網頁清單

2011年7月19日 星期二

終於成功回收玻璃樽啦!!!


16 July 2011, Saturday


一月中果陣, 環保署宣佈係6個公屋試驗12個月回收玻璃樽, 當時鬼咁興奮, 一心諗住好快可以清咗屋企D堆積如山嘅玻璃樽...


點知等到頸都長, 都仲未有新消息...


轉眼都已經過咗6個月, D玻璃樽依然堆積如山, 唉...


上個月又發現其他團體都開始回收玻璃樽...


其中一個係香港泥頭車司機協會嘅「玻璃再生璀璨」項目, 雖然包括太古城, 可惜只限屋苑居民, 激死, 俗語話近廚得食, 但係我咁近太古城都唔可以拎D玻璃樽去回收...


除咗太古城, 就要去到灣仔盧押道垃圾收集站(近修頓球場), 好遠呀, 同埋佢一星期得2日會回收, 仲要係朝早, 我驚搬完D玻璃磚去到, 佢地收咗檔, 我都唔知點算... 所以一直未有行動...


今日終於諗到籍口去灣仔, 臨出發之前, 再上網Check真D先... 呀)))))) 魚則魚涌終於有公眾回收點啦!!!!!! 仲要係英皇道東匯中心, 近好多呀!!!!!!


雖然未至於方便到係屋企樓下咁, 但係已經好過灣仔好多啦...


我今日已經成功回收咗10個玻璃樽啦, 下星期六要再拎多D玻璃樽去回收先得...


呵呵呵呵... 我個廚房好快就可以展示「零玻璃樽」嘅美態啦!!!!!!


### 回收機構小檔案 ###


環保署及房委會の「玻璃樽回收試驗計劃」(Glass Bottles Pilot Recycling Programme)


http://www.info.gov.hk/gia/general/201101/15/P201101140099.htm


環保署及房委會合作, 係2011年1月15日推行「玻璃樽回收試驗計劃」, 為期十二個月, 佢地係6個公屋設立回收點, 包括彩盈村、順利村、順安村、順天村、牛頭角上村及油麗村...


香港泥頭車司機協會の「玻璃再生璀璨」(Green Glass Green)


http://www.greenglass.org.hk/


香港泥頭車司機協會係環境及自然保育基金資助下, 係2010年9月展開「玻璃再生璀璨」項目, 佢地係灣仔盧押道垃圾收集站(近修頓球場)及太古12個屋苑設立回收點, 包括太古城(只限屋苑居民)...


匡智會の「玻璃樽回收行動」(Glass Bottle Recycling Campaign)


http://www.hcfc.org.hk/gbrc/b5_points.php


匡智會係馬會慈善信託基金捐助下, 係2010年4月20日展開「玻璃樽回收行動」, 佢地係全港設立65個回收點, 包括匡智服務單位、公眾回收點、私人屋苑、商業機構、非牟利機構...


3 則留言:

  1. 好環保!讚!
    [版主回覆07/21/2011 16:25:00]Yeah~

    回覆刪除
  2. 我左諗右諗都諗唔到你有啲咩樽…頂多都係豉油樽,一年一枝都用唔晒啦!你可來咁多?!
    [版主回覆07/21/2011 17:38:00]意大利有氣鑛泉水, 日本蘋果汁, 意大利黑醋, 意大利意粉醬, 紅酒, 利賓納, 黑橄欖, 青橄欖, 北海道牛奶布甸, 蠔油, 浙醋, 醃菜, ...
    仲有其他, 不能盡錄...

    回覆刪除
  3. icic,你留返起啲布甸樽啦,好有用!
    [版主回覆07/22/2011 13:38:00]布甸樽好Kawaii, 我都唔係好捨得拎去回收~

    回覆刪除