網頁清單

2015年10月6日 星期二

喜來稀肉 Seorae : 中伏中到心服口服!!! 排長龍+有口碑絕不代表美味

23 September 2015, Wednesday

一間餐廳, 夠膽唔比客人訂位, 要客人係門口排隊Walk-in, 唔齊人唔比入座, 仲要限時90分鐘... 對自己咁有信心, 出品一定好掂啦... 如果你咁諗就錯喇!!!

一間餐廳, 好多人食過都話好食, 包括你朋友的親戚朋友, Viral Marketing喎, 無理由唔掂啦... 如果你咁諗就錯喇!!!

2個小錯加埋, 等於1個大錯... 今晚... 我地就4個人1條心齊齊錯啦~~~


尋日開始2隻手掌過敏出咗成千蚊水泡, 理應留在家中休息一下, 不要到處走, 更何況係韓燒... 熱親對手又會狂癢, 傷口唔小心掂到生肉又驚感染... 之但係一早約好咗台山四寶又唔想改期, 唯有硬住頭皮照去... 白色純棉手套都帶埋係身...

呵呵... 今晚我食殘廢餐... 哀求大家幫我燒埋, 無人反對... (貓兄話燒無問題, 不過唔夾比我食之嘛)

網上講到條龍好誇張, 嚇到我準時收工飛奔去尖沙咀做排隊黨... 6:30PM去到, 樓下有十幾人等緊, 如果我地人齊就可以直入... 可惜貓兄同KaKaMa都未到, 我同龍媽坐陣吹下水講下我考車肥佬經過...

結果... 要OT的貓兄都到咗, 我未過到海已經話自己上咗車的KaKaMa都未到, 仲打電話來問路... 喂呀, 上次咪來過呢條街囉, 咁都可以唔識來?!! 今時今日有Google Map仲學人問路, 你係我地4個次中第1個轉Smart Phone喎當年, 今日攪咩呀?!!

貓兄好醒目地問職員, 其實未齊人係咪都入得?!! 只係限時90分鐘... 職員竟然答係, 仲即時比我地上樓... 勁!!! 我地剛坐低KaKaMa就現身, 原本仲打算Order好晒食物, 等佢一坐低就有得食...

職員帶我地去樓梯旁的枱, 旁邊放了電風扇, 其實全場得一把, 亳無戒心嘅我地, 完全無意識到佢存在嘅背後原因, 坐低咗就知死喇... 我近路邊都仲好少少, 間中有少少風, 貓兄坐埋邊全程熱到死下死下...


座椅下有暗格可放隨身物品... 餐具都放在枱邊的抽屜內... 水都係自己斟... 想找店員下單一點也不簡單... 企晒係樓梯口傾計, 得返1個女仔團團轉, 叫極都無人過來...


前菜只有辣到爆泡菜... 同埋生菜包, 生洋蔥, 同埋一堆野菜, 都係生的, 不敢踫... 醬料有辣椒醬、麵豉醬、豉油... 貓兄試咗辣椒醬話勁辣, 但無辣椒香味...


未坐低已經開咗爐, 有舊好唔新鮮嘅肥膏係爐上燒到出緊油... 爐邊蛋亦開始烤緊...


大家飲緊韓國啤酒同可樂嘅時候, 我走去飲果汁... 味道都幾好, 桃味濃, 但過甜... 估唔到咁大份量, 不過貓兄話價錢比起汽水都貴好多, Sorry, 我無睇清楚... 呢支桃汁糖分超爆標, 好驚, 結果我迫佢地3個試飲, 幫我分擔下, 哈哈...


後面枱有張圖講解豬肉嘅各個部位... 其他部位都食過, 護心肉就連聽都未聽過, Must Try啦~


部Sony Z1有時又影得好好, 搞到我而家好多時都懶得拎部Sony RX100出來食飯, 不過今晚部手機又唔係好掂, 真係比佢玩死...

喜來烤肉 $130
-- 將薄切牛肉捲成花之卷的形狀, 是有心思, 可惜入口欠缺牛味, 未能令我們為它加分...


護心肉 $150
-- 賣相有點兒... 可算是沒有賣相吧... 第一次食護心肉, 肉質很彈牙, 本是很讚, 可惜沒有什麼肉味, 合上眼的話真不知自己在吃什麼...


五花肉 $110
-- 以五花肉來講, 算是瘦了一點, 但還可以的... 烤熟了之後, 金黃色是有的, 可惜甘香肉味欠奉...


蔥餅 $80
-- 後加的蔥餅是全晚比較好味的... 又薄又脆, 蔥很多, 幾香口...


炒年糕 $68
-- 年糕Q韌, 對我來講很辣, 香味不足, 配料亦不出色...



免費Refill的爐邊蛋一點也不好吃, 不論是有泡菜的還是無泡菜的口味...


限食90分鐘, 理應食到趕頭趕命... 我地食咗60分鐘, 已經無Mood再加Order, 急急腳走人轉場食甜品...

網上的人點可能會話佢好食嘅呢?!! 又有口碑又有人龍, 我地今次真係中伏中到心服口服...

大家即刻好賤咁話 : 果D人一定係未食過好o野... 嘩咔咔咔... (真的, 就算米芝蓮3星又如何, 個個讚好味我都可以中伏的)

食到笑唔出的一頓生日飯, 你有興趣試試嗎?!!

是次每人消費約$185元
味道: 3 環境: 2 服務:2 衛生: 3 抵食: 3
###
地址 : 尖沙咀金巴利道79-81號金栢閣1樓連地下
電話 : 27236692



笑料一則... 龍媽想去佐敦食宏, 貓兄反對...

去到The One, 中村藤吉又收8點... 去咗一間新開的日本甜品店, 點知原來係宏, 仲貴佐敦總店10蚊... 命運弄人...




宏的甜品永遠都係咁美味...

4 則留言:

  1. 我覺得個甜品才是最吸引^_^

    回覆刪除
  2. 聽妳咁講,食物同埋服務都好有問題,
    哩間韓燒又唔喺放題都限時@@好把閉咁(><)
    通常人龍店都唔會去,本身無乜耐性◎◎

    回覆刪除
    回覆
    1. 有問題都有人龍果下先係問題 XD

      刪除