網頁清單

2015年5月31日 星期日

Green @ Hotel ICON : Buffet本愉快,何處惹蛋糕

24 May 2015, Saturday

朋友DD睇咗網上講Green新推出週末Brunch Semi-Buffet的食評,興緻勃勃咁出盡力約齊人馬去擦餐勁,可惜去到卻未如食評所講可以任食蛋糕櫃內的精美蛋糕,加上職員未有道歉並只懂重複說「每人限1件」,導致佢好失望。

朋友月初找我一起去食週末Brunch Semi-Buffet時,我多番婉拒,理由是自己正在減肥中(舊年6月至今),但佢盛意拳拳說等足我1個月,唔想掃佢興,只好兩脇插刀。


一直都知Hotel ICON所在位置,但點行入去就真係唔知。坐過海巴過來,行咗好大個圈先知酒店正門係呢度。之前落咗好多日暴雨,好彩今日落車時無再落,心情也不禁輕鬆起來,呢個可能係我等陣無據理力爭的原因。



嘩!部Lift入面黑麻麻嘅?伸手不見五指,好驚呀!


Brunch Semi-Buffet供應時間由11:45AM至2:30PM,11:20AM未夠去到,人影都唔多隻,好彩有位坐,坐多一陣貓兄都到啦,吹咗一陣水,見其他人開始去Reception度登記,我地又去登記定先~


Reception話搵唔到我地Booking,負責訂枱的DD又唔聽電話,搞咗好耐,Reception話會唔會係訂咗樓下,樓下都有Buffet... 係喎,一言驚醒夢中人(尋晚3點先瞓)。朋友講明係半自助餐,有提過Green,唔知點解,咁都會去錯The Market,哈哈,門口相都影埋,The Market太深入民心喇~


今次搵啱啦啩。早到早運桔,時間啱啱好,職員正安排客人入座。


日光浴+青草牆,是店名的由來吧。半圓梳化好睇唔好坐,坐中間果個好慘,好難出去拎食物,我上次係Yamm中過蕉啦~


我地被安排坐係餐廳最入的位置,貼著落地玻璃,係正Buffet枱側邊,唔使離開座位伸隻手出去就攞到Ham食(我地當然唔會咁核突啦)。注意:張Buffet枱就係得相入面Show出來呢1張枱嘅咋,唔好諗多咗呀。


餐廳剛讓客人入座不久,人不多,影相最佳時間。






行了一圈,放下相機準備開動引擎,發起人DD同龍媽終於來了,DD話蛋糕櫃內的蛋糕可以任取,$58/件,食幾件已回本。真的嗎?沒想過Semi-Buffet會包埋蛋糕櫃內的蛋糕,仲可以任吃咁抵?!我地2個慌死比人拎晒,第一時間出去瘋搶,得到的答案竟是~「每人限1件」!天呀!


DD是為此「任食蛋糕」而來,出心出力搵齊班Friends來到,卻「每人限1件」?不甘受騙,跟職員理論食評話任食,職員未有道歉,只懂重複又重複再重複地說「每人限1件」,DD表示非常失望,職員像木人巷錄音機,繼續播音「每人限1件」,其實篇博文我事前無睇過,因要去台灣旅行好忙無時間,反正DD同我講咗人均消費是多少,我付得起便是了。
我沒有任何爭取的打算,只在旁大聲說:「果D係免費來試食寫文,緊係任食啦」,哈,好無聊,只為說比其他客人聽,職員仍是活在木人巷,DD無奈下選了1件。
回家後抽時間看看DD給我的Link,真係標明「餅櫃的蛋糕任點任食,吃六件都回本」,DD今次真係傷了荷包又傷了心。

幾氣頂都好,比咗錢無理由唔食,係時候收拾心情,開動引擎。

~ Round 1 ~

風乾火腿有2款,右下角果款係職員即切,色澤深紅,油脂不多,鹹鮮中略帶甘香,主攻呢款。 左下角果款係傳統Cold Cut,色澤淡紅,不鹹不鮮不甘不香,可以不理。伴著它的蜜瓜爽脆香甜,好有質數。羊奶芝士膻香軟綿,竟伴有整棵的無花果乾,讚。法式鴨肝醬多士甘香,豐腴度及膻味中規中距。炭燒彩椒茄子非常精彩,甜中帶酸,酸中又帶鹹,Encore。挪威煙三文魚油香不足,焗菠菜煙肉芝士撻水準一般。


~ Round 2 ~

七彩繽紛的Macaroon誰可抗拒?味道選擇多,餅皮夠乾夠脆,推介芝麻味及士多啤梨味。朱古力批味道濃郁,批身外脆內軟,還不錯。士多啤梨荔枝撻有點奇怪,只有1粒荔枝肉,沒有荔枝味,士多啤梨多得傾瀉是最大賣點。咖啡千層蛋糕咖啡味香濃無比,一層脆米一層酥皮再加上面層的咖啡醬,小小一口很吊胃口。


Cream Brulee內要有雲呢嗱籽算是一種基本要求吧,布丁很滑溜,焦糖面再硬一點脆一點會更好。


~ Round 3 ~

見DD一路食麵包一路讚好味又有蘋果肉,我又拎返個黑白無常試試。酥皮每一層都做得好薄,味道不錯,只是略甜。香草海鮮沙律完全無味,不想浪費食物,只好問經理拎沙律醋,經理都幾好人,問除咗醋仲要唔要橄欖油,我地話唔使,經理拎咗碟意大利黑醋(Balsamic Vinegar)比我地,蘸海鮮沙律吃不是太夾但還可以。繼續攻即切風乾火腿。


見大家都勁讚海鮮周打湯,我又試返碗先。味道真係超讚,勁Creamy,真係想飲多幾碗!

