網頁清單

2016年8月14日 星期日

【台北】我們這一家。復活大旅行。Day 2。上引水產 煮海 La Mer+寧夏夜市

26 March 2016, Saturday

行程:士林官邸 → 大安森林公園 → 上引水產 → 寧夏夜市

行程第二日,去士林官邸賞完花,再去大安森林公園扮踩完單車,仲有咩玩?唔好心急,最精彩嘅部分而家先至開始!Let's go!!!

我哋坐捷運去到行天宮站再轉的士,準時去到「每一個香港遊客都必定會話要去嘅地方」(已經去過好多次嘅香港遊客例外)--上引水產,幾乎大部分的士司機一聽就知道係邊度!

不過好多人都會搞錯,以為佢只有立食,其實佢入面有一間專辦桌菜嘅餐廳“煮海 La Mer”係可以預約嘅!不過價錢相對比較貴,而且人少的話會難叫菜,所以好多人都聽我講完就算,最後都會去返超市入面食立食。我哋一家十幾口有老有嫩,真係唔方便慢慢排隊,有老人家最好就梗係可以一早book好晒枱啦,玩起上嚟個心都定啲。


桌菜餐牌貼在餐廳門外,6人起。另外亦有2-3人火鍋套餐供應,但菜式就相對無桌菜咁豐盛。


當然,你亦可以單點,自己揀海鮮揀煮法。


我地11人,點了6人份的濤濤合歡,再加1隻現撈活鱈場蟹2吃,飽到飛起,埋單2萬台幣,見到全枱人全晚帶著超滿足的笑容,這個價格我覺得是值得,雖然在台灣人眼中絕對是遊客價。


想吃刺身?先努力動一動手磨山葵吧!哈哈,真係粒粒皆辛苦,磨到手軟。


店員送上頭盤-雜錦刺身時,一放低全枱嘩聲四起!真係好震撼!一個人兩隻手圍住佢都應該攬唔曬!當然要逐個人輪流同佢影合照啦!屋企人滿足的表情係由呢一刻開始未停過。


套餐有毛蟹清蒸,職員見我哋要咗成隻鱈場蟹,覺得重複咗,主動建議換其他海鮮俾我哋,抵讚!事隔幾個月,我已經唔記得咗佢換咩畀我地啦,哈哈哈~

季節魚可選蒸或烤,套餐臨尾仲會有海鮮鍋,見佢多水到咁我哋仲以為呢個已經係海鮮鍋,以6人餐來講,份量好似大咗少少。


貝殼類海產可以揀活扇貝或者鮑魚,蒸或烤,估唔到D扇貝咁大隻,6人餐有12隻會唔會多咗少少?


肉類方面可以選牛沙朗或牛小排,制作同擺盤與海鮮比較的話相對失色。


阿根廷紅蝦香煎-大蝦肉質始終係會嚡D,無計。


季節熱炒-台灣山蘇,份量相對海鮮屬於離奇地少。


戲肉來了!2.5KG現撈活鱈場蟹2吃!清蒸唔蘸醬鮮味爆燈,好食到喊!為咗比大家睇下煮熟後有幾大隻,專程找來大學生同中學生的Body來做比例,咁強調係因為驚大家誤會佢地係小學生,哈哈。咬落啖啖肉,一啖係咬唔晒,自問口大食窮郎,都要分3啖先咬得晒半隻蟹腳,每1啖都好似成舊雞脾肉放入口慢慢咀嚼咁,果種滿足感,好難取代,如果今次旅程無食佢,肯定失色超過50%。




套餐海鮮鍋大得誇張,一班好戲之人企晒係起身扮期盼都係為咗用個Body來Show比大家睇個鍋有幾大啫。


大家都堅係飽到嘔得出,臨尾再上呢個鍋時,放咗十幾分鐘都無人掂,唔知點解我又手痕走去樣樣試D,唔試由自何,一食,驚為天人,粒墨魚丸好食到呢,我一講,姨甥女即刻碌大對眼,搶住試埋一份,一食,即刻同我一齊狂摷個鍋,我比咗最後半粒佢阿爸試下,比佢用“手”搶埋,佢阿爸錯愕嘅表情,真係笑屎晒大家,哈哈!


餐後水果,好清甜。


估計係炸牛蒡片,無估錯嘅話應該係餐牌無嘅餐前小吃。都幾香脆o架。


食得咁飽,餐後當然要參觀下超市,順便見識下立食區的價錢同人海。

最後當然要來個「到此一遊」開心大合照啦~



味道:★★★★☆
環境:★★★☆☆
服務:★★★☆☆
衛生:★★★★☆
抵食:★★★☆☆

煮海 Tresors de la mer (上引水產)
地址:台北市 中山區 民族東路410巷2弄20號2樓
電話:+886 2 2508-1268 Ext 233-234
網址:www.addiction.com.tw/lamer/



下一站,寧夏夜市!


唔知點解大家咁大膽,比全家最最最唔可靠果條友,帶住2個妙齡少女自己1部Taxi,我已經CAP晒地圖比佢,集合地點係寧夏夜市圓環,佢都夠膽死去錯街尾,自己睇都無睇過我張地圖就賴落個司機。搞到成家人幾咁擔心,擔驚受怕半小時先重逢,我地即時訓示2個細嘅千祈唔好再跟住呢個最細嘅長輩車。

夜市內的攤位遊戲。


明明好飽又可以再食,成班都係黑洞。


失蹤3人組仲V得出喎,緊係啦,驚果個係我地吖嘛。


影埋呢張相就要瞓覺覺豬啦~


2 則留言:

  1. 我覺得出外旅行自己滿足合意為先,遊客價...自己啱咪得,遊客喺俾陀地收貴啲咁架😊😊

    回覆刪除
    回覆
    1. 哈哈哈... 陀地, 好親切的用詞~~~

      見到全家笑到甜到漏, 我都覺得貴少少都值得!!! (遊客價得黎都仲比香港平)

      刪除