網頁清單

2017年2月21日 星期二

【宜蘭】偽文叔Hea玩一天團。噶瑪蘭酒廠❤渡小月❤幾米廣場

1 August 2016, Monday

早2日招待了Honey的大學同學兩公婆暴走1日陽明山,朋友堅持要招待我地入宜蘭玩1日,仲叫個租車司機接我地入宜蘭,盛情難卻,食住抗生素去。

今日呢個司機經典中嘅經典!可謂遇過最差的其中2個,同上次租9人車同屋企人上陽明山果位同出一徹。

講咗玩先,等陣係文章尾部先數佢。

第1站:金車噶瑪蘭威士忌酒廠





天然水生產工廠今日關閉,我地先參觀威士忌裝瓶工廠,然後再去威士忌蒸餾廠~





最後當然要去酒堡免費試飲威士忌~






懶得搬,所以無買酒。玩咗2粒鐘,唯一洗費,威士忌雪糕,Yummy!!!

第2站:渡小月










朋友包玩包食,仲豪到請我地去食好出名嘅無菜單料理,好幸福呀~

咦?渡小月?台北果間好差吓喎~不過朋友做東,點都要比面,可能真係唔一樣呢~

好似有3種餐,1千,1千5百,同2千。問有咩分別時,麥兜顯靈!服務員阿姐:常餐快餐午餐,都係果D嘢嚟嘅啫~(妖)

落單後D服務員阿姐繼續完美示範茶餐廳態度,上菜放晒4碟響角落頭,我地要自己企起身拎,服務同無菜單料理嘅幻想好大出入。

臨尾仲反問我地D食物來齊未,呵,想笑屎我咩?頭先問你有咩食都無講清楚,咁我地又點知D食物來齊未呀!阿姐你真妙~

食物味道認真麻麻!賣相亦不濟。(後來同黏土老師傾開,佢話要叫一圍圍果D先好味,每位叫果D係唔得嘅,哦,收到)


味道:★★★☆☆
環境:★★★☆☆
服務:★★☆☆☆
衛生:★★★☆☆
抵食:★★☆☆☆

渡小月餐廳
地址:宜蘭縣 宜蘭市 復興路三段58號
電話:+886 3 932-4414
網址:http://jck.looker.tw/


第3站:宜蘭車站0丟0丟噹森林及幾米廣場


第4站:無

朋友事前計劃咗要去嘅景點都已經完成晒,我地見時間仲早,建議去伯朗咖啡堡,不過去到雪山隧道附近見好似好塞車,朋友要趕飛機返香港,最終決定唔去咖啡堡,直接回台北。

最後係雪山隧道塞車塞足3個鐘,在車上朋友的秘書通知佢香港8號風球,所有飛機航班取消!

大家就苦中作樂話,早知去埋伯朗咖啡堡~

😤😤😤😤😤😤😤😤💣😤😤😤😤😤😤😤😤💣😤😤😤😤😤😤😤😤💣😤😤😤😤😤😤😤😤

一定要爆個租車司機!

個租車司機成世人都未去過宜蘭,係咪台灣人嚟㗎?!

都算啦,唔識路唔緊要,但係態度唔好吖嘛!

朝早喺天母家樂福等,地標嚟㗎喇,都可以唔知去咗邊,結果要等足半個鐘先出現。

去到Kavalan唔識路都算啦,叫佢停P3死唔肯,要我哋喺酒廠正門入口暴曬行入去 ,咁我哋租車嚟做咩呀?!
朋友太太好勞氣,最後我哋唔肯落車,勢不妥協重複又重複要求佢去P3停,個司機先至車到我哋去第一個參觀點,
之後仲跟蹤我哋入去參觀,原來佢聽日都會車人黎宜蘭,坦白到咁,都唔知好嬲定好笑。我哋私底下話佢今日搵我哋做白老鼠,聽日就變宜蘭專家!

去到渡小月,死都唔肯載我哋去門口,死都要我哋喺對面馬路落,咁我哋call車嚟做咩呀?!朋友太太又再度好勞氣,最後我哋死都唔肯落車,擾攘好耐佢先車我哋去渡小月門口。食完出嚟仲問我哋食咗幾錢,話食咗咁耐一定好高級,真係唔知點答佢。

臨尾返台北果下就認真堅囉!

我見到佢輸入導航,點解中山北路得三段,明明有七段!再睇真D,左上角寫著新北市淡水區?!大驚!
我立即同佢講:我哋喺台北市士林區,佢駁嘴話北投區係喺新北市,我話:天母耶,天龍閣嘅城堡,點會唔喺台北市呀?!返出去喇,揀台北市喇,然後士林區呀!
佢竟然熄咗嗰導航系統囉!
仲唔火都嚟?!
你話經典唔經典?!
最後,我哋決定全部人一齊返朋友間酒店,出到去東區,朋友都唔放心,自己開Google導航教返佢架車要點行。

朋友解釋平時唔係用開呢個司機,用開嗰個有嘢做,搵咗呢個經典司機來。朋友話以後都唔再用呢個司機!

😍😍😍😍😍😍😍😍💖😍😍😍😍😍😍😍😍💖😍😍😍😍😍😍😍😍💖😍😍😍😍😍😍😍😍

識得食,一定係食少帥禪園 !

朋友咁豪尋日請我地食無菜單料理,卻慘遭滯留台北(香港8號風球),我地當然要回報吓佢地啦~

可能會有人替渡小月不值,咁都叫賣相差?!就咁,唔該睇吓人地少帥禪園啦~


食完午餐,免費浸埋腳,行去附近嘅北投文物館參觀吓,又返過黎食埋個下午茶,施施然坐車返酒店攞行李去機場,嘆到呢~



沒有留言:

張貼留言