網頁清單

2014年6月8日 星期日

印尼餐廳 Indonesia Restaurant : 味道一般般

2 May 2014, Friday

上月初台山四寶先出過來領取貓兄的沖繩手信, 話咁快今日就輪到我出來派手信, 時間真係過得好快...

上次去韓國街食完秀韓國餐館, 比KaKaMa發現樽裝香蕉奶同士多啤梨奶, 今晚佢又話要補貨, 所以地點一定要近韓國街... 就係咁, 揀咗呢間印尼餐廳...

我抽著幾KG的手信, 緩緩步至餐廳, 竟然仲要我行1層樓梯, 過份吖... 好彩即刻有位坐, 否則我對手一定會斷開... 今日又係我最早到, 唔打緊, 影吓相先...


因為手信太重, 唔想再帶相機增加負擔, 就用Sony Xperia Z1影住先... 店內環境異常陰暗, 加上食物賣相不吸引, 無心機影, 相片質數奇差...

大把卡位都唔比我地... 可惡!!!


餐牌與桌布...


~~~ 時隔1個月先寫呢篇Blog, 記憶已有點模糊, 哈哈 ~~~

煎粟米餅 $60
-- 其貌不揚之最 x 美味之最!!! KaKaMa真係好鐘意食炸o野, 第一樣就叫煎粟米餅, 當時我心中暗忖 : 何解妳咁鐘意食炸o野, 好熱氣好油好肥... 煎粟米餅上桌時醜得離奇更讓我厭惡它,誰知咬了一口, 嘩!!! 好味到吖!!! 香酥鬆脆, 熱辣辣, 嗦嗦聲2啖食完... 死喇, 希望我唔會從此愛上食炸o野, 否則身形肯定4級跳!!! (現在已肥到屎)


印尼香炸雞翼 $70
-- 嘩?!! 又炸o野, 妳想點呀?!! 炸雞翼乾了小小, 味道無乜特別...


加多加多 (印尼沙律) $80
-- 賣相嚇人到不得之了!!! 蝦片唔脆, 已沒心機... 蔬菜一向唔係我杯茶, 不太喜歡...


羊/豬肉沙爹 (半打) $86
-- 燒得焦香的沙爹, 肉質不乾硬, 蘸上大量香甜沙爹醬, Yummy!!!  


印尼炒米粉 $78
-- 作為一個炒米粉痴, 要遇上讓我吃一口已不想再吃的炒米粉, 是頗有難度的... 點講好呢, 淡囉, 料只係鋪面都唔係撈埋一齊... 個賣相唔掂就緊o架啦...


咖喱牛腩 $82
-- 食咖喱蘸薄餅是常識吧?!! Sorry, 呢度無薄餅... 個咖喱汁好稀, 睇樣都知麻麻地, 唔想撈白飯, 結果齋食...


珍多冰 $35
-- 小時候到雍雅山房飲過珍多冰, 童年的記憶烙印於腦袋深深處, 讓我今天不顧一切喝下呢杯珍多冰... 其實呢... 珍多冰一向都唔好飲嘅, 因為有我最憎的椰子味, 仲要冒肚仔痛的危機, 都係童年回憶作祟...


4個人食咗$800, 覺得有點不值... 服務一般般, 味道一般般, 賣相驚嚇, 環境讓我有點擔心會身痕, 好彩最後無事...

若不是到處都Full Booking而呢度仲有得Book位, 真係唔會來囉...

不過今晚都幾開心, 除咗一班死黨都幾滿意我送的手信, 我地仲影咗張自拍晚餐合照Whatsapp比今日生日的無敵, Caption係我地食緊佢餐生日飯, 超抵死, Wakakaka... 無敵, 見到此Blog的話, 唔該你組織一下5月之星生日宴...


是次每人消費約 $200 元
味道: 3 環境: 3 服務: 3 衛生: 3 抵食: 3
###
地址 : 尖沙咀加連威老道66號1-2樓
電話 : 2367 3287

沒有留言:

張貼留言