋書畫，冰之2008中國北京奥運，冰之神舟號，冰之樓梯，冰之北極屋，冰之練丹頂，冰之馬車，中間嗰D唔記得(因為嗰4個女人不停嘈住晒咁話【好凍呀，走啦！】)(睇咗頭3個冰灯已嗶哩啪啦話要走)(其實最凍嗰個係我！我都未嘈話凍！因為我要不停為佢地影相，隻手都凍到僵晒，佢地D手一直塞係衫袋入面，唉，而家唸番起先覺得自己當時似菲傭)，最後係冰之滑梯！因為一滑落去就係出口，所以要放最後。

玩滑梯前大家討論了一陣子，因為童童唔可以玩冰滑梯，蟹爪蘭要照顧佢所以唔玩，果汁冰冰與A先生又借d2唔玩，跟住QQ又扭計話A先生唔玩佢又唔玩，就係咁攪咗一輪，A先生上先，QQ第二，我第三。A先生上咗冰滑梯之後，QQ又扭計話好驚，我唯有話唔使驚快D上去喇，到我上去時一D都唔驚，但我坐上水泡後，都未坐好，工作人員又未講完指示，就一掌推咗我落去，嗰下最驚！不過原來都幾高速，幾秒玩完，走人！

出咗個雪柜，QQ同A先生個眼鏡都朦晒，好搞笑！又攪咗一輪(卸下寒衣)，一行6人終於可以浩浩蕩蕩去食晚飯喇！

總結：

- 因為未睇過冰灯，所以雖然地方唔大，但係都係一個好好嘅体驗同節目！(因為o係香港要揾D優質節目都相當難)

* 值得一試 *

心泰 simply thai

噚晚(2006年8日16日)同大F太食飯，去咗食泰國菜！坐低時佢已經話"日本嘢好食"！

每人奉送一杯"Welcome drink" 羅望子汁．．．酸酸甜甜，幾特別！更可自選香薰蠟燭(Lemon / Rose / Lavendar)！

叫咗以下食物: -
1) 大蝦冬陰功湯：OK
2) 芒果米紙卷：包住白/紅蘿蔔絲..都幾硬,唔鍾意食菜既一定覺得難食
3) 炸蝦餅：炸得太硬，D汁又唔好味
4) 什菌伴蒸豆腐：淡而滑既豆腐
5) 咖哩鴨：冇咖哩味
6) 菠蘿海鮮炒飯：冇菠蘿味，味道略鹹

埋單仲送張書籤。又做埋問卷。

3個人埋單HK$365，價錢一般、食物唔OK、環境優美、我比1粒星。
要求唔高嘅話，當揾個舒適地方食餐晚飯，都OK嘅！

地址：九龍灣德福廣場F1號舖
電話：2796-7818 

彩食酒宴 En Japanese Dining Bar

Honey生日，請完佢睇歌劇，買完PhantomOfOpera CD加DVD & 加勒比海盜第一集DVD送比佢，路經TST Sogo仲買咗CKJeans T-Shirt送比佢，緊係仲有下文啦！

晚飯去咗久仰大名嘅「En」(國際台-日本語時間-行政總厨每週都示範煮飯仔)，之前一路以為個名叫做「彩食酒宴」，係門口仲問waiter點解冇招牌，個waiter話"個招牌咪喺度囉"(註：係日文嘅En)，勁樣衰！waiter先生好nice咁解釋「彩食酒宴」只係slogan，意思係：-
彩：多姿多采
食：食物
酒：酒
宴：Happy Together to eat & drink

有蟹放題同牛肉放題，但因為"胃炎"未好，所以唔可以食放題。order 咗

1) 牛油焗帶子
2) 芝士蝦炸薯球
3) 沖繩豬肋骨湯麵
4) 沖繩香腸拼盤
5) 炸軟殼蟹，蟹子沙律
6) 沖繩蜜柑雪芭
7) Orion Draft Beer (買一送一)
8) 荔枝特飲

全部都好正！份量細細，適宜佐酒！最鍾意蜜柑雪芭！埋單只需HK$511！環境、食物、服務：我全部比五粒星(滿分)！

外傳：因為我為每款食物影相，加上只有日本人光顧，可能令人誤會係記者，搞到waiter先生(由於只有小量服務員會說中文，所以waiter先生一直照顧我嗰枱)埋單時問我"係邊個介紹你嚟o架？"，好搞笑！

PIRATES OF THE CARIBBEAN: CURSE OF THE BLACK PEARL

為咗要睇第2集，所以噚日買咗第1集(PIRATES OF THE CARIBBEAN: CURSE OF THE BLACK PEARL (2DVD/COLLECTOR's Edition)嚟睇，全套好多搞笑位，靚仔靚女加笑匠，HK$99，2個人睇完都算回本！

The Phantom of the Opera 歌聲魅影

噚日(2006年8月12日)去咗尖沙咀文化中心睇歌劇，第一次睇鬼佬大戲，感覺唔錯。

全場坐無虛座，我原來喺坐係VIP BOX 4，自己買咗飛都唔知，好彩唔係VIP BOX 5 (Phantom 專用)，如果唔係容乜易比佢殺死o架！

睇完仲忍唔住買埋Highlights CD(音樂)同DVD(電影)先肯鬆人！

紅樓

昨晚(2006年8日8號)替I小姐慶祝生日，第一次食淮揚菜，之前都唔知係食D乜，任由擺佈！

I小姐Order咗6人餐，另加雞同燒賣

. 椒鹽黃魚 (以椒鹽酥炸，香口惹味肉嫩滑)

. 八寶飯 (傳統八寶飯壓扁煎脆，勁好味)

. 小籠包 (多汁，好味)

. 蟹粉豆腐 (一般，凍咗變一舊嘢咁)

. 另有未聽過嘅馬蘭頭(似豆苗)同其他頭盆

味道：OK；環境：清淨，幾好坐；服務：OK；我比3粒星。

地址﹕銅鑼灣羅素街8號3樓
電話﹕2893 6388

外傳
大家成晚都雞啄唔斷，好似好耐冇見咁，大家都好多新聞要報導，好忙。
開心位：某某(話唔嫁又嫁，話唔生又生嗰位)有咗BB，過多幾個月先開估係邊個！
唔開心位：比「高瘦平」用花生加鹽掉中隻眼，真係唔係幾like，因為我最緊張對眼，唔係嘅話我就唔會每年都捐錢比「奧比斯」兼唔肯做Laser Eye喇！唉！佢真係大唔透！