聽貓兄說,芝麻菜完全無味。


已經不知第幾Round了。

Waitress問我地要咩果汁,我地以為Semi-Buffet包果汁或茶,3位淑女要了果汁,我要了熱檸茶,點知尾聲又來問要咩咖啡/茶,搞到我要掉返轉頭,食飽晒先飲果汁。生果有Refill但好單薄,尾聲係無晒士多啤梨、特大藍莓、超甜菠蘿同西瓜,建議大家早點取定放係位慢慢嘆。


食食吓,有Waitress捧著一盤榴槤布丁逐枱問要唔要試下,個樣真係堅唔得,但咬一啖,嘩,我暈啦~合埋眼無論口感同味道都真係好似食緊「濕包」咁,重口味到呢,唔係好甜但係好香,咬到脆脆餅底至會清醒過來,天呀,好好好味呀,1粒太少喇!


11:45AM入座,1:10PM先上主菜,足足個半鐘,耐到無朋友! 好彩,食Semi-buffet的頭盤及甜品都有夠忙。Main Course 4選1,龍蝦怪見到有龍蝦,話知你咩膽固醇著晒紅燈吖,一樣照食,過2日先去醫生度懺悔。龍蝦肉緊緻有彈性,鮮中帶鹹,味道不俗,幹掉半隻龍蝦即刻覺得幾抵食。墨魚汁好稀唔Creamy,意大利米又唔夠軟腍,食2啖無食,免得浪費Quota。伴碟的芝麻菜終於有芝麻菜強烈的味道。


「每人限1件」的蛋糕櫃蛋糕... 賣相精美,味道一絕(除咗士多啤梨欖油蛋糕),如果可以任食,一定食返10件8件。

士多啤梨欖油蛋糕-1個讚!4件之中,賣相最可愛,味覺上最無沖擊,味道不差,只是其他3件太出色。
綠茶朱古力蛋糕-3個讚!賣相第2精美,味覺沖擊度中等,軟綿的綠茶海綿蛋糕、甘苦的抺茶忌廉、濃甜的朱古力忌廉,加起來已經很強,每嚐一口也夾雜著脆米的沖擊,口感豐富,味道多變相容。
榴槤芝士蛋糕-6個讚!榴槤精靈假扮純情少女,披著白色婚妙帶上金箔做的皇冠,賣相騙得到人,只要輕輕咬一口,包保你打著心裡面“嘩”出來,果股濃烈的氣味,濕淋淋的口感,OMG,點可以做到真的濕包一樣,可以切開10份8份慢慢嗒真D,好襟食。



海鹽焦糖蛋糕-9個讚!成班友不斷對呢件Cake評頭品足,寫食評咁,表層都係甜無咩特別,內裡咬到果仁脆脆先係亮點,話咩好多層次咁話。其實個樣完本無咩特別,但加咗小禮帽又幾可愛,味道同口感都似“樂+杏仁糖”,但佢脆D輕D,的確係一絕,一致好評。


南瓜湯稀溜溜,味道不差,被美味的海鮮周打湯狠狠比下去。


食物質數中上,用料不俗,貴精不貴多。客人有禮,沒有出現搶清光情況,大家的交談聲浪亦低,營造了寧靜悠閒的氣氛。

服務方面,收碟明顯慢,經理態度OK,服務員可能是實習學生,與客人溝通不多,有進步空間。

飯後逛一會DFS,再返回The Market門外的梳化坐下傾下計,一傾就7點幾,好似仲有講不盡的話題,仲約定下次再去擦餐勁。

活在平行時空,左手減肥,右手暴肥(Buffet),Work嗎?

今餐食得太飽,之後24小時都無進食。


是次每人消費約 $360 元
味道: 4 環境: 4 服務: 3 衛生: 4 抵食:2
###
地址 : 尖沙咀科學館道17號唯港薈地下
電話 : 3400 1388

5 則留言:

  1. 好友´*♦☁早晨&午安☀・゚☼・゚

    回覆刪除
  2. $360/都ok,食物都幾好呀,
    食評哩啲嘢,只可參考下,通常我會致電餐廳,
    問清楚食物款式種類,睇下是否啱食,
    任食蛋糕,我就無福消受@@

    回覆刪除
    回覆
    1. 有半隻龍蝦我覺得OK抵食o架,我無期望所以無失望,我朋友就慘D~

      刪除
  3. $360/都ok,食物都幾好呀,
    食評哩啲嘢,只可參考下,通常我會致電餐廳,
    問清楚食物款式種類,睇下是否啱食,
    任食蛋糕,我就無福消受@@

    回覆刪除